Read North Mofu Ɗeriwel ma tsetsew ana a Korintieŋ 1 Bible Online

Ɗeriwel ma tsetsew ana a Korintieŋ 1 - North Mofu bible

Ɗeriwel ma tsetsew ana a Korintieŋ 1

¹Yah Pol, i maslaŋ ma Kriste Yezu, da me wuɗey ma Bay ma Bəla. Ta malam ala Timotey, i windar a Egliz ma Bay ma Bəla na da Koreŋt ana, ta ndaw kokwaɗ ana hay, na da dala ma Akayi tabiyaha.

²Hayna ndzafam hahaya ta zozoy ma Bay ma Bəla, Baba ma Bay’ərlam a lakwa Yezu Kriste.

³Hayna ma sambəra Bay ma bəla, Baba ma Bay’ərlam a lakwa Yezu Kriste, Baba na ndaw a kar da vaw ana, Bay ma Bəla ma mey 'ərev da tek hay tabiyaha na.

⁴A mandakwar ’ərev da viya a lakwa hay tabiyaha, ma lakwa ka slafakwa ma matar ’ərev a ndaw na taya da viya na hay tabiyaha, andza me mey ’ərev ana lakwa ma ndzafəkwawa da har ma Bay ma Bəla na.

⁵Akwa na, andza na ŋga lakwa ma wanəkadakwa tsetseh ma Kriste, dey haɗadzidzay ana na, kal kal andza ha satsa na, i da ndzafakwama me pey dey da har ma Kriste andza ha tiyatsa.

⁶La ka kam na viya? Na ŋga na na, ma me mey ’ərev akwa ta me buwey kwar. Kendzey ka məmandar 'ərev ba? Na ŋga na na, kuray ka ndzafadama me mey 'ərev ba, ma kuray ka səmadama da tsetseh ana, kuray ma ɓəsam andza na ŋga la na tiyatsa.

⁷Me pey dey la ka kuray na, gədaŋ aha dzay hərway la səradama ha, da ma wanəkadama viya kwar ta la na, ka wanəkadama me mey 'ərev ala ta kuray tiyatsa.

⁸Hərway ŋgey malam a ɗaw hay, la wuɗam la ka gəradəmakwar mandzara ha səradama zlay kakay: tsetseh ala na, la ma kəmawa da dala ma Azi ana na, ka tandar vaw ba da mey la dakay, ka fənandar gədaŋ ba, ha la ka dzalam aza la ka da səfram sakay.

⁹Ayaw, la ka nəkadəmərawa memətsey tsoy ta dey la, la ka dzalam, la da səfram sakay. Kəɗey andza 'ar ala ma pa ha na, ka la na sakay, amana, ka Bay ma Bəla, na ma mbəladatərawa ndaw ma mətsa na hay ana.

¹⁰Ma buwandərawa da har ma memətsey andza na ŋga na na, ŋga, a da buwandərawa sa; la ma pa dey aya na ka ŋga, re a da buwandərawa satsa.

¹¹Kuray tiyatsa na, kuray dzəma ahiya da ɗəma ta me ɗula mey kwar hərway la, kəɗey tok na, hahaya neney la ma ndzafam, hərway ma ndaw hay haɗadzidzay ma ɗulam mey hərway la na na, a da tərey na sise ma ndaw hay haɗadzidzay ma kam hərway la na.

¹²Hərway tek ala na ma dandar 'ar ana na, seydewe ma mezek ma vaw la ’ar piokw ana: tek ala ma kəmawa ka bəla na, ɗoh na ta kuray, ta ləfeɗeɗe ta tsəzlakka ma Bay ma Bəla, zləna ta ma səra’ar ma slaw vaw kakay, amana, ta hahaya ma Bay ma Bəla.

¹³La ka windukuraɓa tek mekelehe dakay, akwa na sey na kuray ma dzaŋgama, ma tsənadama na. Ama andza a kafaya na ka da tsənadəmandar aha ba mambay mambay aha,

¹⁴hərway sa ma tek ana la ma tsəmakwar ana hay na, kuray ka tsənadəmandar ba nekəɗey, ka da həslam 'ar hərway la, la da həslam 'ar hərway kwar tey, ta pas ma Bay’ərlam Yezu.

¹⁵Arka da ma sərafa ɗaw ana na, i wuɗey ma da daɓa ba ta 'ay kwar ɗagay, ma i ka ndzafawa hahaya dey ma tsetsew ana.

¹⁶Arka da 'ay kwar na, i da lətsey ma daway a Maseduwan, arka aza da Maseduwan na, i da mawa a 'ay kwar, ma hakam tek hay tabiyaha, hərway ma tsəveɗ a ɗaw ma da daw a Zudey.

¹⁷Tsukuɗu ma dzala ’ar a ɗaw andza ha na na, i ka dzeley 'ar ka vaw kakay ɗaw? Dakay na, tek a ɗaw ana me dzeley ma da key ana hay na, tek me dzeley ma slaw vaw ɗaw? Ka ləva na da yah ana na, ayaw, ta a-ay ma dzahaɓa ahiya ka vaw ɗaw?

¹⁸Ma sərada na Bay ma Bəla: guma la ka kuray na, andza ayaw ta a-ay kakay ana.

¹⁹Hərway Bəzey ma Bay ma Bəla Kriste Yezu, na la ma tələkadama mey da 'ay kwar ana, yah, Silveŋ ta Timotey ana na, ayaw ta a-ay aha kakay. Amana sey ayaw dada!

²⁰Tek na Bay ma Bəla ma tsawa a da vəley ana hay tabiyaha na, a ndzafam ayaw ata na, da ŋga. Arka tiyatsa i da ləvakwama Amen! Ma da hasəkadara bəzay a Bay ma Bəla na hərwuiya.

²¹Ma səmadandakwar ka vaw ta Kriste na ŋga, ma kafandakwar mal ma bay na, Bay ma Bəla na.

²²Ŋga ma kafandakwar zeheɗ da mezəley ŋga, ma batəkwandakwar Mesəfrey Kokwaɗ ana a mevel a lakwa hay, andza me rey sek ma tek ma da vəladandakwar ka mey ana.

²³na ŋga ɗaw na, i zəgey seydewe aha na Bay ma Bəla: ka kəɗaya ba vagay aha, haɗaw i ŋgəley na, i me dzeley ma i ka da maɓa a Koreŋt sakay ana na, hərway i ka da marəgaɗakwar zlay.

²⁴La kam na, la təkəmakwar ɗay ka me pey 'ar akwar kakay, la kam na, la dzənəmakwar ka wuiya kwar, hərway ka me pey 'ar na, kuray ma ndza hiya təɗe.