Read North Mofu Ɗeriwel ma tsetsew ana a Timotey 2 Bible Online

Ɗeriwel ma tsetsew ana a Timotey 2 - North Mofu bible

Ɗeriwel ma tsetsew ana a Timotey 2

¹Kah tok ŋgey dem a ɗaw, dzəŋgərey vaw na ta hahaya na da Kriste Yezu ana.

²Tek na kah ma tatəkada ka yah, ta ndaw seydewe hay haɗadzidzay ana na, vəladatara a ndaw na ɗa ka vaw ta na hay, ma taya na sa tey na, ka slafama ma tatəkadatara a ndaw mekele hiya tey sa.

³Äəsa banay na ma vəla ha ŋgeɗek ana, andza sidzew hayna ma Kriste Yezu.

⁴Ɗaɗa ndaw ka tələkey tsoy a sidzew na, a slafa me key tek andza ma mendzey ma sa ma ndaw hay ma kam ana sakay, haɗaw a wuɗey ka dar 'ar a ndaw ana ma zəga a huɗa na na.

⁵andza ha satsa na, da slam me dzey gawla me gertey vaw na, ndaw a da zəga 'ar ma sleɗ na, sey a zlamar me gertey vaw ana na, ta tsəveɗ.

⁶Ndaw me həvey, ka yey vaw ba ka mber ma ley ŋga na, ma da zəmada wuiya ma tek ma zlagwam ana ka mey na ŋga na təŋga.

⁷Hayna tsənada guma ɗaw a neney i ma tsaka na, sa na na, Bay’ərlam ana a da ɓadaka tek a neney hay tabiyaha.

⁸Hayna sərafa ka Yezu Kriste ma mbəlawa da walaŋ ma ndaw ma mətsa na hay ana, bəzey ma səkway ma David, andza ma Mey Wayna i ma tələkada mey ana,

⁹na i me key tsetseh kava na, ha ma dzuwəmaya ta megesele andza i katsala ha na. Ama guma ma Bay ma Bəla na ma dzuwaha tikay!

¹⁰kavəday ma mey na, i ɓəsata tek a neney hay tabiyaha na, hərway ma ndaw ma gəɗəma na hay, ma aza taya tiyatsa na ka ndzafam me buwey na, da Kriste Yezu ana, ta maram me ndəvey kakay ana.

¹¹Guma neney na təɗe, kassla me pey 'ar kava: haɗaw i mətsakwama ta ŋga na, i da səfrakwama ta ŋga.

¹²Haɗaw i kakwama tsetseh ta ŋga na, i da kakwama bay ta ŋga. Haɗaw i mbəɗakwama mey ba na, ŋga a da mbəɗey mey tey.

¹³Haɗaw i tsənakwar sləmay kakay na, ŋga na a mbəɗey sler a guma ŋga tikay, hərway ŋga na a da mbəɗar aha mey a bay ’ar ma vaw ŋga tikay.

¹⁴Tek a neney hay tabiyaha na, madatara a ndaw hay sa, tsadatara tsəɓak, ka slam dey ma Bay ma Bəla. Hayna ka mbəkadama me tərey vaw ka bəzay ma guma hay, me tərey vaw na, a nefey kakay. Dakay dzadzak na a zəɗadata ndaw ma pafama sləmay ana hay.

¹⁵Key gədaŋ ma ɓadara vaw ɗek a Bay ma Bəla na, andza ndaw ka həlafama suwet tsoy ana, ndaw hwaray ma kar ka mber aŋga kakay ana, ma tələkada mey ta tsəveɗ, ta mey ma dərka.

¹⁶Ka guma ma dzedzəvey so ha, me ŋgəsey me pey 'ar ana na, katar tsakay. Ndaw ma vəladəmara vaw ana hay akwa na, a gəlam ka mey ka mey da meŋgəsey;

¹⁷guma ta na na, a goŋguɓey andza mbəlek ma gurleŋ. Andza Hymenee ta Filetos ma kaya na andza ha.

¹⁸Taya ka zləgam tsoy ka tsəveɗ ma dərka, a ləvam waya ma mbəlawa ma ndaw ma mətsa na hay na, ka kawa tsoy; kəɗey na, a mbəɗadəmatara me pey 'ar ma ndaw hay haɗadzidzay.

¹⁹Kwa teŋgey teŋgey na, bəzay ma 'ay ana Bay ma Bəla ma pa gədaŋ aha na na, ŋga daha təŋga. Zeheɗ aŋga ha na, guma neney: Bay’ərlam na, a səradata ndaw aŋga hay, arka satsa: kwa way way ka zəley mezəley ma Bay’ərlam ba ka vaw na, ka gurey ba dəreŋ ta meŋgəsey.

²⁰Da veɗ 'ay ɗuhwa ha na, tek ma gedzek hay na, ma ləmaya na ta gura, ta sulay dada tsa kakay, na ma tuwaw ta na ma hahay daha tiyatsa. Sa na a kadəmata mber na ta pas ma magurlam, sa na tey na ta pas tedehe na hay.

²¹Ndaw ana ma bazləma meŋgəsey ŋga hay ba na, a da tərey na tek ma gedzek hayna, ma pəsa mey aha, a nafar a bay ma 'ay, ma kwasla ha, ma kadata mber hayna hay tabiyaha.

²²Mbəkada me dzeley 'ar ma bəza hay, səpey na dzerey, me pey 'ar, ma wuɗa vaw, zozoy ta ndaw na ta mevel tsəzlakka na hay, ma ɗulam mey a Bay’ərlam ana.

²³Ama guma ma tsam ta huɗa kakay ana hay, tedehe, ma dəla na hay na, katar tsakay, ka sərada ha a sadərawa na me tərey vaw seŋgey.

²⁴Haya ha akwa na, gawla ma Bay’ərlam na, ka tərey vaw tizlay, amana ka tərey ləfeɗeɗe ha ka ndaw hay tabiyaha, ka slafa ma tatəkadata ndaw hay, ka slafa ma ɓəsata guma na ma tsamar ta huɗa kakay ana hay.

²⁵Haya ka tatəkadata ndaw ma tsam guma ta meterŋgəleŋ ana hay na, ta ləfeɗeɗe aha; ma sərada na way? Neŋgərey Bay ma Bəla a da vəlatar me mbəɗey mendzey, ma ka da səradama dərka na,

²⁶ma da məmawa ta 'ar ata na, da ma parɗawa vaw ta da zəva ma setene, na ma zəgadata beke ahiya na, ma kamar tek aŋga ma wuɗey ana.