Read Nomatsiguenga Iragátane Jesos 23 Bible Online

Iragátane Jesos 23 - Nomatsiguenga bible

Iragátane Jesos 23

¹Inetsasantaiguëri obatatsiri ira Paboro icanque: —Nomatsiguenga, nigóti iniacaninatëna Tosorintsi irooti yamai. Teni nontsorogue naneingomentoquë.

²Aro Ananías itingomi saseriroti igáqueri itsibatari: —Pinchotangabagantetiri.

³Icanque Paboro: —Obiro inguisë Tosorintsi obironta matobiantatsiri. Pisobiaque yaca, picoque pomoncaratirome ora isanguenaque Moisés. Yamai pinguisagantëna. Te pomoncaratiro ora Sanguenari.

⁴Ira matsiguenga aronisatiquë Paboro icanqueri iriro: —¿Picantocotaguetasitari obiro itingomi saseriroti?

⁵Yotabitanëri Paboro: —Teni nogóte cara iriro itingomi saseriroti. Nogóquerime, quero nacantirime aronta ocanti Sanguenari: “Quero picantocotaguetasitari itingomi pomatsiguenga”.

⁶Igóque Paboro cara ainta iconagacari saroseo aisati bariseo. Icaimanë: —Nomatsiguenga, naro bariseo, naatisati itomi. Najiti cara intinaajiri Tosorintsi ira camënguitsi iraganiatairi aisati. Iroro iguisabiritaiguëna yamai.

⁷Iquemobëro oca inibatë Paboro, ipëgatsatobaca catsigue bariseoegui aisa saroseoegui. Iguisaneintobaca.

⁸Ira saroseo jitatsi: “Quero icaniatai aisati ira camatsiri. Querojenga pini isëre matsiguenga, querootisatijenga ini ironomire Tosorintsi”. Ira bariseo icantaiguë: “Intinaajima aitinta isëre matsiguenga. Inganiatanae. Aintasati ironomire Tosorintsi irisaanganetite”.

⁹Tojai iguisatsatobagaigaca catsigue. Aro yaratingaiguë ira ogomeantiro Sanguenari, iriro bariseo. Icantasantaiguë: —Tenijengari ingantaguete ica sërarica ora te onganinate. Iriroca nibaqueri ironomire Tosorintsi, irineta.

¹⁰Aiquero tojaisonori iguisatsatobagaigaca. Itsorogobiqueri Paboro comantanti cara iroguiripitëri intibatsaaqueri jorío. Aro icaimëri isorarotepague igáqueri: —Págabitsatiri, páganëneri pobangoquë.

¹¹Aro yáganëri. Otsitinitanai iconijatomopëri Paboro Atingomi icampëri: —Pinganinaserëte. Piquenguitsatocoquina yaca Jerosarénquë, aisati pinganquima pinibatë canta Iromaquë. Yáganëngani Paboro Sesáreaquë.

¹²Oquëtaguetanë yapatoica joríopague, iquengaigaca cara quero yapi querootisa yóga nija irooti cara iróqueri Paboro.

¹³Icarati 40 jorío quinguënguicha iróguiri.

¹⁴Iátasitaiguëri saserirotijegui aisati antiasipari icantaigapëri: —Catingasatiquë Tosorintsi naquengaigaca naroegui nóguëri Paboro. Quero napi, querootisa nógaa nija irooti cara nóguëri. Queroca nóguiri, iratsipiriacagaiguenata naroegui Tosorintsi.

¹⁵Yamai obirojegui manaantirine comantanti iromapëri Paboro obiroquë. Pingantiri picogaiguë posamitasantiri arota pigóiguero ora icantagueti. Naroegui nomaguetaiguëri nógobëri cara queroquerai yareta obiroquë.

¹⁶Ainta itineri Paboro iquemocoqueri jorío cara isariacari iróguiri Paboro. Aro iáque ibangoquë soraro icomantapëri iriconguiri.

¹⁷Paboro cajemaqueri capitán icanqueri: —Páganëri ica oboinaca comantantiquë. Aiti ora ingomantëri.

¹⁸Yáganëri capitán, icanqueri comantanti: —Icaimagantëna Paboro ira iromingane yamanaquina: “Páganëri ica oboinaca comantantiquë. Aiti ora ingomantëri”.

¹⁹Icatsabagotanëri ira janequi casiriconiati cara irosomiqueri comantanti, yosamitëri: —¿Pairo ojita pingomantëna?

²⁰Yotabitanëri: —Ira jorío iquengaigaca cara iromanajimiri naramani páganairi Paboro catingasatiquë ira obatatsiri icarati 71. Icogaiguini iromatobiquimi, inganquimi icoguini irosomitasantaigueri aisati.

²¹Quero piquemisantiri aintanta sërari icarati 40 iquengaigaca iróguiri. Icantaiguë: “Quero napaigui querootisati nógaa nija irooti cara nógaiguëri Paboro. Queroca nóguiri, iratsipiriacagaiguenata naroegui Tosorintsi”. Yamai aroque yobetsicaigaca. Yoguiaquimi yamai, pinganqueri ora iromanaquimi.

²²Aro igátajiri oboina comantanti icantasantobëri: —Quero picomantiri pairiraca ora picomantëna yamaica.

²³Aique isotocanë. Iriro comantanti icaimëri pite capitán igáqueri: —Pobetsicaigueri pisorarote ingaraque 200 iranëitaiganaque aisati 70 ingueicotanëma imorane, aisati 200 áganënguitsine irosataamento. Iriáiguë Sesáreaquë aganguitesata.

²⁴Aisati pobetsiquineri Paboro imorane, ingueicotanëma. Páganëri caninasati canta Bériquis itingomiquë.

²⁵Aique isanguenaquineri sanguenari ocanti negaca:

²⁶“¿Aintabi, Bériquis, natingomi? ¿Tegotsitatsibi? Naro yaca Caraorio Irísias nasanguenaquimi.

²⁷Nongomantëgotëri ica sërarica nagáquimirini. Yágaiguëri jorío icogaigabitaca iróguirime. Naquemocoqueri, aro natentaigacari soraro nágabitsataiguëri aroquenta nigótocoqueri iriro matsiguengatacari Iromasati.

²⁸Nocoque nogóteme pairoraca iguisabiritaiguëri, aro náganëri cara itingomiquë obatatsi icarati 71.

²⁹Patiro icantocotaiguëri jorío negaca: ‘Iriro teni inguemisantiro ora isanguenaque omatsiguengajegui’. Te ingantaigue pairoraca ora nagamagobiqueri naro teatisati ora nomingabiriqueri.

³⁰Cara nigótanë iquengaigaca jorío cara iróqueri, aito cara naquianca nagáquimiri. Aisati nocomantaiguëri ira quisaneinqueri iriátaigue obiroquë arota ingomantëgotasantiri”. Irooti isanguenaquineri, aro ipabaqueri capitán icanqueri: —Jeroca, páganëneri Bériquis, aisati páganëri Paboro.

³¹Aro ira sorarojegui yágaiganaqueri Paboro tsitiniriquë. Yaretaigacaro Antípatiris.

³²Oquëtaguetanë ipigaigaa ira soraro anëitasitanënguicha. Yágaiganaqueri Paboro ira quijëgotaiguënguicha imoranequë

³³irooti yaretaigacaro Sesárea. Ipapëri sanguenari Bériquis itingomi aisati ipapëri Paboro.

³⁴Iniobëro sanguenari Bériquis, yosamitobëri Paboro: —¿Nega popaniaca obiro? ¿Pairo ojita piguebatsite? Icomantëri Paboro: —Nopaniaca Sirisiaquë.

³⁵Icanqueri itingomi: —Caraquenta nanguemasantëmi cara iribocaigapë ira comantëgotëmine. Aique igáqueri soraro: —Pomingueri canta ibangoquë Eroris. Pinetsasantiri.