Read North Mofu Luk 4 Bible Online

Luk 4 - North Mofu bible

Luk 4

¹Yezu, ma rəha vaw aha ta Mesəfrey Kokwoɗ ana, ma mawa da Zurdeŋ, Mesəfrey Kokwoɗ ana ma kəsada a palah.

²Da meney kokurow faɗ. Setene ma həlafa suwet. Ma ndzawa ŋga na na, kwa a zəmey aha tek kakay. Andza ŋga ka ndakada har ana tsoy na, may ma tsafa.

³Arka Setene ma ləvar: «Haɗaw kah Bəzey ma Bay ma Bəla na, ləvar a ŋgwa ɗey ka tərey peŋ aha kwa.»

⁴Yezu ma mbəɗafara kava: «Ma winda ha da Mewindey Kokwonɗ ana hay: ndaw a ndzey na ta peŋ dada kakay.»

⁵Setene ana ma tsakafa a 'ərlam, ma ɓafara ka slala ma dala hay tabiyaha da mey asləta.

⁶Ŋga ma ləvar: «I slafa ma vəladaka maram ta zleley ma slala neney hay tabiyaha, hərway ma vəla ha na na ŋga ɗaw. I slafa ma vəladara a ndaw i me wuɗey ana.

⁷Kah ekəɗey tok na, Haɗaw kah ka naya dəba ba na, i vəladaka tabiyaha.»

⁸Yezu ma mbəɗar kava: «Ma winda ha da Mewindey Kokwoɗ ana hay: ka da nar dəba sey a Bay ərlam Bay ma bəla ɗek, ka da kar kuley na sey a ŋga asləta.»

⁹Arka Setene ana ma dada a Zeruzalem, ma lətsada ka 'ar ma 'Ay me key Kuley , ŋga ma ləvar: «Haɗaw kah bəzey ma Bay ma Bəla na, kəley ta zavay eɗey a gwadaw,

¹⁰hərway ma winda ha da Mewindey Kokwoɗ ana hay: A da wata madurlam aŋga hay hərway ɗek, ka wafəmaka vaw.

¹¹Satsa na: a da ndawəmaka a har ata, ma kah ka da gweyzey sek ta ŋgwa zlay.»

¹²Yezu ma mbəɗar kava: «Ma tsa ha na: ka da həlafa suwet ka Bay’ərlam Bay ma bəla ɗek zlay.»

¹³Andza Setene ana ka yafa vaw tsoy na, ma mbəkada, ma daw təŋga, ha ka har ana ma pəsla ha na.

¹⁴Arka Yezu ta gədaŋ ma Mesəfrey Kokwoɗ ana ma mawa a Galiley, ma haykadama da dala na tabiyaha.

¹⁵Ma tatəkadata da 'ay me ɗuley mey ta hay, arka ndaw hay tabiyaha ma hasəkadəmara bəzay.

¹⁶Ŋga ma daway a Nazaret wuraw aŋga me gəley da huɗa na. Ta pas ma mesley na, ŋga me fuləkwey a 'ay me ɗuley mey andza ma ŋga zlekete na. Arka ŋga me lətsey ma da dzeŋgey.

¹⁷Ma vəlamar ɗeriwel ma ndaw sek Ezayi, ma pasəka na, ŋga ma ndzafa slam ana daha ma winda ha andza neney:

¹⁸«Mesəfrey ma Bay’ərlam ŋga ka yah, hərway ka kafaya zeheɗ ma mal ba, ma da tələkada mey ta Mey Hayna Wayna a ndaw mbarga na hay. A sləradiyawa na ma da ɓadatara a ndaw da beke na hay, a da bəmawa, a ndaw wulaf ana hay a da nəkadama dey ka dəba, ma da badatərawa ndaw ma kərəmata na hay ka wam 'ar ata,

¹⁹ma da tələkada mey ta mevey ma Bay’ərlam ma da katar hahaya a ndaw hay ana.»

²⁰Ŋga ma paɗada ɗeriwel ana ka slam aŋga, ma vəladara a gawla me key mber da 'ay me ɗuley mey ana, arka ŋga me ndzey aha. Ndaw hay tabiyaha da 'ay me ɗuley mey ana, ma zazərama.

²¹Arka ŋga ma zlar ma ləvatar: «Teseɗey na, guma ma Mewindey a neney Kokwoɗ ana hay ka ndesley tsoy ka kuray a neney ma tsənadama na hay.»

²²Ndaw hay tabiyaha a kam seydewe ŋga na, ma rəzlaya ka mey ma hahaya ma bawa da huɗa mey ŋga na, arka taya ma ləvam: «Andza a kafandar neney ana na, bəzey ma Zozef seŋgey.»

²³Yezu ma ləvatar: «Dey ta kava ka da ləvəmaya bəzay ma guma ɗey: - Ndaw ma sidem, ndeley vaw ka 'ar vaw ɗek ana -. La ka tsənadama tek eɗek me key da Kafarnawom ana hay ba, azlakwa key da wuraw eɗek ana tikwa.»

²⁴Arka ma ləvatar sa: «Ayaw! I ɓadakwar dərka na, ɗaɗa ka ɗamar ndaw a ndaw sek da ŋgwa ŋga na tikay.

²⁵I ɓadakwar dərka na, da har ma Elyi na, madakway hay da Israyel bəza kakay, andza yam me pey kakay mevey makar ta rita na, may me key da dala na tabiyaha.

²⁶Ama ka sləradama Elyi 'ay madakway asləta da Israyel kakay, ama a da slərada na 'ay madakway ana daha da Sarepəta, da dala ma Sidoŋ.

²⁷Da har ma ndaw sek Eli zey na, malawa hay da Israyel bəza kakay. Amana kwa ndaw asləta da walaŋ ata na ma bazləma ha dakay,ama, sey Namaŋ ndaw Sirieŋ.»

²⁸Andza ma tsənadama guma ɗey da 'ay me ɗuley mey na, a ndalatar a ndaw hay tabiyaha.

²⁹Taya ma lətsam, ma badəmərawa ba da wuraw, ma dadama ka mey zalaŋ ma mamba ma wuraw ata na ma ka ha ka ’arra na, a wuɗam ma da pamar teker ba a zavay ana a gwadaw.

³⁰Ama Yezu me tezlerey təŋga ta walaŋ ata na, me zəgey tsəveɗ aŋga, me wey ma daw ŋga hay.

³¹Ŋga me hərɗey a Kafarnawom, wuraw ma Galiley. Ŋga ma tatəkadata ta pas ma mesley.

³²Ma rəzla hiya ta metəkey ŋga na, kavəday guma ŋga na tsəɓak ta mazlaɓ aha.

³³Da 'ay me ɗuley mey ana na, ndaw ana daha ta mesəfrey ma fakalaw ma zləɓa na da 'ar. Ŋga me wudey ta magala ha:

³⁴« Ɗagay ka wuɗafandar mey, Yezu ma Nazaret? Ka sawa na ma da zəɗadandar ɗaw? I sərada ha kah ana na way, Ndaw Kokwoɗ ana ma Bay ma Bəla».

³⁵Yezu ma babətsafa: «Ndzey tete, bawa ba da ndaw a neney»; ma kəlada ndaw ana hana ɓəre ka dala na a wuzlah ata na, fakalaw a hana ma bawa ba da vaw ma ndaw ana, mandzara ka kar tek kwa asləta.

³⁶A wasadata ndaw hay tabiyaha, ha ma ləvam ka 'ar vaw a ta na: «Neney na guma waray? A watar 'ar ta gədaŋ aŋga ma slafa tabiyaha na, a mesəfrey ma zləɓa na hay na, a bəmawa ba.»

³⁷Arka mezəley ŋga ta tek aŋga me key ana hay na, me pey mey da dala na hana tabiyaha.

³⁸Ma bawa ma Yezu ba da 'ay me ɗuley mey na, ŋga ma daway a 'ay Simoŋ. Mesey ma Simoŋ ana 'ar a wuzləɗar gədaŋ aha dzay, ma kamar amboh a Yezu, ma ka key tek hərway ŋga.

³⁹Ŋga ma guɗəkwafa, ma ŋgərzafa ka 'ar me wuzləɗey ana, arka tsana tsendzeŋ ma ndalafa ba. Arka tsana, ŋga me lətsey ma tatar tek.

⁴⁰Andza ma pas me kəley na, ma sadəmatərawa ndaw ta dzedzey ana hay gle gle ka slam ma Yezu. Ŋga ma bazləhafata har ka ndaw ka ndaw, arka ma ndalam tobiya ta ha.

⁴¹Ma badatərawa fakalaw hay haɗadzidzay da vaw ma ndaw hay ta me wudey aha waya: «Kah na Bəzey ma Bay ma Bəla!» Arka Yezu ma katar say ma ləvatar waya ɗaɗa ka da tsam guma zlay; kaveday taya na a səradama ŋga na Kriste.

⁴²Andza dey me tseɗey ba na, ŋga me bey ba da wuraw ana, ma daw təŋga a slam palah aha. Ndaw hay ma kusa na hay ma səpama, andza ma ndzafama ba na, a wuɗam ma zəgadama aha, hərway a wasam ka da katar mabaŋ zlay.

⁴³Ama ŋga ma ləvatar: «Hayna i ka daw a sa ma wuraw ana sa na hay, ma da tələkada mey ta Mey Hayna Wayna ma Slala ma Bay’ərlam, hərway a slərdəmiya na kava.»

⁴⁴Arka ŋga me tələkey mey da 'ay me ɗuley mey hay ma Zudey.