Read Dagara, Northern Yele-za-pɛr-tib 13 Bible Online

Yele-za-pɛr-tib 13 - Dagara, Northern bible

Yele-za-pɛr-tib 13

¹A Abram tɩ yi n a Eziptɩ lɛb do a Negɛɛvʋ, ʋlɛ nɩ a ʋ pɔw nɩ a ʋ bʋ̃-tɛrɩ za. A Lɔtɩ tɩ páw ʋ na.

²A Abram tɩ kpɛ n naalʋ yaga za. Zaw-bɛrɛ bɛrɛ sob tɩ n'ʋ, ɛ́ mɩ̀ tɩ tɛr salm-pla nɩ salm-zɩɛ yaga.

³Ʋ tɩ yi n a Negɛɛvʋ, ɛ́ cere tɛwr zɩnɛ tɩ ta a Betɛl, a be ʋ na tɩ dãw niwn zɩ̃, a Betɛl nɩ a Aɩ cara pʋɔ a.

⁴A be n'a ʋ tɩ mɛ bàwr-maal-kuur ɛ́ tɩ puori a Naaŋmɩn a be bʋɔl'ʋ kɛ́ “Sore”.

⁵A Lɔtɩ na tɩ páw a Abram a mɩ̀ tɩ tɛr'ɩ píir nɩ bʋʋr nɩ nĩi lãwnɩ pɛnɛ-sɛwr.

⁶A zie bɛ tɩ saalɩ bɛ na lãw kpɩɛr ɛ, bʋ̃ʋ n'ʋ vɛ̃, a bɛ bʋ̃-tɛrɩ tɩ zuo na nɩ bɛ na na lãw kpɩɛr a.

⁷A Abram dʋ̃-cɩ̃ɩnbɛ nɩ a Lɔtɩ dʋ̃-cɩ̃ɩnbɛ wa tɩ ìr'a zɛb taa. A Kanãa tẽw dem nɩ a Perizitɩ mɩnɛ tɩ kpɩɛr'ɩ a tẽw a lɛn daar.

⁸A Abram tɩ yel'ɩ a Lɔtɩ: «Zɛbr, a ta be mãa nɩ fʋ̃ʋ cara pʋɔ ɩ, a ɩ̃ dʋ̃-cɩ̃ɩnbɛ nɩ a fʋ dʋ̃-cɩ̃ɩnbɛ cara pʋɔ ɩ, bʋ̃ʋ n'ʋ vɛ̃, yir-been dem n'ɩ tɩ.

⁹A tẽw za bɛ n'ɩ ŋa a fʋ niŋé ɩ? Ɩ tɩ bʋ́r taa: fʋ̃ʋ wa tu gʋba lowr a, ɩ̃ na tu n dʋrʋ lowr, ɛ́ fʋ̃ʋ wa tu dʋrʋ lowr a, ɩ̃ na tu n gʋba lowr.»

¹⁰A Lɔtɩ tɩ jɩ́r'a nyɛ̃ a Zurdɛ̃ vuo za: kʋ̃ɔnɩ tɩ zɔ na pàw ʋ ʋ za. A Sore na bɛ tɩ sãw a Sodɔm nɩ a Gomɔɔr[25] bɛr sɛr a, a Zurdɛ̃ vuo ʋl za tɩ tɔ a Sowaar tɩ ɩ na mɛ̃ a Sore zaadɛ̃ a. Ʋ tɩ ɩ na mɛ̃ a Nɩl[26] man-gbɛ́r a Eziptɩ tẽw a.

¹¹A Lɔtɩ tɩ kaa na ír a Zurdɛ̃ tɩ̃tal, ɛ́ ìr cen a saa-pɛrɩ́. À à ŋá n'a bɛ tɩ bʋ́r taa.

¹²A Abram tɩ zɩ̃ n a Kanãa tẽw, ɛ́ a Lɔtɩ kpɩɛr pɩɛlɩ a Zurdɛ̃ tɩ̃tal tẽ-bɛrɛ. Ʋ tɩ cen na tɩ maalɩ a ʋ pɛnɛ-sɛwr tɩ tɔ n a Sodɔm.

¹³A Sodɔm tẽw dem bɛ tɩ ɩrɛ vla towtow ɛ, ɛ́ tɩ maalɛ yel-bi-bɛrɛ sãwnɛ nɩ a Sore pʋɔ.

¹⁴A Lɔtɩ na tɩ bɛr a Abram baar'a, a Sore tɩ yel'ɩ a Abram: «Àr a zie ʋl fʋ na be a, ɛ́ jɩ́r a saa-pɛrɩ́-gʋba-lowr nɩ a saa-pɛrɩ́-dʋrʋ-lowr, jɩ́r a saa-pɛrɩ́ nɩ a mʋ̃tɔ̃w-kpɛb-lowr.

¹⁵A tẽw ŋa za fʋ na nyɛ̃ a, ɩ̃ kʋ̀rɛ ʋ nɩ fʋ̃ʋ nɩ a fʋ bʋʋrɛ kɛ́ nyɩ só ʋ kʋralɛ.

¹⁶Ɩ̃ na ɩ n a fʋ bʋʋrɛ bɛ yɛ̀r bɛ tɩ tɛr sɔ́rʋ nɩr za zie ɩ, mɛ̃ a lɛ nɩr na kʋ̃ tʋ̃ɔ́ sɔ́r a tẽsɔw tanɛ a.

¹⁷Ìr cɔlɩ a tẽw, a wogo nɩ a yɛ̀lʋ, bʋ̃ʋ n'ʋ vɛ̃, fʋ̃ʋ n'ʋ ɩ̃ kʋ̀rɛ a tẽw.»

¹⁸A Abram tɩ wa n nɩ a ʋ pɛnɛ-sɛwr wa kpɩɛr'ɩ a Mãbre sɛn tɩɩr na pɩɛlɩ Ebrɔ̃ a pɛr. Ʋ tɩ mɛ n bàwr-maal-kuur a be a Sore ƴãw.