Read Nomaande Ebe 1 Bible Online

Ebe 1 - Nomaande bible

Ebe 1

¹Buáyá, *Bandɔ́mɛsɛ́ ŋaa láakɛna cíísú sɔ́kɔ́nɔ́ bɛsana anamánamá bikúlú biéŋí. Bááyɛ́ *behémúnyi bɛsana abá u ŋaá tɔ́mɔ́kɔ́ná ŋa bɔ́ táŋa a yááyɛ́ aháŋá.

²U ŋaá táŋáká aáná ɔ ɔkɔɔ́háma ɔ mɔɔ́sɛ́ eeme me elime.[1] Aámbáya ú ma táŋáka e nyuúté nyí uuyé Ɔɔ́nɔ́. Na Ɔɔ́nɔ́ oócí Bandɔ́mɛsɛ́ ŋeé kétiki na ɔmɛsɛ́ na ɔmuaná ; u ŋeé wuúci táfá o otéŋgínyi bɛnyɛ́ma bikime.

³Wáŋa ihúényínyí ci nuúmi nɔ́ Bandɔ́mɛsɛ́, wáŋa ɔmanánɔ́ Bandɔ́mɛsɛ́ hú táákɔ. Úúye ɔtáŋa áŋa ne butéŋí a bɛnyɛ́ma bikime na bɛ́ ɔmɛsɛ́ na bɛ́ ɔmuaná. Ɛŋakɛlá wé fúúmínyi baacɔ a máábɔ́ maabɛ́, nyíáyɛ́ nyikelímine eényí ɔ Ɔmuaná a aháŋá yɛ́ ɔɔbɔ́ ú manɔ́mɛ ú Bandɔ́mɛsɛ́, Alámakɛ́nda.

⁴Buátɛ́ bɔkɔ wáŋa oliménénú aáhá anyía wáŋa ɔhɔlánɔ́ *bililé bɛ́ masɔ́ma bɛ́ Bandɔ́mɛsɛ́ bikime ; Bandɔ́mɛsɛ́ yó wuúci iinjíe nyiínyi nyí nuúmi anyɛ́ a hɔ́la nyíábɔ́.

⁵Bandɔ́mɛsɛ́ ŋaá laána *Yésus ɔsɛ : « Ɔ ɔ́ŋa uumi Ɔɔ́nɔ́, hɛ́nánɔ í me mí o tóŋínyi ná baacɔ bekime. » U ŋa háná é wuúci laana ɔsɛ : « Ya mɛ́ŋa ɔɔtɛ́, ɔ ɔ́ŋa uumi Ɔɔ́nɔ́. » Mbá a bɛsana eébí bikime, Bandɔ́mɛsɛ́ tɛ ŋá láana yááyɛ́ elilé yɛ́ bɔsɔ́ma a yɛ́mɔtɛ́ aáná ta buɔ́sɛ́.

⁶Ekúlú ayɛ́ Bandɔ́mɛsɛ́ ŋaá tɔ́má uuyé Ɔɔ́nɔ́, Mutéŋínyi bɛnyɛ́ma bikime na bɛ́ ɔmɛsɛ́ na bɛ́ ɔmuaná, u ŋaá kɔ́ɔ́na ɔsɛ[2] : « Bililé bɛ́ masɔ́ma bɛ́ Bandɔ́mɛsɛ́ ŋaá nyɛmána bí onyemi Ɔɔ́nɔ́. »[3]

⁷Asana ayɛ́ Bandɔ́mɛsɛ́ ŋaá kɔ́ɔ́na a aháŋá na bíáyɛ́ bililé bɛ́ masɔ́ma áŋa anyía : « Bililé bɛ́ masɔ́ma bɛ́ Bandɔ́mɛsɛ́ áŋa háyɛ mehúne, biíbi tɔ́na háyɛ tɔbɛ́mbɛ tú oocó. »

⁸Mbá a asana ne uuyé Ɔɔ́nɔ́, Bandɔ́mɛsɛ́ ŋaá kɔ́ɔ́na ɔsɛ : « Kuɔŋɔ́ ɔ ɔ́ŋa Bandɔ́mɛsɛ́, o kóó téŋgínyi bikúlú bikime ; búɔ́wɔ Butéŋí[4] áŋa butálɛ́mánánɔ́.

⁹O ŋoó léne ɔkɛla bɛsana a bɛtálɛ́mánánɔ́, mbá e líŋíkíne a bɛɛbɛ́. Yaátɛ́ asana, yaŋɔ́ ciɔwɔ Bandɔ́mɛsɛ́, ɛ ŋá mɛ ɔ lɔtɔ́, míɔ kuɔŋɔ́ bééti e nyilimíné a nyɛáŋá anyɛ́ a hɔ́la nyɛ́ bɔlɔ́ɔwɔ, ɛ́ɛhɛ́ úúwe ɔtɛ́má ŋee bíléne buéŋí. »

¹⁰Bandɔ́mɛsɛ́ ŋaá kɔ́ɔ́na tɔ́na ɔsɛ : « Kuɔŋɔ́, ɔ ɔ́ŋa Otéŋí a Waáŋá. E nyitúme nyɛ́ bɛnyɛ́ma bikime, kuɔŋɔ́ o ŋoó ketíki ɔmɛsɛ́ ; kuɔŋɔ́ bɛ́muátá tɔ́na, ɔ ŋɔɔ́ kɛlá anyía ɔmuaná á bámɔ́kɔ́na.

¹¹Bɛnyɛ́ma eébí bikime káá mánɔkɔna, mbá kuɔŋɔ́, o kóó líhéke bikúlú bikime. Bí kéé lúneke bikime háyɛ bɛlaŋa ŋe lúne.

¹²O kóó biíbi nyikeke háyɛ bé ŋe nyike bɔlaka bú nyiike, bɔ́ háya e nyihíkíli. Bɛnyɛ́ma eébí bikime káá cáŋiaka háyɛ bɛlaŋa ŋá cáŋia ; mbá kuɔŋɔ́, ɔ ɔ́ŋa bɔkɔ búmɔtɛ́, o ti kóó lune ta buɔ́sɛ́. »

¹³Mbá Bandɔ́mɛsɛ́ tɛ ŋáa láana yááyɛ́ *elilé yɛ́ bɔsɔ́ma a yɛ́mɔtɛ́ ta buɔ́sɛ́ ɔsɛ : « Ké limíne aaha aámɛ aháŋá yɛ́ ɔɔbɔ́ ú manɔ́mɛ ekúlú ekime ayɛ́ ɛ ká mɛ́ kɛ́la anyía óo límékíníne bɔ́ɔ́wɔ beliŋine a bɛɛtɔ́. »

¹⁴Bililé bɛ́ masɔ́ma bɛ́ Bandɔ́mɛsɛ́ áŋa aátɛ́ e ? Bɛ́áŋa hú bililé a bɛ́ ŋɔ nyiɔnɔ Bandɔ́mɛsɛ́ buólí, biíbi eébí Bandɔ́mɛsɛ́ ŋa tɔ́má ɔ ɔkɔwɔ́ɔ́lɔ baacɔ ebé u kéé nóhiki.