Read North Mofu Ɗeriwel a Galat hay 4 Bible Online

Ɗeriwel a Galat hay 4 - North Mofu bible

Ɗeriwel a Galat hay 4

¹Me dzeley 'ar a ɗaw tok na, andza neney: ka key na mendzey haɗadzidzay, ndaw ma da zəmey 'ay ana bəza ha mba na, me weley ta na ka vaw ta beke na dakay, kwa andza ma da wata tek a hay tabiyaha na ŋga na.

²Ama ŋga da huɗa har ma ndaw ma gəla na, ta ndaw ma wafara vaw ka zleley ŋga na, ha kasl ka pas ana baba ŋga ma mbəsla na.

³Arka lakwa na na,andza ha atsa, andza lakwa bəzahiya, lakwa da huɗa har ma tek ma bəla neney hay mba na, lakwa beke ahiya.

⁴Ama andza har ma me ndesley ana ma slawa ba na, Bay ma Bəla ma sləradərawa Bəzey ŋga, a yəmərawa da hwaɗ ma ŋgwas, mewey a war 'ar.

⁵Ma da mbəɗatərawa ndaw na Mewey ma watar 'ar ana hay, ma ka təradandakwar bəzey ma Bay ma Bəla ahiya.

⁶Kuray na, bəzey ŋga hay dərka, Bay ma Bəla ka sləradərawa Mesəfrey ma Bəzey ŋga ba a mevel a lakwa hay, a zəla ta me wudey aha: Aba - Baba!

⁷Kah na tsoy beke ha sakay tok, ama kah na bəzey aha ka dəba, arka andza bəzey aha kadəba na, kah ndaw me zəmey 'ay tiyatsa, na ŋga na na, mber ma Bay ma Bəla.

⁸Zlekete ka səradama Bay ma Bəla tsaray kakay na, kuray beke ma 'ərlam dərka na kakay ana hay, da ma kawa ta na na, bay'ərlam ahiya kakay.

⁹Ama ekəɗey ka səradama Bay ma Bəla ka dəba na, dakay a fəna sa na, ka sədukurawa ba, ɗaɗa kada mam ta dəba sa, a tek ma bəle hay, mbarga hiya na, ka da wumakwar sa na, a key vaw sa ɗaw?

¹⁰Ka tsakasləmata meney sa na hay, kiya sa na hay, lam sa na hay ta mevey sa na hay andza tek ma kuley ahiya.

¹¹Ma wasadaya na, mber a ɗaw ma kawa hərway kwar ana na, a da zəɗey tedehe!

¹²Malam a ɗaw hay, kam andza yah, hərway i ka tərada vaw ɗaw ba andza kuray tey sana, i kakwar amboh, ɗaɗa kuray ka ŋgəsəmaya dakay.

¹³Ka səradama ha haya haya seŋgey, i ma ɓadukurawa Mey Hayna Wayna na, dey tsəfəmey ana na da har mavəday i dzedzey aha seŋgey.

¹⁴Arka kwa da vaw ɗaw ana dzedzey aha na tekeɗe na, kuray ka mbəɗəmaya dəba kakay, i ka kakwar mandzaɗak kakay, dzadzak tok na, kuray ma ŋgələmaya andza madurlam ma Bay ma Bəla, andza ma Kriste Yezu.

¹⁵Wuiya kwar ana tsəfəmey ana, a da daw na a may tok? Hərway i ka seydewe neney: hana na, ha slafama na, kwa dey kwar tekeɗe na, kuray ka tsursləmərawa ba, ma da vəladaya.

¹⁶Ekəɗey tok na, i da tərey na ndaw dugwan a kwar ka dəba, kavəday i ma tsakwar dərka na ɗaw?

¹⁷Haf haf ata na ma kəmakwar ana na, ta tsəveɗ kakay, a wuɗam na, ma tsadəmakwar ba ka vaw ta yah, ma aza kuray ka da tsafəmata dey.

¹⁸Tek hayaha na, ma nəkada ma wuɗa vaw na ta tsəveɗ ana, ma ka pas ka pas aha na, zləna sey i ka key ka tsakay kwar ana tsa kakay.

¹⁹Dem a ɗaw hay, da mendelemey ɗaw ana na, i yadakwar mekelehe, ha aza Kriste ka gəley ba da vaw kwar ɗagay.

²⁰Ah! A saya i da sərafa na, i ka tsakay kwar ekəɗey ana, aza i ka ndzefey veɗ ma ɗay ma tsadakwar na ma daway kassla na, hərway i sərada i ka kadakwar na teŋgey sakay!

²¹Äadəmaya ɗagay, kuray a neney ma wuɗam ma tsənamar sləmay a Mewey ana; ka tsənadama guma ma Mewey ana, ŋga na me ləvey ana tikay ɗaw?

²²Akwa ma winda ha da ɗeriwel kokwaɗ ana na, Abraham me ndzefey wawa hay tsew, asləta na, bəzey ma beke, naŋgar na ma ŋgwas hayna.

²³Ama wawa ma ŋgwas beke na na, ma yaha ma kəla ma slaw vaw, ama ma ŋgwas hayna na, andza na ma tsəmawa kava na.

²⁴Guma neney a təkərey guma ma malada ta tek hay, ŋgwas a neney hay na, akwa ma dzəma vaw hay tsew. Naŋgar na, a sawa da mamba ma Sinayi, a da yawa na, ma da key beke; na ŋga na na, Agar,

²⁵- hərway mamba ma Sinayi na, da Arabi -. Arka Agar a maladəmata na ta Zeruzalem na ekəɗey ana, hərway taya beke hiya ta wawa ŋga hay.

²⁶Ama Zeruzalem ma 'ərlam na, beke ha tikay, arka maya lakwa na ŋga;

²⁷hərway ma winda ha da ɗeriwel kokwaɗ ana na andza neney: «Key wuiya, kah a neney dəlay aha, ma yey tikay ana, kəley salalay ta me wudey ma wuiya, kah a neney ma sərada ma ndelemey ma zləbeŋ tikay ana. Hərway bəzey ma ŋgwas a neney, ma wuɗama tikay ana na, haɗadzidzay a fəna ŋgwas ma zel.»

²⁸Arka kuray tok na malam a ɗaw hay, andza ma Izak na, kuray na bəzey ma guma ma tsəmawa na.

²⁹Ama andza ha satsa na, ndaw ma yaha ma slaw vaw ana na, a kada tatakway ta ndaw ma yaha ma Mesəfrey ana, ha kasl ekəɗey na andza ha təŋga.

³⁰Ana təɗe! Mewindey Kokwoɗ ana hay a ləvam na teŋgey? «Hara beke neney ba ta bəzey ŋga, hərway hayna bəzey ma beke ka da zəmam 'ay ka masləta ha, ta bəzey ma ŋgwas hayna zlay.»

³¹Kəɗey tok na malam a ɗaw hay, lakwa na, bəzey ma beke hay kakay, ama na, bəzahay ma ŋgwas hayna.