Read Nomaande 2Tɛ 3 Bible Online

2Tɛ 3 - Nomaande bible

2Tɛ 3

¹Banɔ́, báásɔ́ benyíinyí, ɛ ŋa mɛ́ aamba okuenyinyi ɔ banɔ́ laána anyía : Ánɔ basɔ́ bɛ́cɔ́kɔ́lɔ́kɛ́nɛ́na Bandɔ́mɛsɛ́, anyía Ambányɛ yɛ́ Ɛsɔ́ma yí Otéŋí a Waáŋá á cɔ́cɔ́báka ne buúse fiaŋɔ fiaŋɔ, yí óómóko a nyɛnamá anyɛ́ yɛ́ ŋaá bɛ́kɛ́láka aanɔ́ ɛ ɛkatɛ́katɛ́.

²Ánɔ basɔ́ bɛ́cɔ́kɔ́lɔ́kɛ́nɛ́na Bandɔ́mɛsɛ́ tɔ́na anyía wá basɔ́ tétényíki, anyía na baŋána na bɛɛbɛ́ bɛ́ baacɔ tɛ basɔ́ kɛla bɔkɔ a bɔɔbɛ́;[8] yááŋa anyía baacɔ bekime ti ŋé bú lúmitinine bɛsana bɛ́ Bandɔ́mɛsɛ́ ebí tu ŋe sú beébe húlínyi.

³Otéŋí a Waáŋá ŋo nyióyísínyi cááyɛ́ esúŋe bikúlú bikime. Wuúci u káá banɔ́ kíndísíki, yɔ́ banɔ́ tétényíki anyía Sátan tɛ banɔ́ kɛlá bɔkɔ a bɔɔbɛ́.[9]

⁴Otéŋí a Waáŋá ŋa kɛ́la anyía túásɔ́ bá na mɔŋɔlɛ́ a yáánɔ́ asana ; tu ŋe sú ményi anyía nu ŋa nɔ́ látɛ́na bɛsana abɛ́ tu ŋa sɔ́ banɔ́ láákɛ́na, tu menyukune tɔ́na anyía nu ké nú biíbi látákɛ́na.

⁵Otéŋí a Waáŋá é kendíki cíínú ɛtɛ́má ɔ ɔlɔ́kɔ́ma bɔmbányɛ na anyána Bandɔ́mɛsɛ́ ŋaá basɔ́ léne na anyána nua nɔ́ŋa nú oweéhíkínyínyi muuyé háyɛ *Kilís.

⁶Banɔ́ báásɔ́ benyíinyí, tu ŋa sɔ́ banɔ́ láana a makɛ́nda me Otéŋí a Waáŋá Yésus *Kilís anyía énu bíkékényíki ne benyíinyí bekime a bá tɛ́ ŋá bɔ́ áamba ɔnyiɔ buólí,[10] bé me bú kíneke ɔlátɛ́na bɛsana abɛ́ tu ŋa sɔ́ banɔ́ éékúnyíkí.

⁷Yááŋa anyía banɔ́ bɛ́muátá nu ŋe nú ményi anyána nua nɔ́ŋa nú ɔ basɔ́ hɔ́áka a nyɛkɛla. Ekúlú ayɛ́ tu ŋa sɔ́ bá aanɔ́ ɛ ɛkatɛ́katɛ́, tu ti ómo sú kíne ɔnyiɔ buólí.

⁸Tu tɛ ɔ́mɔ sɔ́ bata ɔɔcɔ a wɔmɔtɛ́ anyía wá basɔ́ túkéke e etémbí, mbá tu ŋa sɔ́ bá túásɔ́ nyiɔkɔ buólí na makɛ́nda ne nebutúé na nabuɔ́sɛ́ ; túó lumitine oweéhínyínyi ne muuyé na ɔtɔmbɔ anyía tu tɛ asɔ́ banɔ́ oóndó a amɛna a asana na bíásɔ́ bɛnyɛ́ma bɛ́ ɔnyíá.

⁹Aá taaká tu ŋa sɔ́ bá na makɛ́nda ma ɔ banɔ́ bátaka bɛnyɛ́ma bɛ́ ɔnyíá, mbá tú tɛ ɔ́mɔ sɔ́ banɔ́ báta ; tu ŋe sú lénéké ɔnyiɔ buólí anyía túásɔ́ banɔ́ tóŋínyi hibílícínyínyí hɛ́ ɔlátáka.

¹⁰Yááŋa anyía te ekúlú ayɛ́ tu ŋa sɔ́ bá aanɔ́ ɛ ɛkatɛ́katɛ́, tu ŋa sɔ́ banɔ́ óókísíkí anyía ɔɔcɔ okime ewú u ti ŋée léne ɔnyiɔ buólí tɛ ɔ́mɔ́ nyɛmána wu ɔnyíáka tɔ́na.

¹¹Yááŋa anyía tu ŋa sɔ́ lɔ́kɔ́ma bá kɔ́ɔnaka anyía baacɔ a bɔ́mɔtɛ́ aanɔ́ ɛ ɛkatɛ́katɛ́ á bɔ́ŋa ne butise ; bá tɛ ŋá bɔ́ nyiɔ buólí, mbá bé ŋge bú oofine a bɛsana bɛ́ bɔsɔ́ɔ́kɔ́ e bí ti ŋée beébe lɛca.

¹²A baacɔ eébé, tu ŋe sú beébe óókísi, tú beébe laakɛna a makɛ́nda me Otéŋí a Waáŋá Yésus Kilís anyía bé búle nyiɔ buólí bikúlú bikime e mbuumu noómi o o búle bɔ́ŋɔ bɛnyɛ́ma bɛ́ ɔnyíá.

¹³Aá banɔ́ báásɔ́ benyíinyí, nɔtɛ tɔmbɔ ɔkɛla bɛmbányɛ bɛ́ bɛsana.

¹⁴Mbɔ́kɔ ɔɔcɔ tɛ ŋáa látɛ́na bɛsana abɛ́ tu ŋá sɔ́ ɔ́ɔ́ŋɔ aaha e nufule eenu, énu wuúci bísíémúkúnyi bɔmbányɛ ; mbá nu bɛ́álɔ́na ne wuúci a nyɛkɛla nyɛ́ bɛsana, anyía aatɔ́ ɔlama é wuúci tímbíé.

¹⁵Ta híáná, nuti wuúci hiíte háyɛ uunú oliŋine, mbá énu wuúci hɔŋɔ́náka ekúlú ekime anyía wáŋa uunú onyíinyí.

¹⁶Otéŋí a Waáŋá a wáŋa hicéme hí mbuumu á banɔ́ iínjíékíne, wuúci bɛ́muátá, mbuumu ne e bikúlú bikime na a nyɛnamá nyikime. Otéŋí a Waáŋá é límíne náánɔ́ banɔ́ bekime.

¹⁷Yaŋɔ́ Bóol, ɛ ŋa mɛ́ banɔ́ téŋi. Ɛ ŋa mɛ́ ɔ́ɔ́ŋɔ bitéŋíti eebi ne úúmí ɔɔbɔ́ ú bɛ́muátá. Aáná ɛ́ náŋa yámɛ ɔ́ɔ́ŋɔ́kɔ nyiámɛ nyiínyi a túámɛ tufule tukime ; nyiámɛ nyiɔ́ŋɔ eényí nyɛ́áŋa.[11]

¹⁸Uusú Otéŋí a Waáŋá Yésus *Kilís á banɔ́ sáyábákɛ́na banɔ́ bekimeʼo !