Read Nomaande 2Kɔ 2 Bible Online

2Kɔ 2 - Nomaande bible

2Kɔ 2

¹Aáná ɛ ŋa mɛ́ lɛca bɔmbányɛ anyía ɛ tɛ ká háná ámɛ faaya náánɔ́, keyé ɛ ká háná ámɛ banɔ́ núésíki ɛtɛ́má.[10]

²Mbɔ́kɔ ɛ ŋa mɛ́ banɔ́ núésíki ɛtɛ́má, aányɛ́ u etémbí wáŋa wu o mi iínjítúne obíléne ɔ ɔtɛ́má noómi, ɛ tɛ ŋáa bá hú banɔ́ ebé i ŋe mí nuesi ɛtɛ́má e ? [11]

³Yaátɛ́ asana ɛ ŋa mɛ́ banɔ́ ɔɔ́ŋɔ́kɛ́na nufule eénú[12] aáná, anyía i ti ŋé mi léne ɔ ɔkɔɔ́háma náánɔ́, yámɛ lɔ́kɔ́mákɛ́na baacɔ ɔtɛ́má ɔnua, beébe a bábɔ́ nyɛmána bé o mi iínjíékíne obíléne ɔ ɔtɛ́má. I ŋeé mi bíketi aá taaká anyía ekúlú ekime eyí i ŋeé mi bíléne, banɔ́ bekime tɔ́na nu ŋe nú bíléne.

⁴Yááŋa anyía ɛ ŋa mɛ́ banɔ́ ɔɔ́ŋɔ́kɛ́na nufule eénú na ɔtɛ́má ɔnua weéŋí na bɛlɛlá e eése hú mbiɔ́kɛ, tɛ́ cáŋa anyía yámɛ banɔ́ núésíki ɛtɛ́má, mbá anyía núénú ményi nyɛnamá anyɛ́ ɛ ŋa mɛ́ banɔ́ léne.

⁵Yááŋa háyɛ anyía ɔɔcɔ a wɔmɔtɛ́ ŋaá bá wá banɔ́ núésiki ɔtɛ́má ; tɛ́ cáŋa yaŋɔ́ u ŋeé núésíki ɔtɛ́má, mbá banɔ́ bekime, ta anyía baacɔ a bɔ́mɔtɛ́ náánɔ́ u ŋeé núésíki ɛtɛ́má. Aáná ɛ tɛ ŋá mɛ aamba obeyi asana eéyé.

⁶A nyɛnamá nyɛ́ ɔɔcɔ eényí, nyɛkákálɛ́na enyí bé ŋeé wuúci kákálákɛ́na a yáaŋa nyɛnyɛmánánɔ́.

⁷Yaátɛ́ asana, aámbáya nú ŋa nɔ́ nyɛmána nú o wuúci nyɛanɛnɛna yáaŋa, nuó wuúci kíndísi ɔtɛ́má, anyía mbɔ́kɔ nu tɛ ŋá nɔ́ kɛla aáná, ɔtɛ́má ɔnua kéé wuúci tímbie buéŋí ɔ ɔhɔla, yɔ́ kása buúse bukime.

⁸Ɛ́ɛhɛ́ ɛ ŋa mɛ́ banɔ́ bɛ́cɔ́kɔ́lɛ́na anyía énu wuúci tóŋínyi aná hibílícínyínyí, wá lɛcá anyía nua nuánáŋa o o wuúci léne.

⁹Asana ayɛ́ ɛ ŋaá mɛ banɔ́ ɔɔ́ŋɔ́kɛ́na nufule áŋa anyía yámɛ banɔ́ ɔ́ɔ́kɛ́tɛ́na mbá ɛ lɛca mbɔ́kɔ nú ŋa nɔ́ mɛ lɔ́kɔ́mɛ́na a bɛsana bikime.

¹⁰Núánɔ́ nyɛánɛ́nɛ́na ɔɔcɔ a wɔmɔtɛ́ asana a yaabɛ́, yaŋɔ́ tɔ́na í me mí wuúci nyɛanɛnɛna. Yááŋa anyía yaŋɔ́ ya mɛáŋa ɔnyɛanɛ́nánɔ́ ɔɔcɔ oócí, mbɔ́kɔ wáŋa ɔ mɛ kɛlákánɔ́ asana a yaabɛ́ a yɛ́mɔtɛ́. Ya mɛ́ŋa ɔkɛlákánɔ́ aáná a yáánɔ́ asana eé buúse bú *Kilís,

¹¹anyía *Sátan tɛ bɔ́ŋɔ ohónyí náásɔ́, ananyía tu ŋe sú ményi bɔmbányɛ mááyɛ́ menjiŋé mekime.

¹²Ɛ ŋa mɛ́ hatɔ́na, míɔ cɔba a bálɛ́ka cɛ Tɔlɔwás o okohúlinyi baacɔ Ambányɛ yɛ́ Ɛsɔ́ma yí *Kilís. Ɛŋakɛlá yá kaá mɛ háma hɔ́á, míɔ lɛca anyía Otéŋí a Waáŋá áŋa ɔ mɛ tábɔ́nákɛ́nánɔ́ ohónyí wú ɔnyiɔkɔ buólí hɔ́á.

¹³Mbá úúmi ɔtɛ́má ŋaá bá wá bɛ́nyíáka a asana ayɛ́ ɛ tɛ ɔ́mɔ́ kúana uusú onyíinyí Tite. Yaátɛ́ asana, i ŋeé mi bíósínyí belumitinine bá Tɔlɔwás, mío súéte a Masɛtuán o okoó wuúci aamba.

¹⁴Mbá tú iínjíékíne Síkíne Bandɔ́mɛsɛ́ bitéŋíti anyía ú ma hɔ́lɛ́na né *Kilís, yɔ́ basɔ́ bɛ́nɔ́fa buúse bukime. U ŋaá basɔ́ kéndi bɛhaála bikime o ohulinyi baacɔ Ambányɛ yɛ́ Ɛsɔ́ma yí Kilís. Yááŋa háyɛ ambányɛ yí enumbé yɛ́ ɔsɔŋɔ a yɛ́ maá yáányána haála hekime ananyía baacɔ e menyúkúnyínyi ne Kilís.

¹⁵Yááŋa anyía ekúlú eyí tú ŋe sú húlinyi baacɔ Ambányɛ yɛ́ Ɛsɔ́ma, tua sɔ́ŋa háyɛ ambányɛ yí enumbé yɛ́ ɔsɔŋɔ eyí Kilís ŋeé lúlinyi Bandɔ́mɛsɛ́. Enumbé eéyé áŋa ne eé buúse bɔ́ baacɔ abá Bandɔ́mɛsɛ́ ŋoó nóhi, ne eé buúse bɔ́ baacɔ e bé ŋe bú nyíme haaca na Bandɔ́mɛsɛ́ áyá.

¹⁶A asana na baacɔ abá Bandɔ́mɛsɛ́ ŋoó nóhi, enumbé eéyé áŋa e yí ŋe yiínjíéne olíhe. A asana na baacɔ a bɔ́mɔtɛ́ e bé ŋe bú nyíme, enumbé eéyé áŋa e yí ŋe yiínjíéne owé. Aányɛ́ aná wáŋa wu ɔkɛlaka nyɛnamá nyí buólí háyɛ eényí e ? Ta ɔɔcɔ.

¹⁷Mbá Bandɔ́mɛsɛ́ wuúci ú ŋaá basɔ́ tɔ́mɔ́kɔ́ná ɔ ɔnyiɔ buólí eébú, u basɔ́ kíndísíki o o buúbu nyiɔ. Tu tɛ asɔ́ bá háyɛ baacɔ beéŋí a bɔ́mɔtɛ́ a bá ŋa bɔ́ kɛ́la onduné na Bɛsana bɛ́ Bandɔ́mɛsɛ́. Basɔ́ tu ŋe sú húlínyi baacɔ Bɛsana bɛ́ Bandɔ́mɛsɛ́ yáaŋa na ɔtɛ́má ɔ́mɔtɛ́, Bandɔ́mɛsɛ́ basɔ́ lɛ́caka, anyía tua sɔ́ŋa e nyimónjóló ne Kilís.