Read North Mofu Ɗeriwel tsəfəmey ana a Tesalonisieŋ hay 2 Bible Online

Ɗeriwel tsəfəmey ana a Tesalonisieŋ hay 2 - North Mofu bible

Ɗeriwel tsəfəmey ana a Tesalonisieŋ hay 2

¹Malam a ɗaw hay, kuray ana ka səradama haya hayaha seŋgey, kuray ma ŋgələmandar ana ŋga na na, ma hayaha kakay.

²Ama azlakwa tok na, la ka kəmawa banay ba, ta ma tsaɗəmandərawa da Filip, kuray ana ka səradama seŋgey, la ka ndzafam gədaŋ ba da har ma Bay ma Bəla ala, ma səmadandar ma da taləkadakwar mey ta Mey ŋga Wayna, ma tazlarawa ta ma kəɗa vaw ta tek hay haɗadzidzay.

³Guma la na ma tələkada mey ana ma pa ha ka me zləgey ndaw kakay,a dahəɗa ndaw a tek me zləɓey ndaw kakay, a tsəhey wewer ma təke kava kakay.

⁴Dzadzak na Bay ma Bəla ka nəkafandar ba ɗa ma vəladandar Mey Wayna. Ekəɗey andza la tələkadama mey na, la səpam na, la ka dəmatar ’ar a ndaw hay kakay, amana a Bay ma Bəla, na ma sasəka mevel ala na hay.

⁵Kəɗey tok na, ɗaɗa la ka tsam guma ma pey wuiya ka ndaw tikay, kuray ana ka səradama, ɗaɗa la ka dzalam ma ndzafada tek kakay, seydewe la na na, Bay ma Bəla na.

⁶Arka sa na, ɗaɗa la ka səpam ɗuhwa da har ma ndaw hay tikay, kwa da 'ay kwar, kwa da 'ay ma ndaw hay mekele hiya na.

⁷Akwa kassla na, la ka slafama ma wumakwar da mezəley ma maslaŋ ma Kriste, dzadzak tok na, da ma ndzawa la da walaŋ a kwar na, la kokwoɗ ahiya bəza kakay, andza ma maya ma bəzey ma kutəkwey wawa ŋga hay, ma vəlatar tek me zəmey ana.

⁸La ka wuɗəmakwar ba haɗadzidzay, ha la ma həla vaw ahiya na, ma vəlakwar na Mey Wayna ma Bay ma Bəla dada tsa kakay, amana, ta mendzey la na dzay, hərway kuray ka təram ba ndaw andza la ma wuɗəmata haɗa na hay.

⁹Malam a ɗaw hay, kuray ana ka sərafama, banay la, ta me yey vaw la me key mber dəvaɗ ta rəpas adzay, ma la ka da ndzam ma vəlaya ka 'ar ma ndaw da walaŋ a kwar zlay, da slam andza la ma tələkadəmərawa mey ta Mey wayna ma Bay ma Bəla na.

¹⁰Ka slafama me key seydewe ŋga na ta Bay ma Bəla adzay tiyatsa. Tek ala ma kəmawa kavəday kwar, ndaw ma pam 'ar ana hay na, da kokwaɗ, da dzerey, mandzara me ŋgəley bəzay.

¹¹Arka kuray ana ka səradama, i kadakwar na kal kal andza baba ma kadata bəzey ŋga hay.

¹²La ka səmadakwar ba, la ka həladəmakwar bəzay ba, la ka ndzəkəmakwar hahay ba ka dəba, hayna mendzey kwar ka key na, andza na ma dawam ka vaw ta Bay ma Bəla ana, na ma zəlakwar a Slala ŋga me wezley dey ana.

¹³Nəkafama ka mey na, la madəmara sise zarra a Bay ma Bəla: andza kuray ma təɓama guma ma Bay ma Bəla, na la ma tatəkadəmakwar ana na, kuray ka ŋgəlama ba zləna, andza ma guma ma ndaw kakay, amana, andza na ma ka ha andza ha na, Guma ma Bay ma Bəla, na me key mber da vaw kwar ana tiyatsa, kuray ndaw me pey 'ar ana hay.

¹⁴Akwa na malam a ɗaw hay, ka pam sek na, a slam sek ma Egliz ma Bay ma Bəla da Zudey ana hay da Kriste Yezu, kavəday kuray ana tiyatsa na, kuray ka kam tsetseh ba, da har ma ndaw ma 'ay kwar ana hay, andza ma ta Zuif hay ma kadəmata tsetseh ana tey.

¹⁵Zuif hay ma kəɗama Bay’ərlam Yezu ta ndaw sek hay, na taya ka kadəmandərawa tatakoy ba tiyatsa, a damar 'ar a Bay ma Bəla kakay, taya ndaw dugwan ma ndaw hay tabiyaha.

¹⁶Ka təkəmandar ba me tələkey mey a ndaw Zuif ahiya kakay ana hay, ma ka da buwəmata zlay, kəɗey na, a səkadama meŋgəsey ta zarra adiya adiya. Ama ma da ndəvey ŋga na na, me tsey mevel ma Bay'ərlam ha ma təɗafata.

¹⁷Na ŋga la ŋgey malam a ɗaw hay, lakwa ma ndza hiya dəreŋ da mendzey nekəɗey, ka slam dey na dəreŋ, amana da mevel na, dəreŋ kakay. La ka kəɗəmaɓa vaw ba kambəlaɓa ma daɓa ma da nəkəmkurawa, hərway la ka dzalama ba kurah kurah da mevel ala.

¹⁸Hərway ma mey na, la ka wuɗəmaɓa ba ma daɓa a 'ay kwar- yah ana Pol ta ’ar a ɗaw ana- amana Sataŋ ka təkandar ba.

¹⁹Akwa na, tek ala ma me pey dey la na na, na waray? Wuiya la, me ŋgelekey la na na, a da tərey na gursam ala, ha ka slam dey ma Bay’ərlam lakwa Yezu, ta pas ma ma da sawa ŋga na na, sey kuray zləna wiyaway saway?

²⁰Ayaw, kuray na me wezley dey la ta wuiya la.