Read Dagara, Northern Yele-za-pɛr-tib 23 Bible Online

Yele-za-pɛr-tib 23 - Dagara, Northern bible

Yele-za-pɛr-tib 23

¹A Saara yome tɩ ɩ n lɩz'a ayʋɔb nɩ ayopõi (127).

²Kɩrɩyatɩ-Arba n'a ʋ tɩ kpi, a pɛr lɛ k'aa Ebrɔ̃, a Kanãa tẽw. A Abraham tɩ maal'ɩ a ʋ pɔw kuor, kõ ʋ.

³Al pùorí, ʋ tɩ bɛr'ɩ a kũu ɛ́ ìr cen a Hɛtɩ[50] bʋʋrɛ zie tɩ ƴɛ̀r à ŋá:

⁴«Ɩ̃ kpɩɛr'ɩ a nyɩ sɔgɔ mɛ̃ nʋʋra nɩ sãan a. Nyɩ kʋ̀ m kũu ũufʋ zie a nyɩ ka ɩ̃ so ʋ, tʋ̃ɔ́ ɓáw a ɩ̃ kũu tɩ ũù[51].»

⁵A Hɛtɩ bʋʋrɛ tɩ sɔw ʋ na:

⁶«Ɩ̃ sore e, bɛr wõ a tɩ ƴɛ̀rʋ! Naaŋmɩn ɩ na fʋ ɩ nãà a tɩ sɔgɔ. Ũù a fʋ kũu a tɩ bɔw-vla vla za pʋɔ. Tɩ been kãw za bɛ sàwr sɩbr fʋ a ʋ bɔw a fʋ kũu ũufʋ ƴãw ɛ.»

⁷A Abraham tɩ ɩ̀r'a gbĩ dume gũu tɩ tɔ tẽw a Hɛtɩ bʋʋrɛ na kpɩɛr a vuo ŋa a niŋé,

⁸ɛ́ yel bɛ: «Nyɩmɛ wa sɩrɩ sàw k'ɩ̃ɩ ũù a ɩ̃ pɔw a nyɩ zie ka a, nyɩɩm wõ a ɩ̃ ƴɛ̀rʋ ɛ́ zɛlɩ a Sohaar bidɛb Efron ʋ bɛr wõ m.

⁹Ʋ kʋ̀ m a Makɩpela tãw bɔw na ɩ a ʋ sób ɛ́ be a ʋ púo nʋɔr a. Ʋ kʋ̀ m mɛ̃ a lɛ a ʋ daarʋ na ɩ a, a nyɩ niŋé, a bɔw ŋa tʋ̃ɔ́ ɩ a ɩ̃ sób.»

¹⁰A Hititɩ dɔɔ Efron tɩ be n be, zɩ̃ a ʋ tẽ-bi-taabɛ sɔgɔ. Ʋ tɩ sɔw nɩ a Abraham k'aa Hititɩ mɩnɛ za na tɩ wa zɩ̃ a tẽw dɩ̃dɔr nʋɔr a, kɛ́ bɛ tʋ̃ɔ́ wõ a ʋ ƴɛ̀rʋ. Ʋ tɩ yel'a:

¹¹«Aɩ! Ɩ̃ sore e, bɛr wõ a ɩ̃ ƴɛ̀rʋ: ɩ̃ kʋ̀rɛ fʋ nɩ a púo, ɛ́ kʋ̀rɛ fʋ a tãw bɔw na be a pu-pʋɔ a. A ɩ̃ bʋʋrɛ nɩbɛ niŋé n'a ɩ̃ kʋ̀rɛ fʋ, ũù a fʋ kũu a be.»

¹²A Abraham tɩ lɛb'a maal gbĩ dume gũu tɩ tɔ tẽw a tẽw dem niŋé,

¹³al pùorí ʋ ƴɛ̀r a Efron zie, kɛ́ bɛ za tʋ̃ɔ́ wõ a: «Fʋ̃ʋ ʋ, mɩ̀ sàw bɛr wõ m! Ɩ̃ kʋ̀rɛ fʋ nɩ a púo libir, sàw de ʋ a ɩ̃ nũú, ɩ̃ɩ na ũù nɩ a ɩ̃ kũu a be.»

¹⁴A Efron lɛb yel a Abraham:

¹⁵«Ɩ̃ sore e, bɛr wõ a ɩ̃ ƴɛ̀rʋ: tẽsɔw a daarʋ na ɩ salm-pla libie kɔbr anaar a (400), bʋ̃ʋ n'ɩ á ŋá, mãa nɩ fʋ̃ʋ cara pʋɔ? Ũù a fʋ kũu!»

¹⁶A Abraham nɩ a Efron tɩ wõ n taa. Ʋ tɩ sɔr'ɩ a libie nʋɔr a Efron na yel a ʋ tẽ-bi-taabɛ wõ a kʋ̀ ʋ: a tɩ ɩ n salm-pla libie kɔbr anaar (400) mɛ̃ a lɛ a na tɛwr a dàa pʋɔ a.

¹⁷À ŋá n'a a Efron púo na be a Makɩpela, a Mamire saa-pɛrɩ́ a, nɩ a tãw bɔw na be a púo pʋɔ a, nɩ a tɩɩr za na be a púo pʋɔ a

¹⁸tɩ lɩɛbɩ a Abraham sób. A Hititɩ mɩnɛ za na tɩ wa a tẽw dɩ̃dɔr nʋɔr a tɩ dɩ n a dãsɩɛ.

¹⁹A pùorí n'a a Abraham tɩ ũù a ʋ pɔw Saara a Makɩpela púo tãw bɔw pʋɔ na pɩɛlɩ a Mamire a, a pɛr lɛ k'aa Ebrɔ̃, a Kanãa tẽw.

²⁰À à ŋá n'a a Abraham tɩ páw a púo nɩ a tãw bɔw a Hititɩ mɩnɛ zie, k'ʋʋ tʋ̃ɔ́ mɩ́ ũù a ʋ kũuni.