Read Nomaande Sak 4 Bible Online

Sak 4 - Nomaande bible

Sak 4

¹Aátɛ́ yí ŋe héléne na ɛcálɛ na ɛsáká aanɔ́ ɛ ɛkatɛ́katɛ́ e ? Ɔ́kɔ, tɛ́ka ɛbɛ́táá a cɛɛbɛ́ a cɛ́ ŋá nua ciíci ne ciíci aanɔ́ ɛ ɛtɛ́má e ?

²Bɛnyɛ́ma a bɛ́mɔtɛ́ ŋaá banɔ́ hámɛ́na ɛ ɛtɛ́má mbá nu ti ŋé nu biíbi bɔ́ŋɔ : Yaátɛ́ asana nua nɔ́ŋa hoóhi na ɔwɔɔ́nɔ́kɔ́nɔ́nɔ. Nua nɔ́ŋa na ɛcaná ɛ ɛtɛ́má a bɛnyɛ́ma a bɛ́mɔtɛ́, mbá nu tɛ anɔ́ bá na makɛ́nda me o biíbi bɔ́ŋgɔ́na ; yaátɛ́ asana nu ŋa nɔ́ sáá ɛsáká, nu nuaka macálɛ. Nu tɛ anɔ́ bá nu ɔbɔ́ŋɔ bɔkɔ, anyía nu tɛ ŋá nɔ́ báta ná Bandɔ́mɛsɛ́.

³Mbɔ́kɔ nu ŋa nɔ́ báta, ɔ tɛ banɔ́ iínjie ; yááŋa anyía nu ŋa nɔ́ báta bɔɔbɛ́, anyía nu ŋa nɔ́ aamba ɔbɛ́kɛ́lɛ́na bɛnyɛ́ma eébí bikime háyɛ bú ŋaá banɔ́ bíléníne e cíínú ɛtɛ́má.

⁴Banɔ́ bakanda tusɔmɔ eebe ! [13] Nu ŋe nú ményi bɔmbányɛ anyía ɔɔcɔ awɔ́ á táka bukendinyi na bɛsana bɛ́ ɔmɛsɛ́ áŋa muliŋine mɔ Bandɔ́mɛsɛ́. Aáná ɔɔcɔ okime awɔ́ u ŋa látɛ́na bɛsana bɛ́ ɔmɛsɛ́ a yáaŋa oliŋine Bandɔ́mɛsɛ́.

⁵Tɛ́ cáŋa etémbí yááŋa yɔɔ́ŋɔ́kɔ́nɔ́ anyía : « Bandɔ́mɛsɛ́ ŋeé léne buéŋí Elilé ayɛ́ u ŋaá basɔ́ iínjie, u yiíyi kɛlakɛna yɔɔtɛ. »[14]

⁶Mbá ta híáná, Bandɔ́mɛsɛ́ ŋaá basɔ́ bóósi buéŋí ɔ ɔhɔla ; yááŋa yɔ́ɔ́ŋɔ́kɔ́nɔ́ tɔ́na anyía « Bandɔ́mɛsɛ́ ŋeé núusi baacɔ e bé ŋe bú bíbééti, mbá u ŋo bóósi eebe e bé ŋe bú bílóosi ɔ ɔmɛsɛ́. »

⁷Yaátɛ́ asana ánɔ lɔ́kɔ́mákɛ́na Bandɔ́mɛsɛ́. Énu nuusiki Musɔ́mɛ́na, aáná mu káá banɔ́ cábakɛna haaca.

⁸Énu bíkósíki ná Bandɔ́mɛsɛ́, aáná u kéé bíkósíti tɔ́na náánɔ́. Banɔ́ bakɛla maabɛ́ abá nua nɔ́ŋa ne ibíkéti ífendí, ánɔ bɛ́súáka aabá, cí é fúúméne ; ánɔ aáŋíáka maabɛ́ e ciínú ɛtɛ́má noómi.

⁹Ánɔ lɔ́kɔ́máka ɛtɛ́má ɔnua, núe limékíne a bɛcala, nɔ lɛlaka tɔ́na. Nɔtɛ háná cɛ́ca, mbá ánɔ lɛláka. Nɔtɛ háná bíléne mbá ánɔ lɔ́kɔ́máka ɛtɛ́má ɔnua.

¹⁰Énu bílóósíki eé buúse bú Otéŋí a Waáŋá, aáná u káá banɔ́ béétíki.

¹¹Banɔ́ báámɛ benyíinyí, nuti ótókónóno banɔ́ na banɔ́. Ɔɔcɔ okime ewú u ŋo yóoto sɔ́ɔ́kɔ́ ta anyía u ŋe wuúci bábɛ́na, hú *bikotí ú ŋo yoóto, u biíbi bábákɛ́na tɔ́na. Yááŋa anyía, mbɔ́kɔ ɔ ŋɔɔ́ bábɛ́na bikotí, ɛ́cɛ o ti ŋóo biíbi látɛ́na ; o ŋoó biíbi bábɛ́na bɔ́ bábɛ́na.

¹²Hú Bandɔ́mɛsɛ́ bímuócí u ŋe télímínyi bikotí, wuúci bímuócí tɔ́na wáŋa wu okélísíki baacɔ, wuúci bímuócí wáŋa na makɛ́nda me o beébe nohiki, te me o beébe ɔ́ɔ́nɔ́kɔ. Mbá kuɔŋɔ́ anáʼo, ɔ ŋɔɔ́ bɛ́táá anyía ɔ ɔ́ŋa aányɛ́ awɔ́ ɔ ŋɔɔ́ bábɛ́na sɔ́ɔ́kɔ́ e ?

¹³Ɛ́náʼo, aá banɔ́ baacɔ abá nú ŋa nɔ́ kɔ́ɔna anyía ta hɛ́nánɔ, ta nɔɔyá nu ká nɔ́ cɔ́baka o okolímekine a bálɛ́ka a cɛ́mɔtɛ́ hiɔŋɔ hikimekime ɔ ɔkɔkɛla onduné, nɔ́ hɔ́máka mɔɔnyɛ́ meéŋí ;

¹⁴mbá aá banɔ́, aányɛ́ u ŋe ményi nɔɔyá e ? Uúnú olíhe áŋa aátɛ́ e ? Uúnú olíhe áŋa háyɛ olúkúlúku a wáŋa wáá hámɔ́kɔ́na hikúlúkúlú, yɔ́ mána.

¹⁵Yaátɛ́ asana nu ŋá nɔ́ nyɛ́mána nú ɔkɔɔnaka anyía mbɔ́kɔ Bandɔ́mɛsɛ́ ŋeé lénéke, yɔ́ banɔ́ iínjie olíhe ɔcaha, nu ká nɔ́ kɛlaka bɔkɔ eebu, ta anyía ebunyíé.

¹⁶Aá taaká nu ŋe nú bíbééti, nɔ táŋáka na bumálá bukime ; nyɛkɛlaka eényí áŋa nyɛɛbɛ́.

¹⁷Yááŋa anyíaʼo, mbɔ́kɔ ɔɔcɔ ŋe ményi bɔmbányɛ abɔ́ wá nyɛmána wu ɔkɛlaka mbá u ti buúbu kɛlá, u ŋaa kɛla bɔɔbɛ́.