Read Nomaande 2Tɛ 1 Bible Online

2Tɛ 1 - Nomaande bible

2Tɛ 1

¹Yaŋɔ́ Bóol, ɛ ŋá mɛ ɔ́ɔ́ŋɔ nufule eenu. Tua sɔ́ŋa ne Sílas ne Timoté. Tu ŋa sɔ́ banɔ́ ɔ́ɔ́ŋɛ́na nufule eenu, banɔ́ hiɔ́bɔ hí belumitinine *Yésus a hɛ́áŋa a bálɛ́ka cɛ Tɛsaloníke. Nua nɔ́ŋa baacɔ bá na ciasɔ́ Síkíne *Bandɔ́mɛsɛ́ ne Otéŋí a Waáŋá Yésus *Kilís.

²Ne Síkíne Bandɔ́mɛsɛ́ ne Otéŋí a Waáŋá Yésus Kilís bá banɔ́ sáyábɛ́na, bá banɔ́ háya mbuumu ɛ ɛtɛ́má noómi.

³Banɔ́ báásɔ́ benyíinyí, tu ŋá sɔ́ nyɛ́mana tú owiínjíékíne Bandɔ́mɛsɛ́ bitéŋíti a yáánɔ́ asana ekúlú ekime, tu tɛ tɔmbɔ. Búáŋa bɔmbányɛ anyía túásɔ́ kɛ́láka aáná, ananyía úúnú olumitinine ŋa kɔ́ma buéŋí. Híáná tɔ́na, nulénéne enú nu ŋe nú lénene banɔ́ na banɔ́ ŋe bísólínyi mɔɔ́sɛ́ mekime.

⁴Yaátɛ́ asana ekúlú ayɛ́ tua sɔ́ŋa eé buúse bú tuɔ́bɔ tú belumitinine Yésus tú etémbí, tu ŋe sú beébe bíkétínyi yáánɔ́ asana na bɔɔcɔ bukime, anyía nu me nú tímbie olumitinine na makɛ́nda mekime ta yɛ́ cáŋa á bá anyía baacɔ ŋa bɔ́ banɔ́ tékése ne muuyé.

⁵Bú ŋo tóŋínyi bɔmbányɛ bɔmbányɛ anyía Bandɔ́mɛsɛ́ kéé kélísíki baacɔ. Nyíáyɛ́ nyikélísi nyɛ́ bɛsana káá bá nyɛtálɛ́mánánɔ́. Ayɛ́ nú ŋe nú ééhínyínyi muuyé aáná, Bandɔ́mɛsɛ́ káá kɛ́la anyía núánɔ́ bámɔ́kɔ́nɛ́na banyɛmánánɔ́ o owoofokine a búáyɛ́ Butéŋí. A asana ne Butéŋí eébú nu ŋa nɔ́ lɔ́kɔ́ma muuyé.

⁶Ɛ́ɛ, Bandɔ́mɛsɛ́ áŋa ɔtálɛ́mánánɔ́ ; u kéé hélúmúkúnyínyi muuyé a baacɔ a bá ŋa bɔ́ banɔ́ iínjíékíne muuyé.

⁷Aá banɔ́ abá nu ŋa nɔ́ lɔ́kɔ́ma muuyé aámbáya, Bandɔ́mɛsɛ́ káá banɔ́ muúmu aáŋíáka, na aá basɔ́ tɔ́na, ekúlú eyí Otéŋí a Waáŋá Yésus káá lɛ́cana, weé húlúkúne ɔ Ɔmuaná ɔlɔŋɔ na bíáyɛ́ bɛkɛndákɛ́nda bí *bililé bɛ́ masɔ́ma.

⁸U káá fáaya a nɔbɛ́mbɛ nú oocó noómi, yó bífúnéke ne be-ti-menyí Bandɔ́mɛsɛ́ ne eebe e bé tí ŋe bú lumitinine Ambányɛ yɛ́ Ɛsɔ́ma yí uusú Otéŋí a Waáŋá Yésus.

⁹Ciabɔ́ bɔ́nɔ́sɛa káá bá bunyímé bú ekúlú ekime ; bó límekine haaca ne buúse bú Otéŋí a Waáŋá, bá tɛ lɛcá makɛ́nda ma núáyɛ́ nuúmi.[1]

¹⁰Bɛsana eébí káá bɛ́kɛ́láka a buɔ́sɛ́ abɔ́ u ká ka hálɔ́mɔ́na. Ekúlú ayɛ́ u ká ka hálɔ́mɔ́na aá yaandándá yɛ́ buɔ́sɛ́ etéebú anyía bááyɛ́ baacɔ bekime,[2] baháya mɔŋɔlɛ́ nááyá é wuúci nyemíki, bé oómísíki búáyɛ́ buáŋá, banɔ́ tɔ́na núɔ́ bámɔ́kɔ́na ɔlɔŋɔ ne beébe, anyía nu ŋe nú lúmítékíníne bɛsana abɛ́ tu ŋa sɔ́ banɔ́ húlíkínyi.

¹¹Yaátɛ́ asana tú ŋa sɔ́ bɛ́cɔ́kɔ́lɛ́na Bandɔ́mɛsɛ́ ekúlú ekime, tu tɛ tɔmbɔ, a yáánɔ́ asana. Tu ŋe sú wuúci báta anyía wáa kɛlá anyía núénú líhéke a nyɛnamá nyí olíhe anyɛ́ u ŋaá banɔ́ lɔ́ŋɔ́kɔ́ ; tu ŋe sú wuúci báta tɔ́na anyía wá banɔ́ ɔ́ɔ́lɛ́ta na mááyɛ́ makɛ́nda o onyíóyísínyi na ɔ ɔkɛla bɔmbányɛ ebú nu ŋe nú léne ɔkɛla na ɔ ɔnyiɔkɔ buólí bukime abɔ́ nu ŋa nɔ́ nyiɔ, anyía nu ŋa nɔ́ háya mɔŋɔlɛ́ nááyá.

¹²Aáná nu ké nú óómísíki buáŋá bú nyiínyi nyí úúsú Otéŋí a Waáŋá Yésus, yɔ́ kɛ́la anyía bé óómísíki tɔ́na cáánɔ́ eénye a yááyɛ́ asana. Bú káá bɛ́kɛ́láka aáná, anyía na ciasɔ́ Bandɔ́mɛsɛ́ ne Otéŋí a Waáŋá Yésus *Kilís ŋa bɔ́ banɔ́ sáyabɛna.