Read North Mofu Matiyew 8 Bible Online

Matiyew 8 - North Mofu bible

Matiyew 8

¹Andza Yezu a harɗawa ha da mamba na, ndaw ana ma kusa na hay haɗadzidzay ma səpamar bəzay.

²Arka na ndaw malawa na daha ma gurafa, me gərdey ka mey dey ŋga, ma ləvar: «Bay’ərlam, kendzey ka wuɗey na, ka slafa ma bazləmafaya malawa ɗaw a neney seŋgey.»

³Yezu ma tsakafada har, ma ləmar, ma ləvar: «Ayaw i wuɗey, tərey ma bazləma ha na» Deŋe ka slam ana tsana, malawa ŋga na hana na, ma bazləma ha tsoy.

⁴Yezu ma ləvar: «Ndzey tete, ɗaɗa ka da ɓadara a ndaw zlay. Amana daw da ɓadara vaw a baba me key kuley, vəlada tek ma ger ana andza na ma Moyiz ma tsawa kava na. Aza ka da təratar seydewe ta ha.»

⁵Andza Yezu a fuləkwey aha a Kafarnawom na, bay me wey sidzew temere ana daha, ma gurafa, ma kar amboh ma ka dzəna,

⁶ma ləvar andza neney: «Bay’ərlam, gawla ma 'ay ɗaw ma naha da mbaw, ma mbara vaw aha, a ndelemey aha da mey ŋga dakay.»

⁷Yezu ma ləvar: «Yah na, i daway, i da ndaladərawa ɗaw?»

⁸Ama bay ma sidzew ana hana hay, ma mbəɗar kava: «Bay ərlam, yah na ɗa ndaw aha ma kah ka fuləkwey 'ay ɗaw dzay kakay, tsey guma veɗ asləta tsana, gawla ma 'ay ɗaw ana a da ndeley seŋgey.

⁹Kəɗey yah ana na, ɗuhwa ɗaw daha tiyatsa. Ama i wey sidzew hay haɗadzidzay. I ləvar a naŋgar da huɗa: ‹daway›, na, a daway. A na mekelehe: ‹sawa›, na, a sawa, i ləvar a beke ɗaw: ‹ka tek eɗey›, a ka.»

¹⁰Andza Yezu ma tsənada guma ŋga neney na, a mbafa bəza kakay. Arka ŋga ma ləvatar a ndaw ma səpamar bəzay ana hay: « I ɓadakwar dərka na, ɗaɗa i ka ndzefey ndaw da Israyel me pey ’ar andza neney dakay.

¹¹I ləvakwar satsa, aza ndaw hay haɗadzidzay a da səmawa da bəzay, da mey ŋgwa, a da ndzafam slam me zəmey hwahwaɓay andza Abraham, Izak ta Zakob, da Slala ma 'ərlam.

¹²Dzadzak andza ndaw ma da zəmey Slala na hay tok na, a da kuyadəmatərawa a ləvaŋ a bəla. Da huɗa tok na, a da tuwam ta me pəɗey sler aha.»

¹³Arka Yezu ma ləvar a bay ma sidzew ana hana na hay: «Daway a mbaw, ka kaka andza ma me pey 'ar eɗek ana.» Arka gawla ma 'ay ana me ndeley deŋe, da har ana.

¹⁴Andza Yezu me fuləkwey 'ay ma Piyer na, ŋga ma nəkada maya ma ŋgwas ma Piyer ma naha, 'ar a wuzləɗar.

¹⁵Ŋga ma ləmar a har aŋga na tsana, 'ar me wuzləɗey ma ndalafa. Ŋga me lətsey, ma tar tek a Yezu.

¹⁶Ma hakwaɗ me key na, ma hələmatərawa ndaw ta fakalaw da 'ar ana hay haɗadzidzay. A tsey guma ŋga veɗ asləta tsana, ma ɓəlata fakalaw hay. Arka ŋga ma ndaladata ndaw dzedzey ana hay tabiyaha.

¹⁷Ma aza ka ndesley andza ma ndaw sek Ezayi ma tsərawa na: Ŋga ma həlafandakwar me tərey lakwa hay ba, ŋga ma zəgafandakwar dzedzey lakwa hay ba.

¹⁸Andza Yezu ma nəkadata ndaw ana ma kusa na hay haɗadzidzay ka tsakay ŋga na, ŋga ma ləvatar a gawla ŋga hay: «Tasakwa ta 'ar ma bəlay a diya naŋgar.»

¹⁹Arka ndaw me sesəkey Mewey ana daha, ma gurafa, ma ləvar: «Miter, kendzey ka daway ta waray ta waray na, i səpaka bəzay.»

²⁰Yezu ma ləvar: «Mezerem hay ta 'ay ta hiya da tsəvay, ɗiyeŋ ma 'ərlam hay, 'ay ta hay daha; ama Bəzey ma Ndaw na, kwa slam aŋga, me sesəkey vaw na, dakay.»

²¹Ndaw asləta da walaŋ ma gawla ŋga hay, ma ləvar sa: «Bay’ərlam, vəlaya tsəveɗ i ka daway ka zlələrawa baba ɗaw ba, ɗagay.»

²²Ama Yezu ma ləvar: «Səpaya bəzay, mbəkadata vagay hay ka zləlam vagay ta.»

²³Arka ŋga me tsəley a kombiwal, gawla ŋga hay ma səpamar bəzay.

²⁴Andza tsoy taya ka 'ar ma bəlay na, vavəray ma lawa, yam me tsey ɗaŋgwala, tsoy a wuɗey ma zəga kombiwal ba a bəzay yam. Da har ana na ŋga ma nara ha.

²⁵Gawla ŋga hay ma gurafama ma pərkadama, ma ləvamar: «Bay’ərlam! Haya buwandar zləna! La da zəɗam.»

²⁶Ŋga ma ləvatar: «Ɗagay ka wasam ka mey? Ndaw a neney ta 'ar me pey nekəɗey ana hay!» Arka ŋga me lətsey, ma babətsafata kandza vavəray ta bəlay. Memeɗ me rey ba ɗeɗek, kwa tek me ɓəley dasakay.

²⁷A rəzlata ndaw hay kambəlaɓa, ha taya ma ləvam: «Ŋga na na way a way, ndaw a neney ana ha memeɗ ta bəlay ma tsənamar sləmay ana na?»

²⁸Andza Yezu me husey a diya naŋgar a dala ma Gadareniyeŋ hay na, ndaw hay daha tsew ta fakalaw ahiya da 'ar ma bəmawa da tsəvay, ma səmawa ma zlam 'ar. Ndaw hay tabiyaha a wasadəmata ta ndaw ana hana hay. Kwa ndaw ma slafa ma daway ta tsəveɗ ana hana na na dakay.

²⁹Arka taya ma zlamar me wudey, ma ləvam: «Ka wuɗafandar mey, Bəzey ma Bay ma Bəla, ka sawa ka sləna na, ma da mərgaɗandar amba har ana ka slawa ɗaw?»

³⁰Arka a key har daf, ta slam ana na, welde ma gaduru hay a pədəma ha zəmay.

³¹Fakalaw a hay ma kamar amboh a Yezu ma ləvamar: « Haɗaw ka harandar na, sləradandar a welde ma gaduru a ŋga na hay.»

³²Ŋga ma ləvatar: «Dawam!» Arka taya na ma bəmawa, ma fuləkwam a gaduru hay; welde ma gaduru hay ma tsəmawa ɗay zla ka ɗay mamba na a bəlay, arka ma mətsam da yam.

³³Ndaw me tsukurey gaduru ana hay ma hwam a wuraw, ma təkəradəmatara a ndaw hay tek ana hana me key tabiyaha ana, ta na ma ndaw ta fakalaw da 'ar ana hay dzay.

³⁴Arka ndaw hay tabiyaha ma bəmawa da wuraw, ma səmawa ma da zlam ’ar ta Yezu. Andza taya ma nəkadama ba tsana, taya ma kamar amboh a Yezu, ma ŋga ka daway ba da dala ata.