Read Nomatsiguenga Irocas 24 Bible Online

Irocas 24 - Nomatsiguenga bible

Irocas 24

¹Aique oquëtaguetanai tomincoquë, piáigamanë tsinane cara yomianqueri Jesos, págaiganaque casangajengaropague ora pobetsiquëneri.

²Cara paretaigapa omoroquë oniaigapëro oquibe mopë aroque otitigaca ora yasintocoontacari Josë Ira Jesos.

³Ocaigabitanaca tsomagui, carari te oneiri igamaga Atingomi Jesos.

⁴Iroontita onetsasigabitapaari, oquenganeintasantaca, aitoniati yaratingaigapë pite sërari iquitsagata catarisonoriguinte iguitsagare pobariaguitetasantë. Imabocaparo tsinane,

⁵otsorogaigabaqueri, poguitasantaigaca. Icantaigapëro: —¿Pairo picogobiqueri Ira caniatatsi yaca cara yomianqueri igamaga camatsiri?

⁶Teni irinaje yaca. Aroque icaniatanai. Pinguenguero ora icanque Jesos jirai cara aintaquerai Garireaquë.

⁷Icantaiguëmi: “Naro paniacha Jonogaguitequë nomatsiguengatapë cara niboguë yaca quibatsica, aiquenta irácagantëna matsiguenga cantagueantatsiri te ongomeite, iribëquëgotaiguëna, aique ongaraque maba cataguiteri, nanganiatanae”.

⁸Aro oquengaigairo irinibare Jesos.

⁹Pipiganaja poeboroquë ocomantaigapëri irogomere Jesos aisati ocomantagueiguëri basiniegui quemisantatsiri.

¹⁰Ainta María Magararasato, aisati Joana, aisati basini María iniro Santiago, aintasati basini tsinane. Tojai tsinane ocomantaigabitacari iragátane Jesos,

¹¹carari te inguemisantaigabaquero ora ocomantabitaca tsinane cara icaniatanai Jesos. Ijitaigabitaca ocantasitaiga tsinane te ogóigue.

¹²Paniro Peroro icabiritanaca isiganaca omoroquë, yoguipa, inetsapë tsomagui. Patiro iniopë ora tocoya iponatantabecari Jesos. Aique ipiganaja pongotsiquë, iquenganeintasantaca. Pite quemisantatsiri iniajiri Ira Jesos abatsiquë.

¹³Aro irooti cataguiteri iáiguë pite quemisantatsiri cara poeboroquë jitacha Emaos, cosamani 11 quirometoro aiquero Jerosarénquë.

¹⁴Cara iquenaigasegui inibatobaca, inibatëgotëri Jesos ati ocanta icantaiguëri matsiguenga, aisati ora icantasantë Iriro.

¹⁵Cara iáigasegui inibatobaca iquengamotobaca, yotsitipari Jesos, itsibatanacari abatsiquë.

¹⁶Iniaigabitobacari carari Tosorintsi te iranintacaguiri irogótobëri.

¹⁷Aro yosamitëri Jesos: —Cara piquenaigasegui, ¿Pairo picantobitobaca? Irirojegui yaratingaiguë, yogasëretaigaca.

¹⁸Paniro, ijita Quiriopas, yotabitanëri: —Igóiguë antagaisati Jerosaresati. ¿Obiroco paniro te pigótocotiro?

¹⁹Yosamitëri Jesos: —¿Pairo pinibatëgoti? Icantaiguëri iriro pitirooti: —¿Teco pinguemocotiri Jesos Nasaresati? Caninasati icomantaguetaiguëri matsiguengajegui Irinibare Tosorintsi, aisati itasongagueanti. Iniacaninatëri Tosorintsi, aisati naniacaninataiguëri naroegui.

²⁰Irari itingomipague saserirotijegui aisati iraegui obatacagaiguëna yágagantëri, aro yogamagaiguëri ipëicotaiguëri.

²¹Najitaigabitaca Iriro Agabisaicoontatsirite, iragabisaicocái eiro joríojegui. Icantabeca inganiatanae aisati, carari yamai pabisanaque maba cataguiteri cara icamaque.

²²Aintapague tsinane tsipataiguëna, piáigamanë omoroquë, pipigaigapaa omabocapaina cara

²³ocomantaiguëna te oniaigairi igamaga Jesos, te irinaje. Aisati ocampë cara yoniagaparo ironomire Tosorintsi icanquero cara ainta Atingomi caniari.

²⁴Aisati ainta naroeguiquë iáiguë cara omoroquë iniaigapëro irooti ora ocanque tsinane, carari te iraniaigairi Iriro.

²⁵Aique icanqueri Jesos: —¡Te pigótëmataigue; pitsoinguëri comantantatsiri ira quinguitsataiguëmi Irinibare Tosorintsi jirai! Terai pinguemisantiri.

²⁶¿Teco ingantaiguemi cara Iritsita atsipiriaquenguitsine Quirisito Agabisaicoontatsiri ingamaque, aique inganiatanae iriátë Jonogaguitequë?

²⁷Aro yogometasantaiguëri Sanguenari, yotsateanquero omagaro comantëgotëri Iriro. Iparintacaro isanguenare Moisés, aique yogometaiguëri isanguenare basinipague comantantatsiri.

²⁸Aro yaretaigaaro Emaos, irabisanaqueme Jesos

²⁹carari icantaiguëri itsipa pite: —Quero piáti. Pintiomotina yaca nobangoquë. Aroque ochapinitanë, pënibaque ontsitinitanë. Aro icanaque Jesos pongotsique, itimaque.

³⁰Cara isobicaiguë mesaquë, yáguëro pan Jesos, icarasiaqueri Tosorintsi, itibatsaaguequero, ipaguetaiguëri itsipa.

³¹Aito cara ira pitirooti igóiguëri Irianti Jesos; irooti cara ipegopitanacari.

³²Aique icantobaca pitirooti: —¿Teco onganinatasante icancái cara abatsiquë igótacaganacáiro Sanguenari? Tojai ocancái asërequë, poganinasëretacái.

³³Aito cara icabiritaigaca, ipigaiganaja cara Jerosarénquë. Iniaigapëri ira irogomere Jesos icarati 11 cara yapatoica irirojegui aisati basini quemisantatsiri.

³⁴Irirojegui icantaigabaqueri: —Aisonori icaniatanai Atingomi icabiritaja. Iniajiri Simón.

³⁵Aique ira pite Emaosati icomantaigapëri icampë: —Aisati naro, naniaigairi canta abatsiquë. Yogometaigapëna caninasati cara niáigasegui carari terai nogótiri. Aique canta pongotsiquë itibatsaaguequero pan ipaiguënaro, irooti nigóontacari. Aito cara ipeganaca. Jesos yoniagaigapari irogomere.

³⁶Iroontita icomantaseguiro, Iriguito yoniagaigapari Jesos, yaratingopë aganguisatiquë irirojegui, icantaigapëri: —Quero pitsorogaigui. Pomagoriasëretaigue obirojegui.

³⁷Itsorogasantaiguë irirojegui, te irogótaigabaqueri. Ijitaigabitaca iniaigabaqueri sëretsi.

³⁸Aro icampë Jesos: —¿Pairo pitsorogobitaiguë? ¿Pairo pitsoingobitaiguëna Naanti?

³⁹Pinetsaiguero nobaco aisati naguiti cara ipëicoquina. Potsagataiguena pigóontëna aisonori Naro bocatsi; aiti nobatsa aisati notongui, te aisa nangantimaro pibega sëretsi.

⁴⁰Aique yoniagaigapari ibacoquë aisati iguitiquë.

⁴¹Iniaigabitari icaninabentaigabitari, carari terainta iragabiaigue irajitiri cara icaniatanai. Cara iquenganeintasantaigasega, yosamitaiguëri Jesos: —¿Aiti poperi yaca?

⁴²Aro ipaiguëri sima iritasitaga.

⁴³Yáguëri yaaguëri cara inetsaigaseguiri. Itsonque Jesos yogometaiguëri irogomere. (Irag. 1.4-8)

⁴⁴Aique icantaiguëri: —Pinguengaiguero nanibare ora nocomantaiguëmi cani: “Tojai itsipiriacagaiguëna irógaiguëna, omoncaraquema antagaisati isanguenatocoquina Moisés aisati comantantatsiri, aisati omoncaraquema omagaro isanguenatocoquina David cara sárimoquë”. Yamai omoncaraca.

⁴⁵Aique igótacagaiguëri ora ocanti Sanguenaripague,

⁴⁶icantaiguëri: —¿Teco ongante Sanguenari, “Iratsipiriaque Quirisito Agabisaicoontatsiri ingamaque, ongaraque maba cataguiteri inganiatanae ingabiritajima;

⁴⁷aique iriáiguë iragátane imarintëma Jerosarénquë ingomantëgotaiguëri matsiguengajeguiquë cara irojocajiro ora icantagueti te ongomeite aroca inguemisantaiguëri Jesos irabentëmari Tosorintsi, aro Tosorintsi irisetaigaineri ora icantaguetomoqueri quimingari quero iquengairo aisati”?

⁴⁸Pigóiguëro ocanti negaca Sanguenari. Yamai piniaiguëro cara omoncaraca ora isanguenatocoiguëna jirai. Yamai nocoguini pinguenguitsatocotaiguena.

⁴⁹Pinëni yaca Jerosarénquë yamai queronta ocosamaniti cara nagátaiguëmiro ora icantasantaiguëmi Pabati, Iroonti imagantëmi Isëre Tosorintsi inantaigapëmi coshoni ogaiguëmi. Ogabiagagaiguëmi pingantaiguëneri Pabati pairoraca ingocagaiguëmi. Cara yogainocanaa Jesos Jonogaguitequë.

⁵⁰Aique Jesos itsibataiganacari irogomere irooti cara Betaniaquë. Cara, itimagonaguitanaca ibaco jonoquë, yamanaqueri Iriri icanque: —Pabati, jerica nogomerejeguica; pingantocobentaigueri, pomitocotaigueri.

⁵¹Cara icantocobentaseguiri Jesos, aito cara yáguëngani jonoquë yogainocanaca, ipeganaca.

⁵²Aique irogomere ipigaiganaja Jerosarénquë, icaninabentasantaiguëri Atingomi.

⁵³Carari, omagaro cataguiteri iátopiantaiguë cara oquibequë pongotsi irasi Tosorintsi icantaiguë: —Icaninatasanoti Tosorintsi. Aro ocarati ora nasanguenaquemi. Irocas