Read Nomaande 1Kɔ 7 Bible Online

1Kɔ 7 - Nomaande bible

1Kɔ 7

¹Aámbáya, míɔ cɔba yámɛ bɛ́kámáka ɛmbataka acɛ́ nu ŋa nɔ́ mɛ batáka eenú e nufule : Bú ŋa hɔ́la ɔhɛka anyía ɔnɔ́mɔcɔ́ tí bítíse oónjú.

²Mbá ta híáná, yááŋa ambányɛ yɛ́ asana anyía ɔnɔ́mɔcɔ́ okime á bátɛ́na oónjú ; oónjú okime ɔ́ tɔ́nɛ́na ɔnɔ́mɔcɔ́ ɔ ɔkɛla anyía wá sámbáka ɛnjɔkɔ́nɔ́nɔ.

³Ɔnɔ́mɔcɔ́ okime é nyióyísíkínyinyi oónyí *bikotí bɛ́ nyɛtɔ́nɔ́ ; híáná oónjú á nyɛmana wu onyíóyísíkínyinyi tɔ́na ɔnɔ́mɛ bikotí bɛ́ nyɛtɔ́nɔ́.

⁴Yááŋa anyía cɛɛ́tɔ cɛ ɔnɔ́mɛ ti ŋe wuúci bɛ́lɔ́kɔ́mɛ́na, mbá oónyí. Híáná cɛɛ́tɔ ci oónyí ti ŋé wuúci bɛ́lɔ́kɔ́mɛ́na, mbá ɔnɔ́mɛ.

⁵Ɛ́ɛhɛ́ nuti túmékéne elime aná a nyɛfianɛna, ɛ tɛ ŋáa bá hú anyía nu ŋa nɔ́ lɔ́kɔ́mána e ekéti yí ekúlú ɔ ɔkɛla anyía núénú bíínjíé ɔ ɔbɛ́cɔ́kɔ́lɛ́na Bandɔ́mɛsɛ́. Mbá e elime eécí, ánɔ hálɔ́mɔ́na o olimine háyɛ ɛ naŋa nuanɔ́ bá buáyá anyía nu tɛ anɔ́ bá nú oweéhínyínyi ɔlɔbɔ aáná. Mbɔ́kɔ nu ŋa nɔ́ kɛla aáná, *Sátan tɛ kɔ́ɔ́ bɔ́ŋɔ ohónyí wú ɔ banɔ́ kɔ́kɔnaka.

⁶Mbɔ́kɔ ɛ ŋaá mɛ táŋa aáná, tɛ́ cáŋa anyía ɛ ŋa mɛ́ banɔ́ eékínyi ; mbá mbɔ́kɔ nu ŋe nú léne ɔkɛla aáná, yááŋa ambányɛ yɛ́ asana.

⁷Aá yaŋɔ́, keyé ɔɔcɔ okime áŋa wu olimine háyɛ yaŋɔ́, mbá ɔɔcɔ okime áŋa na nyíáyɛ́ nyɛbá anyɛ́ Bandɔ́mɛsɛ́ ŋeé wuúci iínjíé : Ooci aáná, ooci a wɔmɔtɛ́ enenyíé.

⁸Mbá, ɛ ŋa mɛ́ aamba yáaŋa ɔlaana ɛlɛmba cɛ́ baacɔ ne bisíké anyía búáŋa bɔmbányɛ o olimine bímuócí háyɛ yaŋɔ́.

⁹Mbá ta híáná, mbɔ́kɔ bá tɛ ábɔ́ bá bé oweéhínyínyi olimekine aáná, bá bátɛ́ákɛ́na, bɔ́ tɔ́nɔ́kɔ, anyía bú ŋa hɔ́la ɔhɛka anyía bá bátɛ́ákɛ́na, bá tɔ́nɔ́kɔ na anyía bébú wéékúne na ɔtɛ́má a tɔɔna.

¹⁰A aháŋá ne belumitinine a bá ma bɔ́ tɔ́nɔ́nɔ, i ŋe mi beébe oókísi, tɛ́ cáŋa yaŋɔ́ mbá Otéŋí a Waáŋá, anyíaʼo, oónjú tɛ́ bɛ́yúáta ɔnɔ́mɛ.[22]

¹¹Mbɔ́kɔ yɛ́ ŋá háma anyía wá bɛ́yúáta ɔnɔ́mɛ, yááŋa ambányɛ yɛ́ asana anyía wé limíne bímuócí ta anyía bá bɛ́tábɔ́náka ne uuyé ɔnɔ́mɛ. I ŋeé mi óókísi tɔ́na ɔnɔ́mɔcɔ́ okime anyía u ti kine oónyí.

¹²A aháŋá na ɔtɔ́nɔ́ cá baacɔ bé etémbí, yaŋɔ́, ɛ ŋa mɛ́ kɔɔna, tɛ́ cáŋa Otéŋí a Waáŋá, ɛsɛ́ : Mbɔ́kɔ mulumitinine *Kilís áŋa ne oónjú ewú u ti ŋé lumitíníne, mbá oónjú oócí é lumitine ɔcɔba ne buúse o olimine ne muúmu, mulumitinine eémú tɛ mɔ́ nyɛmana mu o wuúci kine.

¹³Híáná tɔ́na, mulumitinine Kilís e muénjú amɔ́ ɔnɔ́mɛ ti ŋéé límitinine, mbá ɔnɔ́mɛ oócí lúmitine ɔ cɔba ne buúse o olimine ne muúmu, oónjú oócí tɛ ɔ́mɔ nyɛ́mana wu o wuúci bɛ́yúata.

¹⁴Yááŋa anyía Bandɔ́mɛsɛ́ ŋee fúúmínyi ɔnɔ́mɛ ewú u tí ŋé lúmitinine a asana na nyíáyɛ́ nyɛtɔ́nɔ́ ne oónyí ewú u ŋe lúmitinine. Híáná u ŋee fúúmínyi tɔ́na oónyí ewú u tí ŋé lúmitinine a asana na nyíáyɛ́ nyɛtɔ́nɔ́ na ɔnɔ́mɛ ewú u ŋe lumitinine. Mbɔ́kɔ tɛ́ cáŋa aáná, keyé báábɔ́ baáná tɛ ká bɔ́ bá befúúménénú eeyé eé buúse, yiíyi anyía bá búáŋa befúúménénú.

¹⁵Mbá, mbɔ́kɔ ɔmɔtɛ́ e bífendí eébí awɔ́ u tɛ á bá mulumitinine Kilís ŋa yaamba ɔbɛ́álɔ́na na sɔ́ɔ́kɔ́ ewú u ŋe lúmitinine, wá kɛla háyɛ u ŋeé léne ; wa yáaŋa a ciayɛ́ciayɛ́. Yááŋa anyía Bandɔ́mɛsɛ́ ŋaá banɔ́ lɔ́ŋɔ́kɔ anyía nuénú líhéke e mbuumu.

¹⁶Kuɔŋɔ́ oónjú, mulumitinine Kilís, o ti ŋó menyi mbɔ́kɔ kuɔŋɔ́ ɔ ɔ́ŋa wu onohi uuwu ɔnɔ́mɛ. Híáná, kuɔŋɔ́ ɔnɔ́mɔcɔ́, mulumitinine Kilís, o ti ŋó menyi mbɔ́kɔ kuɔŋɔ́ ɔ ɔ́ŋa wu onohi uuwu oónyí.

¹⁷Asana ɔ́mɔtɛ́, ɔɔcɔ okime é líhéke a nyɛbá anyɛ́ u ŋaá bá ne nyiínyi ekúlú ayɛ́ Bandɔ́mɛsɛ́ ŋeé wuúci lɔ́ŋɛ́tá. Indélímínyínyi eécí i ŋe húlé émi eékúnyi bɛhaála bikime, aá tuɔ́bɔ tú belumitinine tukime.

¹⁸Túá kɔɔ́na anyía Bandɔ́mɛsɛ́ ŋɔ yɔ́ɔ lɔ́ŋɔ́kɔ́, kuɔŋɔ́ ɔbɛ́ácánɔ́ ; atɛ bɛ́námba anyía ɔ ɔ́ŋa ɔbɛ́ácánɔ́. Mbɔ́kɔ u ŋɔ yɔ́ɔ lɔ́ŋɛ́ta, kuɔŋɔ́ iindú, atɛ bɛ́áca aná.

¹⁹Ta kuɔŋɔ́ ɔbɛ́ácánɔ́, ta kuɔŋɔ́ iindú, bú tɛ ŋɔ́ yɔ́ɔ́lɔ ta bɔkɔ buúse bukime. Bɔkɔ a bɔ́ ŋɔ yɔ́ɔlɔ ɔ ɔhɔla áŋa hú anyía ɔ́ɔ látákɛ́na *bikotí bɛ́ Bandɔ́mɛsɛ́.

²⁰Ɛ́ɛhɛ́ ɔɔcɔ okime é limíne a nyɛbá anyɛ́ u ŋaá bá ne nyiínyi ekúlú ayɛ́ Bandɔ́mɛsɛ́ ŋeé wuúci lɔ́ŋɛ́tá.

²¹Túá kɔɔ́na anyía Bandɔ́mɛsɛ́ ŋɔ yɔ́ɔ lɔ́ŋɔ́kɔ́, kuɔŋɔ́ ɔ buɔ́lɛ́;[23] bú tí o yébíki. Mbá, mbɔ́kɔ ɔ ɔ́ŋa ne ohónyí wú ɔbɛ́háŋɔ́náka, bɛ́kɛ́ndɛ́na aná ! [24]

²²Yááŋa anyía yɔɔ́lɛ́ eyí Otéŋí a Waáŋá ɔ́ lɔ́ŋɛ́ta tɛ a bá tɔ́na a buɔ́lɛ́. Yá yáaŋa a ciayɛ́ciayɛ́, yɛ́ bɛ́lɔ́kɔ́mákɛ́na Otéŋí. Híáná ɔɔcɔ ewú Otéŋí a Waáŋá ɔ́ lɔ́ŋɛ́ta wuúci tɛ́ka a buɔ́lɛ́ á yáaŋa yɔɔ́lɛ́ yí *Kilís.

²³Nɔtɛ bɛ́hɔ́ya anyía Bandɔ́mɛsɛ́ ŋaá bɛ́cáŋgɛ́na buéŋí ɔ ɔ banɔ́ háŋɔ́náka. Ɛ́ɛhɛ́ nu tɛ ɔ́mɔ́ nɔ́ nyɛ́mana nú ɔ háná bɛ́cáŋáka bɛɔ́lɛ́ bɛ́ baacɔ.

²⁴Ɛ́ɛhɛ́ aná, baláamɛ, ɔɔcɔ okime é limíne a nyɛbá anyɛ́ u ŋaá bá ne nyiínyi ekúlú ayɛ́ Bandɔ́mɛsɛ́ ŋeé wuúci lɔ́ŋɛ́tá.

²⁵Ánɔ lɔ́kɔ́ma asana yɛ́ ɛlɛmba cɛ́ baacɔ : Ɛ tɛ ámɛ bá ne indélímínyínyi a cɛmɔtɛ́ e cí ŋé húle né Otéŋí a Waáŋá, mbá, ɛ ŋa mɛ́ aamba yáaŋa ɔ banɔ́ laana nyiámɛ nyɛbɛ́táá. Nu ŋá nɔ́ nyɛ́mana nú o nyiínyi lɔ́kɔ́mɛ́na anyía a ambányɛ yɛ́ ɔtɛ́má yí Otéŋí a Waáŋá ya mɛ́ŋa ɔɔcɔ awɔ́ bááŋa bá ɔháya mɔŋɔlɛ́.

²⁶Ambányɛ yɛ́ asana ayɛ́ ɛ ŋa mɛ́ lɛca áŋa anyía : Háyɛ muuyé áŋa muéŋí e bikúlú eebi, ɔɔcɔ okime ŋá nyɛmána wu olimine aayá a nyɛbá anyɛ́ u naŋa waá bá eé nyiínyi.

²⁷Mbɔ́kɔ ɔ ɔ́ŋa ɔbátɛ́nánɔ́ oónjú, eti wuúci kine ; mbá, mbɔ́kɔ ɔ ɔ́ŋa ɛlɛmba, atɛ bátɛ́na.

²⁸Ta híáná, mbɔ́kɔ ɔ ɔ́ŋa ɔbátɛ́nánɔ́, bú tɛ á bá bɔɔbɛ́. Ɔbɔ́la ɔ́ tɔ́nɔ́, u tɛ ŋá kɛla bɔɔbɛ́ tɔ́na. Énu menyí anyía baacɔ a bábɔ́ tɔ́nɔ́nɔ ŋa bɔ́ lɛca muuyé muéŋí ɔ ɔhɔla. Ɛ́ɛhɛ́ ɛ ŋa mɛ́ aamba anyía mu tɛ banɔ́ bítíse.

²⁹Baláamɛ, ɛ ŋa mɛ́ banɔ́ laana isíʼo : Ekúlú á yáaŋa ekúti a nyɛnamá anyɛ́ anyía, o otúme aámbáya, baacɔ a bá bɔ́ŋa babátɛ́ákɛ́nánɔ́ beénjú é líhéke háyɛ baacɔ a bá bɔ́ŋa ɛlɛmba ;

³⁰eebe a bá ŋa bɔ́ lɛ́la háyɛ eebe a bá tɛ ŋá bɔ́ lɛ́la ; eebe e bé ŋe bú bíléne háyɛ e bé ti ŋé bú bíléne ; eebe a bá ŋa bɔ́ ɔ́ɔ́ndɔ líhéke háyɛ a bá tɛ́ ŋá bɔ́ bɔ́ŋɔ bɔkɔ.

³¹Ɛ ŋa mɛ́ aamba ɔsɔ́mba ɔtáŋa okúti anyía baacɔ abá bɛsana bɛ́ ɔmɛsɛ́ ooci ŋé beébe hámɛ́na ɛ ɛtɛ́má ábɔ́ ááŋɛ́áka ɛtɛ́má e biíbi ; yááŋa anyía ɔmɛsɛ́ ooci á yáaŋa hoóhi na ɔmana.

³²Ɛ ŋa mɛ́ aamba yáaŋa ɔ banɔ́ laana anyía núánɔ́ bá tɛ́ka na bɛsana a bɛ́ ŋaá banɔ́ nyíá ɛtɛ́má. Ɛlɛmba cɛ ɔɔcɔ áŋa na ɛcaná hú cɛ bɛsana a bɛ́ ŋa lɛ́ca Otéŋí a Waáŋá, anyía u ŋeé léne o wuúci bíléníne.

³³Mbá ɔɔcɔ a wáŋa ɔbátɛ́nánɔ́ áŋa na ɛcaná hú cɛ bɛsana a bɛ́ ŋa lɛ́ca ɔmɛsɛ́ ooci, anyía wé bílénékíne oónyí,

³⁴aáná ú ma bɛ́áfána ne oónyí na Bandɔ́mɛsɛ́. Híáná tɔ́na, na babɔ́la ne indíkíné cí beénjú a bá tɛ ábɔ́ bá ɔ ɔtɔ́nɔ́ á bɔ́ŋa na ɛcaná hú cɛ bɛsana a bɛ́ ŋa lɛ́ca Otéŋí a Waáŋá anyía bébú wuúci bílénékíne, bó wuúci iínjie ne cííbú ɛtɛ́má na bíábɔ́ bililé. Oónjú u nyɛtɔ́nɔ́ áŋa na ɛcaná hú cɛ bɛsana a bɛ́ ŋa lɛ́ca ɔmɛsɛ́ ooci, anyía wé bílénékíne ɔnɔ́mɛ.

³⁵Ɛ ŋa mɛ́ kɔɔna aáná a búánɔ́ bɔmbányɛ bɔ́ bɛ́muátá, tɛ́ cáŋa ɔ ɔ banɔ́ kúfítínyí ; mbá ɔ ɔ banɔ́ kɛ́láka bɛmbányɛ bɛ́ bɛsana i iŋetí ci eebe a bá bɔ́ŋa balatánɔ́ e nyimónjóló na ɔtɛ́má okime né Otéŋí a Waáŋá.

³⁶Ánɔ lɔ́kɔ́ma aámbáya asana a yɛ́mɔtɛ́ eeye : Mbɔ́kɔ ɔɔcɔ a wɔmɔtɛ́ ŋeé léne buéŋí yááyɛ́ ɔkɔŋɛna, mbá u tɛ aamba o yiíyi fiananana o ooki ú síkíne anyía u ŋeé yiíyi kéke, ɔ ɔkɔɔ́háma anyía bé keé yiíyi síke, u tɛ ŋá kɛla bɔɔbɛ́ aáná. Wá kɛláka háyɛ bú ŋeé wuúci bíléníne, bá tɔ́nɔnɔ.[25]

³⁷Mbá ɔɔcɔ á sɔ́mbɔ́tɔ́na e úúyé ɔtɛ́má noómi, tɛ́ka ne yeékínyi a yɛ́mɔtɛ́, anyía u tɛ ŋá bátɛ́ákɛ́na yááyɛ́ ɔkɔŋɛna, wá sɔ́mbɔ́tɔ́na tɔ́na o ti yiíyi fianánána anyía u ŋeé yiíyi kéke, mbɔ́kɔ wáŋa wu obítétényi nyíáyɛ́ nyɛsɔ́mbɔ́tɔ́na eényí, ú ma kɛ́laka bɔmbányɛ. [26]

³⁸Ɛ́ɛhɛ́ ɔɔcɔ awɔ́ á bátɛ́na yááyɛ́ ɔkɔŋɛna ma kɛ́laka ambányɛ yɛ́ asana, na ɔɔcɔ ewú é kine ɔbátɛ́na yááyɛ́ ɔkɔŋɛna ma kɛ́laka ambányɛ yɛ́ asana ɔ ɔhɔla. [27]

³⁹Oónjú u nyɛtɔ́nɔ́ áŋa ne okotí yɛ́ nyɛtɔ́nɔ́ ekúlú ekime eyí ɔnɔ́mɛ a yánaŋa o olíhe, mbá ɔnɔ́mɛ é wé, oónjú oócí áŋa wu ɔkɔtɔ́nɛ́na ɔnɔ́mɔcɔ́ u etémbí ewú u ŋeé léne, ɔnɔ́mɔcɔ́ oócí ŋa nyɛmana wu ɔbá yáaŋa mulumitinine *Kilís.

⁴⁰Asana ɔ́mɔtɛ́, a nyiámɛ nyɛlɛca, bú ŋaá hɔla ɔhɛka ne oónjú oócí anyía wé limíne esíké ; yááŋa anyía ya mɛ́ŋa tɔ́na ne Elilé yɛ́ Bandɔ́mɛsɛ́.