Read Nomaande 1Ti 3 Bible Online

1Ti 3 - Nomaande bible

1Ti 3

¹Buhúnyi eebu áŋa taaká ci buhúnyi, búáŋa anyía ɔɔcɔ okime awɔ́ u ŋa yáamba ɔbámɔ́kɔ́nɛ́na *mukendisi belumitinine, ɔɔcɔ oócí má táfa ambányɛ yí buólí.

²Mukendisi belumitinine ŋá nyɛmána wu olíhéke bɔmbányɛ, tɛ́ka na tɔkɔma na baacɔ ; muúmu mɔbátɛ́nánɔ́ hú oónjú ɔmɔtɛ́,[8] mu ti bíínjie ɔ ɔmúána meluku, muúmu ne injiŋé a aatɔ́, muúmu na bɔɔcɔ, muúmu na nɔkasa, mu menyukune oweékúnyi baacɔ bɛsana.

³Mu tɛ ɔ́mɔ nyɛmána mu ɔbá ta amúána meluku, ta anua bitule, mbá mu ŋá nyɛmána mu ɔbá mbuumu cɛ ɔɔcɔ, u tɛ sáá ɛsáká ; wuúci tɛ́ka na ɔtɛ́má ɔɔ́ mɔɔnyɛ́.

⁴U ŋá nyɛmána wu okendiki bɔmbányɛ ciayɛ́ ciíbe cɛ baacɔ, bááyɛ́ baáná wuúci lɔ́kɔ́mákɛ́na, bé wuúci kékéke bɔmbányɛ bɔmbányɛ.

⁵Ɛ ŋa mɛ́ táŋa aáná anyía mbɔ́kɔ u ti ŋée menyi okendisi ciayɛ́ ciíbe cɛ baacɔ cɛ bɛ́muátá, anyána wáŋa wu okendiki hiɔ́bɔ hí belumitinine hɛ́ Bandɔ́mɛsɛ́ e ?

⁶U tɛ ɔ́mɔ nyɛmána wu ɔbá yɔɔ́sɔɔ́sɔ yí mulumitinine Yésus, anyía keyé bumálá kéé wuúci bááta a aatɔ́, Bandɔ́mɛsɛ́ yó wuúci túme hɛkɔma háyɛ ú ŋeé túme Musɔ́mɛ́na.

⁷Yɛ́ ŋa nyɛmána tɔ́na anyía baacɔ a bá tɛ ábɔ́ bá belumitinine ébú wuúci kékéke ; anyía keyé bé kéé wuúci séésíki, Musɔ́mɛ́na múó wuúci ɔ́ɔ́tɔ́kɔ na túáyɛ́ tukolí.

⁸Nyɛbɛ́kɛ́lɛ́na nyɛ́ batiákɛ́lɛ[9] ŋá nyɛmána nyɛ́ ɔbámɔ́kɔ́nɛ́na tɔ́na nyɛmbányɛ, bá kɔ́ɔnaka taaká, bé ti bíínjie ɔ ɔmúána meluku, bá tɛ aamba ɔhɔ́ma mɔɔnyɛ́ i ihényí a cɛɛbɛ́.

⁹Bá ŋá bɔ́ nyɛmána bá ɔlátákɛ́na na hɛcɔɔ́cɔ́ hɛ́ ɔtɛ́má e hifúúménénú bɛsana bí olumitinine abɛ́ Bandɔ́mɛsɛ́ ŋa námbɔ́náka.

¹⁰Ekúlú ayɛ́ bá ŋa yáamba o obééti *batiákɛ́lɛ, bá ŋá nyɛmána bá ɔ cáŋa beébe aákɔ́nákɛ́na bɔmbányɛ ; bá a lɛca mbɔ́kɔ bá ŋá bɔ́ nyɛ́mána, bé beébe béétíki aná batiákɛ́lɛ.

¹¹Beénjú[10] tɔ́na ŋá bɔ́ nyɛmána bá ɔbá na ambányɛ yɛ́ nyɛbɛ́kɛ́lɛ́na, bé ti óóto baacɔ, bé ti bíínjie ɔ ɔmúána meluku, bá kɛlaka taaká cɛ́ bɛsana ekúlú ekime.

¹²Tiákɛ́lɛ ŋá nyɛmána wu ɔbátɛ́na hú oónjú ɔmɔtɛ́, u ŋá nyɛmána wu otétényíki bááyɛ́ baáná, u kendisiki ciayɛ́ ciíbe cɛ baacɔ bɔmbányɛ.

¹³Baacɔ ŋe bú kéké buéŋí batiákɛ́lɛ a bá ŋa bɔ́ nyiɔ ambányɛ yí buólí. Batiákɛ́lɛ eébé á bɔ́ŋa bé ohulikinyi baacɔ bɛsana bí Yésus *Kilís, bé ti líkíme, anyía bá ŋa bɔ́ hákɛ́na mɔŋɔlɛ́ nááyá.

¹⁴Ta ayɛ́ ɛ́ ŋa mɛ́ ɔ wɔɔ́ŋɛ́na nufule eenu, i ŋeé mi bíkéti ɔfaaya ɔ ɔkɔɔ́ kuɔŋɔ́ lɛca hikúlúkúlú.

¹⁵Asana ɔ́mɔtɛ́, mbɔ́kɔ i ti ŋé tényí ká mɛ háma, bɛsana abɛ́ ɛ ma mɛ́ ɔ laakɛna kɔ́ yɔ́ɔ wɔɔ́lɔ omenyi anyána baacɔ bá hɛnyɛ́nɔ́ hɛ́ Bandɔ́mɛsɛ́ ábɔ́ nyɛmána bé olíhéke ; hɛnyɛ́nɔ́ eéhí áŋa hiɔ́bɔ hí belumitinine. Bá bɔ́ŋa baacɔ bá Bandɔ́mɛsɛ́, Ooci a wáŋa wɔɔ́sɔ, beébe nukúse e nú me kíndísi taaká cɛ asana.[11]

¹⁶Asana eéyé ayɛ́ Bandɔ́mɛsɛ́ ŋa námbɔ́nɛ́na baacɔ áŋa yaandándá yɛ́ asana, isuŋí tɛ á kɛla. Yááŋa asana yí Ooci awɔ́ ú ŋaá bɛ́cáŋa ɔɔcɔ, Elilé yó tóŋínyi anyía wáŋa ɔtálɛ́mánánɔ́, bililé bɛ́ masɔ́ma bɛ́ Bandɔ́mɛsɛ́ bíó wuúci lɛcaka, baacɔ bó húlíkínyi baacɔ abá bá tɛ ábɔ́ bá Besuif yááyɛ́ asana, biliminyi bɛ́ ɔmɛsɛ́ okime bá ɔhákɛ́na mɔŋɔlɛ́ nááyá, Bandɔ́mɛsɛ́ nyi wuúci bééti eényí ɔ Ɔmuaná aá haála hé nuúmi.