Read Dagara, Northern Yele-za-pɛr-tib 19 Bible Online

Yele-za-pɛr-tib 19 - Dagara, Northern bible

Yele-za-pɛr-tib 19

¹A malkɩ mɩnɛ ayi tɩ ta n a Sodɔm, a zaanʋɔra. A Lɔtɩ tɩ zɩ̃ n a tẽw dɩ̃dɔr nʋɔr. Ʋ na wa nyɛrɛ bɛ wa báarɛ a, ʋ ìr'a tuori bɛ, tɩ lo gbĩ dume gũu tɩ tɔ tẽw a bɛ niŋé.

²Ʋ tɩ yel'a: «Ɩ̃ zɛlɛ nyɩ na, nyɩ sàw wa a mãa nyɩ tõ-tõ-bie yir. Nyɩ na tɩ pɛ́w nɩ gbɛ́ɛ ɛ́ gã a be ìr. Ɛ́ a biɓaar-pipi a, nyɩ cãà lo a nyɩ sɔ́r.» Ɛcɛ bɛ tɩ sɔw ʋ na: «Aɩ! Tɩ na gã nɩ a laɩ pʋɔ ìr.»

³Ɛcɛ a Lɔtɩ tɩ fɛr bɛ nɩ lɛɛɛ, bɛ tɩ bɩɛ cen tɩ kpɛ a ʋ yir. Ʋ tɩ cɔbr'ɩ dɩb a bɛ ƴãw, sɛ̃ dipɛ̃ na bɛ ƴãw dãbɩl a, bɛ 'wɔb.

⁴Bɛ bɛ tɩ gã sɛr ɛ, ɛ́ a Sodɔm tẽw dem wa ŋmãa jil a yir. Bɛ za tɩ be n be, a pɔ́lɛ́ tɩ lãwnɩ a dɛb-nyamɛ, nɩr bɛ tɩ cɛ ɩ.

⁵Bɛ tɩ bʋɔl'ɩ a Lɔtɩ yel ʋ: «A nɩbɛ na wa a fʋ zie a tɩ̃ɩsɔw ŋa a, nyɩnɛ n'a bɛ be? Ɩ bɛ yi wa tɩ wa gã nɩ bɛ.»

⁶A Lɔtɩ tɩ yi na àr a dɩ̃dɔr zu, ɛ́ pàw a pan a ʋ pùorí

⁷ɛ́ yel bɛ: «Ɩ̃ bá mɩnɛ ɛ, yãayãa n'a ɩ̃ zɛlɛ nyɩ, nyɩ taa maalɛ a yel-faa ŋa ɩ.

⁸Ɩ̃ tɛr'ɩ powli ayi na bɛ páw dɛb sɛr a, ɩ̃ na tɛr bɛ na wa kʋ̀ nyɩ, nyɩ ɩ bɛ lɛ nyɩ na bɔbr a. Ɛcɛ nyɩ taa ɩrɛ a nɩbɛ bɛ ŋa bom kãw za ɩ, bɛ na ɩ a ɩ̃ sãanbɛ a fɛr k'ɩ̃ɩ gùre a ƴãw[39].»

⁹Bɛ tɩ sɔw ʋ na: «Cen taw yi a ka! Fʋ̃ʋ n'ɩ ŋan ɩ nʋʋra, ɛ́ na bãwnɛ yele e! Tɩ na ɩ b'a a kpɛ zuo a bɛl.» Bɛ tɩ dáa nɩ a Lɔtɩ nɩ fãw, ɛ́ taw ta kɛ́ bɛ ŋmɛ a pan kar.

¹⁰Lɛ n'a a malkɩ mɩnɛ ayi tɩ tur a nũu nyɔw a Lɔtɩ vɩr kpɛ n a dĩó a bɛ zie, ɛ́ pàw a pan,

¹¹ɛ́ ɩ a nɩbɛ na be a yir dɩ̃dɔrɩ́ a bɛ zɔ̃w, a pʋrɩ za tɩ tɔ a kpɛ̃ɛ za. Lɛ n'a bɛ tɩ bɔ a kpɛb zie tɩ gù.

¹²A malkɩ mɩnɛ ayi tɩ yel'ɩ a Lɔtɩ: «Fʋ cãà na tɛr a fʋ yir dem a ka a? Dɩɛm bɩɩ bidɛbr bɩɩ pɔwyaar bɩɩ a fʋ nɩr kãw za a? Tɛr bɛ yi n zãá nɩ a tẽw pʋɔ.

¹³Bʋ̃ʋ n'ʋ vɛ̃, tɩ na sãw nɩ a tẽw bɛr. A Sore wõ n a kon-yaga bɛ na kone ƴãwn a tẽw ŋa nɩbɛ a, alɛ so ʋ yel kɛ́ tɩ wa sãw ʋ bɛr.»

¹⁴A Lɔtɩ tɩ cen na tɩ páw a ʋ dɩɛmbɛ, a bɛl nãà wa kul a ʋ pɔwyaar a, yel bɛ: «Nyɩ ìr! Nyɩ yi zaa a tẽw ŋa pʋɔ, a Sore na sãw ʋ na bɛr.» Ɛcɛ bɛ tɩ manɛ k'ʋʋ dɩ̃ɛnɛ na.

¹⁵A zie na wa wɛlɛ a, a malkɩ mɩnɛ tɩ canɛ nɩ a Lɔtɩ yere nɩ: «Ìr! Tɛr a fʋ pɔw nɩ a fʋ pɔwyaar ayi na be a ka a yi n, nyɩ taa wa mab kpiir a tẽw ŋa sãwna zũú ɛ.»

¹⁶A Lɔtɩ tɩ cãà na nɩɩnɛ. A malkɩ mɩnɛ tɩ nyɔw ʋ nɩ a nũú, lãwnɩ a ʋ pɔw nɩ a ʋ pɔwyaar ayi, tɛr yi n a tẽw pʋɔ. Bʋ̃ʋ n'ʋ vɛ̃, a Sore tɩ bɔbr'a k'ʋʋ faa ʋ.

¹⁷Bɛ na wa tɛr bɛ yi n a tẽw pʋɔ baar'a, a malkɩ kãw yel'ɩ a Lɔtɩ: «Zɔ faa a fʋ nyɔ-vʋʋrʋ. Taa ŋmɛlɛ kaar pùor ɛ, taa nɩɩnɛ a vuo ŋa pʋɔ zie kãw ɛ. Zɔ kpɛ a tan pʋɔ, fʋ̃ʋ wa bɔbr kɛ́ fʋ cãà vʋʋrɛ a.»

¹⁸A Lɔtɩ tɩ sɔw na: «Ʋ̃ʋ'hʋ̃ Sore e, a kʋ̃ tʋ̃ɔ́ ɩ.

¹⁹Yel-mɩŋa n'a, fʋ wul mɛ̃ nɩ a fʋ pʋ-pɩɛlʋ, fʋ maalɩ mɛ̃ nɩ yaga za, fʋ na faa a ɩ̃ nyɔ-vʋʋrʋ a. Ɛcɛ ɩ̃ kʋ̃ tʋ̃ɔ́ zɔ kpɛ a tan pʋɔ ɛ́ a faa bɛ páw mɛ̃ ɩ̃ kpi ɛ.

²⁰Fʋ nyɛ̃ nɩ a tẽ-pʋrɩ ŋa a? Ʋ pɩɛl'a man ɩ̃ na tʋ̃ɔ́ zɔ ta a be. Bɛr mɛ̃ ɩ̃ tɩ sɔwlɩ a be, ʋ na ɩ pʋrɩ à ŋá a, ɩ̃ɩ na cãà na vʋʋrɛ.»

²¹A malkɩ tɩ yel ʋ na: «Nyɛ̃, ɩ̃ cãà na sàw lɛb maalɛ fʋ, ɩ̃ bɛ tʋ̀ɔr a tẽw ŋa fʋ na yere a ɩ.

²²Zɔ cen a be fɔ̃w tɩ sɔwlɩ: ɩ̃ kʋ̃ tʋ̃ɔ́ ɩ bom za, fʋ̃ʋ bɛ wa ta a be baar'a ɩ.» Alɛ n'a so bɛ bʋɔlɛ a tẽw ŋa kɛ́ Sowaar[40].

²³A mʋ̃tɔ̃w tɩ pure na a lɛn daar a Lɔtɩ na tɩ ta a Sowaar a.

²⁴A lɛ n'a a Sore tɩ ɩ cirbi nɩ vũu yi a salom zu siw a Sodɔm nɩ a Gomɔɔr zu mɛ̃ saa a.

²⁵Ʋ tɩ dam'ɩ a ten á ŋá nyaw taa, nɩ a nɩbɛ na kpɩɛr a pʋɔ a, nɩ a vuo ʋl za, nɩ a tẽsɔw bʋ̃-buli za.

²⁶A Lɔtɩ pɔw tɩ jɩ́r'a kaa a pùorí ɛ́ lɩɛbɩ nyaarʋ kpul àr.

²⁷A bio daarɩ́ biɓaar-pipi a, a Abraham tɩ ìr'a cen a be ʋ na tɩ àr a Sore niŋé a.

²⁸Ʋ tɩ jɩ́r'ɩ a Sodɔm, a Gomɔɔr nɩ a vuo ʋl za lowr. Ʋ tɩ nyɛ̃ nɩ zʋ̀ʋ́r na yi a tẽw ìre dúor mɛ̃ vũu-kpɛ̃ɛ zʋ̀ʋ́r a.

²⁹A Naaŋmɩn na tɩ sãw a vuo ʋl tẽ-bɛrɛ bɛr a lɛn daar a, ʋ tɩ lɛb'a bãwnɩ a Abraham, ɛ́ faa a Lɔtɩ a yel-faa ŋa pʋɔ.

³⁰A Lɔtɩ tɩ yi n a Sowaar do tɩ kpɩɛr a tan pʋɔ, ʋlɛ nɩ a ʋ pɔwyaar ayi. Bʋ̃ʋ n'ʋ vɛ̃, dɛ̃bɩ̃ɛ tɩ ɩrɛ ʋ na ʋ na na kpɩɛr a Sowaar a. Ʋ tɩ do n nɩ a ʋ pɔwyaar ayi tɩ kpɩɛr'ɩ tãw bɔw pʋɔ.

³¹Bibir kãw, a pɔwya-kpɛ̃ɛ tɩ yel'ɩ a bile: «A tɩ sãà kor'a, ɛ́ dɛb bɛ be a vuo ŋa pʋɔ na kul tɩ mɛ̃ a lɛ a na ɩrɛ a ziir za a ɩ.

³²Wa tɩ ƴãw a tɩ sãà ʋ nyũ divɛ̃ kuoli, ɛ́ tɩ gã nɩ ʋ tʋ̃ɔ́ ɩ ʋ tɛr bʋʋrɛ.»

³³Lɛ n'a bɛ tɩ ɩ a bɛ sãà ʋ nyũ divɛ̃ kuoli a ʋlɩ tɩ̃ɩsɔw nɛ, ɛ́ a pɔwya-kpɛ̃ɛ cen tɩ gã nɩ ʋ. A sãà bɛ tɩ bãwnɩ a ʋ pɔwyaa gaa nɩ a ʋ ìru ɛ.

³⁴A bio daarɩ́, a kpɛ̃ɛ tɩ yel'ɩ a ʋ yɛ-bile: «Nyɛ̃, ɩ̃ zãa gã nɩ nɩ a ɩ̃ sãà a tɩ̃ɩsɔw. Ɩ tɩ ɩ ʋ lɛb nyũ a divɛ̃ kuoli a dɩ̃a tɩ̃ɩsɔw, ɛ́ fʋ cen tɩ gã nɩ ʋ, tɩ tʋ̃ɔ́ ɩ ʋ tɛr bʋʋrɛ.»

³⁵Bɛ tɩ lɛb'a ɩ a bɛ sãà nyũ a divɛ̃ kuoli a ʋlɩ tɩ̃ɩsɔw nɛ. A pɔwya-bile tɩ cen na tɩ gã nɩ ʋ. A sãà bɛ tɩ bãwnɩ a ʋ pɔwyaa gaa nɩ a ʋ ìru ɛ.

³⁶A Lɔtɩ pɔwyaar ayi tɩ tɛr'ɩ a bɛ sãà pʋɔ.

³⁷A kpɛ̃ɛ tɩ dɔw nɩ bidɛble por a yúor Mowab[41]. Ʋlɛ n'ɩ a Mowab tẽw dem na cãà be be a dɩ̃a a, sãàkʋm-kʋra.

³⁸A bile mɩ̀ tɩ dɔw nɩ bidɛble por a yúor Bɛn-Ami[42]. Ʋlɛ n'ɩ a Amɔ̃ tẽw dem na cãà be be a dɩ̃a a sãàkʋm-kʋra.