Read Nomatsiguenga Joan 13 Bible Online

Joan 13 - Nomatsiguenga bible

Joan 13

¹Terai oretima Pásicoa cara iquengaigairo jorío cara isotocaigai Ejípitoquë jiraisonori. Igóque Jesos aroque pareca cataguiteri cara irojocanëro quibatsi iriátae Iririquë. Cara inintasantaiguëri quemisantatiri Jesos yaca quibatsica, yamai inintasantasanoiguëri.

²Cara yapaigasegui, aroque iquiancacari Satanás ira Joras itomi Simón ipaniaca Cariotiquë cara irácagantëri Jesos.

³Igóque Jesos aroque ipëri Iriri omagaro. Aisati igóque ipaniaca Tosorintsiquë aisati yamai iripiganajima jonoquë.

⁴Icabiritanaca mesaquë, isaboquëro imanchaqui, yáguëro oquibiantsa tocoya imatsaguitanacaro,

⁵ishëro nija irabatarioquë, aro iparintaca iquibaguititaguequeri irogomere aique iseantaari tocoyaquë ora imatsaguisiga.

⁶Cara pënibaque inguibaguitiqueri Simón Peroro aro yosamitëri Peroro: —Natingomi ¿Pinguibaguitiquinanico naro?

⁷Yotabitanëri Jesos: —Yamai teni pinguemiro ora nacanti, aiquenta pinguemaquero.

⁸Carari icanë Peroro: —Naro quero piquibaguititina. Yotabitanëri Jesos: —Queroca naquibaguititimi, quero pini Naroica.

⁹Aique icanqueri Simón Peroro: —Natingomi, querori patiro piquibiro naguiti. Aisati pinguibaquina nobacoquë, pinguibaquina naguitoquë.

¹⁰Icanëri Jesos: —Ira quibacha irirai quero iquibaja omagaro, patiro iguitiquë inguibima aroquenta irinaga yoguëteta. Obirojegui pinaga poguëtetaiga paneingomentoquë carari te antagaisati pinguëtetaigue.

¹¹Icanque Jesos: “Teni antagaisati pinguëtetaigue”, aroquenta igóque pairiraca ágagantërine.

¹²Aroqueque iquibaguititaiguëri Jesos icairo imanchaqui aisati, isobiaque mesaquë. Yosamitëri irogomere: —¿Pigótaiguëro oca nacantaiguëmica?

¹³Pijitaiguina Ogomeantatsiri aisati pijitaiguina Pitingomi. Picantaiguiro ora aisonori Naronta Pitingomi.

¹⁴Aroquenta naquibaguititaiguëmi Naro Ogomeantatsiri aisati Pitingomi, caninataque pinguibaguititobaguima aitosati obirojegui.

¹⁵Noniaguëmiro ora pingantaiguë aisa pinganquero obirojegui ora nacantaiguëmi yamai.

¹⁶Nangantasantëmini ora aisonori. Ira iromerataga quero ibatiri ira meratari, aisati icanta ira iragátaga quero ibatiri ira agátirira.

¹⁷Aroca pinguemaquero oca nocomantëmica, aro pinganinataiganaque pinganqueroca.

¹⁸Teni nanibatëgoiguemi omagaro obiro nigótasantimininta aroquenta nocoiguëmi. Nocoiguëmi arota omoncaratima Sanguenari ora ocanti:Ira pëcoquina pan yamai iguisanëintanaina. Icoque iróguina.

¹⁹Nocomantaiguimiro negaca cara iróquinaca pinguenguero, përosati pinguemisanquina Naantinta Agabisaicoontatsiri.

²⁰Nangantasantëmini ora aisonori pairiraca ágobërine ira nagáque aitosati irágobënanisati Naro. Ira ágobënane Naro aisati irágobëri Pabati Ira agáquina Naro. Jesos icomantëgotëri ira ágagantërine.

²¹Cara inibatë negaca Jesos yogasëretasantanaca icantaiguëri irogomere catingasati: —Aisonori nangantasantëmini, ainta paniro obirojeguiquë ira ágagantënane.

²²Aique inetsabacagaguetanaca irogomere Jesos. Te irogóigue pairiraca ira inibatëgotë Jesos.

²³Paniro irogomere ira inintasanti Jesos yapanamitacagaseguiri.

²⁴Simón Peroro ijigotanëri ira panamisiguiri Jesos arota irosomitiri pairiraca ira inibatëgotasegui Jesos.

²⁵Ira panamisiguiri Jesos inebintasitanacari yosamitëri: —Natingomi, ¿Pairi pinibatëgoti?

²⁶Yotabitanëri Jesos: —Ira nomë pan nagaatane, iriro ninibatëgoti. Aro yogaatëro pan ipëri Joras Cariotisati itomi Simón.

²⁷Yágobëro pan Joras aito cara inantanacari Satanás. Aique icanqueri Jesos: —Ora picogui pingantiro, pingantiro omanapague.

²⁸Iquemabecaro basini irogomere Jesos. Te poro quemasantobërine Jesos.

²⁹Irironta Joras omisantineri iguireguite irogomerejegui, ainta ijique igáquerini Jesos iromanante Joras ora asi jiesita. Ainta basini ijique igáquerini imëri quirequi ira coguitiachari.

³⁰Cara yapëro pan Joras isotocanë, aroque otsitinitanë. Jesos igáqueri irogomere: “Pinintobaganëma”.

³¹Aroqueque isotocanë Joras, icanque Jesos: —Omanapague yamai iraniacaninataiguëna matsiguenga, ingantocotaiguëna: “Caninarisonori Ira paniacha jonoquë imatsiguengatapë”. Aitosati ingantocotaiguëri Tosorintsi: “Caninarisonori Tosorintsi aroquenta igáqueri Itomi yaca quibatsica”. Aisati yamai ingantocoquina Tosorintsi: “Ira matsiguenga iraniacaninataiguerita Notomi”.

³³Obirojegui cantaca najaniquite, arosata yamai ninagaiganajimi cara queroquerai niáti. Pingogabetajina, carari cani jirai nocomantaiguëri jorío, aisati yamai nongomantaiguimi obiro: quero piáti cara najáque Naro.

³⁴Oca nagáquemi irorai, pinintobaganëma. Aisa nacanta Naro nanintasanotaiguimi, aisati pinintasanotobaguima.

³⁵Aroca pinintobaganëma, aro antagaisati matsiguenga irogóiguemi obiro nogomerejegui. Inganque Peroro: “Teni nogótiri Jeos”.

³⁶Icanëri Simón Peroro yosamitëri Ira Jesos: —Natingomi ¿Nega pijáque? Yotabitanëri Jesos: —Cara najáque quero poguiatina yamai. Aiquenta piguiatapëna.

³⁷Icanqueri Peroro: —Natingomi ¿Pairo quero noguiabiritimi yamai? Aroca nangamobiquimi nocoguini naguiatimi.

³⁸Yotabitanëri Jesos: —¿Aisonori pingamobiquinaca? Nangantasanotëmini aisonori cara queroquerai icaimi tiapa sërari, maba pingantocoquena: “Teni nogótiri”.