Read North Mofu Ɗeriwel ma Zaŋ tsəfəmey ana 2 Bible Online

Ɗeriwel ma Zaŋ tsəfəmey ana 2 - North Mofu bible

Ɗeriwel ma Zaŋ tsəfəmey ana 2

¹Dem a ɗaw hay, i windadəkuraɓa neney na, ma kuray ka da ŋgəsam zlay. Ama haɗaw kendzey ndaw ana ka ŋgəsey ba na, ndaw ma da dzaŋgərafandakwar ana daha ka slam dey ma Baba, Yezu Kriste, ŋga na dzerey aha.

²Hərway ŋga na, a zəɗada vaw ŋga ma bazləmada meŋgəsey lakwa, na ŋga lakwa dada tsa kakay, amana ma ndaw hay tabiyaha, ka bəla gədem tiyatsa.

³Arka ka neney na, i səradakwa ha seŋgey, i səradakwa ha ŋga na, haɗaw ka wafukwata ha vaw ka mey ma mewey ŋga na hay na.

⁴Ndaw me ləvey: «Ŋga na i sərada», amana a wafata vaw ka mey ma mewey ŋga hay kakay na, ŋga na ndaw maləwaɗay, arka na, dzerey da ŋga dakay.

⁵Ama ndaw ma wafa vaw ka guma ŋga na, dərka na, ma wuɗa vaw ma Bay ma Bəla ka ndesley ba da ŋga, da na ŋga na tok na, la da səradakwa lakwa da ŋga na hərwuiya.

⁶Ndaw me ləvey: «I da ŋga na», hayna ka daway na kassla, ta tsəveɗ ana ŋga na Yezu ana ma daway ta huɗa na.

⁷Dzam aɗaw hay, i windəkuraɓa ɗey na, mey ma mewey wayaha kakay, amana, mey ma mewey gurma ana, na kuray ma ndzafama zla da mezley ana, mey ma mewey a neney gurma na na, na ŋga na na guma na kuray ma tsəmadəmərawa na..

⁸Dzadzak i windəkuraɓa ɗey na,mey ma mewey wayna təŋga, - neney ana na, dərka na da ŋga, da kuray tiyatsa-, kavəday ləvaŋ a daway aha təŋga, arka tsa na, waw me nəkey dey hayna a wazlawa ha dey.

⁹Ndaw ana me ləvey: «I da waw me nəkey dey», amana ma ngəlada dey ta malam aŋga kakay na, na ŋga na na, ŋga re da ləvaŋ.

¹⁰Ndaw ana ma wuɗa malam aŋga na, ma ndzaha da waw me nəkey dey, tek ka ŋga ma da tsada metsembeɗ na dakay.

¹¹Ama ndaw ana ma ŋgəlada dey ta malam aŋga kakay na, ma ndza ha na da ləvaŋ, a heley na da ləvaŋ, arka na, a sərada a daway na a may kakay, hərway ləvaŋ ka waləfadara dey ba.

¹²I windadəkuraɓa ŋgey dem a ɗaw hay: «Meŋgəsey kwar hay na ma sa yam ahiya ba, kavəday ma mezəley ŋga: Yezu.»

¹³I windadəkuraɓa baba hay: «Ka səradama ha Ndaw ana zla da mezley ana.» I windadəkuraɓa gawla hay: «Kuray na ka fənamar 'ar ba a Ndaw hayakakay ana.»

¹⁴I ka windadəkuraɓa ba tok dem a ɗaw hay: «Ka səradama ha Baba na seŋgey.» I ka windadəkuraɓa ba baba hay: «Ka səradama ha Ndaw ana zla da mezley ana.» I ka windadəkuraɓa ba gawla hay: «Kuray na gədaŋ ahiya, arka na guma ma Bay ma Bəla ma ndza ha da vaw kwar, arka na, kuray ka fənamar 'ar ba a Ndaw haya kakay ana.»

¹⁵Ka da wuɗama bəla zlay, kwa tek na ŋga ka bəla na zlay. Kendzey ndaw ana a wuɗey bəla na, ma wuɗa vaw ma Baba ka ŋga dakay.

¹⁶Mavəday tek ana hay tabiyaha da bəla na na, - tek me sey ma slaw vaw, tek me sey me dey, ma vəladara vaw da me ŋgelekey a zleley- a sawa na da Baba tikay, amana da bəla neney.

¹⁷Ama tok na, bəla na a ndəvey, ŋga na ta tek me sey ŋga na dzay, ama ndaw me key andza ma Bay ma Bəla me wuɗey ana na, a ndzey na ma kwoza ha.

¹⁸Dem a ɗaw hay, neney na har madakwaydok ana. Kuray ka tsənadama ba a tələkadama ha mey ndaw dugwan ma Kriste a sawa ha, arka zla ekəɗey ana tsa na, ndaw dugwan ma Kriste hay taya daha haɗadidzay, i da səradakwa har madakwaydok ana na kava.

¹⁹A bəmawa na da 'ay lakwa na hay, amana taya ndaw a lakwa hay kakay. Hana na ka kam ndaw a lakwa hay na, akwatay na taya ma ndzaya ta lakwa. Ama a dafa na ka sərey: kwa taya tobiya ta hiya, taya andza ha tekeɗe na, taya ndaw a lakwa hay kakay təŋga.

²⁰Ma kwar tey na, ka kafəmakwar zeheɗ ma mal ba, ka ndzafama da har ma Ndaw kokwoɗ ana, kuray ana tabiyaha ka səradama seŋgey.

²¹I windəkuraɓa na mavəday ka səradama dərka kakay na,andza ha kakay, amana, ka səradama, ɗaɗa tek maləwaɗay aha ka bawa da dərka na daha tikay.

²²Ɗagay ndaw maləwaɗay ana na way? Dakay na sey ndaw me mbəɗey mey me ləvey: Yezu na, Kriste kakay ana. Na ŋga na na, ndaw dugwan ma Kriste na ŋga tok, ndaw me mbəɗey mey: i sərada Baba ta Bəzey kakay ana.

²³Kwa way way ma mbəɗey mey; i sərada Bəzey ana kakay na, a da ndzafa ha Baba na kakay atsa. Ndaw me ləvey ma dey ma ndaw hay: i sərada Bəzey ana na, a da ndzafa Baba na tiyatsa.

²⁴Guma kwar ma tsənadəmərawa zla da me zley ana na, ka ndzey da vaw kwar, haɗaw guma kwar ma tsənadəmərawa zla da me zley ana, ŋga da vaw kwar na, ka da ndzam da Bəzey, da Baba.

²⁵Guma ŋga ma tsərawa a da kadandakwar ana na, ma ndzafada mendzey me ndəvey kakay ana.

²⁶Neney na guma ɗaw ana i ma wuɗey ma windadəkuraɓa na, kavəday ma ndaw ma wuɗam ma da zləgaɗəmakwar ana hay.

²⁷Zeheɗ ma mal ana kuray ma ndzafam da huɗa har aŋga na na, ma ndza ha da kuray, ka wuɗam ha ka tatəkadəmakwar dzay sakay. Ama andza zeheɗ ma mal ana a tatəkadakwar ka tek hay tabiyaha - ŋga na dzerey aha, a ŋgəley tikay -, mavəday ka da tatəkadakwar ba na, ka da ndzam da ŋga na hərwuiya.

²⁸Kəɗey tok ŋgey dem a ɗaw hay, ndzam na da ŋga, ma aza ka da bawa ba na, i ka da ndzakwama fandar fandar, ma aza i ka da ndzakwama da hwaray dəreŋ ta ŋga, ta pas ma ma da mawa ŋga zlay.

²⁹Azlakwa ka səradama ha ŋga na dzerey aha sana, hayna səradama, kwa way way me key dzerey tiyatsa na, ma ya ha na da ŋga.