Read North Mofu Ɗeriwel ma tsetsew ana a Korintieŋ 12 Bible Online

Ɗeriwel ma tsetsew ana a Korintieŋ 12 - North Mofu bible

Ɗeriwel ma tsetsew ana a Korintieŋ 12

¹Me zlepey ɗaw? A nefey kakay seŋgey! Dzadzak na, i ka mey na, ka tek ma nəkəmiawa a dey ana hay, ta na Bay’ərlam ma ɓadaya na hay.

²I sərada ndaw ana daha ta Kriste, ka key ekəɗey mevey kurow kava faɗ -ŋga da vaw ŋga na ɗaw? i sərada kakay, ŋga da vaw ŋga dakay ɗaw? i sərada tikay; ma sərada na Bay ma Bəla - ndaw ana ŋga na na, ma tsakafama ha kasl a həzlay ma 'ərlam ma makar ana.

³I səradaha ndaw ana ŋga na na, ŋga da vaw ŋga ɗaw? Mandzara vaw ŋga ɗaw? I sərada kakay, ma sərada na Bay ma Bəla.

⁴Ndaw ana ŋga na na, ma tsakafama a slala hayna, arka ŋga ma tsənadərawa guma na me təkərey vaw kakay ana hay, slam har ma ndaw ma slafa ma mada me tsey kakay ana.

⁵Hərway ma ndaw ana ŋga na na, i slafa me zlepey - ama hərway ɗaw na, i da slafa ma pada mezlepey ɗaw na, sey a bəle ɗaw dada.

⁶Ah! Kendzey i ka wuɗey me zlepey na, a da key na, i ma mbəɗa 'ar aha kakay, i da tsey na dərka na dada. Amana, i tsey kakay, hərway ma mey na, me dzeley 'ar ma ndaw hay ka yah na, ka da fəna na ma nəkadama ka yah ana zlay, dakay na, na ma tsənadama na i me tsey ana zlay.

⁷Andza tek ana ma ɓadiyawa na hay na, a gagətsam 'ar. Ma aza ka təkafaya me zlepey a neney na, ma pəmaya tek ana andza ndak a slaw vaw, andza madurlam ma Setene ma həla vaw aha na, ma kəɗaya, ma da təkafaya mezlepey ba tabiyaha.

⁸Ka bəzay ma guma na ŋga na na, i ka ɗuley mey ba a Bay’ərlam dey makar, ka harafaya ba.

⁹Amana, ŋga ma ɓadaya: hahaya ɗaw ana na, ɗaraka, ma slafa ɗaw a ɓey vaw aŋga tabiyaha da bəle ɗek. Dzadzak afəna sa na, i da zlepey na ta bəle ɗaw hay, ma slafa ma Kriste ka ndzey ka yah.

¹⁰kavədiya tok na, i key wuiya da bəle, da me tseɗey, da viya, da tatakway ta zluwer mavəday ma Kriste, hərway andza i bəle ha na, na ŋga na tok na i gədaŋ aha.

¹¹Nəkafama ekəɗey na, tsoy 'ar a mbəɗaya! Ana ma təkəmaya ɗay na kuray ana seŋgey. Hana na akwa ma da dzaŋgərafəmaya na kuray. Hərway i ka nəkada tek ma hətsafaya ka maslaŋ aŋga na ɗuhwa na hay, na daha tikay, kwa andza i tek tedehe tekeɗe na.

¹²Zeheɗ hay ma ɓadama maslaŋ ana na, ka kam ba da walaŋ a kwar ana: me zəgey mevel da tek me suwet hay tabiyaha, zeheɗ ɗeɗew ahiya na, tek me rəzley ndaw ana hay, ta tek ma kaya ta ma slafa na hay.

¹³Egliz a sana hay a da fənəmakwar na ta mey? Ana sey neney i me wuɗey ma sasəɓakwar tikay ana, ana safəmaya yam ka dzerey kakay ɗaw a neney ana!

¹⁴Nəkafama, ekəɗey na i ma həla vaw aha ma da daɓa a 'ay kwar ma dey ma makar ana, arka na re i da sasəɓakwar aha kakay; hərway i səpey na, zleley kwar hay kakay, amana, kuray ana. Ma tsəhatar zleley a baba ta maya na, bəzahay kakay, ama ma da tsəhatar zleley a bəzahay na, taya.

¹⁵Na ŋga ɗaw na, yah ana me wuɗey, i slafa me zəɗey tek, kwa vaw ɗaw ana, ta 'ar a ɗaw ana kərem hərway kwar, ma vəday ma wuɗakwar a ɗaw haɗa na na, ka da wuɗəmaya sakay na, hərwuiya ɗaw?

¹⁶Kəɗey na, i ka ndzey ka 'ar a kwar tikay! Ama yah na, ndaw me pətəney ndaw, i ka ndzafakwar ba ta wewer a ɗaw.

¹⁷Da walaŋ ma ndaw i ma slərəkuraɓa na hay na, zəgam ndaw na kuray ma wuɗam ana, ta har ndaw da walaŋ ata na, i ka sasəɓakwar ba daha ɗaw?

¹⁸I ma təkəraɓa ɗay a Tit ka daɓa a 'ay kwar, i ma sləraɓa malam ana, ŋga na na i ma tsakwar kava na, ka dəmaɓa tsetsuwe. Tit ana na, ka sasəɓakwar ba ɗaw? La ka dawam da me dzeley 'ar ana asləta kakay ɗaw? Da slam sek ana asləta kakay ɗaw?

¹⁹Zla ekəɗey kakay, ka dzalam na, ka lam la wuɗam me tərey ndaw dzerey ahiya na ka slam dey kwar ɗaw? A-'ay, ka slam dey ma Bay ma Bəla, ta Kriste la tsam guma na. Neney tabiyaha na, dzam a ɗaw, la kama na, ma kuray ka gəlam.

²⁰I wesey akwa na, naŋgarhay i ka da husaɓa ba na, i da ndzafakwar aha andza na i me wuɗey ana sakay, dakay na ka da ndzafəmaya ha, andza ma kwar kuray ma wuɗam ana sakay. I wesey naŋgarhay dzendze, səleŋ, me key mevel, me kəɗey waway, me həley ndaw hay ka vaw, me tsey ka ndaw, me ŋgəley bəzay, me bərey, me key tek so ha daha da 'ay kwar.

²¹I wesey naŋgarhay, ma da daɓa ɗaw a neney ta 'ay kwar ana na, Bay ma Bəla a ɗaw ka da paya hwaray a dey, ka slam dey kwar, ma i ka da tuway, hərway ma ndaw hay haɗadzidzay ma ŋgəsam mata zlekete na hay, mandzara ka mbəɗadama mendzey da me zləɓey ta, da me ndzey ta təɗe kakay ana, ta me tsəley ta na so kakay.