Read Dagara, Northern Yele-za-pɛr-tib 26 Bible Online

Yele-za-pɛr-tib 26 - Dagara, Northern bible

Yele-za-pɛr-tib 26

¹ƖZAAKƖ Kɔ̃ tɩ lo n a tẽw pʋɔ. A bɛ ɩ a ʋl na tɩ lo a Abraham daar a ɩ[62]. A Ɩzaakɩ tɩ ìr'a cen Geraar, a Filisɩtɛ̃ mɩnɛ nãà Abimelɛkɩ zie.

²A Sore tɩ ɩ na a Ɩzaakɩ nyɛ̃ ʋ, ʋʋ yel ʋ: «Taa cere a Eziptɩ ɛ, zɩ̃ a tẽw ʋl ɩ̃ na na wul fʋ a pʋɔ.

³Kpɩɛr a ʋlɩ tẽw nɛ, ɩ̃ na be n a fʋ zie, ɩ̃ɩ na maalɩ fʋ na. Bʋ̃ʋ n'ʋ vɛ̃, fʋ̃ʋ nɩ a fʋ bʋʋrɛ nɛbɛ ɩ̃ na kʋ̀ a ziir á ŋá. Ɛ́ à à ŋá n'a ɩ̃ na tu a nʋɔr ɩ̃ na ƴãw kʋ̀ a fʋ sãà Abraham a.

⁴Ɩ̃ na ɩ n a fʋ bʋʋrɛ bɛ yɛ̀r yãwmɛ mɛ̃ a saa ŋmar-bie a, ɩ̃ɩ na kʋ̀ bɛ nɩ a ziir á ŋá za. Ɩ̃ na maal'ɩ a nɩ-bʋʋrɛ za a bɛ zũú.

⁵Bʋ̃ʋ n'ʋ vɛ̃, a Abraham bɛr'a wõ m, ʋ tu n a lɛ ɩ̃ na yel a, ʋ sàw nɩ a ɩ̃ nɛ-ƴãwnɩ, a ɩ̃ tub nɩ a ɩ̃ wulu.»

⁶A Ɩzaakɩ tɩ zɩ̃ n a Geraar.

⁷A be dem tɩ tɛr'ɩ sowru a ʋ zie càar'ɩ a ʋ pɔw. Ʋ sɔw: «Ɩ̃ yeepuule n'ʋ[63].» Ʋ bɛ mɩ́ tɩ sàw yel k'aa Erebeka ɩ n a ʋ pɔw ɛ. Bʋ̃ʋ n'ʋ vɛ̃, ʋ tɩ zɔrɛ nɩ dɛ̃bɩ̃ɛ a nɩbɛ bɛ ŋa nãà wa kʋ ʋ a ʋ ƴãw a. A Erebeka tɩ sɩrɩ na pɔl.

⁸A Ɩzaakɩ tɩ be n a be a tɩ cɛlɩ. Bibir kãw, a Filisɩtɛ̃ mɩnɛ nãà, Abimelɛkɩ, tɩ jɩ́r'ɩ a tokoro vʋɔr ƴãw nyɛ̃ a Ɩzaakɩ na kʋlmalɛ nɩ a ʋ pɔw Erebeka a.

⁹Ʋ tɩ bʋɔl'ʋ na wa yel ʋ: «A bɛ tɛr à ŋá ɩ, a fʋ pɔw n'ʋ! Bʋ̃ʋ n'ʋ so fʋ yel: “Ɩ̃ yeepuule n'ʋ?”» A Ɩzaakɩ sɔw: «Ɩ̃ yel'ɩ a lɛ, ɩ̃ na zɔrɛ dɛ̃bɩ̃ɛ bɛ nãà wa kʋ m a ʋ ƴãw a.»

¹⁰A Abimelɛkɩ lɛb yel: «Bʋ̃ʋ n'ʋ fʋ ɩ tɩ à à ŋá? Zaa pʋrɩ na cɛ, a ɩ̃ nɩr kãw nãá gã nɩ nɩ a fʋ pɔw, fʋ ɩ tɩ ɩ sãwna dem.»

¹¹A Abimelɛkɩ tɩ kpãa nɩ a ʋ nɩbɛ à ŋá: «Nɩr wa tʋɔr a nɩr ŋa bɩɩ a ʋ pɔw a, ɩ̃ na ƴãw na bɛ kʋ ʋ.»

¹²A Ɩzaakɩ tɩ kɔ na bʋ̀r a tẽw pʋɔ a ʋlɩ yũon nɛ, ɛ́ cɛ̀ gb'aa kʋba (100) dɔwlɩ. A Sore tɩ maal'ʋ na.

¹³A ʋ bʋ̃-tɛrɩ tɩ yãwmɛ na dɔwlɛ, ʋ tɩ kpɛ naalʋ yaga za.

¹⁴Ʋ tɩ tɛr'ɩ píir nɩ bʋʋr nɩ nĩi nɩ tõ-tõ-biir yaga za. A Filisɩtɛ̃ mɩnɛ tɩ nyuur'ɩ nɩ a Ɩzaakɩ.

¹⁵Bɛ tɩ sɩɛb'ɩ a buli za a ʋ sãà Abraham tõ-tõ-biir na tɩ tuw a Abraham na cãà vʋʋrɛ a. Bɛ tɩ sɩɛb'a na nɩ tanɛ.

¹⁶A Abimelɛkɩ tɩ yel'ɩ a Ɩzaakɩ: «Fʋ tɛr'ɩ fãw zuo tɩ ƴɛrɛŋa, ìr a tɩ zie ka!»

¹⁷A Ɩzaakɩ tɩ ìr'ɩ a be tɩ maalɩ a ʋ laɩ a Geraar fʋɔla pʋɔ, kpɩɛr a be.

¹⁸Ʋ tɩ ƴãw na bɛ lɛb yaw a buli bɛ na tuw a ʋ sãà Abraham daar, ʋʋ wa kpi baarɩ a Filisɩtɛ̃ mɩnɛ sɩɛbɩ a. Ʋ tɩ lɛb'a por a a yée a ʋ sãà na tɩ por a a.

¹⁹Bibir kãw, a Ɩzaakɩ tõ-tõ-biir tɩ tuw nɩ bule a fʋɔla pʋɔ páw kʋ̃ɔ na tɛbr yire a.

²⁰A Geraar tẽw dʋ̃-cɩ̃ɩnbɛ tɩ bɔ n a Ɩzaakɩ dʋ̃-cɩ̃ɩnbɛ nɔhaarʋ yel bɛ: «Tɩmɛ so a kʋ̃ɔ á ŋá.» A Ɩzaakɩ tɩ por'ɩ a bule ŋa kɛ́ Esɛkɩ, a pɛr lɛ kɛ́ “Nɔhaarʋ”, bɛ na tɩ bɔ ʋ nɔhaarʋ a ƴãw.

²¹A Ɩzaakɩ tõ-tõ-biir tɩ tuw nɩ bul-yũo, zɛbr lɛb maal be be a ʋ ƴãw. A Ɩzaakɩ tɩ por'ɩ a bule ʋl kɛ́ Sɩtɩna, a pɛr lɛ kɛ́ “Nɔkpɛn”.

²²Ʋ tɩ yi n a be cen tɩ ƴãw bɛ tuw bul-yũo na bɛ wa n zɛbr a. Ʋ tɩ por ʋ nɩ Erehovɔtɩ, a pɛr lɛ kɛ́ “Vuo-gã-na”. Bʋ̃ʋ n'ʋ vɛ̃, ʋ tɩ yere na: «Ƴɛrɛŋa a, a Sore bɛr'ɩ vuo kʋ̀ tɩ kɛ́ tɩ tɛr a a tẽw pʋɔ.»

²³A Ɩzaakɩ tɩ yi n a be cen Bɛɛr-Seva.

²⁴A Sore tɩ ɩ na ʋ nyɛ̃ ʋ a tɩ̃ɩsɔw, ʋʋ yel ʋ: «Mãa n'ɩ a fʋ sãà Abraham Naaŋmɩn. Ta zɔrɛ dɛ̃bɩ̃ɛ ɩ, ɩ̃ be n a fʋ zie. Ɩ̃ na maalɩ fʋ na, ɛ́ ɩ a fʋ bʋʋrɛ bɛ yɛ̀r yãwmɛ yaga, a ɩ̃ tõ-tõ-bie Abraham zũú.»

²⁵A Ɩzaakɩ tɩ mɛ n bàwr-maal-kuur a be, puori a Naaŋmɩn, bʋɔl'ʋ Sore. Ʋ tɩ maal'ɩ a ʋ pɛnɛ-sɛwr a be, ɛ́ a ʋ tõ-tõ-biir tuw bul-yũo.

²⁶A Abimelɛkɩ[64] tɩ yi n a Geraar wa k'ʋʋ wa nyɛ̃ a Ɩzaakɩ, ʋlɛ nɩ a ʋ bá Ahuzatɩ nɩ a ʋ zɛbr-nɩbɛ nɩ-kpɛ̃ɛ Pikol.

²⁷A Ɩzaakɩ tɩ sowri bɛ na: «Bʋnʋ ƴãw n'a nyɩ wa a ɩ̃ nyɛ́b, nyɩɩm na bɛ nɔnɛ mɛ̃ towtow, ɛ́ ír mɛ̃ a nyɩ tẽw pʋɔ a?»

²⁸Bɛ tɩ sɔw ʋ na: «Tɩ nyɛ̃ na k'aa Sore be n a fʋ zie, ɛ́ tɩ́ɛrɩ k'aa fɛr'a kɛ́ wõ-taa be fʋ̃ʋ nɩ a tɩɩm cara pʋɔ, wõ-taa tɩ na na pɔ maalɩ a.

²⁹A na ɩ à ŋá a, pɔ kɛ́ fʋ kʋ̃ ɩ a kpɛ tɩ ɛ tɩ na bɛ dɔwrɩ fʋ a ƴãw. Vla tɛwr'a tɩ tɩ maalɩ a fʋ zie bɛr fʋ fʋ cen nɩ ƴã-ɓaarʋ, fʋ̃ʋ a Sore na maalɩ dɩ̃a a.»

³⁰A Ɩzaakɩ tɩ maal'ɩ cuw a bɛ ƴãw, bɛ dɩ kɛ́ nyũ.

³¹Bɛ tɩ ìr'ɩ a bio daarɩ́ biɓaar-pipi pɔ kʋ̀ taa. A Ɩzaakɩ tɩ bɛr bɛ nɩ sɔ́r, ɛ́ bɛ bɛr taa nɩ ƴã-ɓaarʋ.

³²A ʋlɩ bibir nɛ tɔr za a, a Ɩzaakɩ tõ-tõ-biir tɩ wa na wa manɩ bule kãw bɛ na tuwr a yele kʋ̀ ʋ. Bɛ tɩ yel ʋ na: «Tɩ páw nɩ kʋ̃ɔ.»

³³A Ɩzaakɩ tɩ por'ɩ a bule ʋl kɛ́ Siveya, a pɛr lɛ kɛ́ Pɔb. Alɛ so bɛ cãà bʋɔlɛ a tẽw a dɩ̃a kɛ́ Bɛɛr-Seva, a pɛr lɛ kɛ́ “Pɔb bule[65]”.

³⁴A Ezawu tɩ tɛr'ɩ yome lɩz'a ayi a lɛn daar ʋ na tɩ kul Yehuditɩ na ɩ Hititɩ dɔɔ Beeri pɔwyaa a, nɩ Basɩmatɩ mɩ̀ na ɩ Hititɩ dɔɔ Elon pɔwyaa a.

³⁵Bɛ tɩ ɩ na a Ɩzaakɩ nɩ a Erebeka nyɛ̃ wʋ̀ʋr yaga.