Read Nomaande Sak 2 Bible Online

Sak 2 - Nomaande bible

Sak 2

¹Baláamɛ, banɔ́ ebé nu ŋa nɔ́ háya mɔŋɔlɛ́ né uusú Otéŋí a Waáŋá Yésus *Kilís a wáŋa ne nuúmi ɔ ɔhɔla, nɔtɛ kɛlákɛ́na bɔsɔ́ɔ́kɔ́ mebeé.

²Túá kɔɔ́na anyía baacɔ béfendí me bú oofine ekúlú ɔ́mɔtɛ́ a nyɛ́ánɔ́ nyɛbɛ́bándána. Ɔmɔtɛ́ eé beébe ɛnɔ́mɛ cɛ ɔɔcɔ, na nɔbánda nú kóolo a hɛnɔɔ́nɔ́ hɛ́ ɔɔbɔ́, na bɛlaŋa bɛ́ mɔɔnyɛ́ meéŋí aá cɛɛ́tɔ ; a wɔmɔtɛ́ hɛsɔ́kásɔ́ka hɛ́ ɔɔcɔ, ne bilunénú bɛ́ bɛlaŋa.

³Aáná, mbɔ́kɔ ɔmɔtɛ́ aá banɔ́ ŋeé kéke ɔ ɔhɔla ɔɔcɔ u bɛlaŋa bɛ́ mɔɔnyɛ́, yó wuúci laana ɔsɛ : « Taatá, limíne aaha e nyilimíné nyɛ́ bɔɔcɔ eenyi. » Mbá u laana hɛsɔ́kásɔ́ka hɛ́ ɔɔcɔ ɔsɛ : « Kuɔŋɔ́, baabá eeye, ká ka tálɛ́mɛ́na ehenyíé », ta anyía « Ká ka bɛ́nyɔ́kɔ́lɛ́ána ɔ ɔmɛsɛ́ ehenyíé » ;

⁴mbɔ́kɔ ɔɔcɔ aá banɔ́ ŋaá kɛ́laka aáná, tɛ́ka ɛ́cɛ anyía u ŋa kɛ́lɛna bɔsɔ́ɔ́kɔ́ mebeé e ? Tɛ́ka mutáfána eémú muáŋa e mú ŋé húle a bɛɛbɛ́ bɛ́ ɛbɛ́táá e ?

⁵Benyíinyí bá ɔtɛ́má, yááŋa anyíaʼo, Bandɔ́mɛsɛ́ ŋaá táfáka eebe a bá bɔ́ŋa tɔsɔ́kásɔ́ka eé buúse bɔ́ baacɔ bá ɔmɛsɛ́ ooci anyía bábɔ́ bámɔ́kɔ́nɛ́na ɛnɔ́mɛ o olumitinine eeyé eé buúse, mbá bé oofine eeyé e Butéŋí abɔ́ u ŋaá bɛ́tánɛ́ná baacɔ e bé ŋé bú wuúci léne.

⁶Mbá ta híáná banɔ́, nu ŋa nɔ́ bábɛ́na basɔ́kásɔ́ka. Yaŋɔ́ ɛsɛ ɛnɔ́mɛ cɛ́ baacɔ náŋa cɛ́ á banɔ́ tékeseke, cɛ́ banɔ́ télímíkínyi a akála bɛsana e ?

⁷Ɔ́kɔ, tɛ́ka beébe tɔ́na naŋa bábɔ́ cáŋgɛna yáánɔ́ ambányɛ yí nyiínyi eeye yí belumitinine Kilís ayɛ́ bá ŋaá banɔ́ iínjie e ? [6]

⁸Ɛ́ɛ, nu ŋa nɔ́ kɛ́la bɔmbányɛ ɔ ɔlátɛ́na okotí a yɛ́ á hɔ́la *bikotí bikime.[7] Yiíyi yɛ́áŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ noómi anyía : « Lénéke sɔ́ɔ́kɔ́ háyɛ ciɔwɔ cɛɛ́tɔ cɛ bɛ́muátá ».

⁹Mbá, mbɔ́kɔ nu ŋa nɔ́ kɛ́la bɔsɔ́ɔ́kɔ́ mebeé, nu ŋa nɔ́ kɛ́la bɔɔbɛ́ anyía nua nɔ́ŋa bɔnɔkɔ́kɔ́nɔ́ bikotí bɛ́ Bandɔ́mɛsɛ́.

¹⁰Yááŋa anyía, mbɔ́kɔ ɔɔcɔ awɔ́ u ŋa látɛ́na bikotí bɛ́ Bandɔ́mɛsɛ́ bikime ŋé kúféténe hú o okotí ɔmɔtɛ́, wa yáaŋa na nyɛkua e bikotí bikime eé buúse bɔ́ Bandɔ́mɛsɛ́.

¹¹Yááŋa anyía hú waáta ɔɔcɔ ɔmɔtɛ́ awɔ́ u ŋá kɔ́ɔ́na anyía : « Atɛ kandáka tusɔmɔ », hú wuúci tɔ́na ú ŋaa kɔ́ɔna anyía : « Atɛ ɔ́ɔ́nɔ́ ɔɔcɔ ».[8] Aáná, te hú ɔkanda tusɔmɔ ɔ́ɔ kandáka, te hú ɔwɔɔ́nɔ ɔ́ɔ wɔɔ́nɔ ɔɔcɔ, ɔ́ mɔɔ́ caŋgɛna bikotí bɛ́ Bandɔ́mɛsɛ́.

¹²Yaátɛ́ asana, na a bɛsana abɛ́ nu ŋa nɔ́ kɛ́la na a bɛsana bikime abɛ́ nu ŋa nɔ́ táŋa, énu menyí anyía Bandɔ́mɛsɛ́ káá banɔ́ kélísíki e bikotí a bɛ́áŋa bíɔ basɔ́ kátɔ́naka a bɔɔbɛ́.

¹³Mbɔ́kɔ ɔɔcɔ tɛ ŋá bɛ́cáma bɔsɔ́ɔ́kɔ́ mahana, Bandɔ́mɛsɛ́ tí ké wuúci bɛ́cáma mahana ekúlú eyí u kéé wuúci kélísíki. Mbá, mbɔ́kɔ ɔɔcɔ ŋa bɛ́cáma bɔsɔ́ɔ́kɔ́ mahana, u tɛ ɔ́mɔ́ nyɛ́mana wu olíkíméke nyɛkála.

¹⁴Baláamɛ, mbɔ́kɔ ɔɔcɔ ɔmɔtɛ́ ŋá kɔ́ɔ́na bɔ kɔɔna ne nyuúté anyía wáŋa mulumitinine Bandɔ́mɛsɛ́, wuúci tɛ́ka ne mekilíkínyí, bú ŋɔ yɔ́ɔlɔ aátɛ́ e ? Anyána nyɛnamá nyí olumitinine eényí áŋa nyí o wuúci ɔɔ́lɛ́ta e ?

¹⁵Yáakɛlá mulumitinine a mumɔtɛ́ áŋa aáhá a muáŋa onuti etémbí, muúmu tɛ́ka tɔ́na na bɔkɔ bú ɔnyíáka mɔɔ́sɛ́ mekime ;

¹⁶mbɔ́kɔ ɔɔcɔ ɔmɔtɛ́ aá banɔ́ é muúmu laána anyía : « Oóʼo, a cɔba bɔmbányɛ ; bɛ́kɛ́ndɛ́na ɔbɔ́ŋɔ na bɛlaŋa na bɛnyɛ́ma bɛ́ ɔnyíá », mbá u ti muúmu iínjíé bɛnyɛ́ma e bí ŋe muúmu bɛ́ámbɛ́na, bú ŋɔ yɔɔ́lɔ aátɛ́ e ?

¹⁷Híáná tɔ́na olumitinine áŋa ; mbɔ́kɔ ɔɔcɔ ŋá kɔ́ɔ́na bɔ kɔɔna anyía wáŋa ne olumitinine ɔ ɔtɛ́má, wuúci tɛ́ka ne mekilíkínyí, olumitinine oócí áŋa owéénú buúse bukime.

¹⁸Asana ɔmɔtɛ́, ɔɔcɔ a wɔmɔtɛ́ áŋa wu ɔlaana sɔ́ɔ́kɔ́ anyía « O ŋoó lumitinine, mbá yaŋɔ́ ya mɛ́ŋa ne mekilíkínyí ».[9] I ké mi wuúci bɛ́káma ɛsɛ́ : « Mi tóŋínyi uuwe olumitinine awɔ́ ú tɛ á bá ne mekilíkínyí, mbá yémi o tóŋínyi maamɛ mekilíkínyí e mé ŋe húle e uumi olumitinine ».

¹⁹Ɔ nɔŋɔ oó lumitekine anyía Bandɔ́mɛsɛ́ áŋa hú wuúci ɔmɔtɛ́. Búáŋa bɔmbányɛ aáná ; ta *bɛɛbɛ́ bí bililé ŋe bú lúmitine tɔ́na aáná, bá ndándamaka ne bulíkílíki.

²⁰Mbá kuɔŋɔ́, yaála yɛ́ ɔɔcɔ ! Ɔ ŋɔɔ́ waámba anyía yémi o tóŋínyi anyía olumitinine awɔ́ ú tɛ a bá ne mekilíkínyí tɛ ŋɔ́ yɔɔ́lɔ buúse bukime e ? [10]

²¹Bɛ́táá asana yɛ́ *Abɛ́laham cíásɔ́ sɔ́kɔ́nɔ́, anyána Bandɔ́mɛsɛ́ ŋaa kɛ́la anyía wá bá atálɛ́mánánɔ́ yɛ́ ɔɔcɔ eeyé eé buúse anyía u ŋa sɛ́ wé wuúci bɛ́sámbɛ́na uuyé ɔɔ́nɔ́ *Isak.

²²Ɔ ŋɔɔ́ lɛca anyía ne olumitinine ne mekilíkínyí ŋe bú kendikinyi e ? Ɛ́ɛhɛ́ mekilíkínyí ŋo nyióyísínyi bɔmbányɛ uúye olumitinine.

²³Aáná yááŋa yɔɔ́ŋɔ́kɔ́nɔ́ anyía : « Abɛ́laham ŋaá háya mɔŋɔlɛ́ ná Bandɔ́mɛsɛ́, ɛ́ɛhɛ́ Bandɔ́mɛsɛ́ ŋeé wuúci hiíte háyɛ atálɛ́mánánɔ́ yɛ́ ɔɔcɔ eeyé eé buúse, yó wuúci lɔ́ŋɛ́ta anyía yááyɛ́ ekendinyi. »

²⁴Menyí bɔmbányɛ anyía Bandɔ́mɛsɛ́ ŋaá kɛla anyía ɔɔcɔ okime á bá atálɛ́mánánɔ́ yɛ́ ɔɔcɔ eeyé eé buúse a asana na maayɛ́ mekilíkínyí ɔlata tɔ́na ne uúye olumitinine.

²⁵Bɛ́táá tɔ́na asana yɛ́ Laháb, okendí u oónjú. U ŋeé tétényíki ɛndɔ́ma cí *Besuif a cɛ́ ŋgaá hámá e uuyé ooki, yó beébe káha, u ŋé beébe óólísi o ohónyí wú etémbí. Ɛ́ɛhɛ́ Bandɔ́mɛsɛ́ ŋaa kɛla anyía wá bá atálɛ́mánánɔ́ yɛ́ ɔɔcɔ eeyé eé buúse anyía maayɛ́ mekilíkínyí.[11]

²⁶Aáná yááŋa anyíaʼo, háyɛ cɛɛ́tɔ ikime a cɛ́ tɛ á bá tɔ́na na hɛtányɛ́ áŋa iwéénú, híáná tɔ́na olumitinine okime awɔ́ ú tɛ á bá ne mekilíkínyí áŋa owéénú.