Read Nomatsiguenga Joan 2 Bible Online

Joan 2 - Nomatsiguenga bible

Joan 2

¹Omoncaraca maba cataguiteri cara yáguëro iina sërari cara poeboroquë jitacha Caná cara Garireaquë. Aintasati pinasegui iniro Jesos.

²Aisati icaimëngani Jesos aisati irogomere cara yapatotaigaca igaimanejegui.

³Cara pitsoatanaca oja oba aro ocanqueri iniro Jesos: —Tsoatanaca obaa.

⁴Yotabitanëro Jesos: —Atsi caraquenta, ina. Terai oretima cataguiteri cara noniaguëmari matsiguenga cara nomitocotagueantëmari natasorintsite.

⁵Aro iniro ocanqueri iromeraro ira quitiro obaa: —Pairorapagueraca iragáquemi Jesos, pingantiro.

⁶Aiti pinasegui oquibe chomo ocarati 6 ora yogantaro nija ora yoguëtetantagueta jorío. Patiro chomo ojaquima nija 100 iritoro.

⁷Aro igáqueri Jesos: —Pijaguiro nija cara chomoquë antagaisati cara ocarati 6. Icanquero. Iagasantëro irooti otseraquë.

⁸Aique icanqueri Jesos: —Pinguiate arosata yamai. Páganëneri ira agáantiro jiesita. Aro yáganëneri.

⁹Cara iniantacaro iriro ora nija pegacha obaa, te irogóte negaraca opaniaca. Irianti iromeraro ogóiguëro cara ipiaquero Jesos irironta jagaiguëro nija. Aro ira agáantiro jiesita icaimëri sërari águëro iina

¹⁰icabëri: —Ametaigaro eiro cara omagaro poguibatagani iróquimaro ora obaa caninajaro. Aique cara iróquimaca tojai ira igaimane; aro cara imëgotaigueri ora obaa te opënatima tojai. Carari obiro poguëro ora caninajaro obaa irooti yamai.

¹¹Cara poeboroquë jitacha Caná cara Garireaquë yoguibatëro Jesos itasorintsite. Yoniaganca arota irogóigueri matsiguenga Iriro caninarisonori aisati sintsirisonori. Aro iquemisantaiguëri irogomere Jesos. Itimaque Jesos cara Caperinaoquë.

¹²Aique iáque Jesos cara Caperinaoquë. Itsibataro iniro aisati icarataiguëri ireinti aisati irogomere. Cara, itimaiguë arosata cataguiteri. Ijocaiguëri Jesos ira pimantatsiri cara ibangoquë Tosorintsi.

¹³Pënibaque orequima cataguiteri ora jitacha Pásicoa cara iquengapiantaiguiro joríojegui cara jiraisonori isotocaigai Ejípitoquë. Aro iáque Jesos Jerosarénquë.

¹⁴Iniopëri cara oquibequë pongotsi irasi Tosorintsi ira pimantaiguiri oisha, aisati sërari baaca aisati paroma. Aintasati ira campiatiri quirequi.

¹⁵Yobetsiquëro iripasamento Jesos iroonti sogatsa. Aique ijocaiguëri antagaisati pimantatsiri aisati ibaacate aisati iroishate. Yosibiquero imesane ira campiatiri quirequi yosocaguitëri iguireguite.

¹⁶Icanqueri pimantatsiri paroma: —¡Páganëri sotora! ¡Quero popimantaguetiri yaca ibangoquëca Pabati Tosorintsi!

¹⁷Aique iquengaigairo irogomere ora Sanguenari cara ocanti:Nocogasanti iraniacaninatiro pobango matsiguenga. Iroro ora inguisanijintaguëquina naro aisati ingoque iróquena.

¹⁸Yosamitaiguëri joríojegui: —¿Pairo poniagaiguëna ora nogóontimi Obiro cara igáquemi Tosorintsi picanquero negaca?

¹⁹Yotabitanëri Jesos: —Pogomeriguetiro oca pongotsica. Cara omoncaraquima maba cataguiteri nobetsicairo aisati.

²⁰Icantaiguë jorío: —Tojai osarini ocarati 46 cara pobetsiquëngani oca oquibe pongotsica irasi Tosorintsi. ¿Yamai picanque Obiro pobetsicairo mabanti cataguiteri?

²¹Carari Jesos te irinibatocotiro pongotsisonori oquibe. Iroonti inibatëgotë ibatsasonori aisatinta ocantaro pibega ibango Tosorintsi.

²²Iroro cara aroqueque icamaque Jesos icaniatanai, iquengaigairo irogomere oca nibarintsica, aro iquemisantaiguëro Sanguenari aisati iquemisanque ora yogometaiguëri Jesos. Jesos igótasantaiguëri matsiguenga.

²³Cara Jerosarénquë aiti cataguiteripague jitacha Pásicoa cara yapatotaigaa jorío. Itasorintsitaguetasanotapë Jesos iquemisantacagopëri tojai matsiguenga cara iniaigabaquero iquemisantaigabaquero ora icanque Iriro.

²⁴Carari te imemari ira matsiguenga igóquerinta ora iquengaigaca omagaro.

²⁵Igóque ora iquianca antagaisati matsiguenga. Aro te ingogue basini comantirine ati icanta matsiguenga igóquerinta iraneingomentojeguiquë sërari.