Read North Mofu Mber ma Maslaŋ hay 4 Bible Online

Mber ma Maslaŋ hay 4 - North Mofu bible

Mber ma Maslaŋ hay 4

¹Andza Piyer ta Zaŋ a tsəmatar aha guma a ndaw ma səkway hay mba na, baba me key kuley hay, bay ma sidzew ma 'Ay me key Kuley ta Sadusieŋ hay ma husəmaɓa ka tsakay ta.

²A ndalatar bəza kakay, andza ma nəkadəmata maslaŋ hay a tatəkadama ha səkway, a tələkadama mey kavəday ma Yezu, ka ma da mbəlawa ma ndaw ma mətsa na hay.

³Taya ma haləmata, ma kuyadəmata a daŋgay ha ma medew ŋga ana, hərway dəvaɗ ka key tsoy.

⁴Da walaŋ ma ndaw me pey sləmay ka Guma ana hay na ndaw hay haɗadzidzay ma pam ’ar, me mbəsley ta na a tsəley a key ndaw hay gabal zlam.

⁵Arka ma medew ana tok na, bay hay, ndaw ma səka na hay ta ndaw me sesəkey mewey na da Zeruzalem ana hay ma tsəham 'ar.

⁶Daha ka slam ana na, Anna, baba ɗuhwa na me key kuley, Kayif, Zaŋ, Alekzaŋdre ta ndaw ma gedzek ma baba ɗuhwa na me key kuley ana hay tabiyaha.

⁷Ma hələmatərawa andza Piyer ta Zaŋ ka mey 'ərdey ta, ma tsəhafəmata guma: «Ka kam tek a neney na ta gədaŋ aŋgway? Ta mezəley ŋgway?»

⁸Piyer ma rəha vaw aha ta Mesəfrey Kokwoɗ ana, ma ləvatar tok:

⁹«Bay ma səkway ta ndaw ma səka na hay, a yadəmandar vaw teseɗey na hərway la ma kamar hahaya a ndaw ma təra ha, ma la ka ɓadama ndaw ana a da ndeley na, ta gwedey waray?

¹⁰Hayna səradama tabiyaha tok, ndaw ma səkway ma Israyel ta mezəley ma Yezu Kriste, ndaw Nazorieŋ, na kuray ma daradama ka 'ar ma tuwaw ma gəzla ana, ma mbəlawa da walaŋ ma ndaw ma mətsa na hay, ta har ma Bay ma Bəla ana, kuse ma ŋga na, kuray ma nəkadama ndaw a neney ma lətsa ha ka slam dey kwar ma ndala ha na na.

¹¹Ŋga na, ŋgwa aŋga na kuray ndaw me zley 'ay hay ma kəladəmərawa ba haya kakay ana, ama a da tərey na, ŋgwa ma telkomere ha.

¹²Ndaw me buwey ndaw mekelehe na, dasakay, sey ŋga, hərway mezəley ka bəla ma vəla ha a ndaw hay ka da nafatar mada buwandakwar na mekelehe dakay.»

¹³Ba nəkarafəmata kandza Piyer ta Zaŋ na, ndaw tede hiya zləna, ka dzaŋgam kakay, ama guma ta na ma tsam pəlaŋ pəlaŋ ana na, a rəzlata. A səradəmata taya na na, ndaw me heley andza Yezu ana hay.

¹⁴A nəkafama ka ndaw ana ma ndala ha, ma lətsa ha ka tsakay ta na na, a səradama me mbəɗey kava teŋgey sakay.

¹⁵Arka taya ma vəlam slam har, ma ka badəmatərawa ba da Sanedreŋ, arka ma ŋgəlam mawa ka 'ar vaw ta na:

¹⁶«Ka da kadukwata ndaw a neney hay na teŋgey? I səradakwa ha dey ta kava, taya ka kam zeheɗ ba ɗuhwa ha ka slam dey ma ndaw hay, tek ana ma ka hiya a nəkam aha ndzezl ndzelzle ka slam dey ma ndaw ma Zeruzalem hay seŋgey, i slafakwa me mbəɗey mey da ’arra sakay.

¹⁷Dakay dakay madəgom zay aha na, təkəkwata ka da pey mey da səkway kambəlaɓa zlay. Lakwa na, tsəlafukwata zluwer, ma ka da tsam ka mezəley a neney kwa ka slam dey ŋgway ŋgway sazlay.»

¹⁸Taya ma zəladəmatərawa tok, ma babətsəmatar haya hayaha, ma ka da sləfama dakay me tetəkey mezəley ma Yezu ana sazlay.

¹⁹Ama andza Piyer ta Zaŋ ma mbəɗafəmatara kava: «Dzerey aha ka slam dey ma Bay ma Bəla na, na waray? Ma pakwar sləmay a kuray tsukuɗu, ma par sləmay a ŋga ɗaw? Kuray ana dzalama!

²⁰Dey ta kava tek ala ma nəkadama ta na ma tsənadama na hay na, la slafama mandzada tete tikay.»

²¹Andza ma babətsəmatar ba dey mekelehe na, ma mbəkadəmatərawa, hərway ka ndzafafəmata malay ma ka dzuwəmata kakay. Mavəday ma səkway, hərway ndaw hay tabiyaha a madəmara ha sise a Bay ma Bəla, ka tek ana hana na, ma kawa na.

²²Akwa ndaw ana andza ma yəmawa da ma ndeley a neney ɗeɗew aha na na, a key a fəna mevey kokurow faɗ.

²³Andza ma mbəkadəmatərawa ba na, Piyer ta Zaŋ ma ndzafəmatərawa mandala ta sa na hay, ma təkəradəmatara guma ma ndza baba ɗuhwa na me key kuley ana hay, ta ndaw ma səka na hay ma tsəmatərawa na tabiyaha.

²⁴Ma pafəmata sləmay, arka tabiyata ha ma dzəma mey ahiya na, ma ɗulam mey a Bay ma Bəla andza neney: «Bay, ma kərawa həzlay ma 'ərlam, dala, bəlay ta tek ana da huɗa na hay tabiya ha na, kah.

²⁵Ta gədaŋ ma Mesəfrey Kokwoɗ ana na, kah ka padərawa guma neney ba a huɗa mey ma baba la David, gawla ma 'ay ɗek: ɗagay ndaw ma dala hay a hundzəfam andza ha na mey? Səkway hay a dzalam tek ata na ma wuɗam ana, ama na tedehe.

²⁶Bay ɗuhwa ma dala hay ma guram ka vaw, bay hay ma kusam 'ar, ma dzəmadama mey ta asləta ka Bay’ərlam ta Ndaw aŋga ma fəɗa mal ana.

²⁷Ayaw dərka na ka kusam 'ar ba da wuraw a neney: Erod ta Pons Pilat , ta ndaw ma dala na sa na hay, ta səkway ma Israyel, ma kusam 'ar ka Yezu gawla ma 'ay ɗek Kokwoɗ ana, na kah ma kafərawa mal ana.

²⁸Kəɗey na, taya ma kama andza ma tek eɗek ma kərawa ta har eɗek, na kah me wuɗey mapadərawa andza ha na.

²⁹Ekəɗey na, Bay’ərlam, nəkafa ka zluwer ma tsəlafəmata ka ndaw ana hay, vəlatərawa gədaŋ a gawla ɗek hay ka tələkadama mey ta Guma ɗek ndar ndar.

³⁰Bazləhawa har eɗek na, ma ndaw hay ka ndalam, zeheɗ hay, ta tek ma gegətsey 'ar ana hay ka kam da mezəley ma Yezu, gawla ma 'ay ɗek Kokwoɗ ana.»

³¹A dəba ma me ɗuley mey ta na, ’ay ana taya tsəha ’ar ahiya da huɗa na me ɓəley; taya ma rəha vaw aya tabiyaha ta Mesəfrey Kokwoɗ ana, taya ma zlamar ma tsam guma ma Bay ma Bəla ndar ndar.

³²Ndaw me pey 'ar ana hay haɗadzidzay ana na, mevel ata asləta, me dzeley 'ar ata asləta, kwa ndaw da walaŋ ata me ləvey: neney tek a ɗaw na dakay; dzadzak a padama zleley ta hay na, ka maslətaha.

³³Ma slafa ɗuhwa ha a kəsadata seydewe ma maslaŋ hay, ma kam ka ma mbəlawa ma Bay’ərlam Yezu, hahaya ɗuhwa ha a key aha mber da walaŋ ata tabiyaha.

³⁴Kwa tek mahətsar a ndaw da walaŋ ata na, dakay: dzadzak na, ndaw andza ley ta daha, dakay na 'ay ta hay daha na, a haɗəkadəmata, a sadəmərawa sumkwo ma tek ana ma haɗəkadəmatərawa na hay,

³⁵arka a padama a ka slam sek ma maslaŋ hay. Arka kwa way way a təɓey sumkwo na na, ka tek aŋga ma sar.

³⁶Arka na, Zozef, na maslaŋ hay ma pafama mezəley Barnabas ana ka ləva na, ndaw me həley bəzay a ndaw hay ana - ley ŋga daha. Ŋga levit aha, ŋga ndaw Sipre.

³⁷Ŋga ma haɗəkadərawa ley ŋga, ma sawa, ma pada sumkwo na a ka slam sek ma maslaŋ hay.