Read Dagara, Northern Yele-za-pɛr-tib 15 Bible Online

Yele-za-pɛr-tib 15 - Dagara, Northern bible

Yele-za-pɛr-tib 15

¹A yele á ŋá pùorí, a Sore tɩ ɩ na a Abram nyɛ̃ ʋ, ʋʋ ƴɛ̀r a ʋ zie à ŋá: «Ta zɔrɛ dɛ̃bɩ̃ɛ ɩ, Abram i! Mãa n'ʋ gùre fʋ, ɛ́ na kʋ̀ b sã-ya-kpɛ̃ɛ.»

²A Abram tɩ sɔw na: «Sore Naaŋmɩn i, bʋnʋ ƴãw n'a fʋ na dɩ tuo kʋ̀rɛ mɛ̃ bom? Ɩ̃ kule na ɛ́ bɛ tɛr bie ɩ, ɛ́ Eliezɛɛr na yi Damasɩ a n'ʋ na so a ɩ̃ yir.»

³Ʋ tɩ yel'a ƴãw pʋɔ: «Fʋ bɛ kʋ̀ m bʋʋrɛ ɩ, ɛ́ a ɩ̃ tõ-tõ-bie kãw n'ʋ na so a ɩ̃ bome.»

⁴Lɛ n'a a Sore lɛb tɩ ƴɛ̀r a ʋ zie à ŋá: «Ʋlɛ bɛ n'ʋ na ɩ a fʋ gbã-dɩrɛ ɩ, a fʋ bʋ̃-dɔwra n'ʋ na ɩ a fʋ gbã-dɩrɛ.»

⁵Ʋ tɩ tɛr'ɩ a Abram yi n yẽw tɩ yel ʋ: «Jɩ́r a salom kaa, ɛ́ sɔ́r a ŋmar-bie bãw a nʋɔr fʋ̃ʋ wa tʋ̃ɔ́ a.» Al pùorí ʋ yel ʋ: «À ŋá n'a a fʋ bʋʋrɛ nãà yãwmɛ sɛw.»

⁶A Abram tɩ sàw na de a Sore, lɛ so a Sore tɩ sàw kʋ̀ ʋ k'ʋʋ ɩ n nɩ-mɩŋa.

⁷Ʋ tɩ yel ʋ na: «Mãa n'ɩ a Sore na ɩ fʋ yi kɛ́ bɛr a Uur na be a Kalde a, k'ɩ̃ɩ wa kʋ̀ b a tẽw ŋa fʋ so ʋ.»

⁸A Abram tɩ sowr'a: «Sore Naaŋmɩn i, ŋmɩŋmɩn n'a ɩ̃ na bãw k'ɩ̃ɩ na so ʋ na?»

⁹A Sore yel ʋ: «Cen tɩ bɔ yome ata na-sɩra, yome ata bʋ-sɩra, yome ata pʋ́ra, ŋmam nɩ naŋmã-pɔl wa kʋ̀ m.»

¹⁰A Abram tɩ wa n nɩ a dʋn á ŋá za wa põ-zɛ̃-taa, ɛ́ vár vár ŋma, bin a bʋ̃-ŋmaarɛ tori taa[29]. Ɛcɛ ʋ bɛ tɩ vár a bʋ̃-pɩgɛ ŋma ɩ.

¹¹Sidume tɩ siw nɩ a bʋ̃-kũuni zu, ɛcɛ a Abram tɩ diw a na bɛr.

¹²A mʋ̃tɔ̃w na wa kpɩɛr a, a Abram tɩ gúr'ɩ kpalɩtam gã. Tɩ̃ɩsɔw-varkpara na ɩrɛ dɛ̃bɩ̃ɛ a tɩ pili na pàw ʋ.

¹³A Sore tɩ yel ʋ na: «Bãwnɩ a vla a fʋ bʋʋrɛ na na ɩ nʋʋrɩ tẽw bɛ na bɛ so a pʋɔ a. Bɛ na ɩ n gbãgbaar a be, ɛ́ bɛ dɔwrɩ bɛ yome kɔbr anaar (400)[30].

¹⁴Ɛcɛ a nɩ-bʋʋrɛ bɛl tome bɛ na tõ a, ɩ̃ na ƴãw bɛ nɩ dɔwrʋ, al pùorí a fʋ bʋʋrɛ yi a be nɩ na-bome yaga[31].

¹⁵Fʋ̃ʋ a, fʋ na cen na tɩ páw a fʋ sãà mɩnɛ nɩ ƴã-ɓaarʋ, fʋ kʋ̃ bãw kpɩɛrʋ a fʋ koru pʋɔ ɛ, ɛ́ bɛ wa tɩ ũù fʋ.

¹⁶A dɔw-lɩɛr-taa gb'a anaar sob daar'a a fʋ bʋʋrɛ na lɛb wa a ka. Bʋ̃ʋ n'ʋ vɛ̃, a Amoritɩ mɩnɛ ɩ-faar cãà bɛ ta a tab zie ɩ̃ na diw bɛ bɛr ɛ.»

¹⁷A mʋ̃tɔ̃w na wa kpɛ baarɩ a zie sɔb ʋ za a, bɛ wa bere na kure dam na ɩrɛ zʋ̀ʋ́r a, nɩ mɔ̃-'lena vũu a tɔl a dʋn na vár ŋma a cara pʋɔ.

¹⁸A ʋlɩ bibir nɛ a, a Sore tɩ maal'ɩ nɩ a Abram wõ-taa. Ʋ tɩ yel ʋ nɩ à ŋá: «A fʋ bʋʋrɛ nɛbɛ ɩ̃ kʋ̀rɛ a tẽw ŋa na yi a Eziptɩ man ɛ́ tɩ tɔ a man-kpɛ̃ɛ a, a Efaratɩ man.

¹⁹A Kenitɩ, a Kenizitɩ, a Kadimonitɩ,

²⁰a Hititɩ, a Perizitɩ, a Erefayitɩ,

²¹a Amoritɩ, a Kanãa tẽw dem, a Gɩrgasitɩ nɩ a Zebizitɩ mɩnɛ tẽw n'ʋ.»