Read Dagara, Northern Yele-za-pɛr-tib 17 Bible Online

Yele-za-pɛr-tib 17 - Dagara, Northern bible

Yele-za-pɛr-tib 17

¹A Abram na wa tɛr yome kʋba for bir a n'a, a Sore ɩ ʋ nyɛ̃ ʋ, ʋʋ yel ʋ: «Mãa n'ɩ a Naaŋmɩn kpɛnʋ-za-sob. Vʋʋrɛ a lɛ ɩ̃ na bɔbr kɛ́ fʋ vʋʋrɛ a, ɛ́ ta tɛr sãwna bɛ yere ɩ.

²Ɩ̃ na ƴãw nɩ a ɩ̃ wõ-taa fʋ̃ʋ nɩ a mãa cará, ɩ̃ na kʋ̀ b'ɩ bʋʋrɛ bɛ yãwmɛ yaga za.»

³A Abram tɩ lo na gbĩ dume gũu tɩ tɔ tẽw, ɛ́ a Naaŋmɩn ƴɛ̀r a ʋ zie à ŋá:

⁴«Mãa a, a ɩ̃ wõ-taa n'ɩ ŋa ɩ̃ na maalɛ nɩ fʋ a: fʋ na lɩɛb'ɩ nɩ-bʋʋr-yaga yaga sãà.

⁵Bɛ kʋ̃ cãà bʋɔlɛ fʋ Abram ɛ, a fʋ yúor na dɩ n Abraham[35]. Bʋ̃ʋ n'ʋ vɛ̃, ɩ̃ na ɩ na fʋ ɩ nɩ-bʋʋr-yaga yaga sãà.

⁶Ɩ̃ na kʋ̀ b'ɩ dɔwfʋ yaga za, ɛ́ a fʋ bʋ̃-dɔwrɩ na lɩɛb'ɩ nɩ-bʋʋrɛ yaga, ɛ́ na-mɩnɛ na yi n a fʋ pʋɔ.

⁷Ɩ̃ na bin nɩ a ɩ̃ wõ-taa mãa nɩ a fʋ̃ʋ cara pʋɔ, ɛ́ a fʋ pùorí, ɩ̃ bin ʋ mãa nɩ a fʋ bʋʋrɛ na dɔwr lɩɛrɛ taa a cara pʋɔ. A wõ-taa ŋa na ɩ kʋralɛ wõ-taa a na ɩ na ɩ̃ ɩ a fʋ Naaŋmɩn nɩ a fʋ bʋʋrɛ Naaŋmɩn a fʋ pùorí.

⁸A tẽw fʋ na kpɩɛr ɩ nʋʋra a, a Kanãa tẽw za, ɩ̃ kʋ̀rɛ ʋ nɩ fʋ̃ʋ nɩ a fʋ bʋʋrɛ. Bɛ na so ʋ nɩ kʋralɛ, ɩ̃ɩ ɩ a bɛ Naaŋmɩn.»

⁹A Naaŋmɩn tɩ cãà na yel a Abraham: «Fʋ̃ʋ nɩ a fʋ bʋʋrɛ na dɔwr lɩɛrɛ taa a, nyɩ na maal'a tɛr a ɩ̃ wõ-taa.

¹⁰A nʋɔr ɩ̃ na ƴãwnɛ kʋ̀rɛ nyɩ, ɛ́ a fɛr kɛ́ fʋ̃ʋ nɩ a fʋ bʋʋrɛ tuur a, ʋlɛ n'ɩ ŋa: a nyɩ dɛbr za yɛɛ na mɩ́ ŋma na.

¹¹A nyɩ yʋɔr-ŋmãafʋ na ɩ n a wõ-taa na be nyɩɩm nɩ a mãa cara pʋɔ a bãwfʋ.

¹²A nyɩ dɛbli mɩ́ wa dɔw maalɩ bibie ani a, bɛ na mɩ́ ŋma n a bɛ yɛɛ, a lɛ bɛ na dɔwr lɩɛrɛ taa ɩ taabɛ a. Lɛ mɩ̀ n'a a gbãgbaar na dɔw a fʋ yir pʋɔ a ƴãw, bɩɩ a bɛl fʋ na dà nɩ-bʋʋr-yoru zie, ɛ́ bɛ bɛ pʋɔ a fʋ bʋʋrɛ pʋɔ a.

¹³A na ɩ à ŋá a, a gbãgbaa na dɔw a fʋ yir pʋɔ a, nɩ a gbãgbaa fʋ na dà a, bɛ mɩ̀ na ŋma n a bɛ yɛɛ. Lɛ n'a a ɩ̃ wõ-taa na ƴãw a nyɩ ƴã-ganɩ́ a na ɩ wõ-taa na be kʋralɛ a.

¹⁴A dɛb ʋl yʋ̀ɔr nãà bɛ wa ŋmãa a, bɛ na ír ʋ na bɛr a ʋ bʋʋrɛ pʋɔ, ʋ na sãw a ɩ̃ wõ-taa bɛr a ƴãw.»

¹⁵Al pùorí, a Naaŋmɩn tɩ yel'ɩ a Abraham: «Ta cãà bʋɔlɛ a fʋ pɔw kɛ́ Saraɩ ɛ. Dɩ̃a na ta a, a ʋ yúor'ɩ Saara[36].

¹⁶Ɩ̃ na maal'ʋ na, ɛ́ ɩ k'ʋ dɔw dɛble kʋ̀ b. Ɩ̃ na maal'ʋ na, ʋʋ na ɩ n nɩ-bʋʋr-yaga mã. Nɩ-bʋʋrɛ bʋʋrɛ na-mɩnɛ na yi n a ʋ bʋʋrɛ pʋɔ.»

¹⁷A Abraham tɩ lo na gbĩ dume gũu tɩ tɔ tẽw ɛ́ la. Bʋ̃ʋ n'ʋ vɛ̃, ʋ tɩ tɩɛr'ɩ ʋ pʋɔ: «Yome kʋba (100) dɛb na tʋ̃ɔ́ na páw bie e? Ɛ́ a Saara nɩ a ʋ yome lɩz'a anaar'ɩ pie na tʋ̃ɔ́ na dɔw bie e?»

¹⁸Lɛ n'a ʋ tɩ yel a Naaŋmɩn: «Sàw a Ɩsɩmayɛl vʋʋrɛ, ɛ́ fʋ jɩ́rɛ ʋ, a na sɛw mɛ̃ na.»

¹⁹Ɛcɛ a Naaŋmɩn tɩ lɛb'a yel: «Lɛ bɛ n'a ɩ! A fʋ pɔw Saara na dɔw nɩ dɛble kʋ̀ b, fʋ por a yúor Ɩzaakɩ[37]. Ɩ̃ na bin nɩ a ɩ̃ wõ-taa mãa nɩ a ʋl nɩ a ʋ bʋʋrɛ cara pʋɔ a ʋ pùorí. Ʋ na ɩ n wõ-taa na be kʋralɛ a.

²⁰A Ɩsɩmayɛl ƴãw a, ɩ̃ wõ n a fʋ zɛlʋ: ɩ̃ na maal'ʋ na, ɩ̃ na kʋ̀ ʋ nɩ dɔwfʋ, ɩ̃ na kʋ̀ ʋ nɩ bʋʋrɛ yaga za. Ʋ na dɔw nɩ na-mɩnɛ pie nɩ ayi, ɩ̃ɩ ɩ ʋ yɛ̀r ɩ nɩ-bʋʋrɛ na ta nɩ-bʋʋrɛ a.

²¹Ɛcɛ a ɩ̃ wõ-taa a, Ɩzaakɩ n'ʋ ɩ̃ na maal'ɩ, a bidɛb a Saara na na dɔw kʋ̀ b vɩɛr à à ŋá tɔ-won a.»

²²A Naaŋmɩn na tɩ ƴɛ̀r'ɩ a Abraham baar'a, ʋ ìr'a do ɛ́ bɛr ʋ.

²³A lɛ n'a a Abraham tɩ de a ʋ bidɛb Ɩsɩmayɛl nɩ a ʋ gbãgbaar za, a bɛl na dɔw a ʋ yir pʋɔ a, nɩ a bɛl ʋ na dà a, a pɛr lɛ k'aa ʋ yir dɛbr za, ŋma a bɛ yɛɛ a ʋlɩ bibir nɛ, mɛ̃ a lɛ a Naaŋmɩn na tɩ yel kʋ̀ ʋ a.

²⁴A Abraham tɩ tɛr'ɩ yome kʋba for bir a lɛn daar ʋ na ŋmãa a yʋ̀ɔr a,

²⁵ɛ́ a ʋ bidɛb Ɩsɩmayɛl tɛr yome pie nɩ ata a lɛn daar ʋ na ŋmãa a yʋ̀ɔr a.

²⁶Bibi-been n'a bɛ tɩ ŋma a Abraham nɩ a ʋ bidɛb Ɩsɩmayɛl yɛɛ,

²⁷lãwnɩ a Abraham yir dɛbr za, a gbãgbaar na dɔw a ʋ yir bɩɩ ʋ na dà nɩ-sãanbɛ zie a.