Read Nomatsiguenga Maricos 6 Bible Online

Maricos 6 - Nomatsiguenga bible

Maricos 6

¹Aique iáque Jesos, ipiganaja yaretanaa iguebatsitequë. Yoguiataiganajiri irogomere.

²Cara cataguiteriquë ora camagoriantague, icanaque pongotsiquë cara yapatotaiga jorío, yogomeantapë. Iquemaigabaqueri tojai matsiguenga, iquenganeintasantaigacari icantaiganaque: —Ica sërarica, irianti nomatsiguengasonori. ¿Nega opaniaca oca yogomeanti? ¿Nega opaniaca itasorintsite ora itasonganta? ¿Cagarico ira caripintero obetsiquiro mesa, sobicomentotsi, ira otomi María, ireinti Santiago, aisa José, aisati Joras, aisati Simón? ¿Aintasati iritsiroegui otimi yaca poeboroica? Aro itsoingaiguëri, icomëtaigacari, iguisaneintaiguëri.

⁴Icanëri Jesos: —Ainta quemisantaiguëri ira quinguitsatiro Irinibare Tosorintsi, carari itsoingaiguëri imatsiguengasonori.

⁵Tenta inguemisantaigueri cara Nasarequë te tojai iritosongantaguete Jesos cara. Porocagueanti yoguëro ibaco cara janaitatsiriquë, yoguibegajiri.

⁶Iquenganeintasantanëri imatsiguenga Jesos tenta inguemisantaigueri. Jesos igátaiguëri irogomere inguenguitsataguetomotiri matsiguenga.

⁷Aro yapatotaiguëri irogomere caratatsi 12, igátaguequeri pitenaque, yagobiacagaiguëri irojogantaguequimari camagari.

⁸Icantasantaiguëri: —Nagátaiguëmi yamai, carari quero páganëro pairoraca. Iroonti páganë pigotiqui. Quero páganëro poperi, querootisati pitsaguine, querootisati quirequi.

⁹Aisati pisapatote poganëma carari quero páganëro pite piguitsagare.

¹⁰Aisati icanqueri: —Atiraca pijáiguë, pingapë ibangoquë ira cajemobëmine. Pintiomotiri irooti cara pigaganëma.

¹¹Aitica poeboro cara te iranintaigue irágacaninataigabaquemi te inguemisantaigabaquemi, popotetanëneri quibatsipane pisapatotequë, aro pigaganëma. Pingantiri: “Tenta pinguemisantobëna, aiquenta iratsipiriacaquemi Tosorintsi”.

¹²Aique iquenaguetaiganaque, iquenguitsataguetomotaiguëri matsiguenga: —Pingantaigaima yacaqueroca obirojegui, pijocajiro ora picantaguetira te onganinate.

¹³Tojai igátaiguëri camagari jaara. Aisati itiriantari oguei asaitona tojai ira janaitaguetatsi, yogaguibegajiri. Eroris yógagantëri ira Joan.

¹⁴Tojai matsiguenga iquemocotaiguëri Jesos, aisati iquemocoqueri Eroris cobeingari cara Garireaquë. Icanë: —Irirojengari Joan baotisatantatsiri, ira camënguitsi caniatanaatsi. Iroro itasongantaguëti.

¹⁵Carari icanque basini: —Irianti Erías. Basini icantocotaiguëri Jesos: —Irianti comantantatsiri cantaca ira comantantatsi jirai.

¹⁶Carari Eroris iquemocoqueri omagaro, icanque: —Irirojengari Joan, ira nibatëacagantabitaca, caniatanaatsi.

¹⁷Aro jirai Eroris yágabitsaqueri iina ireinti jitacha Jeripe. Iina jitacha Erorías. Icantopiantëri Eroris Joan: —Te ongomeite págabitsatiri iina pirenti. Ocanti isanguenare Moisés: “Quero pinebetaro iina basinipague”. Oguisaneinqueri Joan Erorías, ocogasantabitaca ógagantirime carari te ongantiro tenta iranintacaguiro Eroris ira ojimentaa.

¹⁹

²⁰Eroris iniacaninatëri ira Joan. Igóqueri Joan caninari, iquemisanqueri Tosorintsi. Te iranintacaguiro Erorías cara ógagantiri. Iquenganeintabitanacari Joan Eroris iquemisantabecari; icogasanti inguemiri carari te inguemisantiri.

²¹Aro omoncarapaa cataguitëri cara iquianca Eroris cara inë jirai. Icaimagantaiguëri tojai itingomipague aisati itingomipague soraro aisati basini ira obatacagaiguiri Garireasati. Yapaagaiguëri.

²²Aro ocanaque osinto Erorías, obairapë. Poganinataiguëri Eroris aisati igaimane. Icantasanotëro Eroris: —Pomanina pairoraca ora pininti. Aro nomëmiro.

²³Cara aisonori iniaquina Tosorintsi, igóque quero namatobitimi, nangantasanotëmi, pairoraca pomanaguetina, aro nomëmiro. Pingoicoquinaca aganguisati nagáantane, aro nomëmiro.

²⁴Pisotocanai iroro, ocomantëro oniro, ocanquero: —¿Ina, pairo nomanaqueri? Potabitanëro: —Pomaniri ora iguito Joan baotisatantatsiri.

²⁵Ocanaji omanapague, ocanqueri Eroris: —Nocoguini yamaica pógagantiri Joan baotisatantatsiri, aique pomabaquinaro tsibetaquë iguito Joan.

²⁶Aro tojai yogasëretasantaca cobeingari cara icantasanotëro quero yamatobitiro, aisati aroquenta iquemaiguëri antagaisati igaimane ora icantasanotëro irisintotsari.

²⁷Aro Eroris igáqueri poro soraro ógantatsiri iriáte omanapague iráquintiro iguito Joan. Iáque cara iromingamentoquë yobatëaqueri ira Joan.

²⁸Aique yamapënero tsibetaquë iguito Joan, ipëro irisintotsari Eroris. Iroroque opëro oniro.

²⁹Cara iquemaiguë irogomere Joan, iátasiqueri, yágaiganaqueri igamaga Joan itiajiri. Itasonguëro pan Jesos, yomitojaiguëro.

³⁰Ipigaigapaa irogomere Jesos. Yapatotaigapa icomantaigapëri antagaisati ora icantaiguë aisati omagaro yogometaiguë.

³¹Ainta tojai matsiguenga ira bocasitaigapëri Jesos, aintasati ira pigaiganajacha. Tigueti ingantima irape Jesos aisati irogomere. Aro icantaigabaqueri Jesos: —Intsome casiriconiati arota pomagoriaigue arosata.

³²Aro yotetaiganaja pitotsiquë iátocotaiguë cara tera ontimingani.

³³Carari iniaigabaqueri matsiguenga cara iáiguë, igótaigabaqueri negaraca iriáiguë. Aro ipaniaigaca poeboropaguequë, isigaiganaca cara onamijaquë, ibataiguëri Jesos aisa irogomere, yaretaigaca teraiquerai iragatocopë Jesos, yoguiaigapëri.

³⁴Cara yaguëtanë Jesos cara pitotsiquë, iniopëri tojaisonori matsiguenga yapatoibiricari, icantaneintëgotaigapëri inaisiguinta icantaigasega oisha ira te irine ira omisantiri. Aro tojai yogometaigapëri pairoraca.

³⁵Cara ochapinitanë icantaigapëri irogomere: —Yaca teca ontimingani, aroque ochapinitanë.

³⁶Yamai pigátaigueri icaegui matsiguenga iriátaguetaje poeboropaguequë aisati togantsipaguequë iromananteta iraperi, tenta ine yaca.

³⁷Yotabitaiganaqueri Jesos: —Pomaigueri obirojegui ora irapaiguë. Icantaiguëri irogomere: —¿Pairo nangantaiguë? ¿Picogui najáte nomanantë pan ingaraque 200 tenario, nomaguetaiguëri? Querojengari cotonguiboro aguireguite.

³⁸Yosamitaiguëri Jesos: —¿Ati ocarati inatsi pasiatiegui pan? Atsi pijáte, pinetsero. Cara igóquero irirojegui, icanqueri: —Aiti pabocorooti pan, aisati ainta pite sima.

³⁹Icantaiguëri irogomere Jesos: —Pigasobicaigueri antagaisati irisobicagueigue arosatapague cara tobarisiquë.

⁴⁰Aro isobicagueiguë. Ainta ira caraquenguitsi 100, aisati basini icarataiguë 50, aisati icantaigaca basinipague.

⁴¹Aique yáguëro Jesos ora pabocorooti pan aisati pite sima, inetsanaque jonoquë, icanqueri Iriri: —Pabati, nacarasiatocoquemiro oca noperijeguica popaiguënaca. Aro itibatsaaguequero pan Jesos, yotsatengaiguëri irogomere arota imaiguëri matsiguengajegui. Aisati yotsatengaigacari sima.

⁴²Yapaiguë antagaisati, iquemaigaca.

⁴³Aique yobiitaguetajiro irogomere ora irangarataneegui, iagajiro 12 cantiri.

⁴⁴Yapaiguëro pan tojai sërari icarati 5,000. Yanëiatanë Jesos jonoicaa nija.

⁴⁵Aique icanque Jesos: —Nogomere, potetaiguema pitotsiquë. Pomontiaiganajima, pobatina antatinta cara Betsairaquë. Yamai nagátaiguëri ira botoibiritaiguina iriáigue ibangopaguequë.

⁴⁶Aro igátaiguëri yobetsataiganajari. Aique iáque Jesos oguitojaquë yamanopë, inibataqueri Iriri.

⁴⁷Ainta Jesos paniro inë cara otsitinitanë. Ora pitotsi pinë aganguijaquë.

⁴⁸Iniaiguëri irogomerejegui icomatabitacaro pitotsi, carari poguipigapigatocoqueri sintsiri coguentima. Aro igogaraaque iáque Jesos aiquero pitotsiquë, yanëiaapë jonoicaa angaarequë, te iritsitigue. Irabisanaquerime,

⁴⁹carari iniaigabaqueri yanëiaapë jonoicaa nija, icaibaitaiguë icantobaca: —¡Eeee! ¡Coraque camagari cara iráganacái!

⁵⁰Antagaisati iniaigabaqueri, itsorogasantaiganaqueri. Aro yotabitaigapëri Jesos: —Quero pitsorogui. Naanti bocapaatsi, pinganinasëretanëtigue.

⁵¹Aro yotepa Jesos pitotsiquë, itsibataigaari. Aito cara osantocotanai coguentima; iniaiguëro irogomere iquenganeintasantaiganaca.

⁵²Aisati icanta iniaigabitacaro pan cara itasonguëro Jesos carari te inguengairo. Aisati iniaigabitacari Jesos cara yanëiaquero nija, carari terainta irogótiri Irironta Itomi Tosorintsi. Jesos yogaguibegajiri janaitaguetatsiri cara Jenesarequë.

⁵³Aro imontiaiganaja. Yaretaiganaja Jenesarequë. Yoguëshotëgotaigapëro ibito.

⁵⁴Cara yaguëtaiganaque, igótobëri Jesos matsiguenga.

⁵⁵Cara igóiguë ainta Jesos aro isigaiganaca icomantobaguetanaca matsiguengajegui poeboropaguequë, yamaigapëri janaitaguetatsiri yamantaguepari jatasintsi.

⁵⁶Iquenagueque Jesos poeboropaguequë aisati togantsipaguequë. Negaraca iáque, yamapëri janaitatsiri, yoguëquineri iraganguitëirequë cara iniobëri Jesos yamanaiguëri: —Pinintacaguina notsagaitimiro piguitsagare cara ocarati. Aro yogaguibegajiri antagaisati ira otsagaqueri.