Read Nomatsiguenga Iragátane Jesos 16 Bible Online

Iragátane Jesos 16 - Nomatsiguenga bible

Iragátane Jesos 16

¹Yaretaigaa Térebequë, aisati Irísitaraquë. Canta itimi quemisantatsiri jitacha Timoteo. Iniro jorío quemisantatsiri. Iriri guiriego.

²Ira quemisantatsiri Irísitaraquë aisa Iconioquë iniacaninatëri Timoteo.

³Icoque Paboro intsibatimari Timoteo, carari antagaisati igótocoqueri iriri cara cagari jorío irianti guiriego. Icanqueri Paboro: —Aroca pitoquima obiro aisa pinganquimari joríojegui, aro irágacaninatëmi. Icanë: —Aro. Aro itoqueri.

⁴Aique iquenagueque poeboropaguequë ipaigapëri sanguenari ora ipagantëri Jerosaresati, iroonti iquengaigaca ora isanguenaque iragátane Jesos aisati basini obatacaguiri quemisantatsiri.

⁵Aro yosintsisëretaigapëri iquemisantacagasantapëri ira botoibiritari Quirisito, përosati cara itojaiganaque quemisantatsiri.

⁶Icogabeca iriáigueme Asiaquë orari Isëre Caninaro ocanqueri: —Quero picomanti Asiaquë.

⁷Aique iáiguë Jirijiaquë aisati Garasiaquë. Yaretaigaca Misiaquë icogabeca iriáteme Bitiniaquë. Ocanqueri Isëre: —Querootisati piáti Bitiniaquë.

⁸Iquenaque Misiaquë yanonganaca irooti poeboroquë jitacha Toróare.

⁹Cara tsitiniriquë iquisaniqueri Paboro ira Maseroniasati. Icantasiringapëri: —Popogopë pomitocoigapëna naroegui yaca Maseroniaquëca.

¹⁰Aroqueque iquisaniqueri Paboro iniasiringaqueri matsiguenga, aro nigóiguë iragáquina Tosorintsi Maseroniaquë, nongomantaguepërita aroca inguemisanqueri Jesos, iragabisaicotajiri Tosorintsi. Aro nocoque pitotsi. Iáque Paboro Eoropaquë.

¹¹Notetanaca Toróarequë naquenocoque catingasati oboguesiquë jitacha Samotorasia. Oquëtaguetanë naretaigapa poeboroquë jitacha Neáporis. Aro naguëtanë.

¹²Nogaganaca irooti poeboroquë ojita Jeripo. Iroro poeboro obatatsiri. Ainta tojai matsiguenga paniacha Iromaquë. Aito natimopë arosata cataguiteri.

¹³Sábaroquë nisotocanai Jeripoquë nanëitanë onamijaquë angaare nocoqueri jorío cara yamanaigui. Naniopëro tsinane papatoisigaca. Nisobigopë naroegui nocomantëgotapëri Jesos.

¹⁴Ainta paniro tsinane jitacha Iriria opaniaca jirai Tiatiraquë. Iroro pimantatsiri tocoya quiraaquisaamagori. Aisati oquemisanqueri Tosorintsi. Yamai Ira Atingomi iquemisantacaquero ora icomantë Paboro.

¹⁵Obaotisataca iroro aisa ora otsibata obangoquë. Ocantasantëna: —Aroca pigóiguë yamai cara naquemisantasantëri Atingomi, pijátaigue nobangoquë, pintiomoguintina. Aro tojai ocantopiantëna irooti cara notabitanëro: —Aro.

¹⁶Basiniquë cataguiteri, niáiguë cara nomanaqueri Tosorintsi. Nitonguibocaro tsinane onamitaga inancaro camagari. Igótacaquero ora pairoraca abisënguitsine. Iroro yáganta tojai quirequi ira onamitaro.

¹⁷Aro poguiatëri Paboro aisa naroegui, ocaimë: —Ica sërarica igáqueri Tosorintsi jonoquënintaberi. Icomantaiguëmi atiraca pingantima cara iragabisaicotajimi Tosorintsi.

¹⁸Aro ocantopiantë irooti tojai cataguiteri. Itsirishanacaro Paboro yapisitasitanacaro igátajinero ogamagarite icanque: —Iriro Jesoquirisito naquemisanti. Iroro iripajiro nojogantëmi: “Pijátopitiro pijocanëro tsinane”. Irooti ijogantanacaro camagari.

¹⁹Cara igóquero ira onamitaro icanque: —Quero nágantajaro quirequi yamai tenta irinajeni ogamagarite. Iguisaneinqueri Paboro aisa Siras yágagantëri yáganëri aganguisati poeboro aisati cara ini itingomipague.

²⁰Ipaiguëri itingomi jitacha joes icampëri: —Teni ingomeite ica sërarica. Iriro jorío. Iguisaneintacagaigapëna naroegui timatsi yaca Jeripoquëca.

²¹Icomantaguepëro ora yametaiga. Teni onganinate nanguemisantobëri namecaronta naro basiniati. Naroegui nomatsiguengatacari Iromasati.

²²Iguisanaca antagaisati matsiguenga aisati itingomi. Igáqueri iromeraro: —Pisaboquëtiri imanchaqui Paboro aisati Siras, popasatiri.

²³Aro tojai ipasatancari anchaqui, aique yomianqueri. Icantasantëri omisantiro iromingamento: —Pomisantasantiri ica pitirooti. Pigamemari.

²⁴Iquemobëro oca, yomingasantëri itsitogantacari anchato iguitiquë.

²⁵Aganguite tsitiniri yamanocoqueri Tosorintsi Paboro aisati Siras. Inibabenqueri caninari aisati icántabenqueri. Iquemaiguëri antagaisati iromingane.

²⁶Iroguito posebatanaca omagaro quibatsi aisa iromingamento. Pasirianaquero sitëcori opariganai ora itsinagantacari aisa otsaaguetanaca ora yoguëshotancari.

²⁷Icaguitanë omisantiri aro iniaquero pasiriaca sitëcori ijique aroque isigaiganaca ira irinaga yominguëri. Itsoroganë yáguëro isabirite iróganëmame iriati.

²⁸Carari icaimasantëri Paboro catsigue: —¡Quero pógasitanaca obiati tenta nasiganëma! ¡Aintana omagarojegui yaca!

²⁹Iriro icanqueri iromeraro: —Pomapëna obotagantsi. Aro yamapëneri, icanaque yobaticagueritotasipari Paboro aisa Siras. Imogomogoatanaca.

³⁰Aique yomisotoqueri yosamitëri: —¿Ogomeantatsiri, pairo nanganque cara iragabisaicotajina Pitosorintsite cara irojocajinaro ora nacantaguetomotiri te onganinate?

³¹Yotabitanëri: —Pinguemisantiri Atingomi Jesos pintingomintimari, aro iragabisaicotajimi irojocajimiro ora picantagueti te ongomeite. Aisa inganquima pomatsiguenga.

³²Aro Paboro aisa Siras icomantasantëri Irinibare Tosorintsi ira omisantiri aisa imatsiguenga.

³³Irooti tsitiniriquë iquibajineri cara ipasatëri. Aique ibaotisataca ira omisantiri aisa antagaisati imatsiguenga.

³⁴Yáganëri ibangoquë ipëri iraperi. Ira omisantiri aisati imatsiguenga icaninasëretaiganaque aroquenta iquemisanqueri Tosorintsi ipabacari.

³⁵Oquëtaguetanë igáqueri joes: —Pomisotocajiri Paboro aisa Siras.

³⁶Ira omisantiri icomantëri Paboro: —Igátajina nomisotocajimi. Yamai caninasati pijátaje.

³⁷Carari icanqueri Paboro: —Quero niáti. Naro nomatsiguengatacari Iromasati. Te irosomitëmatina itingomi. Te irogóte pairoraca nacanque. Aisati ipasatasitëna, yomingasiquina. ¿Yamai comanoroni icogui iriocaina? Iribocapëta iriati iromisotocajantina.

³⁸Aro ipiganaja soraro icomantapëri irinibare Paboro. Cara igóiguë itingomi jitacha joes cara imatsiguengatacari Paboro ira Iromasati, aro itsorogasantanë.

³⁹Ipocaigapë itingomi yamanopëri Paboro aisa Siras irojocajineri ora icantaguetomotiri. Yomisotocajiri caninasati, yamanaqueri iriátae.

⁴⁰Aro isotocanë Paboro aisa Siras iromingamentoquë, aisati ipiganaja obangoquë Iriria, iniopairi quemisantatsiri, yogometaigapëri yoganinataigapëri. Aique yogaganaca basiniquë poeboro.