Read Nomaande Sut 1 Bible Online

Sut 1 - Nomaande bible

Sut 1

¹Yaŋɔ́ Súute, munyiɔnɔ mu *Yésus *Kilís, mbá ya mɛ́ŋa tɔ́na onyíinyí u Sáak ; yaŋɔ́ ɛ ŋa mɛ́ banɔ́ ɔɔ́ŋɛ́na nufule eenu, banɔ́ eebe abá *Bandɔ́mɛsɛ́ ŋaá lɔ́ŋɔ́kɔ anyía núánɔ́ bámɔ́kɔ́na bááyɛ́ baacɔ. U naŋa waá banɔ́ lénéke, u banɔ́ tétényíki a asana ne Yésus Kilís.

²Bandɔ́mɛsɛ́ á banɔ́ bɛ́cámáka mahana ekúlú ekime, wá banɔ́ iinjiekine tɔ́na ekúlú ekime ne mbuumu ne nulénéne ɔ ɔhɔla.

³Baláamɛ bá ɔtɛ́má, ɛcaná cɛ ɔ banɔ́ ɔ́ɔ́ŋɔ́kɛ́na nufule ŋaá bá cɛ a mɛ nuakɛna buéŋí, anyía yámɛ banɔ́ hémbulekine nyinohi anyɛ́ Bandɔ́mɛsɛ́ ŋaá basɔ́ nóhi basɔ́ bekime. Yaátɛ́ asana i ŋeé mi bíékínyi o nuúnu ɔ́ɔ́ŋɔ, anyía yámɛ banɔ́ ciékínyi ɔ ɔbɛ́kɛ́ndɛ́na ɔnua ɛcálɛ acɛ́ nu ŋa nɔ́ nua a asana ne olumitinine awɔ́ Bandɔ́mɛsɛ́ ŋe yiínjie bááyɛ́ baacɔ ekúlú ɔ́mɔtɛ́ e bikúlú bikime.

⁴Yááŋa anyía bɛɛbɛ́ bɛ́ baacɔ ɔ bɛ́mɔtɛ́ ne meé bú oofokine e menjiŋé aanɔ́ ɛ ɛkatɛ́katɛ́. Bí ŋeé kótímísi nyiékúnyi nyɛ́ yaála yí nuubo ayɛ́ Bandɔ́mɛsɛ́ ŋaá basɔ́ boosi. Bá ŋa bɔ́ kɛla aáná anyía bébú tóŋgínyi baacɔ anyía uúbú olíhe ú ɛnjɔkɔ́nɔ́nɔ áŋa ɔmbányɛ. Bá ŋa bɔ́ sáŋɔ́na anyía Yésus *Kilís áŋa bímuócí na yáásɔ́ Elékúŋúlu ne uusú Otéŋí a Waáŋá ; feeké Bandɔ́mɛsɛ́ na maá sɔ́mbɔ́tɔ́na yáábɔ́ asana, háyɛ yááŋa yɔɔ́ŋɔ́kɔ́nɔ́.

⁵Ta yɛ́ cáŋa á bá anyía nua núá báka o omenyi bɔmbányɛ bɔmbányɛ bɛsana eébí, ɛ ŋa mɛ́ nyɛmána wu ɔ banɔ́ bítéesi anyía Otéŋí a Waáŋá[1] ŋoó nóhi baacɔ bá bunɔŋɔ bú Islayɛ́l ekúlú ɔ́mɔtɛ́ e bikúlú bikime ɔ buɔ́lɛ́ a bunɔŋɔ bú Esíbit. E elime eécí, u ŋá kɛla anyía baacɔ bekime a bá tɛ ɔ́mɔ́ bɔ́ háya mɔŋɔlɛ́ nááyá é wéekune.

⁶Ánɔ bɛ́tááka tɔ́na asana yí *bililé bɛ́ masɔ́ma a bɛ́mɔtɛ́ e bí ti ómo bíléníne nyilimíné nyɛ́ buáŋá anyɛ́ Bandɔ́mɛsɛ́ ŋeé biíbi iinjie, bɛ́ ŋa bɛ́yúata nyíábɔ́ nyilimíné nyɛ́ buáŋá eényí. Bandɔ́mɛsɛ́ ŋeé biíbi tétényi bɛɔ́tɔ́kɔ́kɔ́nɔ́ buúse bukime a haála hé ibíne noómi, bɛ́ tátáka buɔ́sɛ́ bɔ́ nyɛkála a buáŋá.[2]

⁷Ánɔ bɛ́tááka tɔ́na asana yɛ́ bálɛ́ka cɛ́ na *Sɔ́tɔm na *Kɔmɔ́ɔlɛ na bálɛ́ka a cɛ́mɔtɛ́ a cɛ́ ŋaá bá a maabɔ́ maabána. Baacɔ bá bálɛ́ka eébé ŋa bɔ́ kɛ́láka bɛsana a bɛɛbɛ́ i iŋetí ci bililé bɛ́ masɔ́ma eébí. Bé ŋe bú líhéke olíhe ú tusɔmɔ ɔ ɔkɔɔ́háma ɔ ɔhɛŋɛna nyiketi nyɛ́ Bandɔ́mɛsɛ́ a aháŋá ne nyilíhe nyɛ́ baacɔ. Baacɔ eébé ŋa bɔ́ lɔ́kɔ́ma muuyé o oocó noómi ewú ú ti ŋé nyíme ta buɔ́sɛ́. Asana eéyé áŋa taaká ci nyiókísi a baacɔ bekime.[3]

⁸Aáná baacɔ e bé ŋe bú óófókíne aanɔ́ ɛ ɛkatɛ́katɛ́ ŋa bɔ́ kɛla tɔ́na nyɛnamá nyɛ́ bɛɛbɛ́ bɛ́ bɛsana eébí háyɛ baacɔ bá bálɛ́ka eécí. Bibébékénú bɛ́ ɛbɛ́táá bí cííbú ɛtɛ́má ŋeé beébe nyɛkɛtɛna ɔ ɔkɛla bɛsana bɛ́ ɛnjɔkɔ́nɔ́nɔ ne ciibú cɛɛ́tɔ. Bá ŋa bɔ́ bábɛ́na *Butéŋí bɔ́ Bandɔ́mɛsɛ́, bá ɔ́ɔ́mbɔ́náka bililé bí nuúmi bɛ́ Ɔmuaná.

⁹Yiíye anyía te mutéŋínyi bililé bɛ́ masɔ́ma a muáŋá Mikayɛ́l[4] bɛ́muátá tɛ ɔ́mɔ kɛla aáná, te ekúlú ayɛ́ bá ŋa bɔ́ bá bébú súŋgunyinyi, bá hɔ́kɔ́nɔnɔ omime ú Moyís[5] ne muúmu na Musɔ́mɛ́na, mu tɛ ɔ́mɔ bɛ́káná o wuúci aahɛnɛna yaahɔ́ a nyɛkála ; mbá mu ŋeé wuúci laana hú mɔsɛ : « Bandɔ́mɛsɛ́ ɔ́ɔ bɔ́nɔ́sɛ́á ! »

¹⁰Mbá baacɔ eébé ŋa bɔ́ ɔ́ɔ́mbɔ́na bɛnyɛ́ma ebí bé ti ŋe bú ményi ; biíbi bé ŋe bú ményi ɔmuaná na ɔmuaná háyɛ ɛnyama a cɛ́ tɛ a bá ne injiŋé a bɛɛtɔ́. Aáná bé ké bú nyímúkúne hú táákɔ.

¹¹Ééʼ, mahana ne beébe anyía bá ŋa bɔ́ látɛ́na bɛbɔbɔ bɛ́ Káyɛn;[6] bé mé ke bú óofokine a bɔɔbɛ́ abɔ́ Balaam ŋaa kɛ́láka a asana yɛ́ mɔɔnyɛ́ ma ɔhɔ́máka a bɛfala.[7] Bá ŋa bɔ́ kɛ́lɛna Bandɔ́mɛsɛ́ aatɔ́ ɔnata háyɛ Kolɛ́ɛ;[8] yaátɛ́ asana bé ŋe bú weékúne tɔ́na háyɛ wuúci.

¹²Ɛ́ɛ, baacɔ eébé á bɔ́ŋa bɛɔ́mɔ́ a maŋanda amá nu ŋa nɔ́ bánda. Aáná bá ŋa bɔ́ nyíá, bá múákɛna buéŋí tɛ́ka na aatɔ́ ɔlama, bá tɛ bɛ́táá bɔsɔ́ɔ́kɔ́. Bá ŋa bɔ́ hɔ́á nɔbɔ́lá e nú ŋe híŋílíene, nɔ tɛ́ naa ; hú ehúne yí ŋe húne. Bá bɔ́ŋa háyɛ bɛtɔ́kɔ́ a bɛ́ tɛ á bá na bɛtámá te ekúlú ayɛ́ bá nyɛmána ɔkátáka bɛtámá. Bá bɔ́ŋa háyɛ bɛtɔ́kɔ́ a bɛlɔbákánɔ́ a bɛkaŋá, biíbi biwéékúnénú buúse bukime.

¹³Baacɔ eébé ŋa bɔ́ kɛla bɛɛbɛ́ bɛ́ bɛsana bɛ́ aatɔ́ ɔlama, bɛ́ lɛcakana háyɛ bihíŋe abɛ́ bɛahɔ́ bɛ́ nuɔmɔ́ nɔ́ makɛ́lɛ́ naŋa núá yaáhakɛna a asálá. Bá bɔ́ŋa háyɛ tunjoti e tú ŋe húle endéŋéle haála hekime. Bandɔ́mɛsɛ́ ŋeé beébe tabɔ́nákɛ́ná haála hé olimekine ekúlú ekime i ibíne ci fííʼ a cɛ a hɔ́la.

¹⁴A asana na baacɔ eébé Ɛnɔk[9], ɛndaásɛ cɛ Átam, ŋaá cáŋa ɔkɔɔna buáyá ɔsɛ : « Lɛca, Otéŋí a Waáŋá ooci kokóokó ne cííyí ɛlɔŋɔ cí bililé bɛ́ masɔ́ma e bifúúménénú biéŋí tɛ́ka na ɔmbana

¹⁵o okokélísíki baacɔ bekime bá ɔmɛsɛ́. U kɔ́ɔ́ bɔnɔsɛ́áka bɛɛbɛ́ bɛ́ baacɔ na a asana na bɛɛbɛ́ bɛ́ bɛsana bikime ebí bé ŋe bú wuúci kɛ́lákɛ́na, na a asana na masálɔ́ mekime, na bɛahɔ́ ebí bé ŋe bú wuúci túméke. »[10]

¹⁶Baacɔ eébé naŋa bá tɛ́ abɔ́ lɔ́kɔ́ma bɔmbányɛ e cííbu ɛtɛ́má noómi ta buɔ́sɛ́ ; bé ŋe bú bícúcúle ekúlú ekime, bé líhéke háyɛ bú ŋeé beébe bíléníne. Bá ŋa bɔ́ táŋa na bumálá bukime, bé bísúékíne baacɔ na bɛmbányɛ bí mehúnyi o o beébe nyɛ́ána.

¹⁷Baláamɛ bá ɔtɛ́má, a yáánɔ́ aháŋá, ánɔ bɛ́tááka bɛsana abɛ́ *baacɔ bá ɛndɔ́ma bé uusú Otéŋí a Waáŋá Yésus *Kilís ŋa bɔ́ cáŋa ɔ kɔ́ɔnaka.

¹⁸Bá ŋa bɔ́ kɔ́ɔ́náka báyɛ : « A nyɛmana nyɛ́ ɔmɛsɛ́, baacɔ a bɔ́mɔtɛ́ ká bɔ́ banɔ́ cɛ́cáka ; bé líhéke háyɛ bú ŋeé beébe bíléníne. »

¹⁹Íbeébe ɛ naŋa bábɔ́ sálɔ́tɔ́kɔ́na baacɔ. Bá bɔ́ŋa ne ibíkéti cɛ baacɔ bá ɔmɛsɛ́ ooci ; bá tɛ́ abɔ́ bá ne *Efúúménénú yí Elilé.

²⁰Aá banɔ́, baláamɛ bá ɔtɛ́má, ánɔ cɔba ne buúse o olíhe e úúnú olumitinine noómi ; wáŋa ofúúménénú ɔ ɔhɔla. Ánɔ bɛ́cɔ́kɔ́lɔ́kɛ́na Bandɔ́mɛsɛ́ na makɛ́nda me Efúúménénú yí Elilé.

²¹Ánɔ cɔba ne buúse o olimine e nulénéne noómi anɔ́ Bandɔ́mɛsɛ́ ŋaá banɔ́ léne ; nɔ tátáka háyɛ uusú Otéŋí a Waáŋá Yésus Kilís káá basɔ́ bɛ́cáma mahana, yɔ́ basɔ́ iínjie yɔɔ́sɔɔ́sɔ yí olíhe yí ekúlú ekime.

²²Ɔ bɔsɔ́ɔ́kɔ́ a bá tɛ ábɔ́ bá bɔɔ́nɛ́nánɔ́ o olumitinine noómi, énu beébe bɛ́cámáka mahana.[11]

²³Ɔ bɔsɔ́ɔ́kɔ́ ɔ bɔ́mɔtɛ́, énu beébe sɔ́mɔ́kɔ o oocó ú nyɛkála noómi ; ánɔ bɛ́cámáka mahana bɔsɔ́ɔ́kɔ́ ɔ bɔ́mɔtɛ́ bé etémbí tɔ́na, mbá nu bíkékényíki ɔlatana na bíábɔ́ bɛsana bikime, te hú bíábɔ́ bɛlaŋa, anyía bɛ́áŋa bɛ́tɔ́bɔ́kɔ́nɔ́ ne bihíŋe bɛ́ bɛsana e bí ŋeé beébe hámɛ́na ɛ ɛtɛ́má.

²⁴Túé nyemíki Ooci a wáŋa na makɛ́nda ma ɔ banɔ́ tétényíki anyía nu ti kúféténe buúse bukime, wuúci wáŋa wu ɔkɔɔ́ banɔ́ hámánána ne obíléne a núáyɛ́ nuúmi noómi tɛ́ka na hɛkɔma.

²⁵Túé nyemíki Bandɔ́mɛsɛ́ bímuócí anyía u ŋaá basɔ́ nóhí e elime ci Yésus *Kilís, uusú Otéŋí a Waáŋá ; nááyá ne nuúmi, na buáŋá, na makɛ́nda, ne butéŋí bɛ́ á nyɛmána ɔbámɔ́kɔ́na o otúme e nyitúme nyí bikúlú bikime ɔ ɔkɔɔ́háma na aámbáya ne bikúlú bikime, híáná yááŋa.