Read Nomatsiguenga Maricos 15 Bible Online

Maricos 15 - Nomatsiguenga bible

Maricos 15

¹Oquëtaguetamananaque, yapatotaigaca itingomiegui saseriroti aisati antiasiparipague aisati iraegui ogomeantiro isanguenare Moisés. Aisati yapatotaigaca basini obatacagantatsiri icarati 71. Iquengaigaca, yoguëshotaiguëri Ira Jesos, yágaiganaqueri cara Piratoquë, ipaigapëri Pirato ira cobeingari.

²Yosamitobëri Jesos Pirato: —¿Obiroco Itingomi joríojegui? Yotabitanëri Jesos: —Jee. Naro aisonori ora picanque.

³Icantocotaguetasicari Jesos itingomiegui saseriroti, icantaiguë: —Tojai icantagueque ora te ongomeite. Te inganinate Iriro.

⁴Aisati yosamitairi Pirato icanqueri Ira Jesos: —¿Pairo te potabitëmatobitiri? Tojai icomantëgotaiguëmi cara picantaguetiro te ongomeite.

⁵Carari te irotopitëmatiri Jesos irooti cara iquenganeintasantanacari Pirato.

⁶Aro antagaisati osarini omoncaraca jiesita cara iquengaigaca joríojegui jiraisonori cara yabisobenqueri ironomire Tosorintsi cara Ejípitoquë. Cara jiesitaquë yameta Pirato iromisotocajiri paniro ira yomingui iromingamentoquë, ira icoigaiguë jorío.

⁷Ainta iromingane ijita Barabás. Yomianqueri irironta ógueri aisati icantaiguëri imatsiguenga: “Intsome ojocajiri Iromasati ogobeingarite”.

⁸Aro yapatotaigaca joríojegui, icocagaiguëri ira Pirato: —Yamaica nocogaiguini pingantinaro ora pameta: pomisotocajiri paniro iromingaga.

⁹Yotabitaigabaqueri Pirato yosamitaiguëri: —¿Picogaiguico cara nomisotocajimiri Ira Itingomi joríojegui?

¹⁰Icanque negaca Pirato aroquenta igóque cara iguisaneintasicari Jesos itingomiegui saseriroti tenta iraninte inguemisantiri Jesos matsiguenga.

¹¹Carari itingomiegui saseriroti icantacagaiguëri joríojegui: —Nocogaiguini pomisotogajiri ira Barabás.

¹²Aique yosamitaiguëri Pirato: —¿Pairo nanganqueri Ira Jesos Ira pijitaiguë Itingomi joríojegui?

¹³Icantaiguëri catsigue joríojegui: —¡Popëicotiri corosiquë!

¹⁴Yotabitaiguëri Pirato: —¿Pairo icanque quimingari ora nopëicobiriqueri? Icaimaiganaque jorío catsigue: —¡Popëicotiri!

¹⁵Icogasanti Pirato iraganinataiguëri matsiguenga. Aro yomisotocajiri Barabás, ipaiguëri joríojegui. Aisati igáqueri soraro iripasataiguëri Jesos aisati iribëquëgotëri. Isërontaigacari Jesos soraropague itsipiriacaqueri.

¹⁶Aique yágaiganaqueri Ira Jesos cara ibangoquë cobeingari, tsomagui, ora jitacha peretorio. Yapatotaiguëri omagaro basini irapisorarote.

¹⁷Aro icaagaigabaqueri Jesos manchaguintsi quiraaquisaamagori. Aisati yobetsiquëneri imatseiro iroonti totsei, imatseiqueri.

¹⁸Aique isërontaigacari, yobetsatomemegaigacari: —¡Obiro Natingomi! ¡Intimeta Itingomi joríojegui!

¹⁹Yágaiguë anchaqui ipasatantaigacari iguitoquë, ijobatopiantaiguëri, yobaticagueritotomemegasitacari, itingomintomemegacari.

²⁰Cara itsongaiguë icabíntsátaiguëri isërontaigacari, yágabitsaqueri manchaguintsi quiraaquisaamagori, icaagobairi iraisati imanchaqui. Ipëicotaiguëri Jesos cara corosiquë.

²¹Itonguibocari sërari Sirenesati, ijita Simón. Iriro iriri Arijantoro aisati Irojo. Ipaniaca parigoti, iáque Jerosarénquë. Imeratobacari soraro, igáqueri: —Páganëneri igorosite. Aro yáganëneri irooti cara

²²yaretaigaca Górogotaquë ora ocanti osigaro iguito igamaga.

²³Aro ipabitacari Jesos oja oba ogonoataga casangajengaro jitacha mira, carari te iróguimaro Jesos.

²⁴Aro ira soraropague ipëicotaiguëri Jesos cara corosiquë, aique imaguimpibintëqueri imanchaqui Jesos ipabacaguecaro yotsatiancaro.

²⁵Terai irionogatasante paba cara ipëicoqueri.

²⁶Isanguenaquero pairoraca ipëicobiriqueri. Ocanque: “Ica Iriro Itingomi joríojegui”.

²⁷Aisati ipëicoqueri pite cosirinti itsibatacari Jesos. Ainta paniro ibacosonoriquë Jesos, basini imatepacoquë.

²⁸Aro omoncaraca Sanguenari ora ocanti negaca:Itsibatacari ira cantaguetiro te onganinate.

²⁹Ainta abisanaqueri abatsiquë iniopëri Jesos, icabegaiguëri, ipoteguitotaigapa,

³⁰icantaiguëri: —Obiro ogomeriguetirone ibango Tosorintsi, aisati ongaraque maba cataguiteri, pobetsicairo. Atsi yamai pigabisaicotajima Obiati. Cagarimica matobiantatsiri, piguëtajima corosiquë.

³¹Aisati isërontaigacari itingomiegui saseriroti aisati iraegui ogomeantiro isanguenare Moisés icantobaca: —Yogabisaicotaiguëri imatsiguenga carari te iragabisaicotima Iriati.

³²Iriroca Itingomi joríojegui, Agabisaicoontatsiri, iraguëtajimata Iriati corosiquë. Nanetsaiguëri, aro nanguemisantaiguëri. Aisa icanca ira cosirinti itsibatancari ipëicoqueri icantocotaguetasicari Ira Jesos, icabegaiguëri aisati. Cara Icamaque Jesos.

³³Cara catinga paba otsitiniguitetanë antagaisati quibatsi irooti cara inëmatanë paba ochapinitanë.

³⁴Cara ochapinitanë icaibatanë Jesos. —Eroi, Eroi, ¿Irama sabacatani? Ora ocanti: “Pabati, Notosorintsite, ¿Pairo pijocobitanëna?”

³⁵Ainta matsiguenga cara, iquemaiguëri icantaiguë: —Pinguemobëri. Icaimërini Erías comantantatsiri.

³⁶Aro isiganaca poro, yáguë ichomicantaro, yoaquero obaaquë cochoari. Yoguëneri chocopiquë itimagonaguitanaca ipabitacari Jesos, icanque: —Irinita. Atsi anetseri aroca iribocasitapëri Erías iraguëpëri iragabisaicoqueri.

³⁷Aro icaimasantanë Jesos, irooti icamantaca.

³⁸Cara icamaque Jesos, aito cara otisaraanaca aganguisati ora yotigantaro ibango Tosorintsi. Iroonti oquibepiriga tera yoguëro arota quero iqui pairiraca. Oparintaca jonoquë, otisaraaca irooti osobi.

³⁹Aro ira capitán inetsaseguiri Jesos, ati icanta cara icaibatanë aisati icamaque. Icanque: —Aisonori Ica sërarica Iriro Itomi Tosorintsi.

⁴⁰Aintasati cantaqueronta tsinanepague onetsaiguëri Jesos. Ainta María Magararasato, aitosati basini María iniro Santiago carantatsi aisati iniro José, aisati Saromé.

⁴¹Ocapague tsinane poguiataiguëri Ira Jesos cara Garireaquë, opaiguëri iraperi, tojai omitocoiguëri. Aisati ainta basini tsinanepague aguiataigapëri irooti Jerosarénquë. Itiaiguëri igamaga Jesos omoroquë.

⁴²Aroque ochapinitanë. Iroro cataguiteri cara yobetsicaiguë jiesita queroquerai pareta sábaro cara imagoriaigui.

⁴³Aro ipocasiqueri Pirato poro Arimateasati jitacha José. Iriro icarataigui basini obatacagantatsiri icarati 71 cara yapatotaigaca. Iriro iniacaninataiguë matsiguenga aisati yoguiaquero iragáantane Tosorintsi cara intingomibintaiguëri antagaisati matsiguenga. Te intsoroguiri ira cobeingari; ipocasipëri yamanopëri: —Camaque Jesos. Nocogui pinintacaguina náganëri igamaga nomianqueri omoroquë.

⁴⁴Imabocaca Pirato cara aroque icamaque Jesos. Icaimagantëri igapitante soraro, yosamitobëri: —¿Aisonori camaque Jesos?

⁴⁵Cara icomantëri capitán Pirato cara aisonori icamaque, ipëri José igamaga Jesos.

⁴⁶Aique iáque José yamanantëro tocoya caninaro irorai, yoguëpëri igamaga Jesos, iponatancari tocoya, yomianqueri omoroquë ora yomoroquera jirai cara mopëquë, ititiguëro mopë yasitocoontobacari.

⁴⁷Cara yomianqueri igamaga Jesos tsomagui onetsaiguëri María Magararasato aisati basini María iniro José.