Read North Mofu Ɗeriwel ma Apokalis ma Zaŋ 13 Bible Online

Ɗeriwel ma Apokalis ma Zaŋ 13 - North Mofu bible

Ɗeriwel ma Apokalis ma Zaŋ 13

¹Arka i ma nəkada gənaw ana daha a tsəlawa ha da bəlay ta dərom ahiya kurow, ta 'ar hay tsəla. Ka dərom aŋga na hay na, zlembetse hay kurow, arka ka 'ar ana hay na, mezəley me tseɗey Bay'ərlam hay kava.

²Gənaw ana i ma nəkada na na, a nəkey andza dəvar, sek aŋga na na, andza ma wulav, mey ŋga na na, andza ma mabar. Arka zezekw ana hana ma vəladara gədaŋ aŋga, ta koriwal ma bay ŋga ta me wey ma bay ŋga ɗuhwa na.

³'Ar asləta da walaŋ ana andza ma gwuiyza ha yawa ka memətsey, amana mbəlek aŋga na hana kambəlaɓa na, me pəkwey. A rəzlata ndaw ma dala hay tabiyaha, ma səpamar bəzay a gənaw ana.

⁴Ma namar dəba a zezekw ana, hərway ŋga ka vəladara gədaŋ aŋga ba a gənaw ana. Arka ma namar dəba a gənaw ana ta me ləvey aha: «Ma slafa me wey ta gənaw ana na, way? Arka ma da slafa me kəɗey vaw ta ŋga na way?»

⁵Ma vəlamar mey ma tsada guma hayakakay ana ta ma tsaɗada Bay’ərlam. Ma vəlamar slam har me key andza ha kiya kokurow faɗ kava tsew.

⁶Ŋga me wurey mey ma da tsaɗada Bay ma Bəla, ma tsaɗa mezəley ŋga ta slam me zley 'ar ta Bay'ərlam, ta ndaw na 'ay ta da 'ərlam ana hay.

⁷Ma vəlamar tsəveɗ ma katar vərom a ndaw kokwaɗ ana hay, arka na aza ŋga ka zəgafata 'ar ma sleɗ ba. Arka ma vəlamar gədaŋ ka wata mesəmbərey hay, səkway hay, mey hay gəle gəle ta ndaw ma dala hay.

⁸Ndaw a hay tabiyaha ka dala na hay a da namar dəba, mendzey ma ndaw a hay tabiyaha na mezəley ta ma winda ahiya zla da mezley ma bəla da ɗeriwel ma mendzey ma bəzey təɓaŋ ma təza na kakay ana hay.

⁹Haɗaw ndaw ana sləmay ŋga daha na, ka tsənada!

¹⁰Ndaw ana ma ya ha ba a da zəgama beke ha na, a da daw ba a slam ma beke na təŋga. Ndaw ana ma ya ha ba a da slakama ta sleɗ ma tsakay na, a da mətsey na ta sleɗ ma tsakay təŋga. Neney na har ma matandəroŋ ta me pey 'ar ma ndaw kokwaɗ ana hay.

¹¹Arka i ma nəkada gənaw mekelehe a tsəlawa ha da tsəvay. Dərom aŋga hay tsew andza ma bəzey təɓaŋ, ama a tsey guma na andza zezekw.

¹²Gədaŋ ma gənaw ana hana na tsəfəmey ana na, a key na ka slam dey ŋga. A təkar ɗay a dala, ta ndaw aŋga hay ka namar dəba a gənaw aŋga na tsəfəmey ana, ta mbəlek ma gwuiyza ha yawa a mətsada ma ndeley təŋga na.

¹³A key ɗeɗew hay ɗuhwa hiya, ha kasl ka ma 'hərɗadərawa waw da 'ərlam ma dey ma ndaw hay tabiyaha ka dala.

¹⁴A pətəna ta ndaw ma dala hay ta ɗeɗew aŋga na hay, ma vəlamar slam har ŋga ka key ka slam dey ma gənaw ana. A həladatara bəzay ma taya ka ləmam mey 'ərdey ma gənaw ana, ta vavay mbəlek ma sleɗ ma tsakay ana, ekəɗey ŋga ta dey ka dəba na.

¹⁵Ma vəlamar gədaŋ, ma vəlamar mesəfrey a mey 'ərdey ma gənaw ana hana na, ma ləma ha ta har ana, ha a tsey guma, arka na a slafa me kəɗey ndaw vagay aha, kwa way way me wuɗey ma nar dəba a mey 'ərdey ma gənaw ana hana na kakay ana.

¹⁶A ndaw hay tabiyaha, ka key na bəza hay, ndaw ɗuhwa na hay, ndaw zleley ana hay, ndaw mbarga na hay, ndaw ma wama 'ar ata na hay dakay beke hay na, a da təkatar ɗay ma katar zeheɗ ka har zəmay dakay na ka 'ərdey.

¹⁷Ndaw ana zeheɗ ana ka ŋga dakay na, ɗaɗa a slafa me heɗəkey tek kakay dakay ma haɗəkada tek kakay, haɗaw zeheɗ ma mezəley ma gənaw ana, dakay na, lamba ma mezəley ŋga na na.

¹⁸Neney na, har ma walada tek: ndaw ana ma sərada tek ana na, ka mbəɗadərawa lamba ma gənaw ana, hərway lamba na na andza mezəley ma ndaw, lamba ŋga na na, temere mukwa ta kokurow mukwa kava mukwa.