Read North Mofu Ɗeriwel ma Apokalis ma Zaŋ 1 Bible Online

Ɗeriwel ma Apokalis ma Zaŋ 1 - North Mofu bible

Ɗeriwel ma Apokalis ma Zaŋ 1

¹Ɗeriwel neney na, tek ma kəzla hiya na Yezu Kriste ka ɓada na: Bay ma Bəla a vəladara na, ma ka da ɓadatara a gawla ma 'ay ŋga hay, tek na ma da sawa da bəse na. A da ɓadara na, ŋga ma sləradərawa madurlam aŋga, ka tsakay ma gawla ma 'ay ŋga Zaŋ.

²Ŋga na ma ɓada dərka na, tek aŋga na ma nəkadərawa tabiyaha na, guma ma Bay ma Bəla aha, seydewe ma Yezu Kriste aha.

³Ndaw ma dzaŋga, ndaw ma pam sləmay ka guma neney andza ma ndaw sek ana, ma tsənar sləmay a tek a neney ma winda a hiya na na, taya da wuiya, hərway har ana ŋga bəse.

⁴Yah Zaŋ, i windatəraɓa a Egliz a hay tsəla da Azi ana. Hayna ka vələməkurawa hahaya ta zozoy da har ma Ndaw ŋga daha ekəɗey ana, ŋga daha zla ekəɗey kakay ana, na ma da sawa na, da har ma mesəfrey a hay tsəla ma ndzaya ka slam dey ma koriwal ma bay ŋga na,

⁵arka ta har ma Yezu Kriste, Ndaw seydewe hayna, marakway da walaŋ ma ndaw ma mətsa na hay, Bay Ŋgalaka ma Bay ma dala hay. A Ndaw ma wuɗakwar ana, ma ləhadandukurawa ba da meŋgəsey lakwa hay ta mambaz aŋga,

⁶ma da təradandakwar Slala ma baba me key kuley ahiya ma Bay ma Bəla Baba ŋga. Ma ŋga na, ma vəla ha me wezley dey, me key bay da mevey temere da mevey temere. Amen.

⁷Nəkafama a sawa ha da dey ma pazlay, arka ndaw hay tabiyaha a da nəkadama, kwa ta ndaw ma slakama na hay dzay: səkway ma dala hay tabiyaha a da ndzam, andza da 'ay vagay hərway ŋga. Ayaw! Amen!

⁸Bay’ərlam Bay ma Bəla a ləvey: Yah na Alfa ta Omega, Ndaw ŋga daha ekəɗey ana, ŋga daha zla ekəɗey kakay ana, Ndaw ma da sawa ka mey ana, Ndaw ma slafa tabiyaha na.

⁹Yah Zaŋ malam a kwar, mandala kwar da suwet, da Slala ma Bay’ərlam sa tsa, da matanduroŋ da Yezu, i ma ndza ha da dala ma ɗawala ha ta yam ana da Patmos, kavəday ma guma ma Bay ma Bəla ta me key seydewe ma Yezu.

¹⁰Mesəfrey ma fuləkwaya a vaw ta pas ma Bay’ərlam, arka i ma tsənada vəɗe ma ɗay a tsəney gədaŋ aha da dəba ɗaw, andza keley tolom.

¹¹A tələkey aha mey: «Tek ana kah ma nəkada na na, windada a ɗeriwel, arka na sləradatara a Egliz ana tsəla na hay: a Efez, a Smirne, a Pergam, a Tiyatir, a Sard, a Filadelfi ta Lawdisey.»

¹²I me mbəɗey dey ma da nəkafa ka ndaw ana ma tsaya guma na, arka andza i me mbəɗey dey ba na, i ma nəkada tek me key waw ma gura ta hawal ahiya kava tsəla.

¹³Arka da wuzlah ma tek me key waw ta hawal ahiya kava ana hay na, ndaw ana daha ma lətsa ha, a nəkey andza bəzey ma ndaw, suwal zozom aha ka vaw, ma dzuwa kanda ma gura ha da 'ərev;

¹⁴'ar aŋga na ta mbez aŋga na na, babara ha andza mbez ma təɓaŋ, andza mekwekulek, dey ŋga na hay na andza waw a təɓey aha ger ger.

¹⁵Sek aŋga na hay na andza mandzay gagaza na ma sumko haɗadzidzay ana, ma dzuɓa ha da yam da hudzok, vəɗe ma ɗay ŋga na na, andza ma bebətsey ma bəlay ɗuhwa na.

¹⁶Ma zəga wurzla hay tsəla da har zəmay ŋga. Sleɗ ma tsakay a zəmey bəza kakay ma tasla ha tsakay tsuwe ta hiya, ma bawa da huɗa mey ŋga. Mey dey ŋga na na, a wezley dey andza pas da me wezley dey ŋga tabiyaha na.

¹⁷Andza i ma nəkada na, i me kəley andza i ma mətsa ha ka slam sek aŋga, amana, ŋga ma pafaya har zəmay ŋga, ma ləvaya: «Ka wesey zlay, yah na ndaw tsəfəmey ana, Ndaw madakwaydok ana,

¹⁸Ndaw ŋga daha ta dey ana, i ka mətsey ba, ama ekəɗey na, i daha ta dey ka mevey temere ka mevey temere kwoza ha, lakile ma memətsey ta slam ma ndaw ma tsəvay hay ma vəla hiya da har a ɗaw.

¹⁹Winda tek a neney kah ma nəkadatərawa na, na ekəɗey ana, ta na ma da sawa ka mey ana.

²⁰Ka guma ma kəzla na ma wurzla neney hay tsəla kah ma nəkadata da har zəmay ɗaw ana, ta tek me key waw ma gura ta hawal ahiya kava tsəla, guma na na, andza neney: wurzla a hay tsəla na na, madurlam hay tsəla ma Egliz hay tsəla na, arka tek me key waw ta hawal ahiya kava tsəla na na, Egliz ana hay tsəla na hay.»