Read North Mofu Ɗeriwel ma tsetsew ana a Korintieŋ 10 Bible Online

Ɗeriwel ma tsetsew ana a Korintieŋ 10 - North Mofu bible

Ɗeriwel ma tsetsew ana a Korintieŋ 10

¹Yah Pol ta 'ar a ɗaw ana, i tsəhafakwar ta kokwoɗ ma Kriste, yah a neney ləfeɗeɗe ha ana, andza i da walaŋ a kwar, ka mey 'ərdey kwar na, ama andza i dəreŋ ta kuray na, i həma ha.

²I kakwar amboh, həma ɗaw ana, i ka tsakay kwar ma slafa ma ɓada kakay ana na, kendzey i ka daɓa ba na, ka ndaw ma ləvam waya tek ala makam na ma slaw vaw ana na, i da ɓadatara ta har ma mawal.

³Kwa andza la ndaw hay tedehe na, me kəɗey vaw la na na, ta gədaŋ ma slaw vaw a neney dada kakay.

⁴Tek ma har ala ma kəɗada vaw ana hay na, ma ləmatərawa na ndaw kakay, amana, ma slafa ta na a sawa na, da Bay ma Bəla, ma da mbəzlada zleɗ ɗuhwa na hay. La mbəzladəmatara me dzeley 'ar ma ndaw ma ŋgalakam ana hay na,

⁵ta ma slafa ma tek hay ma lətsadama vaw, ma ŋgalakam ana hay tabiyaha, ma ŋgalakam ka ma sərada tek ma Bay ma Bəla ana hay. Me dzeley 'ar tabiyaha na, la zəgama beke ha ka da tsənar sləmay a Kriste.

⁶Kendzey me tsəney sləmay kwar ka key ba tobiya hana, la ma həla vaw aya, ma da hətey ndaw me tsəney sləmay kakay ana hay.

⁷Nəkafəmata ka tek ana hay ndar ndar kwa, kendzey haɗaw ndaw ka nəka vaw ŋga ba, ma vəla ha ma Kriste na, aŋga ka sərafa ba haya haya: haɗaw ŋga ma vəla ha ma Kriste na, la tiyatsa na, la ma vəlaya ma Kriste!

⁸Kəɗey na, kwa andza i ka ŋgelekey ba kambəlaɓa nekəɗey na, hərway ma slam har ma Bay’ərlam ma vəlandərawa na na, ma da gəladakwar ka mey zləna, ma da madakwar ta dəba kakay, hwaray a da kaya ha kava dakay.

⁹Da ɗeriwel a ɗaw ma windəkuraɓa na hay na, i səpey na ma tsəlafakwar zluwer kakay,

¹⁰hərway a ləvam na, - ɗeriwel aŋga hay na ger ahiya, tsəɓak kambəlaɓa; ama andza ŋga na ka husawa ba na, ŋga bəle ha, guma ŋga na a nefey kakay-.

¹¹Ndaw ana me tsey andza ha na na, ka sərafa ba ɗagay: da guma neney da dəreŋ la ma windəməkuraɓa na na, la da nəkam na andza ha, kendzey la daha da tek ala na hay, ma da kam na.

¹²Hərway la na, la wuɗam me wuyey vaw, ma wada vaw la, dakay ma malada vaw la ta ndaw ana hay, ma gəladəmatara 'ar a vaw ta na hay tikay; a zəgama vaw ta na, andza tek ma wada tek ta ma malada tek aha, 'ar ata dakay!

¹³Ŋga la na, meŋgelekey la ka da fəna kokway ana zlay, ama la na, la da zəgam andza tek ma wada tek aha na, slam har na Bay ma Bəla ma vəladandərawa na, andza ma me wuɗey ŋga, la ka husadəməraɓa kasl ka kuray ana.

¹⁴Hərway la pərzlama kwakway la tikay, andza la na ka dəmaɓa ’ay kwar kakay. amana, dərka na, ma husaɓa ka mey 'ay kwar ta Mey Wayna ma Kriste na: la.

¹⁵Meŋgelekey la na kambəlaɓa kakay, ma pada ka mber ma ndaw tikay, amana 'ar ala me pey na, ka gədaŋ a kwar me key da 'ar me pey ana, ka gəley adiya adiya da kuray, amana mandzara ma parzla kwakway ana.

¹⁶A dəba na na, la slafama ma dada Mey Wayna a wuraw na pərazl kuray ana, mandzara meŋgelekey, hərway ma mber ma ndaw mekele hiya ma kam da ley ta na.

¹⁷Haɗaw ndaw ana a wuɗey me ŋgelekey na, ka ŋgelekey na da mezəley ma Bay’ərlam.

¹⁸A səmbəram na, ndaw na me ləvey: mber a ɗaw na haya ha, na kakay, amana, a səmbəram na, ndaw na Bay’ərlam me ləvey mber aŋga haya ha na.