Read Nomatsiguenga Maricos 5 Bible Online

Maricos 5 - Nomatsiguenga bible

Maricos 5

¹Aro yaretocoiganaca antatinta cara itimaigui Gararasati.

²Yaguëtanë Jesos cara pitotsiquë. Aro cara itia camatsirini ipaniaca sërari inancari camagari.

³Itimi cara itia camatsirini. Te pairi aguëshotantimarine ora coshotsari sogatsa.

⁴Aroque tojaitaque yoguëshotapinintaigabitacari imatsiguenga cara iguitiquë aisati ibacoquë carari itimishairo yobëshopiantairo yoguiripijitajiro. Te pairi agabeirine.

⁵Përosati tsitiniriquë aisati cataguiteriquë iátopiantë cara itia camatsirini aisati oguitojapaguequë. Përo cara icaibainteti aisati itobaguecaro mopë.

⁶Iniobëri jaanta Ira Jesos, isigasipari yobaticagueritotasipari,

⁷icaimapë icampë catsigue: —¿Pairo picantobipëna naro, Jesos Itomi Tosorintsi jonoquënintaberi? Iniaquinanta Tosorintsi, nomanaquemini cara quero pitsipiriacaguina.

⁸Inibatë negaca aroquenta Jesos igáqueri: —Obiro camagari quimingari, pijátopitairi ica sërarica.

⁹Aisati yosamitëri Jesos: —¿Pairo pijita? Yotabitanëri: —Tojai najitaiga arosonorinta ninaigui.

¹⁰Quero pigátaiguina jaanta. Tojai yamanasantobëri Ira Jesos.

¹¹Ainta inaigasegui arosonori chancho yapaigasegui cara tongagariquë.

¹²Aro ira camagari yamanaiguëri Jesos: —Aroca pijocaiguëna, pigátaiguena cara chanchoeguiquë ninampëmari iriro.

¹³Yotabitanëri Jesos: —¡Atsi pijáigue! Aro isotocaiganajiri sërari camagari, inantaigapari ira chanchoegui. Aro isigaiganaca chancho cara tarangaquë, imatsematseiganaque angaarequë tobotn tobotn tobotn. Itsiticaiganaque ijogataiganaca omagaro chancho icarati 2,000.

¹⁴Aro ira omisantaiguiri chancho isigaiganaca icomantagueigapëri imatsiguenga cara poeboroquë aisati togantsipaguequë. Aique iátasitaiguëri Jesos tojai Gararasati iraniaiguëro omagaro atiraca ocanta.

¹⁵Iniaigapëri Ira Jesos aisati ira inabitaca camagari. Ainta isobiaque iguitiquë Jesos, iquitsagasiga, iquengaa caninasati, aisati inibatai caninasati. Aro itsorogaigapë matsiguenga.

¹⁶Ira niaiguëro antagaisati icomantasantaigabaqueri basini ati icanta Jesos yogabisaicoqueri ira inabitaca camagari aisati icomantëgotaiguiri chanchoegui.

¹⁷Aique iraegui Gararasati yamanaiguëri Ira Jesos: —Atsi pijátaje yamai, quero pipocaji yaca aisati.

¹⁸Aro yotetanaa Jesos pitotsiquë. Yamanabecari ira inabitaca camagari: —Nocoguini naguiatanëmi.

¹⁹Carari te iranintacaguiri Jesos. Icanqueri: —Quero poguiatina, pinëni. Pijátasitiri pomatsiguenga cara pobangoquë, pingomantiri ora icanquemi Tosorintsi tojai icábintsëmi.

²⁰Aique iáque sërari icomantaguepëri Gararasati antagaisati Tecaporisiquë cara ocarati 10 poeboro ati ocanta cara yogabisaicoqueri Jesos. Iquenganeintasantacari omagaro quemaiguëri. Jesos yoguibegajiro araasetatsiri; aisati yoganiatairo irisinto Jairo.

²¹Aique imontëcotanaa Jesos. Cara yaretaja onamijaquë antatinta, yapatoibiritaigapari onamijaquë tojai matsiguenga.

²²Yarepari sërari jitacha Jairo. Iriro obatacaguiri jorío cara pongotsiquë cara yapatotaiga. Cara iniopëri Jesos yobaticagueritotasipari,

²³tojai yamanasantapëri: —Pënibaque ongamaque nasinto. Popogopë Obiro pogapënero pobaco arota obeganaima.

²⁴Aro iátacaqueri Jairo Jesos. Ainta tojai matsiguenga aguiataiganaqueri itsinatsinataiganaqueri Ira Jesos.

²⁵Ainta tsinane piraaseti cosamani ocarati 12 osarini, tojai otsipiriaque.

²⁶Pipënabentaguetabecari jompiantatsiri omagaro ora pasinta, te aropei te iromitocotëmatiro.

²⁷Oquemocotobëri Jesos, aro piátasiqueri itisitaquë Jesos, oquenopë antagaisatiquë matsiguenga, potsagaqueri Jesos cara ocarati iguitsagare,

²⁸oquianca: “Aroca iroonti notsagaitëri onamiquë iguitsagare aroje iragaguibegajina”.

²⁹Potsagaqueri, aito cara pibeganaa, aro ocaratanai oraa.

³⁰Aro igónijinca Jesos cara yogaguibegajiro poro itasorintsitequë. Yapisitaca, yosamitaiguëri matsiguenga: —¿Pairi otsagaitënaro naguitsagare?

³¹Yotabitaiganaqueri irogomere: —Ishongaiguëmi tojai matsiguenga itsinatsinataiguëmi. ¿Pairo posamitobiquena: “¿Pairi otsagaitënaro naguitsagare”?

³²Përosati inetsaguetaiguëri matsiguenga arota iraniaqueri pairiraca otsagaqueri.

³³Aro otsoroganë tsinane omogomogoatanaca. Pigóque tigueti ongantima ománanëma, cara igóquero Jesos, aro parepari pobaticagueritotasipari, ocomantëri antagaisati.

³⁴Icanquero Jesos: —Nomatsiguenga, aroquenta piquemisanquina nogaguibegajimi. Yamai pijáte pingaigasëretanae, pomagoriasëretanë.

³⁵Cara inibasigui Jesos, yarepa iratirite Jairo ipaniaca ibangoquë, icomantapëri: —Aroque ocamaque pisinto. Pitsipiriasica yamai páganëri Ira Ogomeantatsira.

³⁶Iquemobëri Jesos, yotabitanëri ira obatacaguiri jorío: —Jairo, quero pitsorogui. Patiro pinguemisantina.

³⁷Te iranintacaguiri quero pairi aguiatirine, irianti ira Peroro, aisati Santiago, aisati Joan ireinti Santiago.

³⁸Yaretaiganaca ibangoquë Jairo. Iniaigapëri tojai matsiguenga iraicotaiguëro catsiguesonori irisinto Jairo aisati yogasëretocotaigacaro.

³⁹Aro icanaque Jesos tsomagui, icantaigapëri: —¿Pairo picaibaibiriti? ¿Pairo piraicobiritaiguëro? Teni ongame janequi, pisamini.

⁴⁰Icabíntsátaigabaqueri; aro igátaiguëri antagaisati irisotocaigue sotoquë. Aro yáganëri iri janequi, aisati oniro, aisati irogomere icarati maba, icaiganaque tsomagui cara pinasegui ogamaga irisinto Jairo.

⁴¹Yágobagotapëro obaco Jesos, icanquero: —Tarita, comi. Ocanti: “Janequi, nanganquemi pingabiritima”.

⁴²Aito cara ocaniatanai, pipigapaa osëre, ocabiritanaa, oparintanaa panëitanai aroquenta pogabisë 12 osarini. Iniaiguëro ira inasegatsi tsomagui, iquenganeintasantaiganaca.

⁴³Aro icantasantaiguëri Jesos: —Quero picomantëmatiri pairiraca. Pomero operi.