Read Nomatsiguenga Iragátane Jesos 12 Bible Online

Iragátane Jesos 12 - Nomatsiguenga bible

Iragátane Jesos 12

¹Ainta itingomi ijita Eroris canta Jerosarénquë yágagantëri atiraca icarati ira quemisantatsiri, cara ingantaguequeri ora catsimari.

²Yobatëantacari sabiri ira Santiago ireinti Joan.

³Cara yoganinasëretaiga joríojegui, asiati Eroris yágagantëri Peroro.

⁴Yágagantëri cara yapaisiguiro pan joríojegui ora te ingonaguero piponganta. Oca jiesita jitacha Pásicoa. Aroque yágagantëri Peroro, Eroris yomianqueri iromingamentoquë. Ainta soraro yomisantëri icarati itsibasati coniamaniquë. Ainta basini itsibasati catingaquë. Basini irirai itsibasati soraro chopiniquë, aisa basini itsibasati aganguite. Icogabeca Eroris aroca abisanaque Pásicoa iráganërime Peroro cara yapatoita matsiguenga ironijagantërime. Icogabeca Eroris iranetsaiguërime matsiguenga cara iragamaguërime Peroro.

⁵Ainta Peroro iromingamentoquë Eroris. Yomisantëri soraro. Ira quemisantatsiri botoibiritari Jesos yamanocobintasantëri Peroro. Yomisotocajiri Peroro Tosorintsi.

⁶Irooti tsitiniriquë cara queroquerai yoniaguiri Eroris matsiguengaquë isamasigui Peroro yoguëshosigaro pite sogatsa coshori. Icarasiguiri pite soraro, poro ibacosonoriquë poro imatequë. Ainta basini pite soraro omoroquë.

⁷Iriguito iconijapë irisaanganetsite Tosorintsi yogonijaguitepëro tsomagui, icabocapëri Peroro icampëri: —Pingaguite pingabiritima yamaica. Aro otsaanaca ironeni ora yoguëshosiga ibacoquë aisa iguitiquë.

⁸Aisati icampëri ironomire: —Pomatsaguitima coshooti pomanchaquiquë. Poguimari pisapatote. Aro icanquero Peroro. Icanai irisaanganetsite Tosorintsi: —Pogaimaro pomanchaqui ora pobicota. Intsome, piguiatanëna.

⁹Isotocanë Peroro yoguiatanëri ironomire Tosorintsi. Te irogóte iroroca aisonori ora icanque irisaanganetsite, iquisanitasicaroco.

¹⁰Yabisanaqueri soraro omoroquë, aique basini soraro, te iraniobairi. Yareparo oquibequë sitëcori coshori pasirianaca ironeni isotocanë Peroro. Yáganëri ironomire Tosorintsi irooti cara págaboquiobaga abatsi yoganairi isaanganai te iraniobairi.

¹¹Icanë Peroro iquenganaca: —Yamai nigóque. Aisonori igáquinari ironomire Tosorintsi cara iromisotocajina iragabisaicotajina cara icogaigabitaca Eroris aisa joríojegui iróguiname.

¹²Iquianca Peroro, iáque cara obangoquë Maria iniro Joan. Joan aisati ijita Maricos. Cara, inaisigui tojai matsiguenga yamanaigasegui.

¹³Itaapëro sitëcori Peroro ton ton ton. Pipogopë onamire María ojita Irore. Oquemobëri pigótsatobëri ora irinibare Peroro ocaninasëretanë. Te osirecotiri. Pisiganëtiga tsomagui ocomantaigapëri matsiguenga: —¡Ainta Peroro sotoquë!

¹⁵Icantaigabaquero matsiguenga: —¡Teni pineicotima! Iroro ocanatanë: —Jee, aisonori iriro Peroro. Icantaiguë: —Cagari Peroro; irianti ironomire Tosorintsi omisantiri Peroro.

¹⁶Iroontita inibatobagaigaca tsomagui, përosati cara itaapiantëro Peroro sitëcori. Cara yasirecoqueri iniobëri imabocacari.

¹⁷Icanaque Peroro yacopëri imairetanë. Icomantapairi cara yomisotocajiri Atingomi. Icampëri: —Pingomantiri Santiago aisati ira quemisantatsi. Aique iáque Peroro basiniquë pongotsi. Imánaca.

¹⁸Cara oquëtaguetanë itsorogaiganaque soraro cara icogabetajari Peroro.

¹⁹Igáantairi Eroris ingogajiri. Te irinaje. Eroris yosamitasantëri isorarote ira omisantëri Peroro. Te. Aro igáqueri basini soraro iróqueri ira omisantabitacari. Aique iáque Eroris cara Joreaquë irooti basiniquë poeboro jitacha Sesárea. Icamaque Eroris.

²⁰Eroris iguisaneinqueri ira timaigatsi pitequë poeboro jitacha Tiro aisa Sirón. Iriroqueraiegui iquengaiganaca iromanaiguëri Eroris iraniacaninatëri aronta opaniaca tojai iraperi iragáantanequë Eroris. Ipaigapëri quirequi ira Barásito iromeraro Eroris arota irinibabintëri caninasati.

²¹Iquengaigaca cara cataguiteriquë. Cara yaretaigaca matsiguenga, icanaquero Eroris imanchaqui caninari, isobiaque cara iragáantomentoquë inibataigapëri Tirosati aisa Sirósati.

²²Iparintanaca Tirosati aisa Sirósati icaimanë: —Cagaro irinibare matsiguenga. Iroonti irinibare Tosorintsi.

²³Aito cara itsirishobitanacari Tosorintsi igáqueri insaanganetsite yoanaitëri Eroris tenta ingomantëgotima cara irianti matsiguenga cagari Tosorintsi. Aito cara yaaganaqueri isitsane icamaque.

²⁴Yamai otojaiganaque Irinibare Tosorintsi iquemaigabaquero omagaroguitequë.

²⁵Aroque itsonquero ora igáquengani Berinabé aisa Saoro cara Jerosarénquë, ipiganaja Antioquíaquë. Yáganëri Joan aisa ijita Maricos.