Read North Mofu Ɗeriwel a Ebrew hay 8 Bible Online

Ɗeriwel a Ebrew hay 8 - North Mofu bible

Ɗeriwel a Ebrew hay 8

¹Arka tek andza ɗuhwa ha da bəzay ma guma lakwa neney na, na ŋga lakwa na, baba ɗuhwa na me key kuley ana andza na ŋga na na. Ŋga na ma ndza ha ta har zəmay ma koriwal ma Bay Ŋgalaka na da 'ərlam ana.

²Andza ndaw me kuley ma 'Ay me key Kuley dərka, ma gwadzavok ana dərka na, ma ləma ha na, ta har ma Bay’ərlam ana zləna, ta har ma ndaw kakay.

³baba ɗuhwa na me key kuley ana waray waray na ma pa ha na, ma vəladara tek ma haya ha a Bay'ərlam, ta ma kar kuley hay, ŋga tey na tek aŋga me vəley daha tiyatsa.

⁴Kendzey haɗaw Kriste ana ka key ŋga daha ka dala na, kwa a da slafa ha me tərey baba me key kuley aha kakay, slam ana ma vəla ha tsoy ma ndaw ma vəladəmara tek a Bay'ərlam ana hay, andza ma Mewey me ləvey ana;

⁵ama kuley ta na na, a kadəmara na a mey dey ma tek, mezek ma na da 'ərlam ana. Andza na ma Moiz Bay’ərlam ma ləvərawa ka ləma gwadzavok ana, ŋga ma ləvar: «Nəkafa ka da ka na, kassla andza na ŋga ɗek ma ɓadəməkawa ka 'ar ma mamba na.»

⁶Ka me tsey dərka na na, mber ana kassla ta na ŋga na na, a fəna sa, hərway ŋga na, maslaŋ ma ma da dzəmey vaw na hayna, a fəna sa na, ma pa bəzay aha ka tek hayna ma tsəmawa kava na.

⁷Haɗaw azlakwa me dzəmey vaw ana tsəfəmey ana, ka key na meŋgəsey da huɗa dakay na, a da mbəɗadama ta na me tsetsew ana kakay.

⁸Akwa na, dərka na a key na, a katar na say: Bay’ərlam a ləvey na, nəkafa pas ana hay a səmawa ha, i da kam zeheɗ ma me dzəmey vaw waya ha ta gedzek ma Israyel ta gedzek ma Zuda.

⁹Ma dzəma vaw ana na andza na la ma kəmawa andza baba ta na hay sakay. Ta pas andza i ma zəgafatərawa har, i ma badatərawa ba dəreŋ ta dala ma Ezipte. Hərway taya na na, ka ndzam da ma dzəma vaw ɗaw kakay. Arka Bay’ərlam me ləvey: «Yah tiyatsa na, i ma mbəkafata har ba.

¹⁰Hərway nəkafa me dzəmey vaw ana la ma da dzəmam ta gedzek ma Israyel ana. Arka Bay’ərlam me ləvey: «A dəba ma pas ana ŋga na hay na, i da vəlatar mewey ɗaw hay, i da windadatara a 'ar me dzeley ta hay ta mevel ata hay, i da tərey na Bay ma Bəla ta ha, taya tey a da təram səkway ɗaw aha.

¹¹Ndaw da walaŋ a ta ma da dzaŋgada ndaw ma dala ŋga naŋgar na dasakay, kwa malam aŋga ta me ləvey aha: sərada Bay’ərlam! na dasakay; hərway tobiya ta ahiya a da səradəmaya, zla ka bəzey bəza ha, kasl ka ndaw ɗuhwa ha.

¹²Kavəday i da safatara yam ba ka malay ta hay, i da mətada 'ar ba ta meŋgəsey ta hay.»

¹³Ka me tsey ŋga ka me dzəmey vaw wayna na, ŋga ka tərada na tsəfəmey ana ba guram aha. Arka na, tek me tərey ba guram aha na, me key maraw ana na, ma zlambar aha a da devesey.