Read Nomaande 2Tɛ 2 Bible Online

2Tɛ 2 - Nomaande bible

2Tɛ 2

¹Banɔ́ báásɔ́ benyíinyí bé olumitinine, tu ŋa sɔ́ banɔ́ bɛ́cɔ́kɔ́lɛ́na a asana na nyɛkahálɔ́mɔ́na nyí úúsú Otéŋí a Waáŋá Yésus *Kilís, na nyíásɔ́ nyɛbɛ́bándána anyɛ́ tu ká sɔ́ bɛ́bándákána nááyá, anyía

²nuti tényí nyímísi cianɔ́ injiŋé ; ta anyía nuti líkíméke a nyɛkɔɔna anyɛ́ baacɔ ŋa bɔ́ kɔ́ɔ́na anyía buɔ́sɛ́ ebú Otéŋí a Waáŋá ká ka hálɔ́mɔ́na na maá ká háma ; te *behémúnyi bɛsana a bɔ́mɔtɛ́ ŋa bɔ́ kɔ́ɔ́náka aáná, ta anyía yáakɛlá nu ŋa nɔ́ lɔ́kɔ́máká a bɔ́mɔtɛ́ ébú húlikinyi baacɔ aáná, ta anyía tɔ́na baacɔ a bɔ́mɔtɛ́ ŋa bɔ́ kɔ́ɔ́na anyía yaŋɔ́ ɛ ŋa mɛ́ ɔɔ́ŋɔ́kɔ aáná, nuti lumítíne.

³Nuti lumítíne buúse bukime anyía ɔɔcɔ á banɔ́ néŋé, anyía buɔ́sɛ́ ebú Otéŋí a Waáŋá káá faáya, baacɔ beéŋí káá bá ɛ́cɛ bá ma bɔ́ kɛ́lakɛna Bandɔ́mɛsɛ́ aatɔ́ ɔnata;[3] ekúlú eéyé ɛ́cɛ ɔŋána me bítóŋínyi a baacɔ, wuúci bé kéé nyímísi buúse bukime.

⁴U kéé núusiki bɛnyɛ́ma bikime abɛ́ baacɔ ŋe bú nyemi ; ta yɛ́ cáŋa á bá Bandɔ́mɛsɛ́ bɛ́muátá,[4] mbá ta bɔkɔ bú etémbí ; u káá kɔɔna anyía u ŋeé biíbi hɔ́la bikime, yó kó wóofine te eé Ciíbe cɛ Bandɔ́mɛsɛ́,[5] yó kó limine hɔ́á, u kɔɔnaka anyía wáŋa Bandɔ́mɛsɛ́.

⁵Yáakɛlá nu tɛ ŋá háná ánɔ́ bɛ́táá anyía ekúlú ayɛ́ tú ŋa sɔ́ bá náánɔ́, ɛ ŋa mɛ́ banɔ́ láákɛ́na bɛsana eébí.

⁶Ta híáná, bɔkɔ a bumɔtɛ́ áŋa hɔ́á e bú mo kóti bɛsana eébí ɔbɛ́kɛ́la aámbáya ; nu ŋe nú ményi buátɛ́ bɔkɔ, ɔŋána kéé bítóŋínyi a baacɔ hú ekúlú ayɛ́ Bandɔ́mɛsɛ́ ŋaá táná.

⁷Yááŋa taaká anyía baacɔ beéŋí a bɔ́áŋa ɔ ɔkɛlɛna Bandɔ́mɛsɛ́ aatɔ́ ɔnata ; tu ŋe sú menyi aáná hú anyía Bandɔ́mɛsɛ́ u ŋaá basɔ́ tóŋínyi. Mbá bɛsana eébí tɛ káá bɛ́kɛ́láka ɔ ɔkɔɔ́háma ekúlú ayɛ́ Bandɔ́mɛsɛ́ ká yáaŋia ɔɔcɔ ewú ú mo koti ɔŋána ɔ ɔfaaya.

⁸E elime eécí ɔŋána kéé bítóŋínyi a baacɔ. Ekúlú eyí Otéŋí a Waáŋá Yésus ká ka hálɔ́mɔ́na a núáyɛ́ nuúmi noómi, u kéé wuúci ɔɔ́nɔ́ ne mehúne a má ŋaá háma a nyíáyɛ́ nyuúté.[6]

⁹Ɔŋána oócí, awɔ́ u káá cɔba o obítóŋínyi a baacɔ, káá fáaya na makɛ́nda amá *Sátan kéé wuúci iínjie ; u káá kɛ́laka anamánamá cé ne bikéki ne bikémése bɛ́ bɛsana anyía wé néŋéke baacɔ ne biíbi.

¹⁰U káá kɛ́laka anamánamá ekime cá bɛɛbɛ́ bɛ́ bɛsana anyía wé néŋéke baacɔ e bé ké bú nyímúkúne. Bé ké bú nyímúkúne anyía bó ti ómo bú lúmitinine taaká, bé ti ciíci léne ; mbɔ́kɔ bébú ciíci lumítíníne, keyé Bandɔ́mɛsɛ́ ŋeé beébe nohíki.

¹¹Yaátɛ́ asana Bandɔ́mɛsɛ́ káá kɛ́la anyía bábɔ́ bɛ́tááka bɛsana a bɛ́kɔ́tɛ́mákánánɔ́, bó lúmitekinine bɛfala.

¹²U kéé kélísíki baacɔ bekime e bé ŋe bú kíne olumitinine taaká, bé lénéke ɔkɛla bɔɔbɛ́, yó beébe iínjíékíne muuyé.

¹³Mbá a yáánɔ́ asana, banɔ́ báásɔ́ benyíinyí bé olumitinine ebé Otéŋí a Waáŋá ŋeé léne, tu ŋá sɔ́ nyɛ́mana tú owiínjíékíne Bandɔ́mɛsɛ́ bitéŋíti bikúlú bikime, anyía u ŋaá banɔ́ táfáká o otúme e nyitúme.[7] U ŋaá banɔ́ nóhí a makɛ́nda me Efúúménénú yí Elilé. Yiíyi yɛ́ ŋa kɛ́la anyía nuánɔ́ bámɔ́kɔ́nɛ́na bifúúménénú bɛ́ baacɔ, u banɔ́ nóhiki anyía nu ŋe nú lúmítíníne taaká.

¹⁴Aá yaátɛ́ asana Bandɔ́mɛsɛ́ ŋaá banɔ́ lɔ́ŋɔ́kɔ́ nááyá na Ambányɛ yɛ́ Ɛsɔ́ma ayɛ́ tu ŋa sɔ́ banɔ́ húlíkínyi, na anyía núénú bílénéke tɔ́na e elime ci nuúmi nú úúsú Otéŋí a Waáŋá Yésus *Kilís.

¹⁵Buátɛ́ bɔkɔ, banɔ́ báásɔ́ benyíinyí bé olumitinine, énu bíínjíé na makɛ́nda o olumitinine noómi, nu tétényíki bɛsana abɛ́ tú ŋa sɔ́ banɔ́ éékúnyíkí, te ne nyuúté, ta na núásɔ́ nufule a númɔtɛ́ anɔ́ tú ŋa sɔ́ banɔ́ ɔ́ɔ́ŋɔ́kɛ́ná.

¹⁶Ɛ ŋaá mɛ bɛ́cɔ́kɔ́lɛ́na ne uusú Otéŋí a Waáŋá Yésus Kilís bɛ́muátá na ciasɔ́ Síkíne Bandɔ́mɛsɛ́ awɔ́ ú ŋa basɔ́ léne anyía bá cɔbá ne buúse ɔ ɔ basɔ́ kíndísi ɛtɛ́má, bá basɔ́ hákɛ́na taaká cɛ mɔŋɔlɛ́ ɛ ɛtɛ́má a yáábɔ́ yaála yí nuubo noómi,

¹⁷bá banɔ́ kíndísíki ɛtɛ́má, bá banɔ́ iínjíékíne tɔ́na makɛ́nda na ma ɔkɛlaka na ma ɔtáŋáka ekúlú ekime bɛmbányɛ bɛ́ bɛsana.