Read Nomatsiguenga Irocas 23 Bible Online

Irocas 23 - Nomatsiguenga bible

Irocas 23

¹Aito cara omagaro jorío obatatsiri yágaiganaqueri Ira Jesos catingasatiquë Pirato, ira cobeingari Iromasati.

²Aro icomantëgotaigapëri Ira Jesos, itsoiguëgotaigari: —Teni ingomeite Ica. Naniaiguëri cara yamatobitaiguëri nomatsiguengajegui, icantaigabitacari: “Quero popiri cobeingari quirequi”. Aisati icantopianti: “Naro Quirisito, pintingomintina, pinguemisantina Naro”.

³Yosamitëri Jesos Pirato: —¿Aisonorico? ¿Obiroco Itingomi joríojegui? Yotabitanëri Jesos: —Jee, Naro aisonori ora picanque.

⁴Aro Pirato icantaiguëri itingomipague saserirotijegui aisati iraegui ogomeantiro isanguenare Moisés aisati tojai matsiguenga botoitaigacha, icanque: —Ninibatëri Ica sërarica. Te ine pairo ingantaguetëmate ora nangasitígabiriqueri.

⁵Carari icantopiantaiguëri jorío: —Iguisagaigacari ira matsiguengajegui, icantaiguëri: “Intsome ojoquiri ogobeingarite”. Iparintaca cara Garireaquë, yamai yaca aisa icampa, yamatobitaguëpëri tojai. Pirato igáqueri Jesos cara Eroriquë.

⁶Cara iquemaque Pirato, yosamitëri: —¿Iriroco Garireasati Ica?

⁷Yotabitëri: —Jee, Iriro. Icanqueri Pirato: —Aro, atsi páganëri cara Eroriquë igobeingarite Garireasatiegui. Yamai ainta yaca Jerosarénquë; ipoque cani.

⁸Aro yágaiganaqueri. Iniobëri Eroris, icaninatanë. Tojai iquemocotopiantëri Jesos itasongantagueque; icogasantë iraneiri. Icogabeca iraneirime cara itasonganti.

⁹Cosamani yosamitaguetabecari Ira Jesos, carari te irotopitiri.

¹⁰Tojai yogatsitapinintaiguë itingomipague saserirotijegui aisati iraegui ogomeantiro isanguenare Moisés, icantaiguë: —Teni inganinate Ica, aiti icantagueti ora te ongomeite.

¹¹Aique isërontaigacari Ira Jesos Eroris aisati omagaro isorarote. Irooti iquitsagatacagaigacari caninaro quitsagarintsi icantomemegacari itingomi, isërontobitaigacari. Aique yoguipigaineri Pirato.

¹²Jirai iguisabacaga Eroris aisati Pirato, carari yamai iparintacaro yágacaninatobaca, ijocajiro cara iguisabitobaca jirai. Ipëgantaari Jesos ira Barabás.

¹³Aique Pirato yapatotaiguëri ira itingomipague saserirotijegui aisati obatacagaiguëri jorío aisati tojai basini matsiguenga, icantaiguëri:

¹⁴—Pinetse, carani pamaigabitënari Ica, picantaiguëna yogometiri matsiguenga cara irojocajina naro aisati basini cobeingari natsipa. Piniaiguë cara nosamitasantëri pairoraca, carari naniacaninatëri, te ine irantane ora te ongomeite. Picantasitaigaca obirojegui.

¹⁵Aisati ira Eroris iniacaninatëri, irooti cara yoguipigainari. Ica te ingantaguete pairoraca ora nógobiqueri.

¹⁶Yamai nopasatagantëri, nomisotoqueri.

¹⁷Aro antagaisati osarini omoncaraca jiesita cara iquengaigaca joríojegui jiraisonori cara yogabisaicobintëri ironomire Tosorintsi cara Ejípitoquë. Cara jiesitaquë yameta Pirato iromisotocajiri paniro iromingane, ira icoigaiguë jorío.

¹⁸Carari icaimaiguë omagaro jorío: —¡Pógagantiri Ica; iriroque pomisotocaje Barabás!

¹⁹Yomianqueri ira Barabás irironta ógueri aisati icantaiguëri imatsiguenga: “Intsome ojocajiri Iromasati ogobeingarite”.

²⁰Icogabetanta Pirato iromisotocajiri Jesos, icogabeca iraguimairentaiguërime matsiguengajegui,

²¹carari aiquero iáiguë icaimaiguë: —¡Popëicotiri, popëicotiri!

²²Yogatsitairo Pirato maba icantaiguëri: —¿Pairo icanque ora nopëicobiriqueri? Nosamitaigabitëmi obirojegui aisati nosamitabitacari Iriro. Te ine ora pigótacagaiguëna ora icantagueti te onganinate. Te ine ora nagamagobiqueri. Iroro nopasataguëqueri, nomisotocajiri.

²³Carari përosati icaimaiganaque: —¡Popëicotiri, popëicotiri! Aiquero icaimasantaiganaque iróoti cara yagobiaiguëri ira Pirato ora icogabeca iriro.

²⁴Icantaiguëri: —Aro nanganque ora picocagaiguëna.

²⁵Yomisotocajineri ira Barabás, ira yomianque jirai aroquenta yogamaguëri matsiguenga aisati icoque irojocajiri igobeingarite. Ipaiguëri Barabás, carari igáqueri isorarote irágaiganaqueri Jesos cara iribëquëgotaiguëri. Yágaiganaqueri Ira Jesos iribëquëgotëri.

²⁶Aro yágaiganaqueri Jesos iribëquëgotaiguëri. Itonguibocari Sirenesati, ijita Simón, ipaniaca parigoti. Aro imeratobacari soraro iráganëneri Jesos igorosite, yoguiatëri yanatanëneri.

²⁷Aisati yoguiataiguëri arosonori matsiguenga aisati tojai tsinane, piraicotaiguëri. Aisati pogasëretococari.

²⁸Carari inetsaiguëro Jesos, icantaiguëro tsinanepague: —Jerosaresato, quero piraicotina Naro; piraicotaiguema obirojegui, aisati pitomijegui.

²⁹Aiquenta orequima cataguiteri omomirintsitomotaiguëmi, pitsipiriaiguë. Ingantaiguë matsiguenga: “Onganinasëretë ora tsinane quero pogui ojaniquite, aisa ora quero otsotacagui”.

³⁰Aique ingantaigabitëma matsiguenga: “Otiopënata taranga, ománaiguenata oguitoja”.

³¹Aroca itsipiriacagaiguëna Naro te nangantëmate ora te onganinate, iritiguëmarini iratsipiriasantacaqueri iraegui cantasantatsi tojai te ongomeite.

³²Aisati yágaiganaqueri pite cosirinti iribëquëgotëri, intsibatëmari Jesos. Ipëicotaiguëri Jesos corosiquë.

³³Cara yaretaigaparo oguitoja ojita Carabera, ora ocanti osigaro iguito igamaga, aro ipëicotaigapëri Jesos corosiquë. Aisati ipëicotaiguëri pite cosirinti basiniquë pite corosi, paniro ibacosonoriquë Jesos, ira basini imatepacoquë.

³⁴Icanque Jesos: —Pabati, pingábintseri icaegui yogamaguënani, quero piguisiri tenta irogóigue pairoraca icantaiguë. Ira soraropague imaguimpibintëqueri imanchaquipague Jesos ipabacaguecaro yotsatiancaro.

³⁵Ainta yaratingaiguë tojai matsiguenga inetsaiguëri. Aisati ainta obatacagaiguëri jorío isërontaigacari icantaiguë: —Yogabisaicotaiguëri imatsiguenga. Intsome anetsaigueri aroca iragabisaicoquima Iriati, Iriroca Quirisito Agabisaicoontatsiri, Ira icoiguë Tosorintsi igáqueri.

³⁶Aisati isërontaigacari soraropague. Iátasiqueri ipapëri obaa cochoari

³⁷icantaiguëri: —¡Obiroca Itingomi joríojegui, pigabisaicotima Obiati!

³⁸Aiti sanguenari poguëngani igorositequë jonoica iguito Jesos, ocanti: “Icari Ica Irianti Itingomi joríojegui”. Osanguenaca maba nibarintsiquë: irinibarequë guiriego aisati irasi ebereo aisati iratín irinibare Iromasati. Inibataiguëri cosirinti Jesos.

³⁹Aisati ainta paniro cosirinti ipëicoca aisati itsibatari Jesos, isërontacari icanqueri: —¿Obiroca Quirisito Agabisaicoontatsiri? Atsi yamai pigabisaicotima Obiati, aisati pigabisaicotaiguëna naro pitirooti.

⁴⁰Irari basini cosirinti isintsitsaqueri itsipa, icanqueri: —¿Teco pintsoroguiri Tosorintsi? Aisati obiro, pënibaque pingamaque.

⁴¹Aroquenta ocositagueanti eiroegui acantaguetiro cagaro caninatatsi, iroro ipëicotaguëcái atsipiriaiguë yamai. Irari Ica te ingantëmate ora yógobiqueri.

⁴²Aisati icanqueri Ira Jesos: —Jesos, Natingomi, pinguenguena cara pirequima pigáantanequë cara pigáanti omagaro, quero pomaguisantina.

⁴³Yotabitanëri Jesos: —Aisonori nanganquimi, yamaica cataguiteri pintsibatëna canta caninaguiteroquë. Icamaque Jesos.

⁴⁴Aroque icatingapë paba cara otsitinitanë omagaro quibatsi irooti cara ochapinitanë.

⁴⁵Itsitinitanë paba, aisati otisaraanaca aganguisati ora yotigantaro oquibe ibango Tosorintsi,

⁴⁶aito cara icaimanë Jesos, catsigue icanque: —Pabati, yamaica nomëmiro nasëre. Irooti icamantanaca. Ora iquengaigaca ira niaiguëri Jesos cara icamaque.

⁴⁷Ira igapitante sorarojegui icarati 100 iniaqueri Jesos cara icamaque, iniacaninatëri Ira Tosorintsi, icanque: —Icaninatasanti Tosorintsi; aisati Ica camënguitsica. Aisonori Irianti Itomi Tosorintsi caninari, te ingantëmate ora te onganinate.

⁴⁸Aisati ira botoibiritaigari cara inetsaiguëri Jesos cara ipëicoca, iniaiguëro omagaro, ipigaiganaca yogasëretaigaca.

⁴⁹Ainta jaqueronta ira ogóiguëri Jesos inetsaiguë aisati ora tsinanepague tsipataigapari cara ipaniaca Garireaquë, onetsaiguëri aisati. Cara itiaqueri Jesos omoroquë.

⁵⁰Aro ainta caninari sërari jitacha José, itentaigacari basini obatatsiri jorío icarati 71 cara yapatotaigaca.

⁵¹Iriro Arimateasati, te iranintiro cara ipëicotaiguëri Jesos irironta aguiaquero iragáantane Tosorintsi cara intingomibintaiguëri antagasiati matsiguenga.

⁵²Ira José iátasiqueri Pirato yamanopëri imëri igamaga Jesos arota iromingueri. Aro ipëri.

⁵³Aique iáque, yoguëpëri igamaga Jesos, iponatancari tocoya, yomianqueri irasiquë iritijomento yomoroquero mopëquë, ora terai iritijantimaro.

⁵⁴Iroro cataguiteriquë yobetsicaiguë jorío jiesita; teraiquerai oretima sábaro cara imagoriaiguë. Pënibapë.

⁵⁵Ora tsinanepague aguiataiguëri Garireaquë otsibataigapari aisati Jerosarénquë, onetsaiguëri cara itiaqueri omoroquë.

⁵⁶Pipigaiganaja obangoquë, pobetsiquëneri casangajengaropague otiritaiguërime igamaga Jesos. Aroquenta pareca sábaro, cara omagoriaiguë cara ocanti isanguenare Moisés.