Read Nomatsiguenga Maricos 7 Bible Online

Maricos 7 - Nomatsiguenga bible

Maricos 7

¹Aro yapatoibiritaigapari Jesos ira bariseopague aisati ira ogomeantiro isanguenare Moisés. Ipaniaigaca Jerosarénquë.

²Iniaigapëri irogomere Jesos cara yapaigui; te inguibocotima. Icantaiguë bariseo: —Caninataque inguibocotaiguema queroquerai yapi arota iraganinasëretima. Cara te inguibocotima, iroonti quimingari ibaco.

³Yametaiga bariseoegui aisati omagaro joríojegui queroca iquibocotasanta, quero yapi, cara yametaiga jirainisati aisati yogometaiguëri ira jorío.

⁴Cara iripigaima cara poeboroquë cara yapatotaiga matsiguenga ipimantagueti pairoraca, queroca iquibocota jorío, quero yapi. Aisati yametaiga inguibopiantiro pairoraca basini: pojo, pachaca, oya, omagaro.

⁵Aro ira bariseo aisati ogomeantiro Sanguenari yosamitaiguëri Ira Jesos: —¿Pairo te irometaigabiritimaro pogomere ora yametaiga omatsiguenga jirai? Yapantaigacaro ibaco quimingari. Icantagueti ora te onganinate.

⁶Yotabitaiganaqueri Jesos: —Obirojegui matobiantatsiri cara aisonori icomantëgotaiguëmi Isaías cara isanguenaque jirai:Icanë Tosorintsi: “Ica matsiguengaca inibatasitëgotina ora caninaro, carari te inguenganeintina.

⁷Yamanocotasitina carari yapatotasitaiga; iroonti yogomeantaigui irasi matsiguenga”.

⁸Aisati icantaiguëri Jesos: —Teni pinguemisantiro ora icanquemi Tosorintsi, pijocasicaro; iroonti piquemisantasica ora yogomeanti matsiguenga.

⁹Cara pametaigaro iroonti irasi pomatsiguenga, pitsoingaiguëro ora icanque Tosorintsi.

¹⁰Isanguenaque Moisés:Pinguemisantiri piri aisati piniro. Ingameta ira cantëgotaguetasitari iriri aisati iniro.

¹¹Carari obirojegui, pogometaiguëri pomatsiguenga: “Pingantiri ira asintimi: ‘Quero nomitocotimi. Nomëmime quirequi, nangantaneintëgotëmime carari aroque natsita nacanqueri Tosorintsi nopëri Iriro naguireguite’ ”.

¹²Cara picanque negaca, te pinintacaguiri ingábintsairi iriri aisati iniro,

¹³te pogomeantiro Irinibare Tosorintsi, teatisati pinguemisantiro. Iroonti piquemisantaiguëro ora yametaiga pomatsiguenga jirai aisati pogaganëneri basini. Aitosati aiti tojai ora picanque cantacha nega. Jesos yogometocoquero pairoraca aguimingasëretiri matsiguenga.

¹⁴Aique Jesos icaimaiguëri ira botobiritaigari, icantaiguëri: —Pinguemina, obirojegui, pigótiro oca nocomantaiguëmica:

¹⁵caninataque opaiguero pairoraca queronta poguimingatiro asëre. Orari ora inibatasitagueta iroro aguimingasëretacái cara aquianquero quimingaro.

¹⁶Aitica piguemita ora piquemanta, pinguemisantiro ora nacantaiguëmi.

¹⁷Aro ijocaiganaqueri matsiguenga botoitacha sotoquë, icanaji Jesos pongotsiquë cara yosamitëri irogomerejegui: —Teni nanguemimi; pingomantina ora ocanti picantaiguëri matsiguenga yamai.

¹⁸Yotabitanëri Jesos: —¿Teraico pigóte obirojegui aisati? ¿Teco pigóte pairoraca opë ojáque asegotoquë aique agabisairo? Te ongantiro pairoraca asërequë. Iroro yogomeantaguëque cara antagaisati perintsi caninaro opëro.

²⁰Aisati icanque: —Ora paniacha iraneingomentoquë matsiguenga, ora iquengagueta, iroro aguimingatëri.

²¹Ora iquenga matsiguenga opaniaca tsomagui. Iquenguiro quimingari, aique icanquero te onganinate. Cara intaguetiro tsinane cagaro iina aisati cara tsinane ontaguetiri sërari cagari ojime; cara icositanti; cara yóganti;

²²cara inebetaro ora irasi basini; cara icantagueti pairoraca te ongomeite; cara yamatobianti; cara inintasanotëtiri ora yasinta basini; cara icantocotaguetasitari basinipague matsiguenga; cara iquengasita caninari iriati; cara te inguengueri Tosorintsi;

²³antagaisati ocapague paniacha cara iraneingomentoquë matsiguenga. Iroro oca aguimingataguetiri; carari Tosorintsi iniaqueri matsiguenga cara icantaguetiro quimingari. Oquemisanqueri Jesos tsinane cagaro jorío.

²⁴Aique iáque Jesos aronisatiquë Tiro. Icanaque pongotsiquë, te iraninte irogótirime matsiguenga, carari tigueti ingantima irománima.

²⁵Ainta tsinane, ora osinto inancaro camagari. Cara oquemocoqueri Jesos, piátasiqueri pobaticagueritotasipari iguitiquë Jesos.

²⁶Iroro cagaro jorío, opaniaca cara Sirojenisiaquë. Pamanopëri Jesos: —Inancaro nasinto camagari. Pigátajinero.

²⁷Icanquero Jesos: —Nipocasique naguibatëri nomatsiguengasonori nomitocoqueri iriro. Caninataque irapeta iritsita janequi. Te ongomeite ágabitsatiri pan janequi arota omionguëneri otsiti itiomijani.

²⁸Carari potabitanëri: —Aisonori ora picanque, Natingomi, carari yapiro otsiti opetoqui ora yobariaguetaigui janequi.

²⁹Icanquero Jesos: —Caninataque piquemisanquena. Yamai pijátaje. Ira camagari aroque isotocanairo pisinto.

³⁰Aro pipiganaja obangoquë, oniopairo osinto pinariasega osamamentoquë. Aroque isotocanairo camagari. Jesos yoguibegajiri sërari maguemitari.

³¹Aique yogaganaca Jesos, iquenaque Tiroquë, Sirónquë, aisati Tecaporisiquë cara pini 10 poeboro. Yaretaja angaarequë jitacha Garirea.

³²Yamaigapëri poro sërari maguemitari aisati te irinibatasante. Yamanaiguëri Ira Jesos iroguineri ibaco iragaguibegajiri.

³³Ainta tojai matsiguenga. Aro Jesos yáganëri casiriconiati, yomianquineri ibatsapaco cara iguemitaquë. Ijobabococa, yotsaganinequeri ira te irinibate cara ininequë.

³⁴Aique Jesos inetsanaque cara Jonogaguitequë, yaneingasantanë, icanque: —Epeta. Epeta ocanti pishapiriaguemitatanaima.

³⁵Aro ishapiriaguemitatanaa, iquemasantanai. Aisati posebatanaa inine, inibatasantanai.

³⁶Aro icantasantaiguëri Jesos: —Quero picomantëmatiri basinipague matsiguenga. Carari te inguemisantaigueri, aiquero icomantëgotanëri.

³⁷Ira matsiguenga iquenganeintasantëri Jesos, icantaiguë: —Antagaisati icanque caninari. Iquemacaguiri maguemitari aisati inibatagairi ira te irinibate caninasati.