Read Nomaande 2Bi 3 Bible Online

2Bi 3 - Nomaande bible

2Bi 3

¹Baláamɛ bá ɔtɛ́má, ánɔ lɛcá : Núámɛ nufule nɔ́ ɔláta eenu ɛ ŋa mɛ́ banɔ́ ɔɔ́ŋɛ́na. Eémi e tufule tukime túfendí, ɛ ŋa mɛ́ banɔ́ bítéésíki bɛsana a bɛ́mɔtɛ́ anyía yámɛ banɔ́ héényíki ɛtɛ́má, núánɔ́ bámɔ́kɔ́nɛ́na na mɔsɔŋɛ́ e mefúúménénú a bɛɛtɔ́.

²Ɛ ŋa mɛ́ aamba anyía núánɔ́ bɛ́tááka bɛsana ebí befúúménénú bé *behémúnyi bɛsana bá Bandɔ́mɛsɛ́ ŋa cáŋa ébú hulikinyi baacɔ e nyuúté nyɛ́ baacɔ buáyá. Ánɔ bɛ́tááka tɔ́na okotí eyí uusú Otéŋí a Waáŋá, muasɔ́ Munohi, ŋaá basɔ́ húlikinyi e nyuúté nyɛ́ báánɔ́ *baacɔ bá ɛndɔ́ma.

³Ánɔ cáŋa omenyi bɔmbányɛ anyía ɔ mɔɔ́sɛ́ ma nyɛmana nyɛ́ ɔmɛsɛ́,[6] baacɔ a bɔ́mɔtɛ́ ká bɔ́ fáakɔna, bá banɔ́ cɛ́cáka, bá kɛ́laka anamá cá bɛsana a bɛɛbɛ́ bikime e bí ŋeé beébe hámɛ́na ɛ ɛtɛ́má noómi,

⁴bá kɔ́ɔnaka báyɛ : « Mbá ɛndána acɛ́ u ŋaá táná anyía u ká ká hálɔ́mɔ́na ciíci ciényí aná e ? Yááŋa anyía ɔ ɔtɔkɔ otúme eyí cíísú síkíne ŋe bú líheke, bíó wéékúne, ta bɔkɔ tɛ ŋaá hɛ́ŋɛ́na e nyilimíné. Bɛsana bikime a yánáŋa bɔkɔ búmɔtɛ́ o otúme ayɛ́ ɔhuálɔ́ ŋaá bɛ́bɔ́ta. »

⁵A nyɛkɔɔna eényí, bé ŋe bú kíne omenyi anyía buáyá Bandɔ́mɛsɛ́ ŋeé kétíki na ɔmɛsɛ́ na ɔmuaná ne buhúnyi bɔ́ nyíáyɛ́ nyuúté ; yó ketiki na ɔmɛsɛ́ ne menyífé, aáná ɔmɛsɛ́ áŋa hɔ́á a asana ne menyífé.

⁶Híáná ne menyífé a ma ŋa hɔ́mbáka a yaandándá yí olondí, Bandɔ́mɛsɛ́ ŋaá kátákɛ́ná ɔmɛsɛ́ awɔ́ ú ŋa cáŋa ɔbá.

⁷Asana ɔ́mɔtɛ́, na ɔmɛsɛ́ na ɔmuaná abɛ́ tu ŋa sɔ́ lɛ́ca hɛ́nánɔ áŋa bɛnyɛ́ma ebí buhúnyi bɔ́ Bandɔ́mɛsɛ́ ne meé tétísi anyía oocó kéé biíbi lulíki a buɔ́sɛ́ bɔ́ nyɛsɔ́mbɔ́tɔ́na nyɛ́ bɛsana ebú u kéé ményisiki bakɛla maabɛ́.

⁸Mbá, banɔ́ baláamɛ bá ɔtɛ́má, asana ayɛ́ nu tɛ ɔ́mɔ nɔ́ nyɛ́mana nú ɔbɛ́hɔ́ya áŋa anyía : A nyɛlɛca nyí Otéŋí a Waáŋá, buɔ́sɛ́ búmɔtɛ́ áŋa háyɛ tɔ́sɛ́na cɛ́ tuɔŋɔ ; tɔ́sɛ́na cɛ́ tuɔŋɔ áŋa háyɛ buɔ́sɛ́ búmɔtɛ́.[7]

⁹Yááŋa anyía u ti ŋe yéényísi onyíóyísínyi ciayɛ́ ɛndána háyɛ baacɔ ɔ bɔ́mɔtɛ́ ŋá bɔ́ bɛ́táá ; mbá u ŋaá banɔ́ eéhínyínyi bu eéhínyínyi, ananyía u ti ŋé léne anyía ɔɔcɔ ɔmɔtɛ́ é nyíme. U ŋeé léne yáaŋa anyía baacɔ bekime ɔ́ bɔ́ŋgɔ́na ohónyí wú ɔbɛ́kákálákɛ́na máábɔ́ maabɛ́, mbá bá sɔ́mba ɔkɔlɔ́ eé meéme.

¹⁰Buɔ́sɛ́ bɔ́ nyɛkahálɔ́mɔ́na nyí Otéŋí a Waáŋá káá háma hú huasɛ, háyɛ weébi naŋa waá fáaya, ɔɔcɔ tɛ bɛ́tátá. Buɔ́sɛ́ eébú, ɛŋɔ́lɔ́muaná kéé séŋúlue hú fuab na yaandándá yí ekundí, oocó yó séŋúlísíki bɛnyɛ́ma bikime e bí ŋe iínjie eese ɛ ɛŋɔ́lɔ́muaná ; na ɔmɛsɛ́ na bíáyɛ́ bɛnyɛ́ma bikime bɛ́ɔ mánɔ́kɔ́na hú táákɔ.[8]

¹¹A asana na nyɛnamá anyɛ́ bɛnyɛ́ma bikime eébí á nyɛ́mana bí oséŋúlúeke aáná, nu ŋá nɔ́ nyɛmána nú ɔbámɔ́kɔ́na baacɔ abá na yáánɔ́ ambányɛ yɛ́ nyɛbɛ́kɛ́lɛ́na na nyíánɔ́ nyibíínjie o olumitinine áŋa bifúúménénú.

¹²Tɛ́ka banɔ́ nú ŋa nɔ́ tátá, nu eeŋelikinyi fiaŋɔ nyɛkaáháma nyɛ́ buɔ́sɛ́ bú *Kilís abɔ́ Bandɔ́mɛsɛ́ maá táfa e ? Buɔ́sɛ́ eébú, oocó kéé lulíki ɛŋɔ́lɔ́muaná, ɔbála ú tɔbɛ́mbɛ tú oocó tú oséŋúlísíki bɛnyɛ́ma bikime e bí ŋe iínjie eese ɛ ɛŋɔ́lɔ́muaná.

¹³Mbá Bandɔ́mɛsɛ́ ŋaá basɔ́ bɛ́tánɛ́na na yɔɔ́sɔɔ́sɔ yɛ́ ɔmuaná na yɔɔ́sɔɔ́sɔ yɛ́ ɔmɛsɛ́ ; hɔ́á bɛsana a bɛtálɛ́mánánɔ́ áŋa ekúlú ekime, biíbi tu ŋa sɔ́ táta.

¹⁴Yaátɛ́ asana, baláamɛ bá ɔtɛ́má, a nyɛtáta anyɛ́ nú ŋa nɔ́ táta bɛsana eébí, ánɔ bɛ́kɛ́ndákɛ́na ɔbámɔ́kɔ́nɛ́na befúúménénú tɛ́ka na hɛkɔma, banɔ́ e mbuumu noómi eé buúse bɔ́ Bandɔ́mɛsɛ́.

¹⁵Énu menyí anyía yaandándá yí nyiéhínyínyi yí uusú Otéŋí a Waáŋá eéyé ŋaá banɔ́ iinjie ohónyí wú ɔnɔhɔkɔ banɔ́ bekime. A asana eéyé uusú onyíinyí u ɔtɛ́má Bóol ŋaá banɔ́ ɔ́ɔ́ŋɔ́kɛ́na tɔ́na i injiŋé acɛ́ Bandɔ́mɛsɛ́ ŋeé wuúci iínjíé.

¹⁶Híáná u naŋa wɔ yɔ́ɔ́ŋɔ́kɔ a túáyɛ́ tufule tukime ekúlú ayɛ́ u ŋaá táŋá bɛsana eébí. Tufule eétú áŋa na bɛhaála a bɛ́mɔtɛ́ a bɛ́ ŋa náta ɔlɔ́kɔ́ma ; biíbi eébí baacɔ a bɔ́mɔtɛ́ a bá tɛ abɔ́ bá ne injiŋé, beébe tɛ́ka bé bíínjíénú o olumitinine, ŋe bú kótímísi nyɛlɔ́kɔ́ma. Híáná bá ŋa bɔ́ kɛla tɔ́na a bɛhaála bí etémbí bɛ́ Ciɔɔ́ŋɛ́ cɛ́ Bandɔ́mɛsɛ́. A nyíábɔ́ nyɛkɛlaka eényí, bé ŋe bú bísúéne búábɔ́ bunyímé bɔ́ bɛ́muátá.

¹⁷Baláamɛ bá ɔtɛ́má, a yáánɔ́ aháŋá nua núáŋa o omenyi bɛsana eébí, bá maá banɔ́ kúuneke biité. Yaátɛ́ asana, énu bíkékényíki aná, nɔtɛ bɛ́nyɛ́ána anyía baŋána eébé ábɔ́ banɔ́ nénísíki ohónyí na yáábɔ́ aabɛ́ yɛ́ nyɛbɛ́kɛ́lɛ́na, bɔ́ banɔ́ aáŋíáka mɔŋɔlɛ́ a mɔɔ́nɛ́nánɔ́ a maáŋa e cíínú ɛtɛ́má noómi.

¹⁸Mbá ánɔ cɔ́cɔ́báka ne buúse, nu kɔmaka na a yaála yí nuubo noómi ne o omenyinyi ne Yésus Kilís, wáŋa ne uusú Otéŋí a Waáŋá na muasɔ́ Munohi. Nuúmi á bámɔ́kɔ́nɛ́na nááyá o otúme aámbáya ɔ ɔkɔɔ́háma bikúlú bikime, híáná yááŋa.