Read North Mofu Matiyew 13 Bible Online

Matiyew 13 - North Mofu bible

Matiyew 13

¹Ta pas ana ŋga na, Yezu ma bawa da 'ay, me ndzey ka mey ma bəlay.

²Ndaw hay haɗadzidzay ma kusam ka tsakay ŋga, ha ŋga me tsəley a kombiwal. Ŋga me ndzey da huɗa ka 'ar ma yam. Ndaw ana ma kusa na hay tabiyaha ma ndza hiya ka ɗakal tok.

³Ŋga ma tsatar ka tek hay haɗadzidzay, ta ma maladatara ta meley. «Nəkafama ndaw me sləkey ma bawa da 'ay ŋga ma da sləkey.

⁴Andza a sləkey aha na, daw ma kuyafa ka tsakay tsəveɗ, ɗiyeŋ ma 'ərlam hay ma səmawa, ma ndama ba tabiyaha.

⁵Sa na hay ma kuyafa ka sek pəray, hahay kava haɗadzidzay dakay, ma pətsawa tsam tsam hərway slam ana sek pəray aha, slam ma pafa slasləlay dakay.

⁶Andza pas ma sləlawa na, ma ɓətam, ma ŋgwalam tek ata, hərway slasləlay ka vaw dakay.

⁷Sa na ma kuyafa 'ay ndak, ndak a hana ma gəlawa, ma margaɗa daw ana ba.

⁸Sa na ma kuyafa ka slam bobor aha, me nəhey kava haɗadzidzay. Na temere na, na kokurow mukwa na, sa na kokurow makar.

⁹Kendzey sləmay ma ndaw ana daha na, ka tsənada!»

¹⁰Gawla ŋga hay ma gurafama, ma ləvamar: «Ɗagay ka tsadatara bəzay ma guma na hay, ka maladatara ta tek hay na, ka mey?»

¹¹Ŋga me mbəɗey kava: «Hərway a kuray na ka vələmakwar tsəveɗ ma sərada tek ma kəzla na hay ma Slala ma 'ərlam ba, ama a taya na, ka vələmatar tsəveɗ tikay.

¹²Hərway ndaw ana tek aŋga daha na, a da vəlamar adiya. Arka a da dzəmey na haɗadzidzay. Ama ma ndaw ana dakay na, kwa ketekuɗey daha na, a da təɓadəmara ba.

¹³Nəkafama i maladatara bəzay ma guma na hay ta meley na: hərway a nəkam dey na, mandzara ka nəkadama; a da dzəkam sləmay, mandzara ka tsənadama, ka səradama.

¹⁴Ma ta a da ndesley na andza ma ndaw sek Ezayi ma ləvawa na: Ka da dzəkam sləmay haya hayaha, amana ka da tsənadama ha kakay. Ka da zazəram dey haya hayaha, amana ka da nəkadama ha kakay.

¹⁵Hərway mevel ma səkway a neney na ka tərey ba təɗa təɗa. Taya ma təra hiya andza maragwam da sləmay. Taya wuɗaradama dey ba, ma aza ka da nəkadama ta dey ta zlay, ka da tsənadama ta sləmay ta zlay, ka da səradama da mevel ata zlay, mala ka da mbəɗadama mendzey ta zlay; akwatay dakay na, i ka ndaladata ba!

¹⁶« Ama kuray eɗey hay na, kuray da wuiya zləna, ka nəkadama dey, ka tsənadama sləmay.

¹⁷I ɓadakwar dərkana, ndaw sek hay haɗadzidzay, ndaw dzerey ana hay haɗadzidzay, ka wuɗam ba ma nəkada tek a kwar a neney hay ma nəkadəmata na, amana ka nəkadəmərawa kakay. Ka wuɗam ba, ma tsənada tek a kwar a neney hay ma tsənadəmata na, amana ka tsənadəmərawa kakay.»

¹⁸Kuray eɗey tok na, tsənadama bəzay ma guma ma mala ha na ma ndaw me sləkey ana.

¹⁹Andza ndaw ma tsənada guma ma Slala ma 'ərlam, ama a sərada kakay na, Ndaw wewer ana ma sawa, ma kuɗadərawa guma na hana, ma sləka ha da mevel aŋga na ba. Neney na andza ma ndaw ma sləka ha ka tsakay tsəveɗ ana.

²⁰Na me sləka ha ka sek pəray ana na, ndaw ma tsənada Guma na, ma təɓa tsam tsam ta wuiya ha na.

²¹Amana ka pey slasləlay da mevel aŋga kakay, ŋga na, ndaw ma mendzey nekəɗey: andza viya ma sawa, dakay a kadəmata tatakoy hərway ma Guma na na, a təɗey.

²²Na ma sləka ha da ’ay ndak ana na, ŋga na ndaw ma tsənada Guma na. Amana me dzeley 'ar ma bəla neney hay, ta zleley me pey wuiya ka ndaw, a ŋgaɗətsa guma na ba. Arka na, a ndzey na mandzara bəzey ana kava.

²³Na ma sləka ha ka dala hayna na, ŋga na ndaw ma pafa sləmay ka guma na, arka ma tsənada: arka na, me yey bəzey, na temere na, na kokurow mukwa na, sa na tey kokurow makar ana »

²⁴Arka Yezu ma tsatar ta bəzay ma guma mekelehe ma malaha ta meley ana: «Bəzay ma guma ma Slala ma 'ərlam na, andza ma ndaw me sləkey haləfaw hayna a ley ŋga.

²⁵Andza ta dəvaɗ ndaw hay ma nara hiya tsoy na, ndaw dugwan aŋga ma daway, ma sləkar daw zay sla a wuzlah ma daw ana, ma daw təŋga.

²⁶Andza daw ana ma pətsawa, ma sawa ta 'ar na, daw zay sla ma sawa ta 'ar tey.

²⁷Gawla ma bay ma 'ay ana hay ma səmawa ka tsakay ŋga, ma ləvamar: ‹Bay, andza a kafandar ka sləkey a ley ɗek na daw hayna, kakay ɗaw? Azlakwa tabiyaha daw zay sla a sawa da huɗa na, da may?›

²⁸Ŋga ma ləvatar: ‹Me key tek a neney na, ndaw dugwan› arka gawla ma 'ay hay, ma ləvamar: ‹A saka na la ka dawam, ka kuɗama ba ɗaw?›

²⁹Ŋga ma ləvatar: ‹A'ay, me wesey na, kendzey andza ka kuɗəma ha na, ka da kuɗəmata ba ka vaw ta daw aha dzay.

³⁰Mbəkadəmata ka nəham kamaslətaha, ha aza kasl ka har me tsuwey. Ta har me tsuwey ana tok na, i da ləvatar a ndaw me tsuwey ana hay: tsuwama daw zay sla ba ɗagay, mbadama ma da kakəra. Ama daw hayna tok na, kazləmərawa a dey ɗaw ana.»

³¹Ŋga ma maladatara bəzay ma guma mekelehe sa: «Slala ma 'ərlam na kal kal andza bəzey ma ɓəzaŋ. Ndaw ma zəga, ma daw, ma sləka a ley ŋga.

³²ŋga na, serɗeɗe ha da walaŋ ma haləfaw hay tabiya ha. Ama ka pətsawa ba na, a gəley a fənata sa ma vəɗe ma tek hay tabiyaha da dzerne. A tərey wudez aha, ha ɗiyeŋ hay a səmawa, a kam 'ay ta ka hawal ana hay.»

³³Ŋga maladatara bəzay ma guma mekelehe sa: «Slala ma 'ərlam na, kal kal andza is ŋgwas me zəgey nekəɗey, ma halɓada ta hapa haɗadzidzay, arka na ma mbəslada hapa a hana tabiyaha.»

³⁴Tobiyaha bəzay ma guma ŋga neney hay na, Yezu a maladatara a ndaw ana ma kusa na hay ta tek hay, zləna, a tsadatara mandzara ka maladatara ta meley kakay na dakay.

³⁵Ma aza ka ndesley andza ma ndaw sek ma ləvawa na: I da wurey mey ma da maladatara guma ta tek hay. I da ɓada tek na ma kəzla hiya, zla da mezley ma bəla na hay.

³⁶Arka andza Yezu ma mbəkadata ndaw ma kusa hiya na hay ba na, ŋga ma daway a mbaw. Gawla ŋga hay ma gurafama, ma ləvamar: «Wandzaladandar bəzay ma guma ma daw zay sla da ley ana ɗagay.»

³⁷Ŋga ma mbəɗatar kava: «Ndaw me sləkey daw hayna na, Bəzey ma Ndaw .

³⁸Ley na, bəla gədem. Daw hayna na, ndaw ma da fuləkwey a Slala ma 'ərlam ana hay. Daw zay sla tey na, ndaw ma Ndaw Wewer hay.

³⁹Ndaw dugwan ma sləkawa na na, Setene. Pas me tsuwey na, pas ma bəla me ndəvey. Ndaw ma da tsuwey ana hay na, madurlam ma 'ərlam hay.

⁴⁰Andza ma mbadama daw zay sla ma da kekərey na, a da key ta pas ma bəla me ndəvey na, andza ha tok.

⁴¹Bəzey ma Ndaw a da slərey madurlam aŋga hay, a da gaɗəməmata ma da mbadata dəreŋ ta Slala ŋga, ndaw me pey wuiya ka ndaw ana hay, ta ndaw me key tek haykakay ana hay.

⁴²A da hələmata a da kuyadəmata a waw ma laɓa na. Da huɗa tok na, a da tuwam, a da pəɗam sler.

⁴³Arka ndaw dzerey ana hay tok na, a da wazlam dey andza pas da Slala ma Baba ta. Ndaw ana sləmay ŋga daha na, ka tsənada!.»

⁴⁴«Slala ma 'ərlam na, ma malada ŋga na na ta zleley ma kəzla ha da huɗa ley. Ndaw ma ndzafa, ma kəzlada ka slam aŋga. Da wuiya ŋga na hana tok na, ma daw ma haɗəkada tek aŋga hay ba tabiyaha; arka ŋga ma haɗəka ley ana tok.

⁴⁵Slala ma 'ərlam na, ma malada ŋga na satsa na ta ndaw filaw, me səpey tek ma wuiya hayna hay.

⁴⁶Andza ŋga ka ndzefey ba asləta ma sumkwo haɗadzidzay ana na, ŋga ma daw ma haɗəkadata tek aŋga hay ba tabiyaha. Ŋga ma hadəka tok.»

⁴⁷«Slala ma 'ərlam satsa na, kal kal andza zəva ma kəladama a bəlay. Ma həlawa mendzey ma kəlef hay tabiyaha.

⁴⁸Andza ka rəhey ba na, ma vahəmərawa ka ɗakal. Arka ma ndzam aha, ma waləmata na hayna hay a tsakarak, na ma nafam kakay ana hay tey na, a kuyadəmata.

⁴⁹Ta pas ma bəla me ndəvey na, a da key na kal kal andza ha. Madurlam hay a da səmawa, a da wanəkadəmata ndaw haya kakay ana hay ba ka vaw, ta ndaw dzerey ana hay.

⁵⁰Arka a da kuyadəmata a waw ma laɓa na. Da huɗa tok na, a da tuwam, a da pəɗam sler.»

⁵¹«Tek a neney hay tabiyaha na, kuray ka tsənadama ba ɗaw?» Taya ma mbəɗamar kava: «Ayaw.»

⁵²Arka ŋga ma ləvatar: «Kəɗey tok na, mendzey ma ndaw me sesəkey Mewey , ma dzaŋga ha ka Slala ma 'ərlam aha na, kal kal andza ma bay ma 'ay ma badərawa zleley ŋga, na wayna ta na guram ana.»

⁵³Arka andza Yezu ma ndəvada me tsey bəzay ma guma ŋga neney ma mala hiya ta meley ana hay ba na, ŋga ma daw təŋga da huɗa.

⁵⁴Andza ŋga ma sawa a wuraw aŋga na, Yezu ma tatəkadata ndaw ma wurow ana hay da 'ay me ɗuley mey ta ha ma rəzlata, ha ma ləvam: « Ma səra ’ar a neney ta ɗeɗew a neney a səmərawa na da may?»

⁵⁵Ɗagay neney na bəzey ma ndaw me tseɗey tuwaw ana kakay ɗaw? May ŋga na na, mezəley ŋga na na Mariya kakay ɗaw? Malam aŋga na hay na, andza Zak, Zozef, Simoŋ ta Zud kakay ɗaw?

⁵⁶Malam aŋga diŋgwas ana hay tabiyaha na, taya da 'ay lakwa na hay kakay ɗaw? Azlakwa tek a neney hay tabiyaha a səmərawa na da may?»

⁵⁷Arka Yezu a da kafata na tek me tsey metsembeɗ aha. Yezu ma ləvatar: «A rəsama ndaw sek na da ŋgwa ŋga, da veɗ 'ay ŋga.»

⁵⁸Arka da huɗa na, Yezu ka key ɗeɗew hay haɗadzidzay kakay zləna, hərway a pamar 'ar kakay.