Read North Mofu Ɗeriwel a Filemoŋ 1 Bible Online

Ɗeriwel a Filemoŋ 1 - North Mofu bible

Ɗeriwel a Filemoŋ 1

¹Yah Pol, i da daŋgay hərway ma Yezu Kriste, ta malam a ɗaw Timotey, i windar a Filemoŋ, mandala la ma meslərey, na la ma wuɗama bəza kakay ana,

²ta Afiya malam ala diŋgwas ana, ta Arsip mandala la ma vərom, ta Egliz ana ma tsəhey 'ar da 'ay ɗek ana.

³Hayna ndzafam hahaya ta zozoy da har ma Bay ma Bəla Baba lakwa, ta Bay’ərlam Yezu Kriste.

⁴I madara sise a Bay ma Bəla a ɗaw zarra da me ɗuley mey ɗaw na, i sləfaka ha.

⁵Hərway i tsənada ha a tsam aha ka ma wuɗa vaw ɗek, ta me pey 'ar eɗek ka Bay’ərlam Yezu ta ndaw kokwaɗ ana hay tabiyaha.

⁶Hayna ma vəlada vaw ɗek ana a me pey 'ar ana na ka vəɗey: haya tok na, ɓada tek a lakwa hayna hay tabiyaha ma slafakwa me key hərway ma Kriste na.

⁷I ka ndzefey wuiya ba ɗuhwa ha ta ma mey 'ərev, hərway ma ma wuɗa vaw ɗek malam a ɗaw, kah na ka matar 'ərev ba a ndaw Kokwaɗ ana hay.

⁸Kwa andza ta Kriste na, slam har a ɗaw daha ma tsaka ka tek eɗek na a dafa kah ka kata na hay,

⁹amana, tek a neney i ma da tsəhafaka na na, ha ka da ma wuɗa vaw. Ayaw yah a neney tsoy i maraw aha na, yah ana ekəɗey da daŋgay hərway ma Yezu Kriste na,

¹⁰i kaka amboh na, hərway ma wawa ɗaw Onezim, na i ma ndzafawa da daŋgay ana,

¹¹da me pey 'ar aŋga zlekete a nafaka ha kakay, ama ekəɗey na, a nefey ka dəba, a kah, kalkal andza a yah ana.

¹²I sləradəkaɓa sa, ŋga neney kal kal andza mevel a ɗaw ana.

¹³Akwa na i ka slafa na i ka pada, ka ndzaya tek a ɗaw, ka kaya meslərey da mey ɗek, da daŋgay ana i da huɗa kavəday ma Mey Wayna na;

¹⁴amana i ka wuɗey me key mandzara kah ka vəlaya slam har kakay, ma hahaya na ka da nəkey andza i təkaka ɗay zlay, ama ka sawa na da mevel eɗek ana, andza na ŋga ɗek me wuɗey ana.

¹⁵Ka zəgawa ba Onezim a mbəkadəkawa na, me mendzey nekəɗey, aza ka da madəməkaɓa tek eɗek ma mambaŋ aha.

¹⁶Amana, andza beke ha sakay, a fəna sa na, andza malam kah ma wuɗa bəza kakay ana. Ka yah na, ka kafaya ba a fəna malam sa, ka kah ana na a da kafaka a fəna sakay na teŋgey? Ŋga ndaw aha təŋga, ŋga kretieŋ aha sa.

¹⁷Haɗaw ka nəkafaya na andza i malam a ɗek aha da me pey 'ar na, ŋgəla na, andza ka ŋgəley yah ana.

¹⁸Kendzey andza ka ŋgəsaka ba na, dakay gwedere ɗek ka ŋga daha na, mbəkada ka 'ar a ɗaw ana.

¹⁹Ma windəkaɓa na, yah ana Pol ta 'ar a ɗaw ana, ma da warkadaka na yah ana - Akwa i ɓadaka dzay sakay, sərafa na, kah ana tiyatsa na, gwedere ɗaw ka kah daha, gwedere na na, bay 'ar ma vaw ɗek ana.

²⁰Ana ŋgey malam a ɗaw, kadaya meslərey a neney da mezəley ma Bay’ərlam, maya mevel ta Kriste.

²¹I windəkaɓa na, i ma pa 'ar aha ka me tsəney sləmay ɗek, i sərada ha ka da key na a fəna na i ma tsəhafəkaɓa na sa.

²²Satsa na, ləmaya 'ay me ney: i ma dzala na, kuse ma me ɗuley mey kwar hay na, a da kələdəmiyaɓa tek a kwar.

²³Epafras mandala ɗaw la da daŋgay tsetsuwe hərway ma Bay Yezu Kriste na, ka tsadəkaɓa guma.

²⁴Ka zəgawa andza Mark, Aristark, Demas ta Luk, ndaw na la ma kam meslərey dzaya na hay.

²⁵Hayna hahaya ma Bay’ərlam Yezu Kriste ka ndzey ta kuray.