Read Dagara, Northern Yele-za-pɛr-tib 25 Bible Online

Yele-za-pɛr-tib 25 - Dagara, Northern bible

Yele-za-pɛr-tib 25

¹A Abraham tɩ lɛb'a de pɔw kãw na dɩ kɛ́ Ketuura a.

²Ʋ tɩ dɔw nɩ bidɛbr bɛ ŋa kʋ̀ ʋ: Zimiran, Yɔkɩsan, Medan, Madian, Yisɩbakɩ nɩ Suwa.

³Yɔkɩsan tɩ dɔw nɩ Saba nɩ Dedan. A Dedan bʋʋrɛ tɩ n'ɩ a Asuuritɩ mɩnɛ, a Letusitɩ mɩnɛ nɩ a Lewumitɩ mɩnɛ.

⁴A Madian bʋ̃-dɔwrɩ tɩ n'ɩ Eifa, Efɛɛr, Hanɔkɩ, Avida nɩ Ɛlda. A bɛ ŋa za tɩ n'ɩ a Ketuura bʋʋrɛ.

⁵A Abraham tɩ kʋ̀ n a ʋ bʋ̃-tɛrɩ za a Ɩzaakɩ.

⁶Ʋ tɩ kʋ̀ n bome a pɔw-bili bidɛbr, ʋʋ na tɩ cãà vʋʋrɛ a lɛn daar a n'a ʋ ƴãw bɛ ìr cen saa-pɛrɩ́ tẽw kãw, zãá nɩ a ʋ bidɛb Ɩzaakɩ.

⁷A Abraham tɩ tɛr'ɩ yome kɔbr ayi vʋ̃ɔ lɩzɛr ŋmãa anũu (175),

⁸a lɛn daar ʋ na tɩ kpi a. Ʋ tɩ kor'a tɩ kor, ɛ́ dɩ sɛw, ɛ́ pãa bãw kpi cen tɩ páw a ʋ sãà mɩnɛ.

⁹A ʋ bidɛbr Ɩzaakɩ nɩ Ɩsɩmayɛl tɩ ũù ʋ nɩ a Makɩpela tãw bɔw na be a Hititɩ dɔɔ Sohaar bidɛb Efron púo pʋɔ a pʋɔ, tori a Mamire.

¹⁰A Abraham'ʋ tɩ dà a púo ŋa a Hɛtɩ bʋʋrɛ zie[55]. Be n'a bɛ tɩ ũù ʋlɛ nɩ a ʋ pɔw Saara.

¹¹A Abraham kũu pùorí a, Naaŋmɩn tɩ maal'ɩ a ʋ bidɛb Ɩzaakɩ. A Ɩzaakɩ tɩ kpɩɛr'a pɩɛlɩ a Lahaɩ-Ʋrɔɩ bule[56].

¹²Nyɛ̃ a Abraham bidɛb Ɩsɩmayɛl bʋʋrɛ yée. A Ɩsɩmayɛl ɩ n a bie ʋl a Saara tõ-tõ-bi-pɔw Agaar na yi a Eziptɩ tẽw a na tɩ dɔw kʋ̀ a Abraham a.

¹³A Ɩsɩmayɛl bibiir yée n'ɩ á ŋá, mɛ̃ a lɛ bɛ na dɔw tu taa a: Nebayɔtɩ, Kedaar, Adibeyɛl, Mivisam,

¹⁴Misima, Duma, Masa,

¹⁵Hadadɩ, Tema, Yetuur, Nafisɩ, Kedima.

¹⁶A Ɩsɩmayɛl bibiir pie nɩ ayi n'ɩ a bɛ ŋa. Ŋa za mɩ́ tɩ ɩ n dɔwlʋ nɩ-kpɛ̃ɛ. Bɛ tɩ de nɩ a bɛ yée por'ɩ a bɛ ten nɩ a bɛ laɩ.

¹⁷A Ɩsɩmayɛl tɩ tɛr'ɩ yome lɩz'a ayʋɔb'ɩ pie nɩ ayopõi (137) a lɛn daar ʋ na tɩ kpi cen tɩ páw a ʋ sãà mɩnɛ a.

¹⁸A Ɩsɩmayɛl bʋʋrɛ tɩ kpɩɛr'ɩ a vuo ʋl na be a Hawila nɩ a Súùr cara pʋɔ a. A Súùr tẽw tɩ pɩɛl'ɩ a Eziptɩ tẽw ɛ́ lɛb cere Asuur tẽw lowr. À ŋá n'a bɛ tɩ zɩ̃ zãá nɩ a bɛ yɛbr za. ZAKƆB

¹⁹A Ɩzaakɩ yele n'ɩ á ŋá: A Ɩzaakɩ tɩ ɩ n a Abraham bidɛb.

²⁰A ʋ yome lɩz'a ayi daar'a ʋ tɩ kul Erebeka na ɩ Betuwɛl pɔwyaa nɩ Labã yeepuule a. Bɛ za ayi tɩ ɩ n Aram tẽw nɩbɛ na kpɩɛr Mezopotami tẽw Saa-zu a.

²¹Ɛcɛ a Erebeka tɩ ɩ n pɔw-ãan. Lɛ n'a a Ɩzaakɩ tɩ zɛlɩ a Sore a ʋ pɔw ƴãw. A Sore tɩ wõ n a ʋ zɛlʋ, ɛ́ ɩ a Erebeka tɛr pʋɔ.

²²A bibiir tɩ pɔbr'ɩ taa a ʋ púorí, ʋ cɩɩrɩ yel: «Alɛ wa ŋmɛ̃ à ŋá a, bʋnʋ ƴãw n'a ɩ̃ tɛr a pʋɔ?» Ʋ tɩ cen na tɩ sowri a Sore[57].

²³A Sore yel ʋ: «Ten ayi n'a be a fʋ púorí, nɩ-bʋʋrɛ ayi nɛbɛ fʋ na dɔw. A kãw na tɛr'ɩ fãw zuo a kãw, ɛ́ a kpɛ̃ɛ na ɩ n a bile tõ-tõ-bie[58].»

²⁴A ʋ dɔwfʋ daar na wa ta a, bʋnʋ bɛ tɩ ka be ɩ, yɩbr nɛbɛ tɩ be a ʋ púorí.

²⁵A dãw-niwn sob na yi a tɩ ɩ n zɩɛ. Ʋ tɩ ɩ n kɔblʋ tɛwr, mɛ̃ kɔblʋ kparʋ n'ʋ ʋ su a, ɛ́ bɛ tɩ por ʋ Ezawu[59].

²⁶A ʋ yɛb tɩ yi na tu, a ʋ nũu fɩɩrɩ a Ezawu gbɛnacʋ̃ʋn tɛr, bɛ por ʋ Zakɔb[60]. A Ɩzaakɩ tɩ tɛr'ɩ yome lɩz'a ata a bɛ dɔwfʋ daar.

²⁷A dɛbli tɩ baa nɩ nɩbɛ, a Ezawu ɩ nabawl-kara, wɩ̀ɛ pʋɔ nɩr, ɛ́ a Zakɔb ɩ nɩr na bɛ damnɛ a, ɛ́ nɔnɛ a pɛn-sɛw pʋɔ zɩma a.

²⁸A Ɩzaakɩ na tɩ nɔnɛ a wɛ-nɛn a, alɛ n'a so ʋ tɩ nɔnɛ a Ezawu, ɛ́ a Erebeka nɔnɛ a Zakɔb.

²⁹Bibir kãw a Zakɔb na tɩ dʋwr zɛ-kʋ̃ɔ a, a Ezawu tɩ yi n a wɩ̀ɛ pʋɔ wa kpɛ, bàl ʋ za.

³⁰Ʋ tɩ yel'ɩ a Zakɔb: «Ɩ̃ bɛ cãà laar ɛ. Bɛr mɛ̃ ɩ̃ nyũ a zɛ-kʋ̃ɔ-zɩɛ á ŋá, ɩ̃ nyũ a fɔ̃wlɛ.» —Alɛ n'a so bɛ por ʋ Edɔm[61], a pɛr lɛ kɛ́ Dɔɔ-zɩɛ—

³¹A Zakɔb tɩ sɔw na: «Kʋ̀ɔrɩ a fʋ kpɛ̃ɛnʋ kʋ̀ m baarɩ.»

³²A Ezawu yel: «A kɔ̃ na kʋ m'a. Bʋ̃ʋ n'ʋ a ɩ̃ kpɛ̃ɛnʋ ɩrɛ mɛ̃?»

³³A Zakɔb lɛb yel: «Pɔ baarɩ.» Lɛ n'a a Ezawu tɩ pɔ yel k'ʋʋ kʋ̀rɛ ʋ nɩ a kpɛ̃ɛnʋ,

³⁴ɛ́ a Zakɔb kʋ̀ ʋ dipɛ̃ nɩ bɛ̃w-bʋʋrɛ kãw bɛ na bʋɔlɛ a lãtɩɩ a bie zɛ-kʋ̃ɔ. A Ezawu tɩ dɩ na kɛ́ nyũ, ɛ́ ìr tɔl cen. Ʋ tobr bɛ tɩ ka a ʋ kpɛ̃ɛnʋ ƴãw ɛ.