Read North Mofu Ɗeriwel a Efeziyeŋ hay 2 Bible Online

Ɗeriwel a Efeziyeŋ hay 2 - North Mofu bible

Ɗeriwel a Efeziyeŋ hay 2

¹Arka kuray a neney hay ma mətsam ba hərway ma malay kwar ta meŋgəsey kwar hay,

²na kuray ma vəla vaw ahiya da huɗa zlekete na, da har andza ka səpam aha 'ərlam ma bəla neney hay, bay ma ma slafa haya kakay ana hay me key bay ka mabaŋ ma 'ərlam ta dala, ŋga na mesəfrey ma tek haya kakay ana me key mber ekəɗey ana da walaŋ ma ndaw ma tsənadama sləmay kakay ana hay.

³La da walaŋ ata tiyatsa, la neney tabiyaha, ma mbəkadəmara vaw zlekete a tek ma slaw vaw ma sar ana, la kam andza ma ŋga me wuɗey ana, la səpam me dzeley 'ar aŋga, arka la ma kaya na kalkal andza sa ma ndaw hay, ma vəlaya a me tsey mevel.

⁴Ama Bay ma Bəla na, ndaw a kar da vaw bəza kakay, hərway ma ma wuɗa vaw ŋga na ɗuhwa ha na, ma wuɗandukurawa na,

⁵da har ana na, lakwa ma mətsaya tsoy hərway ma malay lakwa hay. Ŋga ka vəlandakwar mendzey ba ta Kriste - a buwandakwar na, hərway ma hahaya ŋga-,

⁶Ta ŋga na, ka mbəladandukurawa ba da walaŋ ma ndaw ma mətsa na hay, a ndzadandakwar da 'ərlam da Yezu Kriste.

⁷Kəɗey tok na, ta haya aŋga me key hərway lakwa da Yezu Kriste na na, a wuɗey ma ɓada da mevey temere na hay ma da səmawa ka mey ana hay, zleley ma hahaya ŋga, na tek ma malada dakay ana.

⁸Akwa a da buwəmakwar na, kuse ma hahaya ŋga ta gwedey ma me pey 'ar, kuray ka kam təke mekelehe kava dakay, na ŋga na na, tek ma Bay ma Bəla ma vəlawa ma hayaha na.

⁹Tek ana a sawa na, da meslərey ma ndaw me key ana kakay, ma aza ndaw ka slafa ma ŋgalakada zlay.

¹⁰Hərway ma ləmandukurawa na ŋga, a kandukurawa na ta Yezu Kriste, ma da key mber hayna hay, na Bay ma Bəla ma ləmərawa zla ka vaw ana, ma aza lakwa ka da kakwama andza ha.

¹¹Sərafama ka ma ndzawa kwar ana zlezle na! kuray na zuif na ma yadəmukurawa da hwaɗ ana hay kakay, Zuif hay a kadəmakwar kuray ndaw ma sla kuɗey kakay ana hay na ta ɗəma kakay, mavəday taya na ma sla kuɗey ahiya kavəday ma zeheɗ me me sley kuɗey ka vaw ta na.

¹²sərafama da varay ana ŋga na na, Ndaw ma vaha 'ar ana ma kwar tsaray dakay, a mbəsləmakwar a dey ma səkway ma Bay ma Bəla kakay, kuray ma warzlaya ba da ma dzəma vaw na ma tsəmawa kava na, mandzara me pey dey, mandzara Bay ma Bəla ka bəla neney.

¹³Ama ekəɗey da medzəmey vaw ta Yezu Kriste na, kuray a kete dəreŋ ana hay na, kuray ma təraya ba bəse ta mambaz ma Kriste.

¹⁴Akwa zozoy lakwa ha na ŋga, ta tek ma wanəkaya ba ka vaw ana na, ka tərada ba tek asləta ha. Ta me mətsey ŋga ka ’ar ma tuwaw na, ka mbəzlada zleɗ ma me ŋgəley dey a vaw kakay ana, ma tsadata Zuif hay ba ka vaw ta ndaw Zuif ahiya kakay ana hay.

¹⁵Ŋga ka həlafa gədaŋ ma mewey ma Moiz ba ta mey ma mewey hay, ma səpəmata tərre na hay, a wuɗey na, andza neney, ta ndaw Zuif , ta ndaw Zuif aha kakay ana na me kərhey səkway waya ha da ŋga na, ta ma vəlawa zozoy,

¹⁶ma dzəmadata ka vaw ta Bay ma Bəla tsetsuwe ta hiya, da vaw asləta, ta gwedey ma tuwaw ma gazləla na; da huɗa na, ŋga ka zəga səkwom ba ma tsoy aha.

¹⁷A sawa «ma tələkadukuraɓa mey ta zozoy a kuray a neney dəreŋ ana hay, ta zozoy a ndaw bəse na hay.»

¹⁸Kuse ma ŋga na, ka ndaw ka ndaw, da Mesəfrey ana asləta na, a wuradandakwar tsəveɗ me gurey ka Baba.

¹⁹Kəɗey na, kuray mbəlak ahiya sakay, kuray ndaw ma sawa ta sek ana hay sakay, wurow a kwar na asləta andza ndaw kokwaɗ ana hay, kuray na ndaw ma veɗ 'ay ma Bay ma Bəla hay.

²⁰Ka fuləkwadəmakwar tsoy a mezley ’ay ana, na bəzay ana na, maslaŋ hay ta ndaw sek hay, arka Yezu Kriste na ta 'ar aŋga na na, ŋgwa ma mede na.

²¹Da ŋga na, mendzey ma ay tabiya ha, a tserzley mambay aha, a tsəley a 'ərlam ma da tərey 'ay me kuley kokwaɗ ana na, da mezəley ma Bay’ərlam.

²²Da ŋga na, kuray ana tiyatsa na, ka masləta ha na, kuray ka tələkam ba a me zley 'ay ana, ma da tərey 'ay mendzey ma Bay ma Bəla ta har ma Mesəfrey.