Read North Mofu Ɗeriwel ma Zaŋ tsəfəmey ana 1 Bible Online

Ɗeriwel ma Zaŋ tsəfəmey ana 1 - North Mofu bible

Ɗeriwel ma Zaŋ tsəfəmey ana 1

¹Tek ana me key zla da mezley ana, tek ana la ma tsənadəmərawa na, la ma nəkadəmərawa ta dey la na, tek ana la ma zazurəmərawa na, arka na har ala ma ləmərawa na, Ndaw ana Mey ma Bay’ərlam ma mesəfrey ana.

²-Hərway mendzey ana ka ɓey vaw ba, la ka nəkadəmərawa ba, la kam seydewe ŋga na, arka la ma tələkadəmakwar mey, ta mendzey na me ndəvey kakay ana, na ma mbəɗa dey aha 'ar 'ay Baba na, ma ɓandar vaw ala-.

³Na la ma nəkadəmərawa, ma tsənadəmərawa na na, la ɓadəmakwar a kuray tiyatsa, ma aza kuray tiyatsa na, la ka dzəmakwama dzaya. Me dzəmey vaw lakwa na na, me dzəmey vaw ta Baba, ta Bəzey ŋga na Yezu Kriste.

⁴Arka la ma windəməkuraɓa neney na, ma wuiya lakwa ka key na kərem.

⁵Neney na bəzay ma guma na la ma tsənadəmərawa ka ŋga na; arka na la ma ɓadəmakwar: Bay ma Bəla na waw me nəkey dey, ləvaŋ ɗaw? Ka ŋga na kwa ketekwəɗey daha tikay.

⁶Haɗaw i ləvakwa: «Lakwa na ma dzəmaya ta ŋga na», da me heley da ləvaŋ satsa na, na ŋga na na, i tsakwama maləwaɗay, arka i kakwama ha dərka sakay.

⁷Ama haɗaw i halakwama da waw me nəkey dey, andza ma ŋga na ta 'ar aŋga na ŋga da waw me nəkey dey ana na, lakwa ma dzəmaya ka ndaw ka ndaw ta mambaz ma Yezu Bəzey ŋga ma bazləmadandakwar meŋgəsey lakwa hay ba tabiyaha na.

⁸haɗaw i ləvakwama: «Meŋgəsey ka lakwa dakay na», a key na, i zləgakwama bay 'ar ma lakwa na, arka na dərka da vaw lakwa dakay.

⁹Haɗaw i ɓadakwa meŋgəsey lakwa na, ŋga na a mbəɗar sler a guma ŋga tikay, dzerey aha, a da safandakwar aha yam ba ka meŋgəsey lakwa hay, a bəzləmadandakwar malay hay ba tabiyaha.

¹⁰Haɗaw i ləvakwa: «Lakwa ma ŋgəsa hiya kakay na», la təradakwa ŋga na ndaw maləwaɗay aha, arka na guma ŋga, ŋga da vaw lakwa dakay.