Read Dagara, Northern Yele-za-pɛr-tib 27 Bible Online

Yele-za-pɛr-tib 27 - Dagara, Northern bible

Yele-za-pɛr-tib 27

¹A Ɩzaakɩ tɩ kor'a, a ʋ mimie zɔ̃wnɛ tɩ zɔ̃w, ʋ bɛ cãà nyɛrɛ ɩ. Ʋ tɩ bʋɔl'ɩ a ʋ bidɛb-kpɛ̃ɛ Ezawu yel: «Ɩ̃ bie e!» Ʋ sɔw: «Mãa n'ɩ ŋan.»

²A Ɩzaakɩ lɛb yel: «Fʋ nyɛ̃ a na, ɩ̃ kor'a ɛ́ bɛ bãw a ɩ̃ kũu bibir ɛ.

³De a fʋ bome, a fʋ tam nɩ a fʋ lɔw kpɛ n a wɩ̀ɛ tɩ kʋ wɛ-nɛn wa kʋ̀ m.

⁴Cɔbrɩ a bʋ̃-dɩ-nʋʋr al kãw ɩ̃ na nɔnɛ a wa kʋ̀ m. Ɩ̃ na dɩ na ɛ́ ƴɛ̀r nɔ-vla ƴãw fʋ ɛ́ bãw kpi.»

⁵Zɩ̃ k'aa Erebeka tɩ bɛrɛ na wone a lɛn daar a Ɩzaakɩ na tɩ ƴɛ̀rɛ a ʋ bidɛb Ezawu zie a. A Ezawu na tɩ yi kpɛ a wɩ̀ɛ, k'ʋʋ tɩ bawlɩ kʋ a wɛ-nɛn wa n a,

⁶a Erebeka tɩ yel'ɩ a ʋ bidɛb Zakɔb: «Ɩ̃ wõ n a fʋ sãà yel a Ezawu:

⁷“Wa n wɛ-nɛn wa maal'ɩ bʋ̃-dɩ-nʋ̃ɔ̀ kʋ̀ m ɩ̃ dɩ. Al pùorí, ɩ̃ na ƴɛ̀r'ɩ nɔ-vla ƴãw fʋ a Sore niŋé ɛ́ bãw kpi.”

⁸Ƴɛrɛŋa a, bɛr wõ a ɩ̃ ƴɛ̀rʋ, ɩ̃ bie e, ɛ́ tu a lɛ ɩ̃ na yere kʋ̀rɛ fʋ a.

⁹Cen a dʋn pʋɔ tɩ nyɔw bʋli-vɩɛlɩ ayi wa kʋ̀ m. Ɩ̃ na maal'ɩ nɩ a bʋ̃-dɩ-nʋʋr al kãw a fʋ sãà na nɔnɛ a kʋ̀ ʋ.

¹⁰Fʋ na de a na cen nɩ tɩ kʋ̀ a fʋ sãà, ʋ dɩ, ɛ́ ƴɛ̀r a nɔ-vla ƴãw fʋ, ɛ́ bãw kpi.»

¹¹A Zakɔb tɩ sɔw nɩ a ʋ mã: «A ɩ̃ yɛb Ezawu tɛr'ɩ kɔblʋ, ɛ́ mãa bɛ tɛr kɔblʋ ɛ.

¹²Kapaw, a ɩ̃ sãà na gbaalɩ mɛ̃ na kaa, ɛ́ nyɛ̃ k'ɩ̃ɩ bɛlɛ ʋ na. A lɛ a, a ʋ ŋmɛ-ƴãw n'a ɩ̃ na bɔ kʋ̀ ɩ̃ tʋɔra, a kʋ̃ ɩ a ʋ nɔ-vla ɩ.»

¹³A mã tɩ sɔw na: «A ŋmɛ-ƴãw ŋa, ʋ páw mɛ̃, ɩ̃ bie e. Bɛrɛ wone a lɛ tɛwr ɩ̃ na yere kʋ̀rɛ fʋ a, ɛ́ cen tɩ nyɔw a bʋli wa kʋ̀ m.»

¹⁴A Zakɔb tɩ cen na tɩ nyɔw a bʋli wa n wa kʋ̀ a ʋ mã. Ʋ tɩ de a na maal'ɩ a bʋ̃-dɩ-nʋʋr al kãw a Ɩzaakɩ na nɔnɛ a.

¹⁵Al pùorí, a Erebeka tɩ de nɩ a ʋ bidɛb-kpɛ̃ɛ Ezawu kparɩ, a kpar-vɩɛlɩ vɩɛlɩ zie na tɩ be a ʋ zie a yir a, ʋ tɩ de a na su a ʋ bidɛb-bile Zakɔb.

¹⁶Ʋ tɩ de nɩ a bʋli gamɛ pàw nɩ a Zakɔb nuru nɩ a ʋ nyũu zie ʋl na bɛ tɛr kɔblʋ a,

¹⁷ɛ́ ƴãw ʋ a bʋ̃-dɩ-nʋ̃ɔ̀ nɩ a dipɛ̃ ʋ na cɔbrɩ a, a nũú.

¹⁸A Zakɔb tɩ kpɛ n nɩ a sãà zie tɩ yel: «Ɩ̃ sãà a!» Ʋ sɔw: «Mãa n'ɩ ŋan, ɛcɛ ãa nɩ̃ɛ nɛ b, ɩ̃ bie e?»

¹⁹A Zakɔb sɔw: «Mãa n'ɩ a fʋ bidɛb-kpɛ̃ɛ Ezawu. Ɩ̃ maal'ɩ a lɛ fʋ na yel a. Ìr zɩ̃ 'wɔb a ɩ̃ wɛ-nɛn tʋ̃ɔ́ ƴɛ̀r a fʋ nɔ-vla ƴãw mɛ̃.»

²⁰A Ɩzaakɩ tɩ sowr'a: «Ŋmɩŋmɩn n'a fʋ ɩ páw a nɛn fɔ̃w à ŋá, ɩ̃ bie e?» Ʋ sɔw: «A Sore fʋ Naaŋmɩn n'ʋ taw kʋ̀ m.»

²¹Lɛ n'a a Ɩzaakɩ tɩ yel a Zakɔb: «Taw pɩɛlɩ, ɩ̃ gbaalɩ fʋ kaa nyɛ̃, ɩ̃ bie e, fʋ sɩrɩ na ɩ a ɩ̃ bidɛb Ezawu u?»

²²A Zakɔb tɩ taw na pɩɛlɩ a ʋ sãà Ɩzaakɩ, ʋ gbaal'ʋ kaa, ɛ́ yel: «A kɔkɔr ɩ n Zakɔb kɔkɔr, ɛ́ a nuru al ɩ Ezawu nuru.»

²³Ʋ bɛ tɩ bãw k'aa Zakɔb ʋ ɛ, a ʋ nuru na tɩ ɩ kɔblʋ mɛ̃ a Ezawu dem a ƴãw. Ɛcɛ, ʋ na bɛ tɩ kʋ̀ ʋ a maalʋ sɛr a,

²⁴ʋ lɛb'a maal sowr'ʋ: «Mɛ̃ a ɩ̃ bidɛb Ezawu taa sɩrɩ nɛ b?» A Zakɔb sɔw: «Ʋ̃ʋ, mãa n'ʋ.»

²⁵A Ɩzaakɩ lɛb yel: «Wa bin mɛ̃ a bʋ̃-dɩrɩ, ɩ̃ bie e, ɩ̃ 'wɔb a fʋ wɛ-nɛn ɛ́ ƴɛ̀r a ɩ̃ nɔ-vla ƴãw fʋ.» A Zakɔb tɩ bin nɩ a bʋ̃-dɩrɩ a ʋ sãà, ʋ dɩ, ʋʋ kʋ̀ ʋ divɛ̃ ʋ nyũ.

²⁶Al pùorí a Ɩzaakɩ yel ʋ: «Ɩ̃ bie e, taw ta weri mɛ̃.»

²⁷A Zakɔb tɩ taw na ta nyɔw ʋ weri. A Ɩzaakɩ tɩ wõ n a Zakɔb kparɩ nyũu, ɛ́ ƴɛ̀r a nɔ-vla[66] ƴãw ʋ à ŋá: «Nyɛ̃, a ɩ̃ bidɛb nyũu ɩ na mɛ̃ púo a Sore na maalɩ a nyũu a.

²⁸A Naaŋmɩn, ʋ ɩ a ɓɩɛlʋ lore a fʋ ƴãw, ʋ kʋ̀ b zi-kʋ́ɔrɩ na tɛr pʋɔrʋ a, nɩ ble nɩ divɛ̃ yaga za!

²⁹Ten ten nɩbɛ, bɛ tone kʋ̀rɛ fʋ, ɛ́ nɩ-bʋʋrɛ bʋʋrɛ gbine dume a fʋ niŋé! Dɩ nɩ-kpɛ̃ɛnʋ a fʋ yɛbr zu, ɛ́ bɛ gbine dume a fʋ niŋé! A ŋmɛ-ƴãw, a tuur sob nɛ nãà wa ŋmɩɛr ƴãwn fʋ a, ɛ́ a nɔ-vla tuur sob nɛ nãà wa ƴɛ̀rɛ nɔ-vla ƴãwn fʋ a[67]!»

³⁰A lɛ a Ɩzaakɩ na tɩ ƴɛ̀r a nɔ-vla ƴãw a Zakɔb wa baar'a, ɛ́ a Zakɔb yire a ʋ sãà zie wa báarɛ a, lɛ n'a a Ezawu tɩ yi a nabawlʋ zie wa ta.

³¹Ʋ mɩ̀ tɩ cɔbr'ɩ bʋ̃-dɩ-nʋ̃ɔ̀ wa n a sãà zie wa yel: «Ɩ̃ sãà a, ìr 'wɔb a wɛ-nɛn ɩ̃ na wa n a, al pùorí fʋ ƴɛ̀r a nɔ-vla ƴãw mɛ̃.»

³²A ʋ sãà Ɩzaakɩ tɩ sowr'ʋ na: «Ãa nɛ b?» Ʋ sɔw: «A fʋ bidɛb-kpɛ̃ɛ Ezawu nɛ m.»

³³A tɩ dam'ɩ a Ɩzaakɩ yaga za, a ʋ ƴã-gan za màwr, ʋʋ sowri: «Ɛ́ ãa n'ʋ kpɛ a wɩ̀ɛ tɩ kʋ a wɛ-nɛn wa kʋ̀ m? Ɩ̃ dɩ n bom za, ɛ́ fʋ bãw kpɛ. Ɩ̃ ƴɛ̀r'ɩ a ɩ̃ nɔ-vla ƴãw ʋ, a na tuur ʋ.»

³⁴A Ezawu na tɩ wõ a ʋ sãà ƴɛ̀r-bie a, pʋɔ za tɩ sãw ʋ na, ʋ lɔbr cɛlsɩ. Ʋ tɩ zɛlɩ nɩ a sãà yãayãa yel: «Ɩ̃ sãà a, mɩ̀ ƴɛ̀r nɔ-vla ƴãw mɛ̃!»

³⁵A Ɩzaakɩ sɔw: «A fʋ yɛb wa na wa maalɩ yã de a fʋ nɔ-vla.»

³⁶A Ezawu lɛb yel: «Bɛ na bʋɔlɛ ʋ a Zakɔb[68], a pɛr lɛ kɛ́ nɩ-nɛbrɛ a, al ƴãw n'a ʋ nɛb mɛ̃ a gb'a ayi bɩɩ? Ʋ dãw na faa a ɩ̃ kpɛ̃ɛnʋ, ɛ́ ƴɛrɛŋa ʋ lɛb faa a nɔ-vla ɩ̃ nãà tɩ páw a. Nɔ-vla bɛ lɛb cãà be fʋ na ƴɛ̀r ƴãw mɛ̃ ɩ?»

³⁷A Ɩzaakɩ sɔw ʋ: «Ɩ̃ ɩ na ʋ ɩ a fʋ nɩ-kpɛ̃ɛ, ɛ́ de a yɛbr za kʋ̀ ʋ kɛ́ bɛ ɩ a ʋ tõ-tõ-biir. Ɩ̃ kʋ̀ ʋ nɩ a ble nɩ a divɛ̃. Ɩ̃ kʋ̃ lɛb tʋ̃ɔ́ ɩ bom za kʋ̀ b ɛ, ɩ̃ bidɛb i!»

³⁸A Ezawu tɩ sɔw nɩ a sãà: «Nɔ-vla ƴɛ̀r-been n'ʋ fʋ tɛr bɩɩ? Mɩ̀ ƴɛ̀r nɔ-vla ƴãw mɛ̃ wɛ, ɩ̃ sãà a!», ɛ́ vaa kɔkɔr kone.

³⁹Lɛ n'a a Ɩzaakɩ tɩ yel ʋ: «Fʋ na kpɩɛr'a zãá nɩ a zi-kʋ́ɔrɩ na tɛr pʋɔrʋ a, zãá nɩ a ɓɩɛlʋ na lore a.

⁴⁰A fʋ zɛbr-sɔ-kpɛ̃ɛ n'ʋ na guole fʋ, ɛ́ fʋ na ɩ n a fʋ yɛb tõ-tõ-bie. Ɛcɛ a fʋ yɔb fʋ na na mɩ́ yɔ tɩ sãá ka, ɛ́ tɩ sãá ka a pʋɔ n'a, fʋ na ɩ a fãw ʋ na tɛr a fʋ zu a, a baarɩ.»

⁴¹A Ezawu tɩ hɩ̃ɛn nɩ a Zakɔb a bɛ sãà nɔ-vla ʋ na tɩ páw a ƴãw. A Ezawu tɩ tɩɛr'ɩ ʋ pʋɔ: «A ɩ̃ sãà kʋ̃ yaa kɛ́ kpi ɛ, a lɛn daar a, ɩ̃ na kʋ n a ɩ̃ yɛb Zakɔb.»

⁴²A Erebeka na wa wõ a lɛ a ʋ bidɛb-kpɛ̃ɛ Ezawu na tɩ́ɛrɛ a, ʋ ƴãw na bɛ bʋɔlɩ a ʋ bidɛb-bile Zakɔb kʋ̀ ʋ, ʋ wa yel ʋ: «A fʋ yɛb Ezawu bɔbr'a k'ʋʋ kʋ b yáa a san.

⁴³A na ɩ à ŋá a, ɩ̃ bie e, wõ a ɩ̃ ƴɛ̀rʋ vla. Ìr zɔ cen a ɩ̃ yɛ-dɛb Labã zie, a Haran tẽw.

⁴⁴Tɩ be a ʋ zie blã, ɛ́ gù a fʋ yɛb suur tɩ ɓãá.

⁴⁵A fʋ yɛb bɛ wa cãà tɛr'ɩ fʋ suur a, ʋlɛ wa yiiri a lɛ fʋ na ɩ a kpɛ ʋ a, ɩ̃ na ƴãw na bɛ tɩ tɛr fʋ a be lɛb wa n. Bʋnʋ ƴãw n'a ɩ̃ na wa ìr bibi-been nyɩ za ayi bɔr a ɩ̃ zie?»

⁴⁶A Erebeka tɩ yel'ɩ a Ɩzaakɩ: «A nyɔ-vʋʋrʋ bɛ ɩrɛ mɛ̃ nʋ̃ɔ̀ a ɩ̃ biir-pɔwbɛ na ɩ Hititɩ mɩnɛ a ƴãw ɛ. A Zakɔb mɩ̀ wa kul a tẽw ŋa powle kãw a, bʋnʋ ƴãw n'a ɩ̃ na cãà vʋʋrɛ?»