Read Nomaande Kol 4 Bible Online

Kol 4 - Nomaande bible

Kol 4

¹Banɔ́, bɔsɔ́ɔ́kɔ́ baáŋá, énu tétényíki bíánɔ́ bɛɔ́lɛ́ bɔmbányɛ háyɛ yɛ́ ŋaá bɛ́ámba, nu bɛ́tááka anyía banɔ́ tɔ́na nua nɔ́ŋa na Waáŋá ɔ Ɔmuaná.

²Ánɔ bɛ́cɔ́kɔ́lɛ́na Bandɔ́mɛsɛ́ bikúlú bikime, ánɔ háya ɔtɛ́má ɔ ɔbɛ́cɔ́kɔ́lɛ́na, nu wuúci íínjíékíne tɔ́na bitéŋíti.

³Ánɔ bɛ́cɔ́kɔ́lɔ́kɛ́na tɔ́na a yáásɔ́ asana, anyía Bandɔ́mɛsɛ́ á basɔ́ tóŋínyi ohónyí wú ohulikinyi baacɔ yááyɛ́ Ambányɛ yɛ́ Ɛsɔ́ma yí Kilís ayɛ́ Bandɔ́mɛsɛ́ ŋa bátɛ́na indiitie. A yaátɛ́ asana yí indiitie eéyé ya mɛ́ŋa eé ciíbe cɛ ɛcaná aámbáya.

⁴Ánɔ bɛ́cɔ́kɔ́lɔ́kɛ́na anyía yémi húlíkínyi baacɔ Ambányɛ yɛ́ Ɛsɔ́ma háyɛ yɛ́ ŋaá bɛ́ámba.

⁵Énu líhéke ne injiŋé ɛ ɛkatɛ́katɛ́ ci be-ti-lumítíníne Kilís, ánɔ aambáka ohónyí wú ohulikinyi be-ti-lumítíníne Ambányɛ yɛ́ Ɛsɔ́ma e bikúlú bikime abɛ́ nuánɔ́ ɔɔ́ndɛ́mánána.

⁶Énu hémúkúnyi ekúlú ekime bɛmbányɛ bí mehúnyi, bí sóomoko ; aáná nu ké búle enú bíhélúmúnyi bɔmbányɛ ɛmbataka cɛ́ ɔɔcɔ okime.

⁷A bɛsana bikime a bɛ́ ŋa mɛ́ lɛca, Tisíke[12] u kéé biíbi banɔ́ láakɛna ; wáŋa uusú onyíinyí u ɔtɛ́má. U ŋɔɔ́ nyiɔ buólí bú Kilís na ɔtɛ́má ɔ́mɔtɛ́ ; wáŋa tɔ́na yáámɛ ekendinyi yí buólí bú Kilís.

⁸Yaátɛ́ asana í me mí wuúci banɔ́ tɔ́mɛ́na anyía wá banɔ́ láákɛ́na anyána tua sɔ́ŋa, yɔ́ banɔ́ hélúmúkúnyi ɛtɛ́má.

⁹Wáŋa ɔlɔŋɔ ne wuúci ne uusú onyíinyí u ɔtɛ́má Onesime[13] ; u ŋa látɛna tɔ́na Kilís na ɔtɛ́má ɔ́mɔtɛ́. U ŋeé húle náánɔ́. Beébe eébé bá ká bɔ́ banɔ́ bíkétíkínyi bɛsana bikime a bɛ́áŋa aáhá.

¹⁰Alisitáak[14] a wáŋa aaha eé ciíbe cɛ ɛcaná na yaŋɔ́ ŋaá banɔ́ téŋi. Malɛ́kus[15], onúséyé u Baanábas[16] ŋaá banɔ́ téŋi tɔ́na. (Mbɔ́kɔ u ŋá fááya náánɔ́, énu wuúci káha bɔmbányɛ, anyía nu ŋe nú ményi aátɛ́ ɛ ŋa mɛ́ banɔ́ éékúnyíki ɔkɛla.)

¹¹Yésus, awɔ́ bɔ́ ŋɔɔ́ lɔ́ŋɔ anyía Yusítus, ŋaá banɔ́ téŋi tɔ́na. Hú bɛ́tátɔ́ bɛ́ baacɔ eébí bɛ́áŋa *Besuif a bá ŋa bɔ́ nyiɔ buólí na yaŋɔ́ aáhá anyía baacɔ é lumítíníne anyía Bandɔ́mɛsɛ́ áŋa Otéŋí a Waáŋá. Bé ŋe bú mi hélúmúnyi ɔtɛ́má.

¹²Ɛbáfas[17] a wáŋa uunú ɔɔcɔ a wɔ́mɔtɛ́, ŋaá banɔ́ téŋi. U ŋɔɔ́ nyiɔ buólí bú Yésus Kilís. Ú meé bíínjíe na makɛ́nda ɔ ɔbɛ́cɔ́kɔ́lɛ́na Bandɔ́mɛsɛ́ eenú eé buúse anyía nuénú lúmitinine na makɛ́nda, nu kɔmaka o ohónyí ú Bandɔ́mɛsɛ́, nu menyukune bɔmbányɛ bɔmbányɛ aátɛ́ Bandɔ́mɛsɛ́ ŋa yáamba anyía nuánɔ́ kɛ́láka.

¹³I ŋe mí menyi bɔmbányɛ anyía u ŋa lɛ́ca muuyé buéŋí e buólí abɔ́ ú ŋɔɔ nyiɔ ne eenú eé buúse, ne eé buúse bú belumitinine bá Lawotisé na bá Híélabolis tɔ́na.

¹⁴Lúkas[18], muasɔ́ muándɛ́na baacɔ mu ɔtɛ́má, ne wuúci na Tɛ́mas[19] ŋa bɔ́ banɔ́ téŋí tɔ́na.

¹⁵Énu mi téŋgínyi belumitinine bekime bá Lawotisé, énu téŋíti tɔ́na oónjú awɔ́ bɔ́ ŋɔ lɔ́ŋɔ anyía Nímfa[20] na hiɔ́bɔ hí belumitinine a hɛ́ náŋa hɛ́a bɛ́bándákána e úúyé ooki.

¹⁶Núánɔ́ fanaka nufule eénú, énu nuúnu tɔ́mɛ́na hiɔ́bɔ hí belumitinine hɛ́ Lawotisé, anyía bábɔ́ fánáka tɔ́na. Belumitinine bá Lawotisé ká bɔ́ banɔ́ tɔ́mɛ́na nufule enú í ŋe mí beébe ɔɔ́ŋɔ́kɛ́na anyía núénú nuúnu fanáka tɔ́na.[21]

¹⁷Nu laana Alésibe anyía wá bɛ́kɛ́ndɛ́na onyíóyísínyi bɔmbányɛ bɔmbányɛ buólí ebú Otéŋí a Waáŋá ŋeé wuúci iínjíé.

¹⁸Yaŋɔ́ Bóol, ɛ́ ŋa mɛ́ banɔ́ ɔɔ́ŋɛ́na bitéŋíti eebi : Ɛ ŋa mɛ́ banɔ́ téŋítíʼo ! Nɔtɛ bɛ́hɔ́ya anyía ya mɛ́ŋa eé ciíbe cɛ ɛcaná. Bandɔ́mɛsɛ́ á banɔ́ sayábákɛ́naʼo ! [22]