Read Nomatsiguenga Joan 6 Bible Online

Joan 6 - Nomatsiguenga bible

Joan 6

¹Itsonquero irinibare Jesos cara Jerosarénquë, aique iátaji cara Garireaquë. Imontianaca angaare jitacha Garirea aisati ojita Tiberias.

²Yoguiataiguëri tojaisonori matsiguenga iniaiguërinta Jesos cara itasongobenqueri janaitatsiri.

³Cara pënibaque orequima cataguiteripague ora jitacha Pásicoa cara irapatotaiguëma joríojegui, itongaiganaque oguitojaquë Jesos aisati irogomere isobicaigapë.

⁴

⁵Iniaigabaqueri Jesos arosonori matsiguenga yoguiataigapëri. Icanqueri ira Jeripe: —¿Nega omanantëneri pan ora irapaiguë?

⁶Icanque Jesos negaca arota iraniantëmari Jeripe. Aroque igóque Jesos ora inganque Iriro.

⁷Yotabitanëri Jeripe: —Aroca omanantë pan ora pënatacha 200 tenario, quero cotonguiboro cara irapaiguë omagaro arosata. Paniro tenario yágui ira tarobacaatatsi poro cataguiteri.

⁸Poro irogomere Jesos ijita Antiris ireinti Simón Peroro icanqueri:

⁹—Ainta yaca janequi sërari yamapë pabocorooti pan aisati pite itiomijani sima, carari quero cotonguiboro tojainta matsiguenga.

¹⁰Igáqueri irogomere Jesos icanque: —Pigasobicaigueri. Aiti pinasegui caninaro tobarisi tojai. Isobicaiguë sërari cara tobarisiquë icarati 5,000.

¹¹Yáguëro pan Jesos icarasiaqueri Tosorintsi, aro yotsatengaiguëri ira sobicaigatsi. Aisati ipaguetaiguëri sima. Ora ocarati icogaigui matsiguenga.

¹²Cara iquemaigaca omagaro, icanqueri irogomere Jesos: —Pobiitaguetajiro ora ingarataiguë, arota quero omainatëmata.

¹³Aro yobiitaguetajiro iagajiro ocarataji 12 cantiri ora angaraquenguicha pan aroquenta iquemaigaca tojaisonori matsiguenga.

¹⁴Cara iniaiguërinta matsiguenga Ira Jesos cara yomitojaiguëro pan aisati sima itasorintsitequë, aro icanë: —Aisonori Ica Iriro comantantatsiri Ira boquënguitsine yaca quibatsica Ira oguiaiguë cosamani.

¹⁵Igóque Jesos cara icogaiguë matsiguenga iráganëri inganqueri itingomi. Aro itonganaque Jesos aisati, iáque casiriconiati. Ipigapaa Jesos Caperinaoquë, yanëiatanë nija jonoicanti.

¹⁶Cara ochapinitanë yanongaiganaca irogomere Jesos yagaitanë angaarequë.

¹⁷Yotetaiganaca pitotsiquë iátocoiguë aiquero cara antatinta Caperinaoquë. Aroque otsitinique. Teraiquerai iraretima Jesos.

¹⁸Aro oparintanaca omotoncaatanë angaare sintsironta coguentima.

¹⁹Icomataiganaque pabocorooti quirómetoro cara iniaigabaqueri Jesos yanëiapëro angaare jonoicanti. Itsorogaiganaque irogomere.

²⁰Icampëri Jesos: —Naanti. Quero pitsorogaigui.

²¹Aique icaninataiganaque yotetaigabajiri Jesos pitotsiquë. Aiguito iniaigaa canta onamijaquë canta iriátëri. Icogaiguëri matsiguenga Ira Jesos.

²²Itimaiguë matsiguengajegui cara yapaiguë pan. Oquëtaguetanë igóiguë teni ine pitotsi. Patiro ora yotetaiganaca irogomere Jesos iátocoiguë, carari Jesos te intsibatanaimari.

²³Paretaiga basini pitotsipague opaniaca Tiberiaquë aronisati cara yapaiguëro pan matsiguenga cara icarasiabintëro Jesos.

²⁴Cara igóiguë teni irinaje Jesos irirojeguiquë teatisati irogomere, yotetaiganaca pitotsipaguequë irooti Caperinaoquë cara ingogaigairi Jesos. Jesos ijica perintsi timagantatsiri.

²⁵Cara iniaigairi antatinta, yosamitapairi: —Ogometinari, ¿Ati ocanta pipoque yaca?

²⁶Yotabitanëri Jesos icantaiguëri: —Nangantasantëmini nigóiguëmi teni pingogaiguena cara nitasonganti, carari picogaiguina aroquenta papaiguëro poperi piquemaigaca.

²⁷Quero picoguiro perintsi ora peganënguichane, ora pingogue perintsi timagantatsiri ontimacaguimi Jonogaguitequë përosati ora nomëmira Naronta matsiguengatapënguitsi. Ipënaro Pabati Tosorintsi cara nomaiguëmiro irorota timaquimine obirojegui pisërequë.

²⁸Yosamitaiguëri: —¿Pairo nangantaiguë ora ininti Tosorintsi?

²⁹Yotabitanëri Jesos: —Icoguini Tosorintsi pinguemisantina Naro Irironta agáquina.

³⁰Aique yosamitaigairi: —¿Yamai pairo pitasonguë aisati arota naniobëro nanguemisantimi? ¿Pairo pinti?

³¹Omatsiguenga jirai yapaiguëro iraperi ora jitacha maná cara tera ontimengani. Ocantocoquero Sanguenari:Ipaiguëri Tosorintsi perintsi paniacha jonoquë.

³²Icantaiguëri Jesos: Nangantasantëmini, teni iriro paiguemirone Moisés ora perintsi paniacha jonoquë, carari yamai imaiguëmi Pabati perintsi irorosonori paniënguichane jonoquë.

³³Ora perintsi imaiguëmi Tosorintsi yamai, Irianti sërari Ira masobingopënguitsi cara Jonogaguitequë. Itimacaqueri matsiguenga yaca quibatsiquë.

³⁴Icantaiguëri matsiguenga Ira Jesos: —Natingomi, përosati pomëntaiguenaro perintsi ora picantocoque.

³⁵Icanqueri Jesos: —Naro perintsi timagantatsiri. Cara popë poperi, caraquenta pitasegae aisati. Cara póga nija, caraquenta pomiretae. Carari cara pinguemisantaiguënanica, pinganinasëretanë përosati. Pinguemasëretaiguëmaro ora perintsi paniacha Jonogaguitequë. Naanti cantaca perintsi paniacha jonoquë.

³⁶Piniaiguëna obirojegui carari aroque nacanquemi teni pinguemisantina.

³⁷Antagaisati matsiguenga ira ipina Pabati iribocasitapëna Naro. Pairiraca bocasitapënane coshoni noguëmari quero nojocajiri sotoquë.

³⁸Nopaniacanta Jonogaguitequë nanganque ora ininque Ira agáquina. Teni nangante ora nocogui Naro.

³⁹Ira agáquina ininti quero nobeguëmatiri paniro ira ipëna, carari nangábintsasantëri irooti cara nopocaje naganiatairi najátacaqueri jonoquë.

⁴⁰Ininti Pabati Ira agáquina antagaisati niaiguënane quemisantaiguënane Naro matsiguengatapënguitsi, përosati intiomoqueri Tosorintsi Jonogaguitequë. Cara nopigaima nangabiriqueri náganëri jonoquë.

⁴¹Yabentaigaca joríojegui aroquenta icanque Jesos: “Naro yamai perintsi paniacha Jonogaguitequë”.

⁴²Icantobaca jorío: —¿Cagarico Jesos Ira itomi José? Nigótiri iriri aisati iniro. ¿Pairo icantobique yamai: “Nopaniaca Jonogaguitequë”?

⁴³Icantaiguëri Jesos: —Quero pabentaiga.

⁴⁴Quero ipocasitina matsiguenga iriati queroca Iriro agátinarine Pabati Ira agáquina Naro. Aisati nangabiritajiri naganiatairi cara nopocaje aiquenta.

⁴⁵Isanguenataiguë comantantsiripague jirai:Irogometaiguëri Tosorintsi omagaro matsiguenga. Antagaisati ira quemisanquerine Pabati ora yogomequeri iribocasitapëna Naro.

⁴⁶Te pairi neirine Pabati. Paniro Naro aronta nopaniaca Iriroquë.

⁴⁷Nangantasantëmini pairiraca quemisanquinane nantimacaqueri cara intiomoqueri Tosorintsi Jonogaguitequë.

⁴⁸—Naro perintsi timagantatsiri.

⁴⁹Jirai pomatsiguenga yapaiguëro perintsi jitacha maná cara tera ontimengani. Carari icamaiguë antagaisati.

⁵⁰Oca perintsi ninibatëgotica opaniaca jonoquë, aroca irapëro matsiguenga quero icamaji.

⁵¹Naro perintsi timagantatsiri. Nopaniaca jonoquë aroca irapëro oca perintsica pairiraca matsiguenga intimacaqueri Pabati Tosorintsi përosati. Oca perintsi nomërica iroonti nasi nobatsa. Nomaiguëri matsiguenga arota intimacaganëri iriro përosati.

⁵²Aique yosamitobaca jorío icanque: —¿Atiroco ingantima Iriro cara imacáiro ibatsa ajaguëri?

⁵³Icanqueri Jesos: —Aisonori nangantasantëmini nomatsiguengatapë. Queroca paaguiro nobatsa querootisatica pógaro naraa, quero pitimi Tosorintsiquë tenta pigótiri.

⁵⁴Ira jaguërone nobatsa aisati óguëmarone naraa aro intimacaqueri Tosorintsi Jonogaguitequë përosati. Aisati nangabiritajiri naganiatairi cara nopocaje.

⁵⁵Nobatsa iroronta perintsisonori aisati naraa iroronta omiretagantsisonori.

⁵⁶Ira jaguërone nobatsa aisati óguëmarone naraa inguengasëretina, aro intiomoquina jonoquë. Coshoni iroquina Naro aisati coshoni noguëri iriro.

⁵⁷Ira agáquina Pabati Irironta timagantatsi. Naro përosati natiomotiri. Aisa icanta ira jaguënane nantimacaqueri.

⁵⁸Ninibatëgotiro perintsi opaniaca jonoquë. Teni aisati ongantimaro pibega perintsi ora yapaiguë pomatsiguenga jiraisonori jitacha maná. Icamaiguë iriro. Carari ira përone oca perintsica ninibatëgotica përosati intimaque Jonogaguitequë.

⁵⁹Antagaisati oca yogomeantëca Jesos inibatëro cara yapatotaiga jorío cara poeboroquë jitacha Caperinao. Cara intime përosati matsiguenga.

⁶⁰Aroqueque yogomeantë Jesos, ainta ira aguiatëri icantobaca: —Comëtaro oca nibarintsica. ¿Pairi quemobërone?

⁶¹Igóque Jesos cara yabentaigacaro icomëtaigabacaro irinibare, yosamitëri: —¿Teco ongomeitomotimi oca?

⁶²¿Ati pingantaiganaque aroca piniaigabaquina nagainocanaima cara nopaniaca jirai?

⁶³Itimaque matsiguenga aitinta isëre. Queroca pini isëre irianti igamaga. Oca nibarintsica ninibatimica ontimacaquemi përosati jonoquë; cara pinguemisantobëro, Isëre Tosorintsi ontimacaquemi.

⁶⁴Përosati ainta obirojeguiquë ira te inguemisantina. Cara jiraisonori cara irirai parintënguicha igóitacari Jesos ira te inguemisantiri aisati ira ágagantërine.

⁶⁵Aisati icanque Jesos: —Iroro nacantaguëtaiguëmi quero ipocasitina matsiguenga irianti. Patiro iromapënarica Pabati iribocasitapëna.

⁶⁶Tojai ira aguiataigabitari Jesos aique ijocaiganajiri, te intsibataimari aisati.

⁶⁷Aro yosamitaiguëri Jesos ira irogomere icarati 12: —¿Aisatico picogaigui obiro pijáigae?

⁶⁸Yotabitanëri Simón Peroro icanqueri: —Natingomi, teni irinaje basini ira naguiataigae. Patiro pasi pinibare ontimacagaiguëna përosati.

⁶⁹Obiro naquemisantaiguë aisati nigóiguimi Obiro caninarisonori Itomi Tosorintsi catimanerisonori.

⁷⁰Yotabitanëri Jesos: —Nocoigaiguëmi obiro picarati 12, carari ainta poro obirojeguiquë iromeraro Satanás camagari.

⁷¹Jesos inibatëgotëri Joras Cariotisati ira ágagantërine Ira Jesos cara matsiguengaquë catsimari.