Read North Mofu Mark 14 Bible Online

Mark 14 - North Mofu bible

Mark 14

¹Pak, ta magurlam ma peŋ mandzar is ana ma zlambar aha, a zawa meney tsew. Baba ɗuhwa na me key kuley ana hay, ta ndaw me sesəkey Mewey hay, ma səpam wewer ma da zəga Yezu, ma da kəɗa ba vagay aha na teŋgey.

²Taya ma ləvam andza neney: «Ka key da magurlam zlay zləna, me wesey na a da zlawara səkway ba»

³Yezu ŋga da Betani, da 'ay Simoŋ ndaw malawa, andza a zəmam aha tek na, ŋgwas ana daha, ma sadərawa ta wurdey hayna ma sumkwo haɗadzidzay ana, da kwalaba mambay aha. Ŋga ma wura kwalaba na hana, ma mbəɗafa wurdey ana ka 'ar ma Yezu.

⁴Sa ma ndaw hay da walaŋ ata, ma gwaŋguɗam mey ka 'ar vaw ta na, ma ləvam: «Ɗagay neney na masaka ma wurdey mey?

⁵Akwa ka haɗəkadama wurdey a neney na, a sadərawa gabal temere makar na, a vəladəmatara sumkwo na a ndaw mbarga na hay!» Arka taya na ma kafama mevel ka ŋgwas ana hana na.

⁶Ama Yezu me ləvey: «Mbəkadama, ka wuzləɗamar ’ar a ŋgwas ana na ka mey? Mber ana na haya ha bəza kakay, ŋga ma ndaslada hərway ɗaw ana na.

⁷Akwa ndaw mbarga na hay na, ka da ndzam ka pas ka pas dzaya seŋgey, kendzey ka wuɗam na, ka slafama ma kəmatar hahaya. Ama yah na, ka da ndzafəmaya ha ka pas ka pas kakay seŋgey.

⁸Tek aŋga andza ŋga ma slafa me key ana na, ŋga ka ka tsoy, zla ka vaw na ŋga ka mbəɗafa wurdey ba ka vaw ɗaw ma da zəgey a tsəvay.

⁹I ɓadakwar dərka na, ka slam ma da ɓey Mey Wayna ka bəla tabiyaha na, a da təkərama tiyatsa ma sərafa ka ŋga na ta tek aŋga ma kawa na.»

¹⁰Arka Zudas Iskariyot, ndaw asləta da walaŋ ma gawla ŋga kurow kava tsew ana hay, ma daway ’ay ma baba ɗuhwa na me key kuley ana hay, ma da haɗəkadatara Yezu.

¹¹Andza ma tsənadama mey ana na, a datar 'ar bəza kakay, ha ma ləvamar a da vəlamar sumkwo ba a ŋga na. arka Zudas me səpey wewer a da haɗəkadatara kassla ka har ana hayna na, teŋgey?

¹²Pas tsəfəmey ana ma peŋ mandzar is ana, ta pas me sley təɓaŋ ma magurlam ma Pak na, gawla ma Yezu hay ma ləvamar: «A saka, la ka dawam, ka ləmadəmaka tek me zəmey ɗek, ma magurlam ma Pak na, ka waray?»

¹³Arka ŋga me slərey ndaw hay tsew, da walaŋ ma gawla ŋga hay, ma ləvatar: «Dawam a wuraw, ka da zlam 'ar ta ndaw ana daha, ta zaw aha ka 'ar, a sawa da yam, səpamar bəzay;

¹⁴arka, andza ŋga ka fuləkwey tsoy a 'ay ana na, ləvamar a bay ma 'ay ana: ‹Bay a ləvawa na: 'ay na i ma da zəmey tek ma Pak andza gawla ɗaw hay da huɗa na na, na waray?›

¹⁵Arka ŋga tok na, a da ɓafakwar ka 'ay ana daha ka 'ar ma 'ay ma papaya ha ta pepeyey, ɗuhwa ha, ma ləma ha ba ka vaw. Arka na ləmadəmandakwar da huɗa tok.»

¹⁶Arka gawla ŋga na hana hay ma həlam vaw, ma dawam a wuraw ana, ma ndzafama andza ma ŋga ma tsatəraɓa na. Arka taya ma ləmadama tek ma Pak ana tok.

¹⁷Andza ma hakwaɗ me key na, Yezu ma husm ta gawla ŋga kurow kava tsew ana hay.

¹⁸Da har andza taya ka slam me zəmey tek a zəmam aha tek na, Yezu me ləvey: «I ɓadakwar dərka na, ndaw asləta da walaŋ a kwar a da haɗəkadaya. Ndaw ana na, la zəmam aha tek tsetsuwe.»

¹⁹Guma na a ndalatar bəza kakay, taya ma zlamar ma ləvamar: «Akwatay na yah ɗaw! Akwatay na yah ɗaw?»

²⁰Ŋga ma ləvatar: «Ndaw asləta da walaŋ a kwar kurow kava tsew ana hay, na la ma tələkam har a gandaf tsetsuwe na.

²¹Hərway Bəzey ma Ndaw a da daway na, andza ma Mewindey Kokwoɗ ana ma ləvafa. Ama ndaw ana, ma da haɗəkada Bəzey ma Ndaw ana tey na, ka tuway vaw ŋga! Ndaw ana ŋga na na, akwa ma ŋga na, ŋgama ka yəmərawa zlay tabiyaha!.»

²²Da har a zəmam aha tek na, ŋga me zəgey peŋ, a dəba ma ma pəsafa mey ba na, ŋga ma tsada, ma vəladatara, arka me ləvey: «Təɓama, neney na vaw ɗaw.»

²³Arka me zəgey vəley ma zom, a dəba ma ma madara sise ba kava na, ma vəladatara, ma sama tabiyaha ta ha.

²⁴Arka ŋga ma ləvatar: «Neney na mambaz aɗaw, mambaz ma Me dzəmey Vaw, ma da mbəɗawa hərway ma ndaw hay haɗadzidzay na.

²⁵I ɓadakwar dərka na, ɗaɗa i da sey aha zom ma bəzey ma viŋe sakay, ha ka pas i ma da sey na wayna, da Slala ma Bay’ərlam.»

²⁶A dəba ma ma kəmata walay ma Pəsom hay ba na, taya ma bəmawa, ma dawam a mamba ma Tetəɗez.

²⁷Arka Yezu ma ləvatar: «Kuray tobiya kwar aha ka da təɗam. Hərway ma winda ha na, i ka da kəɗa ndaw me tsukurey ana ba na, təɓaŋ hay a da zlaɗam 'ar.

²⁸Ama, i ka da mbəlawa ba na, i da lahafakwar ba ka mey a Galiley.»

²⁹Piyer na, ma ləvar: «Kwa ndaw hay tabiyaha ka təɗam ba na, ama yah na, i da təɗey aha tikay!.»

³⁰Yezu ma ləvar: «I ɓadaka dərka na, teseɗey ta dəvaɗ a neney maga dzagulok a da zlehey dey tsew na, kah ka ləvey tsoy dey makar, ka səradaya kakay.»

³¹Amana, ŋga me ləvey afəna sa: «Kwa andza tekeɗe i da mətsama tsetsuwe na, i da ləvey aha, i səradaka kakay, tikay.» Sa na hay ma ləvam tabiyaha andza ha satsa.

³²Taya ma husam 'ay dzerne na daha, a zəlamar Zetsemani, arka ŋga ma ləvatar a gawla ŋga hay: «Ndzam ka sləna, i daw, i da ɗulawa mey.»

³³Ŋga me ŋgəley ka bəzay na, Piyer, Zak ta Zaŋ. Arka a da zlar na, ŋga ma sərafa ŋga me wesey, a kar tossa.

³⁴Ŋga ma ləvatar: «Mezek a ɗaw ma ndza ha magwam aha a memətsey, ndzam ka sləna, ka da naram zlay.»

³⁵Andza ŋga ma daway har daf kəɗey na, ŋga me kəley ka dala, ŋga me ɗuley mey, ma aza haɗaw a key vaw na, har ma tsetseh a neney na, ka daway ba dəreŋ ta ŋga.

³⁶Ŋga me ləvey: «Aba, Baba, ka kah na tek hay tabiyaha, ta dəba har sana, zəgafaya vəley ma tsetseh a neney ba! Amana paɗ ka kah zləna, andza na ŋga ɗaw me wuɗey ana, tikay!.»

³⁷Andza ŋga ma mawa na, a da ndzafata na, ma nara hiya; ŋga ma ləvar a Piyer: «Simoŋ, ka nerey aha seŋgey! Kah ka slafa me ndzefey gədaŋ me ndzey ta dey, ndzemdey pal, kakay!

³⁸Ndzam ta dey, ɗulam mey, ma aza kuray ka da təɗam a har ma ndaw me pey wuiya zlay. Mesəfrey na ma həla vaw aha, ama slaw vaw na, bəle ha.»

³⁹Arka ŋga gurey dey mekelehe sa, me ɗuley mey ma mada guma na andza ha satsa.

⁴⁰Andza ŋga ma mawa satsa na, ma ndzafata na a naram hiya satsa, hərway taya ma rəzla hiya. A səradama, ka ləvamar teŋgey, sakay.

⁴¹Andza ma mawa ŋga dey ma makar ana na, ŋga ma ləvatar: «Naram tek a kwar, sasəkam vaw kwar hay! Ma ka ha tsoy. Har ana ka sawa tsoy: nəkafama ka haɗəkadama Bəzey ma Ndaw tsoy, a har ma ndaw ma ŋgəsa na hay.

⁴²Lətsam! Nakwama ba. Nəkafama, ndaw ma haɗəkadaya na, ka husawa tsoy.»

⁴³Ka slam ana deŋe, andza Yezu a tsey aha guma mba na, Zudas, ndaw asləta da walaŋ ma gawla ŋga kurow kava tsew ana hay, ma husawa ta ndaw hay haɗadzidzay, ta tapay ahiya, ta sleɗ ma tsakay ahiya, ma sləradatərawa na, baba me key kuley hay, ndaw me sesəkey Mewey hay, ta ndaw ma səka na hay.

⁴⁴Ndaw ma haɗəkadatara na na, ɓa ka ɓadatərawa wewer a ŋga na, ma da ɓafatara na tsoy, a ləvatar na: «Ndaw na i ma da surma na na, ŋga ha! Zəgama, dadama, dzaɗama haya hayaha.»

⁴⁵Andza ma husawa ta ba tsana, ŋga ma gurey ka tsakay ma Yezu, ŋga ma ləvar: «Rabi.» Arka na, ŋga ma surma.

⁴⁶Sa ma ndaw hay tok na, ma pafama har, ma zəgama.

⁴⁷Ndaw asləta da walaŋ ma gawla ma Yezu hay, ma kuɗawa maslalaɓ aŋga, ma tsuwa gawla ma 'ay baba me key kuley ana daha ka sləmay, ha sləmay pok ba.

⁴⁸Yezu me tsey guma, ma ləvatar: «Ka səmawa ma da zəgaya ta tapay ahiya, ta sleɗ ma tsakay ahiya, andza ma da zəgaɓa katsala na, ka mey?

⁴⁹I daha ka pas ka pas da walaŋ a kwar da 'Ay me key Kuley , i tatəkadata ha ndaw hay na, kuray ka zəgəmaya kakay. Amana, ma Mewindey Kokwoɗ ana hay ka ndaslam.»

⁵⁰Tobiya ta ha ma mbəkadama, ma hwam tek ata.

⁵¹Bəzey gawla na daha, ma səpa da dəba da dəba, ma gadzəka ha ka vaw na gwada. Andza a da zəgama da huɗa na,

⁵²ŋga na ma gəradatara gwada na a har ata, ma hway təŋga, vaw kənaha.

⁵³Taya ma dadama Yezu 'ay bay ma Baba ɗuhwa na me key kuley ana, taya ma kusa hiya tabiyaha. Baba ɗuhwa na me key kuley ana hay, ndaw ma səka na hay, ta ndaw me sesəkey Mewey hay.

⁵⁴Piyer da dəreŋ na, ma səpa kasl a hwoɗ ma 'ay ma ’ay bay ma Baba ɗuhwa na me key kuley ana. Ŋga ma ndza ha ka dey waw a ndzam aha waw, andza gawla ma 'ay hay.

⁵⁵Azlakwa tok na, baba ɗuhwa na me key kuley ana hay, ta Sanedreŋ tabiyaha, ma səpam guma ma ndaw seydewe, ma da dzuwa Yezu a memətsey. Amana, taya ka ndzafam kakay.

⁵⁶Hərway ndaw hay haɗadzidzay ma kafama seydewe haya kakay ana hay ka Yezu, amana, seydewe ta na ka dazlam ka vaw kakay.

⁵⁷Ndaw hay daha nekəɗey da walaŋ ata ma lətsam, ma da kafama seydewe haya kakay ana hay ta me ləvey aha:

⁵⁸«La ka tsənadama ba a ləvey na waya: ‹Yah na i da mbəzlada 'Ay me key Kuley a neney, ma zla ha ta har ma ndaw hay ana ba, da meney makar na, i da zley mekelehe, na ma zla ha ta har ma ndaw hay tikay ana.› »

⁵⁹Ama, kwa ta guma neney tekeɗe na, seydewe ta na, ka dzəmey kakay.

⁶⁰Baba ɗuhwa na me key kuley ana, me lətsey da walaŋ ma ndaw hay tabiyaha, ma tsəhafa ka Yezu: «Ka mbəɗey ka seydewe ma ndaw a neney hay, ma tsafəmaka na tikay ɗaw?»

⁶¹Ama ŋga na, tete təŋga, kwa ka mbəɗey kava kakay. Baba ɗuhwa na me key kuley ana ma tsəhafa dey mekelehe sa, ŋga ma ləvar: «Kah na Ndaw ma vahara 'ar ana, Bəzey ma Bay ma Bəla na ma pəsa mey aha na ɗaw?»

⁶²Yezu me ləvey: «Ayaw, yah dərka na, ka da nəkadama Bəzey ma Ndaw , ma ndza ha ta har zəmay ma Ndaw ma slafa tabiyaha na, a sawa ha ta pazlay aha da 'ərlam.»

⁶³Baba ɗuhwa na me key kuley ana, ma ŋgarɗada zana ŋga hay, me ləvey: «Ka səpakwa ndaw seydewe sa na, key mey sa mey?

⁶⁴Kuray ana, ka tsənadama ba ta veɗ sləmay kwar, a tsaɗa ha Bay'ərlam sana, ka dzalafama na teŋgey?» Arka taya tabiya ta ha ma dzuwama na kassla təɗe me kəɗey ŋga na na vagay aha.

⁶⁵Ndaw hay nekəɗey ma zlamar ma təfafama sleslem, ma mbəzadəmara dey ba, ma kəɗama, arka ma ləvamar: «Key ndaw sek! Arka gawla ma 'ay hay ma ŋgəlama ta marawa ha.

⁶⁶Andza Piyer ŋga da gwadaw ma hwoɗ ma 'ay na, dem me key mber da 'ay Baba ɗuhwa na me key kuley ana, ma husawa.

⁶⁷Andza ŋga ma nəkada Piyer a ndzey aha waw na, ŋga ma zazura, ma ləvar: «Kah ana tiyatsa na, kuray dzaya andza ndaw ma Nazaret aŋga na, Yezu.»

⁶⁸Amana, Piyer me mbəɗey mey ta me ləvey aha:«I sərada kakay, i tsənada guma ɗek a neney, kah me tsey kava na, kakay.» Arka ŋga ma daway təŋga a bəla ka mezləŋgərey.

⁶⁹Andza dem ana hana na, ma nəkada satsa na, ma ləvatar a ndaw ana ka slam aŋga na hay: «Neney na ndaw ata təŋga!»

⁷⁰Ama Piyer na, me mbəɗey mey satsa. Mendzey nekəɗey a dəba na na, ndaw ana hana ka slam aŋga hay, ma ləvamar a Piyer: «Kwa maləwaɗay kava dakay, kah na ndaw ata təŋga! Zləna, kah na ndaw ma Galiley sana.»

⁷¹Amana, ŋga me mbəɗey,ta me ləvey aha: « Haɗaw i ŋgəley na Bay’ərlam ka hətaya, i sərada ndaw a neney kuray ma tsəmaya kava na, tikay!»

⁷²Arka tsana dzagulok me zlehey dey ma tsetsew ana. Arka Piyer ma sərafa ka guma ma Yezu, ma tsar ana: «Maga dzagulok a da zlehey dey metsetsew ana na, kah ka mbəɗey mey tsoy dey makar, ka səradaya kakay.» Ŋga na ma bawa tsam tsam ta ma tuway aha.